#كحل_عرب
(احضان باردة )
((( بقلم زينب ماجد )))
الحلقة_٢١
( كيدهن )
گول ..
اجيك عيون ذيب وغيض حية
وغيمة مِروة وهبوب عذيبي أهب
لــِ عريان السيد خلف ||
كامت امي تصيح بكل صوتها وهي حاضنتني وتدعي عليهم وتجر بيدي تكض الدم واني اصرخ بديها ، وعباس كاضته ريحانه عني و مؤيد يصيح : من ورانا اداومين جلبه ، امشية الماي من جواناااااا ، تعرفين التمشي الماي من جوا اهلها شتتسمى ولج نااااااااانة .
وامي كاضتني وتصيح : الله لا يوفقكم ان شاءااااااااالله ، ولكم ايدها راحت ،الحكوووووووووولي يا ناس بتي رااااحت .
هوسة كلش هوسة واني اصرخ .. ما كمت اميز صوت عن صوت من الوجع الحسيت بيه بيدي ، الضربة جانت بعظمة ايدي بحيث احس قنبلة من الوجع مو ايد .
بنص هالهوسة اندفر الباب ودخل مروان دفع مؤيد وتعارك وياه وامي كامت تصيح عليه ، اجا كضاني حتى يكومني ، اني اصيح من ايدي : توجعني ااااخ ايدي ولج يمممممممة
كواغد : خافنه كسر اديتها النذل ، امش بيها للمستشفى بساعة ، ياله ابني .
صاح علي : اني راح احرك السيارة مروان جيبها .
مروان : انعل سلفى سلفاكم قنااااادر ، هكو احد يسوي هجي باخته ، كوا**** .
طبت هدوة وراهم ومروان وامي يمشوني وزهراء اختي ترجع حجابي على راسي ، صعدوني بالسيارة وهدوة تصيح : يمن كسر بديكم ان شاللة خوان لو عدوان ، اويلااااخ ييمه شوف اديتها شوف ، الله يطيكم كون .
عباس كام يدافع وياهن حتى يمنعهم ياخذوني ، عافني مروان واندارله ، دفعه : انت يمتى تصير رجال كلي ، يمتى تتمرجل عباااااس .
غلط عليه ورداه : كو** ابو النسوان مو انت التعلمني المراجل ، اذا ما تنزل من...... بعده ما مخلص حجايته طفر عليه مروان وهو وياه للكاع تولاه بوكسيات ، كلها ركضت تجر بمروان ، يريدون يفكون عباس من اديه ، كوة مؤيد جراه جر من فوكاه .
تفل عليه مروان وصعد السيارة ويا علي وصعدت هدوة وايمان ويا نانة .. طلعوا بوجهم للمستشفى .. بالطريق ايمان حجتلهم القصة وكالتلهم ما يدرون اداوم كلية ، حسبالهم معهد ومن درون تسودنوا عليها .
كض التليفون مروان اتصل على مأمون : الو
مأمون : هلا مروان خير
- وصلت النجف لو بعدك
- باقيلي شوي واوصل ، كول
- انت بيا حق مسجل نانة بدون علم اخوتها مأمون تدري شسوو بيها هسه .
- شسووا ، اذوها ؟ شصاير كلي
- الصاير ماخذها للمستشفى ، هذا الصاير والسبب انت
- شصار كلي ، شكو
- دروا يعني شكلك ، سواية هاي مأمون تسويها بربك
- ياهو الطكاها ، ووين هي هسه ، الجهال وينهم
- الجهال بالبيت غاد وهسه اني وعلي وامي وهي وخالتي ايمان شايلينها للمستشفى .
- جاي .
سداه من عدهم ، ولف السيارة ورجع طريق بغداد ..
طلع مروان بيهم للمستشفى ، خابر سرحان : ها شني
- تونا طبينا المستشفى بعدنا
- لهدرجة طاكينها عوينة ابو اصلهم هالملاعين شجاهم
- بوية سواية ابنك مو شويه مخليها اداوم كلية بدون علم احد وكايله الهم اداوم معهد بس بنات .
- وصلت البيت انه ، هسه امش ليهم واشوفن سالفتهم .
دخلوها المستشفى ، ازدحام ..
ما عاينو الحالة .. لفوها الها بكطن وباندج .. وطلعوها .
خذتها هدوة ابيتها وجابت جهال مأمون ، نومتها على فراش علي ، ما نامت من الوجع ، الوب وتون من ايدها .
اجا مؤيد على سرحان كاله : عمي السلام عليكم
سرحان : وعليكم السلام
- انت راضي بالسواه مأمون ؟ احنا اخوتها ومنعناها من الكلية ، على اي اساس يخليها اداوم بلا علمنا ؟
سرحان : الحك حك الله مأمون ماله حك ، ولا انتم الكم حك بالعملتوه بيها ، تتولون بت يتيمه لا الها حول ولا قوة وانتم اخوتها ابدال ما تكعدون وياها بالعقل وتتفاهمون وتمنعونها بهداي ، هجي تسوون بيها ؟
مؤيد : السويناه قليل ، البت التمشي الماي من حدر اهلها كلشي تسوي عمي ومنا وجاي لا كلية ولا معهد ولا الها دوسة عتبة الباب .. دوام ماكو .
