#كحل_عرب
(الفوضى)
((( بقلم زينب ماجد )))
الحلقة_60
(تغالب وخديعة )
بَعـَـدْ لـَتـْظِنْ
تحايلني المودّه وليك روحي إتحـِنْ
و بَعـَـدْ لـَتـْظِنْ
تكـَـــاوي امشتتاتي
وبيك بس أصفـِنْ
وأبـَـد لـَتْظـِن
يضوكَ الدمع عيني
ويطفح المجمن
مالازم فرح
كون اليحب مذلول!!
وبشوفة عيونك عاليحبها إتـْمِنْ
(عريان السيد خلف )
الأء: دفعته من عدي و فتحت الباب حتى انزل كض ايدي وكال ( بعلي لو نزلتي اندمج )
- انت شرايد حمزة فدوة كافي ، تعرف ابوي شكد عصبي
- هالحنحوني ابيج ما اعترف بيه بكاله ، خلي اليمنعني من بيته .. يشوف شسوي بيه
- شهالحجي حنحوني شنو ترا واله ما ارضى تحجي على ابوي ، وامشي منا يلا ما اريد
سحبني بقوة ودفعني كدامه : اكعددددي
- ما اريد ، امشي منا يلا
كض حنجي : لا تحجين ويتي بهالأسلوووووب ، احترمي
- وكت ما انت تحترم اني احترم .. ديلا روح
- شلوووون .. لا شو بالله عيدي
- حمززززة روح
- تحترمين وغصبا ما على رااااااسج . خوووش
- لا ادفع حمزة
- تستنكفين ولج ؟
- كافي روح
- ما اروح شتريدين تسوين ؟
درت عنه بحيرة وعيوني غوركن .. ابوي اذا صعد وهو موجود راح تصير مصيبة شلون اني بعناد ابوي وعناد حمزة .. اني الصرت بيناتهم واني الأتذيت الكترين بس يريد يفرض روحه .
حمزة: نزلي سويلي استكان جاي وتعاي خل نكعد هنا
- حمزة كافي !
- سمعتي شكلت لو لا .
- لا ما سمعت .. وراح ادخل وشتريد تسوي سوي
فتحت الباب ودخلت ، دخل هو وراي ، تخبلت كمت ادفع بيه : ولك انت مخبل امشي منا فدووووة كافي
- كلت لج سويلي جاي
- بس اطلع هسه اسوي ، بس اطللللللع
رجع طلع للسطح ، حجيت : ليش دا اسوي هيج ؟
- حتى احسن
- حمزة جاي تكرهني بيك والله
- احترمي نفسج لا والعباس اندمج
- هسه الرايده شنو ؟
- سم كتلج .. جاااي
- بس ظل هنا
- روحي يلا ولو تأخرتي انزل وراج
- ترا بيت بيه كومة بنات شني ما عدك حرمة بيت انت
- وهذا الكاضني .. امشي يلا
انفتحت الباب .. ريحانة بت المرحوم ستار : شجاي تسوون ؟
- فوتي
سحبتها وفتت ، بعدتني : شني الاء ترا عيب وعلي مصعدته على السطح ما سمعتي جدي شجان يحجي مساعة ؟
- واني بكيفي هو خابر وكال اني فوك وصالي ساعة اتعارك وياه وما يفيد .. سريد جاي
- بكيفه يريد جاي ، هسه انه اصيحن عليه حبوبتي
- اسكتي هسه اخلي يروح
-، وعلى اي اساس يصعد على بيتنا ما عده مستحى ؟
- عوفيني ريحانة دخيلج امشي .
عفتها ونزلت سويت جاي ، صعدت لكيت امي صاعدة وتكله : الجاي تسوي عيب ، يعني شرايد مشكلة لو مصيبة .. البيوت الها وانت رجال جبير مو زغير حتى تسوي هالسوالف
- والجاي يسوي عمي وياي شني ، قصده يذلني لو شنو
- الجاي يسوي رد على افعال شنو نسيت شسويت بمؤيد لو تهديدك لسرحان والنا ، كافي .