سرحان : انا يابوية مالي حك ادخل هذا شأنكم ، لجن النصيحة مني وانا عمكم وجبيركم ، بهداي ويا خيتكم ، المرة ما تنطك ولو طكت فلت .. بسكم من اخياتكم ذيج حملت الضيم هي وايتامها ليما تزوجت حماها وخلصت من شركم ، وهاي دايرين عليها خوان انتو بوية يو شنهي .
ظل يحاجي ، صف سيارته مأمون وطب وهم على كعدتهم ، دخل للاستقبال : السلام عليكم
ردوا السلام ، هستوة حجه مؤيد عافه واندار طلع من الادوانية وطب للبيت يصيح : نووووسة ، يممممه
طلعتله نوسة : هم زين اجيت يمعود ... شصار بحال المسكينة
- وينها ؟
- بالغرفة
طب لغرفة علي ، هي نايمة وتون ، تقرب من عدها وجهاله تبعوه للغرفة ، حجه : نانة
نانة : من سمعته واني اون كمت ابجي ، وارتفع صوت البجي مالي ، تقرب من عندي وكال : كومي شو كومي ، ياهو الطكج
- ايدي توجعنيييييي مأمون جاي تموتني
كضاها وفتح اللف مالتها واني ابجي لفاها ، واندار لنوسة : براسيتول .. مسكن الم انطيتوها ؟
نوسة : كلشي ما اطوها بس لفو ايدها وجابوها
- دشوفيلي امي بساع ، اذا عدها مسكن .
مشت وهو ظل كاض ايدي واني متجية راسي ع الجرباية وانوح ، ونرجس تسولفله شلون مؤيد و عباس طكوني .. يباوعلها ويرد يباوعلي وساكت ، مد ايده كض كصتي : صخنت يا الله .
جابت نوسة الدوا ، طب سرحان : مأمون بوية عملتك هاي ما تتسولف
صاح مأمون : وعساها لا تتسولف وحق هذا الله لا ما العب بيهم طوبة وانعل ساسهم الخ** كوا**
سرحان : مخلي البت اتداوم بلايا علمهم وتلومهم ، شنهي بوية وين صايرة
- بوية رحمة الوالديك ، شوية انطيني مجال ، بس شوية ، هاج اشربي هاي .
اطاني فاليوم .. خذيته ورجعت راسي وهو كام طلع ..
مشى لبيت حاكم ، دخل مؤيد هستوة طاب : انت ما تستحي على روحك مسوي هيج باختك
- انت اخر واحد يحجي بالمستحى
- افلش وجهك والله ، حيوووووان ... من تحاجيني هيج والقرأن ابتلي بيك
مؤيد : ياهو الحيوااااان ، شو تعال .
كضاه وتلازموا هو وياه ، ركضت ايمان وكواغد والبنات لوى ايد مؤيد وحصرة ويا الحايط وكام يشد على ذارعه ويصرخ ومؤيد يفلت بروحه ويصيح ، نزل عباس يركض يريد يكض مؤيد وكفتله ايمان .
ذب مؤيد من ايده صاحله : تعال تعال
هستوة جاي يحجي عباس شيل سراحية كزاز واشمرها بوجه مأمون وهو يصرخ : ابن الجلب جاي تكو* على اختي ابن ال*****
السراحية اجت بوجه مأمون طاحت بالكاع اطشرت ، هستوة يريد يفز على ضربته وفشاره ما يحس الا علي جاي من ورا ، اطاه دفرة بضلعه وتولوه علي ومأمون
البيت انكلب كلاب عليهم .
طلع مأمون وهو يجر علي ، ويغلط ويهين بيهم ، سرحان واكفلة بالباب ، طب هو وعلي ، حجه سرحان : مو حك هاذ مأمون بوية ، انت جاي تخبط اولها اعلى تاليها ، وين رايد توصل ابني .
مأمون : انعل ساسهم والله السكط جاي يتمرجلون وهم ذرة رجولة ما بفادهم ، واحد تايخ بالعرك والثاني انكس خلق الله باك فلوس ايتام اخته ولغفهن وجاي يحجون بالمراجل .
سرحان : وانت ياهو مالتك بيهم بوووويه ترا ما يصير هجي
مأمون : رحمة الوالديك بوية عوفني من الما يصير ، اني مو غريب وتكلي ما يصير ، ذولة رابي وياهم بفرد فراش انعلهم نعل والله .
- اختهم بوية
- اختيش ويمتى ذولة صاروا اخوة بوية ، روح شوف يمه كواغد تتعارك وياه على ١٥٠ الف للبيت ما يطون، زلم ونسوان تصرف عليهم وتكلي اخوتها ، ما تكعد عني بويه .
طب جوا ، نانة بعدها تون من الوجه ، فات : والله بالله كسرناهم تكسر والقرأن ، سويناهم نسوان .. ارتاحي .
- ايدي موتتني والله راح اموت من الوجع
حجيت وبجيت
- امشي كومي خل اخذج ، نوسة ديري بالج ع الجهال .
كومني بس سرحان ما راضي بتصرفاته .. اني لابسة تنورة وقميص بس نوسة رجعت لفتلي حجابي ، واني عيوني مورمة من البجي .. واكو اثار خفيفة بوجهي من ضربهم .
طلعت وياه بالسيارة ، طلع للحارثية
نزل عند دكتور ، سجل اسمي واجا كعد يمي ، اني متجية راسي للحايط ، ماخذة فاليوم وما نايمة من الوجع ظليت مثل السكرانة من الفاليوم والالم .
كض ايدي : فتحيها
- توجع
- بس شوية
حاولت .. تأذيت ، رجعتها ظل كاض ايدي وجاب ايده الثانية ، كمش ايدي بين اديه وظل يفرك على كيف .. حجيت : راح يخلوني ابطل
- معليج بيهم
- شلون معلية ، مشفتهم شسووا بيه
- مثل ما كملتي بكلوريا تكملين كليتج لا تخافين .
رجعت راسي على كتفة وظليت منتجية عليه واون .. وهو ساكت وكاض بيدي ، صاح السكرتير باسمي .. كام وكال : يلا على كيفج .
طببني للدكتور ، عاينها وتفحصها ، سأل : منو الخيط ايدج
- مضمد مدري دكتور بمستشفى القادسية .
- ما سوولج اشعة
- لا
- تحتاج اشعة واعتقد عدها تمزق بالاربطة ، ميصير هيج هاي زيدوا عليها الالم ما عالجوه شلون يخيطونها بدون فحص واشعة .
كتب ع الراجيته وطلعنا نسوي اشعة لأيدي ، اني انتهيت كوة كمت امشي دخلت لغرفة الأشعة ، سأله الولد : زوجتك ؟
مأمون : لا
- حامل
- لا اختي هي بعدها ما متزوجة .
سحب ايدي وكال : اختي فتحيها حيل
- تأذيني
اجا مأمون تقرب : على كيفج فكيها
ضل يفتح باصابيعي شوي شوي واني اتألم متت ..
كوة فتحتها سوا الاشعة وكعدنا نتتظر لحد ما استلمها رجعنا للدكتور انتظرنا المريض يطلع ودخلنا ، شافها .. جبرها اليه بس روحي راحت على كثر ما توجعت وبجيت لحد ما خلص ، احس متت بعد نا حسيت على شي .
كتبلي قائمة علاج ورجعني للبيت ،الطريقة كله اني غافية ، وصلني للبيت ندهني ونزلني لغرفة علي وصلاني تلكتني نوسة من اديه ، وامي تسأل : شلونها شكالولك .
ظل يسولف لأمي ويحجيلها اني ما حسيت بعد بسرعة نمت .
اجت كواغد لهدوة : يمه لا اطيحين بين الكترين اخوتها ناوين اعلى شر ، وسرحان لو ادخل ما يتلكه غير الشين ، خلي مأمون يشيل ايده ، واحنا نتكفل البت ما يطكونها .
سمع مأمون كال الها : البيه شر هلا بيه ، خلي يشوفني شره .
تحاجه وياه سرحان كال : بوية اني تكفلتها ما اعوفها لو مو تحجون ، اخوتها صدك ما تحملوها ما شالو عنها ، يدرون شكد مصرفها باليوم ؟ اشترولها هدوم دفعوا فلوس خطها لو فلوس كتبها ، من تكلي اخوتها ومال حق اوكف بوجوهم ، هم موفين خوتهم واحترمهم .. ما يدرون عن البيت شأكل واشرب وجايين يصيرون زلم ويتأمرون ، دوام ما تبطل وجية البيت ما تجي ، هنا بيت اختها تعيش وانعل ابو عيشتهم بعد .
سرحان : مو حجي هاذ بوية ، البت تريدها كول
انتفض مأمون : بويه تحجي صدك انت اريدها شني ، دخيل بختك ، الف مرة كايلك الحجي هاذ لا تكولة ليش تتعمد تغثني بيه .
- جا شنهي وضعك بويه احتارينا وياك ، البت بركبة اخوة زينين شينين جا احنا شنسوي هاذ حظها .