باوعتلي واشرتلي انزل ، حجه : رايد يفتح وياي صفحة جديدة اكف عنه ، واذا جان اباله يهيني بهاي تصرفاته بالقرأن يشوف مني شي ما يخطر على باله
-دا تهدد
- احسبي اللي تحسبينه .. مالي غرض
حجاها ومشى .. نزل على المخزن مال يمه كواغد ومن المخزن طفر للشارع العام ومشى لسيارته ، اندارتلي امي : شنو هالتصرفات الاء ؟
- ماما والله العظيم صالي ساعة اتعارك وياه يكلي اذا ما ظليتي يمي انزل للبيت
- هذا مو صاحي بنتي ماكو واحد عاقل يسوي هشكل .
- شسويله
- مستعدة تعيشين وياه العمر كله؟
- شلون يعني
- ماما الرجال اهله مراضين بيج واحنا ما راضين بيه .. وهو مدري شلونه يا بنتي لضيعين نفسج
- لا هو زين بس ضاج لإن ابوي عامله هيجي
هزت ايدها ونزلت .. شلت التليفون ، عدلته ومفتحته حتى ما اخابره واحجي وياه لإن تصرفه اليوم كلش بلا معنى ..
دخلت للغرفة نانة واكفة كدام المراية وتركص ... كمشتي ريحانة فزيت : منين طلعتيلي انت .. فززتيني
- دا تسمعين صوت ؟
- اي صوت
- ما سمعتي ابد .. صوت عالي
- لا
ظلت تباوع عليه، حجيت : شبيج ؟
ثاني يوم
اجا سرحان للبيت ، تلكاه مأمون : هلا بيك يابه
- شماله هاذ المسربت ؟
- طالعنا بسالفة جديدة .. متزوج
- وياهي هاي الماخذها
- شمدريني تلكاها وحدة ذابه روحها وراضية على نفسها زواج السر .
- ووينه هو هسه
- فوك مطمور
- ندهه
طلب من علي ينده مروان .. صعد علي كعد مروان و الثاني نزل وهو مغمض بالشورت : ها بوية
- ووجعة تنام بفادك يا بوية ، ولك انت عليش ما تستعدل عليتني بعلي عليتني
- وشسويت بوية
- ياهي هاي الماخذها ؟
- بت حبيتها وخذتها .. ياهو الأله علي راي ويحكمني حر اتزوج كنو احب منو محد اله غرض بيه .
سرحان: انجبببب ولك ، افصم ظهرك وعلي
- وانت دومك تصيح علي اليكول هي بتك مو انا ابنك
- مره صاينتك وحافظتك شقصرت وياك و تحط عليها
- وياهو الكال قصرت ولا اني مقصر وياها بشي بس الله حلل اربعه واني بكيفي
- دكوم هي مسربت .. دذكر الله وصلي واحجي بالدين والشرع .. ناكع بالشرب مالك وتصيح الله حلل.. الله حرم عربدتك هاي شمالك ما تكف
- اهوووو راح نرد لنفس الأسطوانة يا الشرب ويا طلابة الشرب
مأمون : احجي عدل ويا ابوي لا اكسر فجك وعلي
سرحان : اطخ بعكلي اتبرى منك وعلي واذبنك كن العشيرة لخليك فرجة للوادم وعلي .
مروان : استغفرك ربي .. اسمع بوية ما دام انت ومأمون مجتمعين اني محتاج ٢٥ مليون
سرحان : فلس احمر ما تشوف مني
مأمون: شتسوي بيهن ؟
- رايد افتح مشروع جديد
سرحان : وبيك خير انت تفتح مشروع جديد
مأمون : بوية رحمة لوالديك خل نفهم منه
- ولك مسربت هااااذ
- ميخالف .. شنو المشروع
- اني وصاحبي نريد نفتح النا مشروع
- اي وشنو هو
- محل تجارة مستورد
- محل وشريك و ٢٥ مليون .. شلك بيها هاي مروان ؟
- هسه اني محتاجهن تطوني لو لا
- هي مو جكت اصبع وهاك كدامك .. حاليا ما عدي اللي تريدة اصبر عليه .