- حظها شني انعل ساسهم والله ، ولحد يسويلي بيها فلم اليكعد يحط بيها انه اشكن حلكة والله ، البنية هاي الها فضل عليه ما اجازي ، اني بعمري محد مسوي علي فضل الحمد لله والشكر متفضل محد متفضل عليه من بعد ابوي طبعا ، بس هالبنية فضلها فوك راسي ، انكر وكفتها لجهالي ؟ يوم الماتت مرتي شلت هم هالزغار شلون يربون بلايا ام .. تاليتها ما حسو بغياب امهم ولا بحنانها .. بوجودها .. جانت واعدة ابن خالتها بزواج ووكفت قسمتها في سبيل تربي جهالي وما تخليهم يحسون بغياب امهم ، انكر فضلها هاذ ؟ لا جذب ما انكره واقل شي اردلها فضلها اتكفل دراستها .. محد يكعدها ولا احد يمنعها على كص ركبتي ، والعندة غير حجي يجيني ويحجي وياي .
طلعت كواغد ردت لمؤيد تكله : هذا حجي مامون وحكه .. البت درست وتعبت ، بيش تحكونها صرفتوا عليها تدرون عنها وتمنعونها
ضل يصيح مؤيد : جديدة هاي مال بيش تحكونها اخوتها احنا نكسر ظهرها ، زين من عدنا مخلينها تدرس ، جاي يدور ورانا مصرف ، تكعد وتسكت لا دراسة ولا صخام ، ماكو طلعة بعد ، شجنينا من الدكتورة حتى نجني من نانة وهندستها .
كواغد : ذاك مأمون وذيج اخيتك ، بيكم زود .. امش ليهم وجيبها ما بياش اروحن بعد ، انا بالف يا علي اعين اجدامي .
نانة : فكيت عيني بالليل .. باوعت حيدوري نايم وياي ع السرسر وهو ابو النفر .. جريت نفسي منه و سحبت تليفوني باوعت بيه ، ٧ مكالمات من الاء وشاهين ، ردت اخابر على الاء ما عندي رصيد .
كمت بس دايخة كلش .. اني الصبح اطلع بلا ريوك
.. اليوم كله ما ماكلة بس العلاج احس ضغطي هبط ، كلش دخت ، طلعت علي ومروان ومأمون كاعدين يباوعون لعبة مال برشلونة .
من طلعت تلاثتهم باوعولي حجه مأمون : ها شلون صرتي ؟
- ايدي وجعها خفيف بس دايخة
مروان : ماماكلة شي غير .. اكليلج لكمة وجهج مصفط
مأمون : جبتلج لفتين كباب يم راسج ما اكلتيهن ؟
- لا
كام جابهن وكال : اكعدي اكليهن
كعدت يمهم واني احاول اكل ، نزلت نرجس من فوك : ليش بعدج ما نايمة .
- باجر ما عدي مدسه
انطيتها للفة البيدي وكعدت تاكلها ومنتجية علية واني متجية راسي ع التخم ، مديت ايدي على شعري احس شي ناقصني من كصاه ، دمعت عيوتي واني اتحسسة ، نرجس يمي تحجي وتسأل هواي : ليش طكج خالو ، ليش كص شعرج ، يطلع بعد .
ظل يباوع مأمون ، وعلي يكلي : اخذج للصالون باجر وكصي كصة حلوة مثل هاي الويا مراد علم دار .. احلالج من الشعر الطويل .
مامون : يلوكلج اصلا
مروان : يجذبون عليج ، خربتي بعد صرتي تلعبين النفس
دفره مامون : الخاييييس هيي شبيك
- الجذب حرام
- والنسوان مو حرام ، شو اسكت واكرمنا بسكوتك
- اخي ليش كل شوية تعايروني بالنسوان ، شكيتوني شك قابل عيب هن غير يموتن واني كلبي رهيف عليهن.
مأمون : دلصم خل نسمع
يداهرون ابتسمت على مداهرهم ، فتح علي علاكة الحلويات مالته دفره مروان : ضامها جوا الكرميدة دطيني لك .
مأمون مد ايده ، حجه : شني نا اشتريتوا ، شظلالي بعد .
مروان : انجب حيوان
علي : مامون طكه عليك العباس وعلي كلساع دافرني .
دفره مأمون اندارله مروان : عود البعير وما اكدرلك غير ازرفك الزرف ومحمد
ظل يضحك مأمون كامله مروان ، صرخ مأمون : بعدين بعدين بس خل تخلص اللعبة .
شمرلي علاوي نستلة انطيتها لنرجس ما مشتهية ، بس التهيت بيهم ونسيت الألم ، ردت اخذ التليفون الفاتورة مال مأمون اتصل بألاء بس شفت الوقت متأخر .. عفت وظليت كاعدة يمهم ، لحد ما غفيت ما ادري بنفسي .
فزيت على علي وهو يجر رجلية حتى ينومني عدل ونرجس تجر بالغطا ، غطوني وكملت نومتي .
لثاني يوم الصبح ، الفجر حسيت على ايد مأمون وهو يحطها على كصتي ، فتحت عيني ، ابتسم : ها يحلوة شلونج اليوم ؟
- لا الالم مال ايدي احسن ، بس ثكيلة كلش اذتني بالنوم
- سهلة ان شاءالله، تكومين وياي نجيب ريوك ، ترفهي شوية .
- مو جمعة شعدك كاعد من الصبح
- متعود على دوامي اكعد من الصبح .. كومي يلا شو .
كمت وياه رحنا بالسيارة جبنا كيمر عرب ورجعت حيدوري كاعد كعدته بحضني مستغرب من ايدي ، الساعة بعدها ب٧ ونص ، هو مزاجه عالي سوا جاي والبيض ، هستوى حط الريوك طلع سرحان من غرفته ، شافني اني وحيدوري كاعدين وهو يحط الريوك كدامنا ، تبسم : كيمر وريحة الصمون تجيب التايه اصباح الخير بوية
- هلا حجي صباح النور كعدت بوكتك ، يلا تعال .
كعدت هدوة ، غسوا وجوهم وكعدوا ويانا ، سرحان يباوع لهدوة ويتبسم ما فهمت شنو نظرته .
كملت ريوكي كام مأمون جاب مي و العلاج وكال : اخذي علاجج اذا ما خذتي بوكته ترا تتأذين ويرجعلج الألم .
سرحان : خير ابو الأكبر ، اشوفنك مهتم يبعد ابوك .
من حجاها سرحان حيل استحيت بس هو ردا بسرعة : اني الضميت عن اهلها واني السبب بحالها هاذ خطية .
للظهر واسمع سرحان يكله : البت زغيرة واربيبتنا ومن طينتنا عليش تخليها تروح للغريب يا بوية خلني اخذنها الك هم انت وفريخاتك يرتاحون وهم هي تفتك من اخوتها وتخلص كليتها احذاك ، واحنا هنا وياكم نعاونكم اعلى هالفر*وخ .
لأول مرة مامون ينطق كلمة : الله كريم يابه ، عوفها هسه خلي البنية تطيب .
اني من سمعت هذا الحجي ..
تهيئلي غير امور
جان كلشي يسوي مأمون اخذه من باب هو رجال غيور وشهم ويحب يساعد خصوصا اني قريبة على اطفاله وحاويتهم فيساعدني ..
بس مساعدته من بعد هاليوم كمت اشوفها بنظرة ثانية
ما ادري اذا مأمون من زمان هيج يهتم بيه
لو اني صرت ادقق اكثر .
واتسأئل هواية
ليش يسوي هيج
ليش دائما يلاطفني وخفيف وياي
يلتجئلي لما يريد يسولف عن شغله
لو عن شي مضوجه
استمعله بدون ملل حتى لو ما جنت افهم الامور اليحجيها .
اصفن هيج .. اكول اني شدا افكر
وشلون اتقبلها ؟
بس الكى نفسي ما ادري .. شي تدريجي اندرج مو بيوم وليلة صار .. اني شوية شوية صار شي مثل حايط جليد ، يذوب وتوضح الصورة اكثر ويصير الامر اقرب .
كل ما تحاول اكول لا وشلون
ارجع انسى الا وشلون والاكي روحي سارحة بافكار بعيدة ...
مر اليوم واليومين ..
اخوتي سكتو ما سمعت منهم خبر ولا ودوا عليه بعد
شاهين يتصل هواي وما ارد ، اجا لبيت سرحان ما طلعتله ، اطمن عليه من هدوة وطلع
ظل يدزلي رسايل غلط ورزايل لإن هيجي دا اسوي ..
ما رديت
اخذلي مأمون اجازة اسبوع من الجامعة بعذر صحي
بقيت عدهم مدللة اكل واشرب وانام
وكل يوم بالليل مأمون وعلي ومروان ينكلون علية اني والجهالب بانواع الحلويات ، مرات افور مي واجيب اكواب واسوي صينية حلويات وحليب وككو حار ونكعد نسولف ونضحك .
خابروا على مأمون .. كالوله التقديم للكلية العسكرية انفتح .. علي جان منتظرها بساع زج اسم علي بين الأسماء بالتقديم .
علي جان حيل فرحان ودائما يشاركني فرحته ويوصفلي ويسولف عن العسكرية وشيسوي لو صار ضابط وشلون السلك العسكري ، كلش اهتمامة بالعسكرية .
مرته العافها بالنجف ، ودت عمامها على سرحان
جان علي حاط حاضرها وغايبها ٥ ب٥ بس ما عاقد محكمة اجو عمامها يطالبونه عشائريا ، اطاهم الفلوس وخذا علي خلاه يطلكها ورجع .
يوم الخميس
جان اكو اجتماع اولياء الأمور ..
ومعلمة نرجس مودية كرت دعوة ..
مأمون كال: الخميس اني اطلع من وكت ، اجي واروح للأجتماع .
لما راد يجي خابرني كالي : بدلي حتى امر عليج نروح اني وياج .
اني هم خابرت ماما كلت الها ، كالتلي: روحي
بدلت وانتظرته ورحنا على مدرسة نرجوسة
جانوا صافين الرحلات قريب من الادارة ، كعدنا اني ومأمون ونجرس بيناتنا نستمع للمدير ... لحد ما خلص المدير حجي .