سرحان : اذا ما اشوف الشغل بعيني واطلع عليه واعرف شنهي مجرياته وشنهي ضوابطه لا تظن اساعدنك بفلس
- الله كريم .
صعد فوك كض التليفون ، خابر على زوجته الثانية ، ما ردت ، كتبلها رسالة ( ابوي وافق ينطيني فلوس الشغل ) خمس دقايق وجاوبت هي : صحيح
- اي بس راد يطلع على الشغل بنفسه
- وشلون يطلع على الشغل يعني
- انت تعرف شغل اخوية شلونه ، ابوك اذا درى اكيد ما راح يرضى
- اي هسه اني كتله محل البسه واخوج عنده محل البسه .. نرهملنا السالفة ونضبطها حتى يطيني الفلوس
- بس ما ، ما .. بعدني مرضيت شلون اثق بيك وانت كلتلي اني ممرتبط وتالي متزوج
- اي يعني اني حاسب نفسي ما متزوج شسوي
- ليش
- بت عمي وابوي شيخ وتعرفين هالأمور
- اي اطلكها
- ما اكدر
- ما تكدر ليش ؟
- شوفي اذا طلكتها ابوي يحطني بالشارع وكتها اخسر الجواي والوراي ، سواها كبلي عمي كريم طلع وهو ماسح ايده بالحايط فلس ما اله.
- ماشي اذا مجبور ممكن اتقبل بس مو تتقربلها
- اكلها اخوان .. لا اكضها ولا تكربني
مشى سرحان لوسن وكاللها : تعاي ليجاي بوية .. شنهو امرج
- عمي شقصوري ويحط علي مرة
- ما عدج كل قصور بس هاذ مروان وهاي سوالفه انا كليلي شنهو الاعملنه وياه .. وذرة الساني طاحت من كثر الحجي وما ينفع
- ادري ما ينفع .. يطلكني ويحطلي بيت اعيشن بيه اني وجهالي
- بيت شنهو التعيشين بيه بوية
- بيت الي
- اسمعي بوية انا زلمه معروف والناس تتصيدلي وانت بنيتي ووياج بشنهو تريدينه ، لجن بت حديثة واحطنج ابيت مفرد ما يجوز .. تكولين رايدة اطلك ، اردنج ابيتي للسماوة وانا كفالج وكفال بزرج .. والكلتي لا عمي واصبر ومالي غرض بيه احطنج فوك راسي وعوينة ابو اليخلي مروان يتعرضلج لو يكربج اكعدي هنا معززة مكرمة .
- عيشة وياه ما اتحمل ، ورجعة ويا عمتي فخرية ما احملنها عمي
- جا لا هاي ولا هاي .. شنهو التريدينه ؟
اكلله يطلع بمرته الخذاها وتظلين انت هنا .
- الي حك عدك مو .. اطيني حكي من ابوي واني اتصرف بيه
- هاي مالت انا اتصرف بيه بوية عيب ، جا انا شنهو موش عمج وحسبة ابوج
- عمي عيشة ويا مروااان ما اعيش
- وانا ما جاي اكللج عيشي .. ابتي مسربت ما تصيرله جارة شسوي .. اكلج تعاي لبيتي غاد لا ، اطردنه لا جاااا شسوي .
سكتت ، ردف هو : عيشة ابيت الوحدج ، لا عدج احد ويكعد وياج و جهالج زغار و الوضع هالتشوفينه تايه ، ساعة جافتين علينا الامريكان تفتيش وساعة وحيد شارد ، والحرامية فوك السطوح و الناس ما تخاف الله تذب اعلى بت **)) ولد ، جا من يعرفون بنيتي كاعدة وحيدها الف عدوة يتربصلج ويتصيدلج ... كدامج بيتين من بيوتي اختاري اليحلالج عمي غيرهن مامش .
كام منها وهي كامت تبجي ، تبعته هدوة وهي دكله : بهداي امس ابنك واليوم انت يسرحان
- البت تريد بيت لوحيدها يهدوووة
- اعرف ما يصير بس لا تلومها الصار وياها مو هين .. الزلمه عزيز يسرحان و الضرة توجع .. وفخرية عاشت عدها وما تنحمل ، هم البت حارت
- مو جاي اكللها اخلي مروان يعزل ابيت .