اخذناها ورحنا على معلمتها اول ما شافتها ، كالت : لا تسألون عن الشطورة ، نرجوسة نار نار .
ظليت احجي وياها واحجيلها عن طريقة التهجي اللي ادرسها بيها .. فرحت حيل من تحاجيني وتناقشني بيها عبالها اني امها .. مأمون واكف ومجتف اديه ما يحجي اندارتله ، وهي تكله : الابو ما يعرف شي ، ماخذها صامت
ابتسم : هو ابوها بس كلشي ما افتهم اني لا مقريها ولا مكتبها
حجت: الضيم كله ع الأمهات
ضحك وهو يكللها : امها بعد .. ويمها هي اعرف .
سحبت ايد نرجس وهي تحجي تحجي بيناتنا ، وهو يجاوبها وفرحان وياها ويضحك .. صعدت وياها بالسيارة حط ايده على متني وهو يكلي : من صدك شكد ما اشكرج ما اوفيج .
- لييش
- لولاج جهاالي ضايعين .. اليوم المعلمة من تحجي بنرجس ومستواها حيل افتخرت بيج .. كفيتي ووفيتي .
- الاسوي ما اقبل تشكرني عليه لإن اني احب جهال خواتي كأنما جهالي اني مخلفتهم ، مو بس نرجس وحيدوري ، جهال الاء ونهاد نفس الشي .. بس ذولة صار اهتمامي بيهم اكثر لإن امهم ماكو .
جاي احجي رن تليفونه قطع كلامي ، طلعه مروة .. كتلة رد .. سوالي اشارة بوجهه بمعنى لا .. ما اريد
عفته .. طلع اغنية شاطر شاطر .. لنرجس
يغني وياها وهي تصفك وتركص وتصيح شاطر شاطر
واني اضحك واغني وياها ..
صفينا اباب البيت مروة واكفة بسيارتها ، من شافتنا بهالوضع ، نزلت .. طفى السيارة وكال : نانة اخذي نرجس وطبوا .
نزلت كضيت ايد نرجس وهو نزل الها ، انداريت وتعمدت اصيحة واسأله : مأمون
باوعلي ، حجيت : اليوم العصر نروح للدكتور على ايدي
- الله كريم ان شاءاللة
ابتسمتله ، طبيت بس ما دخلت للبيت ، ظليت اباوع من ورا الباب واراقبها ، تخصرتله وهي تكله : سويت بيه اللي سويته وعايفني ولاهي ويا هاي .
- شرايدة مروة ، وكفتج على باب بيت ابوي مو حلوة
- اشوفك كتلي تفضلي يا ابن الشيوخ ، مضايفكم واصالتكم ترضى تسوي بيه السويته ، ترضى هيج تعاملني وما ترد عليه ، يا عيني لهسه ما كتلي تفضلي ، مأمون ليش هيجي وياية شسويتلك وشنو قصوري وياك ؟
- روحي هسه وبعدين نحجي
- دا تطردني ؟
- مروة جاي اكلج روحي .. مو وكتها هسه
- شوكت وكتها كولي
- الله كريم بعدين
- العصر انتظرك تجيني
- لا العصر عندي شغل
- شنو شغلك ... نانة ؟ ليش عيني ما عدها اهل مخلفينها وناسينها اهلها حتى انت تاخذها دكتور وتطلب منك
- هالامور ما تخصج كتلج نحجي بعدين
- مأمون اني احبك ليش دا تسوي بيه هيج والله مدا انام الليل عندك بنية ترضى بعد يومين احد يسوي ببنتك مثل الدا تسوي بيه .
- روحي هسه ابوي على جية ما اريدة يشوفج
- انت طالع بنانة كدام الله وخلقة وتستحي ابوك يشوفني
- كافي تقارنين بنانة البنية ما عندي شي وياها ولا وياج ، عوفيني بحالي ، الله ، بلووووة والعباس .
عافها واندار للبيت ، ركضت بساع طبيت للتواليت .
فات جوا .. طلعت اني .. ظلت هي بالباب واكفة ، باوعتلها ، تبجي وتمسح بدموعها ، رادت تصعد السيارة لمحتني اباوعلها من فتحت الباب .. اندارت : اكدر احجي وياج
- لا
سديت الباب دكته فتحته بساع : اذا هو طردج لاحكتني ليش
- شكد تريدين وتعوفين مأمون ؟
- ومنو رايدة مأمون حتى تساوم عليه ، اذا رايدته ورايدج اخذي كدامج .
- لا تبيعين شرف براسي اثنينا بنات ونفهم بعضنا
- المثلي ما تفهم مثلج اعذريني .
- احسن مني ؟
- اقلها ما ذبيت هدومي الداخلية ابيت واحد حتى اخرب بيته ، لو نسيتي .