- وتظل هي ابيت ابوه .. ما ترهم
- وعلي احتاريت ، جاااااااا سوووووي ؟
- ياااا وانا ياهو ماتي وصيح علي
- واليرحم والديج فكيني لروحها واصلة ليجلي .
هدته ومشت
مرت ٣ ايام ..
وسن بعدها تخط بجدمها وتخاف تخطي الخطوة وتهد البيت وتفشل عمها، وحتى لو رادت تطلع ، بعدها نفسه وما طالعة الاربعين وجهالها زغار.. سكتت وهي ما تعرف شتنتظر حتى تقرر .
اتصلت امها كم مرة بمروان بس مروان يرفض من يمه وما يطي الموبايل لوسن .
الاء زعلانة من حمزة وقافلة جهازها كل هالمدة، مر على كواغد وطلب منها تصيح لالاء ، تحججت هي نايمة ، عرفها حجه ..
تأزمت الاوضاع بهذه الفترة بين قوات الأحتلال و الجماعات المسلحة ، خاصة بعد ما امر بول بريمر بغلق صحيفة الحوزة التابعة للتيار الصدري ، فواجه رد من قائد الجماعة بإن يحاربوا الأحتلال بكل ما اوتوا من قوة ، وبعد ما عليهم سكوت ..
خاف جان الضرب و القصف بين فترة وفترة .. قام الحرب ضدهم بشباب عزل ما يملكون إلا اسلحة بسيطة مما ترك صدام حسين في مخازنه واخذها بعد سقوطه .
اشتعل الوضع بمدينة الصدر ( الثورة سابقا ) صار اليطلع بالشارع ما يأمن على نفسه .. الامريكان كامت تلاحك جماعة التيار وتنزيل على كل بيت يخصهم .. اعتقلوا هواي و جرجروا هواي ناس ابرياء بحجة اتباع للمقاومين .
ايام .. حتى مأمون اخذ اجازة و كعد بالبيت على كد ما اللليل يخلص بس مواجهات وقتال دامي ... غير التفجيرات اللي بكل ساعة اطك عليك عبوة او سيارة مفخخة .. والوضع تأزم بكل معنى الكلمة .
من بعد ما مرت ٤ ايام والاء غالقة الجهاز وهو يجي بس يريد يشوفها من الباب وترفض .. انقطع ، لما قطع استفقدته ليش ما مر ؟
فتحت الجهاز خابرت عليه الجهاز خارج نطاق الخدمة ، او مرات مغلق ومرات يرن بس ما يرد
الاء: قلقت عليه هواي وظلت سولتي كاضة التليفون واخابر بيه وكلشي ماكو ... تهسترت .. وين صار معقولة زعلان وما يرد .. لا حمزة ما يسويها ، حتى لو زعلان يرد يرزل يغلط بس مال يضرب الوضعية .. ما عده .
كمت ادزله رسائل ( حمزة اشتاقيتلك )
.. وينك
... انت بخير بس طمني الوضع حيل يخوف شصاير وياك
- حمزة بس طمني
- حمزة اذا زعلان والله اني اسفة .. بس لا تسوي بيه هيج والله ظل بالي عليك
... اذا جنت بخطر الله يحفظك ويحميك من كل شر .
ادز برسايل وماكو رد
محد من اهله عدهم تليفون .. جان غالي ومو كل الناس تجيبه لا هو ولا الدش وينه ووينه الحط ستلايت لو كض موبايل .
احتاريت بيا طريقة اوصل لحمزة واخابره ..
وصلت المرحلة لا اكل ولا اشرب .. كطعت الاكل من كد فكري بيه ، وكل البيبان مسدده الناس خافت الحرب والانفجارات برا مو بمقياس ، بس العده شغل يطلع على باب الله ، بس كل معالم الحياة والفرح اختفت من الشارع العراقي بهذا الوقت .
وكل يوم نسمع هاذا جابوه شهيد
وذاك مات .. وذاك راح بالانفجار .. حتى انفوسنا تعبت
يمه كواغد ما تعول على الله تلكالها فاتحة شهيد تروح تواسي روحها وتذكر مصاب ابنها ، اطب اتلاجي وتكعد تنوح واعلى كثر ما حسها بيه حزن و يكسر باب الكلب ، النسوان بالمنطقة كامن يودن عليهن بكل عزا خاطر تنعيلهن .
نزلت للبيت ، ريحانة كدام المراية مركزة بيها وتباوع بطريقة غريبة ، تركتها مالي خلك الها ، دخلت للمطبخ الساعة ٩ ونص الصبح .. نانة و زهراء بالمدرسة ، والحجية بالمخزن و لالة يمها وامي حاطة طشت الهدوم وتغسل ، صاحت : واخيرا يا امي كعدتي ، طلعي ريوك واتريكي يلا حتى تكومين وياي
- ما اشتهي
كعدت كابلتها على الهدوم اغسل ، عافتهن وكامت ، امي من زمانها تحب الصبح تسمع فيروز لو وحيدة خليل .. واكثرها فيروز .. فعافت الراديو ع الطابوكة وكامت ، طلعت اغنية جديدة لحاتم العراقي (اشوفك وين يمهاجر )
ظليت استمع الها ودموعي تجري ..
لحد ما خلصت وطلعت اخبار كملت الهدوم شريتهن ، ومشيت لأمي : الناس كلها اشترت غسالة بس احنا بعدنا نجرد بدينا
ايمان : اي تدللين الاء خانم هسه اخاليهم يحطولج الغسالة بالباب صدك جذب ، دكومي يا امي لكمتكم كوة مدبرينها تريدين غسالة ، شو ابوج على عكازة و واخوج سكران ما يدري شصار ما صار بالدنيا والثاني متدرين شوكت يطلع شوكت يطب .. الله ينطي ام ستار العايشية بزود هالحصة وراتب الشهيد ستار ،كوة مدبرين بيها عالكوم لحم ، بعد بيش اشتري بكملاتي ؟
- ماما حمزة ما جاي يرد شلون
- لا تهمين بيه ، عوفي
- تعبت والله حتى مالي نفس بكلشي
- عوفج من حمزة ، معرفتي ريحانة ليش ممداومة ؟
- لا ، ليش
- ما اعرف البارحة صيح عليها مؤيد .. وزعلت
- مدري
- امشي كعدي نهاد و لمن الشغل يلا يمه
مشيت لنهاد .. مبتلية بأبنها وتبجي مصخن وما نايم الليل وللفجر يلا نايمة ، خذته منها وعفت فراشها ما شلت رحت حللت الطفل بالهول يم امي ونظفت البيت .
كملت صعدت للغرفة فوك .. لكيت مكالمة لم يرد عليها من حمزة ، طفرت من مكاني ، وخابرت بسرعة .. ما رد
ضجت حيل .. ظليت ادك ادك ادك .. اخر شي سده بوجهي وغلق التليفون
فكرت زعلان .. ظليت ابجي
يعني كل هالمدة زعلان وهان عليه يعوفني بهالوضع ؟ مفكر حتى يرد على رسايلي ويجاوب ، ظليت اكلب بالرسايل فرفحت شلون اني خايفة عليه وادعيله وهو هيجي يسوي بيه ..