- وانت شدا تسوين ؟ اللي دا تسوي مو اقل مني بس انت بذكاء .. كسبتي بجهاله ، وخليتي محبس باصبعج .
- ما حاسبتهم جهالة حتى اعتنيله بيهم ذولة ولد اختي اذا تعرفين معنى الاخوة .
- انت اللي تعرفينها من مخلية عينج على رجل اختج .
صفكت الباب بوجهه ، طلع هو : بعدها
ما حجيت عفته ودخلت جوا
غثتني بهالحجاية حيل .
طبت نوسة : خايبة ضوجة وعلي كاتلتني الضوجة
- نوسة ما بية حيل فدوة
- اووي شبيج يا الامشيله يبجي بوجه الله .
- غثتني حيل
- يا هي ؟
- مروة
- شبيها ؟
سولفت الها ، ضحكت : تحبين مأمون نانة ؟
- لا شحبه بس هاية كلش ضوجتني من كالتلي هيج
- ليش تغشمين نفسج .. انت الغيرة واضحة بيج عليه ، واهتمامج بيه واضح
- اني ما جاي اهتم ... هو الدا يهتم واهتمامة ما اعرف افسره ... يييييي اصلا اني شلون جاي افكر هيج .. شلون دا اثبلها على روحي ما ادري
- وشكو ليش متقبليها على روحج
- رجل بطة هذا نوسة
- اكلج الرسول مو زوج بته لعثمان بن عفان وماتت ورجع زوجه بنته الثانية ، بنت الرسول هم ما عدها احساس لو نفسيتها مو زينة حاشى بنات الرسول .. اختج مو بالحياة حتى حاطة عينها على رجلها ونكول نفسيتج .. اختج ماتت من زمان والله ما يحلل شي بيه خله .. وانت اله احسن من غيرج لجهاله .
- ما ادري
- تحبينه
باوعتلها : لو بمكاني تحبينه
- واعشك التراب اليمشي عليه ، دشوفي روحج ياهو الواكفلج غيرة ، حتى عمي سرحان لاماه وما رد بلوم ابوه ووكفلج سيف وسكت اخوتج عنج ..
- مو بس هاية .. انت مدا تحسين اللي اني احس ، اكو تفاصيل يصعب شرحها .. من بعز الشغل يخابر حتى يسألني شلوني بس .. لو طالع ويتصل شمشتهية وشنو على بالج من اصفن الاكيه يكلي شنو المحيرج من احير هو يحل امري ومن امرض هو العلى راسي ومن اطيح بشدة هو الوياي .. تفاصيل بيه هواية لو شما ابعد روحي منا وما اريد افكر بيه اندار الكى روحي اتذكر واتبسم شلون يهتم بيه ، بس انت كليلي اهتمامة هذا شنو عطف لو .....
- لا تنتظرين من مأمون حب نانة ، حبي وهو ما راح يقصر باهتمامة .. بس راح تلكين بمامون اخ ابو سند ظهر بس مو حبيب .
سكتت وظليت افكر ويا روحي
فات النا هو للغرفة : جوعان ما ناوين تصبون
نوسة : عمي ما يجي ؟
مامون : لا ابوي عنده كعدة اليوم بمضيف البو محمد وغاداه غاد .
تغدينا وهو يكلي : انام لل٣ كعديني حتى ابدل واخذج .
نام جوا واني بقيت اباوع الاعادة مال مسلسل قصر الحب .. الخميس ما تبدي بس تنعاد حلقات الاسبوع كلها .. وكاعدين مندمجين اني وياها وهدوة .
كعد الظهر خذاني فتح ايدي ..
والاحد داومت ..
رجعت لكيت هوسة .. حبوبته ردحة ماتت
وانكلبت الدنيا على فاتحتها ابيت سرحان الاول بالطالبية .
امي ويمه كواغد ونسوان هواي من المنطقة التمن وراحن للفاتحة مال ام الشيخ .
شفت مؤيد بالباب ..
حجينا اني وياه وكال : رجعي وداومي بكليتج بس مرة ثانية من اسمع ضامة عنا شي لو ماشية بكيفج العب بيج طوبة
خذاني مؤيد بيده ورجعاني للبيت
جانن بس بنات ستار بالبيت ومرت عباس
زهراء اختي رايحة ويا امي للفاتحة .
بدلت لحيدوري وسألت ميادة : شمسوين غدا ؟
- ما سويت هو ياهو الاكو واسوي
- مؤيد واني والجهال والبنات ، كلنا ماكو
- اي كل واحد يدبر روحة
هزيت ايدي ووكفت ع السريع اسوي تمن احمر ، نرجس جوعانة لحكتني من بيت هدوة ما ماكلة .. اطيتها فلوس ركضت جابت روبة واجت صبيت وكعدت اني وياها ومؤيد ناكل .
......
الاء : من راح علاء منا جان زعلان مني .. واني هم ما خابرته بعد ، لإن هو القصر بيه ما قصرت وياه ... ١٠ ايام ورجع قبل موعد نزولة ... متخربط هناك ومتمرض ومنطينة اجازة ونازل .
نازل على بيت اهله .. خابرني هو .. اتعجبت من بعد ال١٠ ايام خابر وسأل ، رديت : الو
- الو هلو الاء
- الجلب العضك كتلناه
- اني مريض
- سلامات شبيك
- كلش تعبان تخربطت هنا ونزلت مجاز ، ما ادري بس كلش مو زين .
- اسم الله الستار ، شصاير وياك
- تعبان حيل
- سودة عليه والله ما ادري عنك
- لا اسم الله عليج ، بس حاس بروحي مو زين
- اجيك
- لا اني الراح اجيكم هنا هوسة وما جاي ارتاح يمكن راح اخلي احمد يجيبني الكم .
- اي تعال هسه احضرلك الغرفة وحتى الحمام .. يلا
سديت الخط من عندة كلبت الغرفة على البطانة ونظفتها وشغلت بيها قرأن وبخور .. وحضرتله ملابسه والخاولي بالحمام .
جابه احمد بس الظاهر متعارك هو ومرته ومتضايق منها واجا عندي ، سكتت ما ضوجته بهالسالفة لو فتحتها ، سبحته بيدي ودخلته بالغرفة ، واحمد انطاني علاجة .
وحضرت جهال بالدوانية حتى اخلي البيت هدوء اله
اجوا عمي وعمتي بالليل عليه نايم ..
راحو ، فرشت لجهالي ونومتهم ورحت نمت يمه ، كلش جان تعبان بالكوة فتح ليدة وخلى راسي على ايده .
ثاني يوم ...
اجا بس عمي .. بس وجهه بيه شي .. صاير شي .
طب يم علاء وكال : عمي لو تسويلي استكان جاي .
عرفته يريد يحجي وياه ..
عفتهم ورحت اسوي الجاي لا تصنتت ولا حطيت اذني .. كلت ياخبر اليوم بفلوس باجر بلاش .
كام علاء وصاح : الاء طلعيلي الدشداشة الجوزية مالتي بسرعة
- وين رايح
- شوية وارجع ، سدي الباب ورانا
- صاير شي
- لا
طلع من البيت هو وابوه وراحو ..
رجع كلش عصبي .. بعدت الجهال عنه واسمعه بالغرفة يخابر امه ويكللها : كح*** انت ملفية ابيتج كح*** .. لا ما انعل والد والديهن فلا اتسمى بسمي .
طبيت اسأله هكو شي ..
يكلي ماكو
سمع بخبر وفاة ام الشيخ سرحان
اخذني العصر ومر على اهله اخذ امه وابوه وطلعنا للفاتحة .. عمتي مغندبة السيف ما يكص وجهه ..
الفضول كتلني كتل غير اريد اعرف شنو السالفة .. ما جاي افتهم ، رجعنا وعلاء هم بات يمي ..
استغربت علاء ليش بس يمي ؟
وشعجب ما يروح لبيت اهله ولمرته؟
غير اعرف شصاير
ثاني يوم هم رحنا للفاتحة ..
ورجعنا بالليل وعلاء هم ظل يمي ، بس رجعت كلش تعبانة لإن فاتحة ضخمة ونسوان التجي تلاجي هواي .. رجعت جنازة كوة وكلت جهالي .. بس جانت باردة كلت لعلاء : راح انوم الجهال يمنا بالغرفة ، باردة انومهم بالأستقبال .
- كاضج اني ، نوميهم شعدي قابل .
فرشت الهم بالكاع نومتهم ومن النعاس نمت يمهم .. وعلاء ظل ع التلفزيون يباوع ومتمدد ع الجرباية الى ان غافي والتلفزيون مفتوح .
ما احس الا علاء مفزوع ويصيح : الاء كوووومي الااااااء
فزيت مفزوعه مث المخبلة واشوف ضوا بالهول مثل ضوا النار وعلاء يصيح : شيلي الجهاااااال البيت جاي يحتررررك .
....
مأمون : بالفاتحة اني ومروة هرتني هري اتصالات ، لحد ما صار الليل ، رديت : انت مسودنه شبيج ما تعرفين اني بفاتحة حبوبتي .
- لازم اشوفك هسه
- جاي تسمعين شدا اكول ؟
- مأمون لازم اشوفك .. ضروري
حجت وبجت
- خير ؟ شكو شصاير
- اشوفك واحجي وياك
- ساعة واجيج
خلصت الشغل البيدي وطلعت لشارع فلسطين نزلت كبال البيت هي متانيتني بالحوش مالتهم ، كالتلي : فوت
- ما اكدر احجي اللي عندج فضيني
طلعتلي الة زغير جهاز ابيض وضعيف .. سألتها : شنو هاي ؟
- جهاز تحليل حمل ....يتبع
☆☆☆☆☆
#زينب_ماجد