بعده التليفون بيدي اتصل ، رديت بساع بس ما حجيت بس اناشغ ، رد هو (الو) سمعني ( ها شبيج )
- ليش تسوي بيه هيج
- اني ؟!! شمسوي
- يعني رسايلي وكل خوفي عليك ما صار بعينك
- يا رسايل توني فتحت التليفون ، شبيج حبيبتي لا تشغلين بالي عليج والقران مشتاقلج
- يعني ما زعلان مني- لا شلون ما زعلان ارد واكسر راسج ، بس هسه بالنجف والله ومشتاقلج حيل بس بعلي ما عدي وكت اعاين روحي
- شتسوي بالنجف
- شغل ، شلونج انت زينه
- زينه بس ليش ما ترد جهازك كل شوية يطيني سالفة شكل مرة يكلي خارج نطاق الخدمة مرة مغلق
- من نكون تحت منطقة يقيدعا الطيران الامريكي الشبكة تختفي وتصير خارج نطاق الخدمة ، ومرات اغلقة حتى لا تنعرف اماكنه
- زين ليش هيجي كاطع
- الو وعلي وكتي ضيك ومالي وكت اكعد اسولف بس ردت اسمع صوتج ، لإن حصرتج طايحة حظ كم مرة اجيت وما طلعتيلي
- اني هم كومة مشتاقتلك
بجيت
- جا هو اليشتاق يبجي ، مو هيج الاء
- مسامحني
- لا كتلج من ارد احاسبج ، بس الاء بلغي اهلج من ارد نتزوج بساع ، حتى لو ارد سالفة اسبوع نتزوج وارجع للنجف
- ليش
- ما ادري هواي من صحباني ماتوا واظن يومي قريب وما رايد اموت وانت بنفسي ، خليني اموتن وانت على ذمتي
- لا تحجي هيج عفيييية
بجيت
ضحك : حبيبتي جا ما كلت هجي حتى ابجيج بس مشتاقلج وعلي ، ورايدج .
- شوكت ترجع
- ما ادري ، ما عدي وكت احجي اكثر مستعجل ديري بالج على نفسج هواي واذا ما خابرت لا يظل بالج ، انا باول فرصة احصلنها انت اول وحدة اخابرج
- لا تغلق تليفونك
- مو ع الضوا ينشنون لازم نطفي مرات .. يلا مع السلامة
-الله وياك ، راح ادعيلك هواية
- بالعباس اموتن عليج
ابتسمت منه وبست التليفون .. سداه
باوعت .. ويا تنهيدة طويله .. برنة جهاز زغير غير حالي من حال الحال ، ياربي يحفظه ويحمي من كل شرب بجاه العباس ابو فاضل .
وسن : اطيني تليفونك
- شتريدين منه
- اخابر امي لو مو حقي .. الارضي مقطوع
- ميخالف انطيج ، بس ميخالف تعوفين الزعل شوية
- والك عين تكلي زعل ؟
- اي الي ليش ما الي ، يعني شسويت
- اي كلي شسويت ؟ ولك لو مهتم بيه و ما مقصر وياي اكول خله يتزوج المهم ما مقصر وياي بشي ، انت من فوك ليجواتقصير بتقصير وتسألني شسويت .. حقك كلشي مسويتلي بس الاذية
-والى متى راح نظل هيج اني وياج
- مو اني الما تحبني ومجبور بيه لو غيرني
-لو ما احبج شعدي مبقيج على ذمتي .. شبيج
- انت المن حرت الها لو الي
- لا تقارنين هيجي .. انتي مرتي ام جهالي وهاي نزوة وكت لو رايدها ومفتخر بيها ما اتزوجها بالسر جا كدام الكل وغصبا ع اليرضى والما يرضى ، بس هيج
- هيج ما هيج اني لعبت روحي منك ومن نزواتك .. اطيني التليفون ، ولا تخاف رسايلك ومخابراتك ما ارد عليهن مو لخاطرك بس ما اريد اقهر بروحي .
طلع التليفون واطاه اهلها .. مشت خابرت امها : الو
- الو يا بنتي وين من اسبوع واني ادك وما احصلج ليش
- ظروفي ما اكدر
- مو قررتي اطلعين وينج
- وجهالي؟
-جيبيهم وياج
- وياهو اليرضى اخذهم وياي
- سالفتج شنو حتى افهم
- سالفتي مليانة ذل وما بيه خير اخطي خطوة وحدة واغير من روحي تعرفين ليش ، لإن عفتيني مكفخة بيد الرايح والراد اكل وينكالي وسم واتجرع الاهانة بكل لكمه اكلها واتعودت عليها لحد ما صرت ما اعرف اشيل روحي .. ادمغت
- الصار جان خارج ارادتي لو ظاله جان اني وياج اتذبحنا .. الله يعلم الظرف الخليتج بيه .. شنو جان
- وبعدها نسيتيني مو
- عيشتج ابيت شيخ احسن من عيشتي ابيت الكاولية اجيبج المن
- رجعتي لشغلج
-، واعرف درب غير هاذ حتى امشي بيه بس هسه الوضع تغير مو مثل اول
- شلون
- بالتسعين طلعنا للخليج اشتغلنا لإن شغل الكاولية نزل والناس طكها الحصار ووين وينه اليحط كاوليه بعرسه ويركص ، بس القريبين من عدي من ابن صدام وهاي ينرادلنا بخت حتى نركص كدامه .. وما حصلناها ، طلعنا للخليج
- والله يا يمه تاريخج مشرف المفروض افتخر بيه
- والهالسبب ما جبتج يمي اعرف العيشة مو سهلة
- ولهساتج كاولية
- لا العمر اله حوبة ومو جسم اول والبس وادك دكة كاولية .. اتزوجت واحد قطري مدة ٥ سنوات درت مرته و طلكني ، عشت بالفلوس الحصلتهن منه لحد ما رديت كبل جم شهر للعراق واخذيتلي شقة هنا
- وين هنا ؟
- بالكرادة
- وعيشتج ينطلع بيها لوووو
- ما اشتغل بت ليل بتي ، اني ركاصة مو بت ليل .. بس جهل الخلاكم ما تفرقون بين الركص والدعارة .. جنت ركاصة وبطلت وحتى حجاب لبست وعايشة عيشة كريمة الحمد لله ورايدتج عدي ، تشيليني وتملين عليه البيت .
- جا خوش ، شوكت اجيج ، بس عمي اذا درى بيه ما يرضى
- يرضى ميرضى شتسويله ، انت جبيرة وهو ما يحكمج
- هاي مال ما يحكمني ما عدنا .. يحكم حتى زلمنه وكلمته ماشية على الجبير و الزغير واني عمي احبنه ما مقصر وياي حتى اكطع وياه لو اقلل منه ، حتى لو جان ابنه مو خوش
- وهسه شنو كوليلي ؟
- ما ادري ادبرها و اكلج
- انتظر منج خبر مو هم تكطعين مرت اللخ
- لا ان شاءالله .
من بعد أسبوع
حمزة ما متصل غير مرتين ، وبالمرتين ع الطاير ويقفل بس يسمع صوت الاء و يسده ، لحد ما رجع وبلغ اهله وكل عمامه ان رايد عرسه هاليومين ..
كالوله : شني متوازي خل تفض هالاوضاع وتدلل بعدهاكال الهم : ما ادري بعد ما تفض اني عايش لو لا ، وكل الرايدة من هالدنيا بس البت الاحبنها تصير على ذمتي وبين ادي .
خافوا من كلمته هاي وكالوله: هاهيه احسب العرس هالأيام .
كاموا عمامة بيها وولد عمه .. ناس تحضرله البطايق وناس تركض على غرفة الاخشاب وناس تصبغ بغرفته وتبيضها .. وتصبغ البيت .
وخواته التهن بتحضيرات العرس .. النضدة الفرشة ، النيشان مال العروس .. كل واحد يشتغل بصوب
هدوة اركبها ما يعننها بعد .. من تروح للدكتور يكللها عدج التهاب بالصابونة مال رجلج .. ويطيها علاج .. وظاله على العلاج وبسبب كعدتها سمنت حيل وصل وزنها فوك ال١٠٠.
سرحان وهدوة رجليها توجعها .. يخبص الدنيا لو سمع بيها طالعة ومتعبة روحها ، ما يرضى .. مرات يضطر يرد من السماوة في سبيل يكابلها لإن تعبانة
لهذا ما تكدر تخدم اهلها وتطلع عنهم باعراسهم ..
وايمان البيت مركب براسها كله ..
ولالة ما تفتهم كلش بسوالف البنات
فالمهمة ظالة النوسة .. رجليها صارت خيوط على كثر ما ماخذة الاء ورادة بيها للسوك .. هي ونهاد .
الاء : حمزة من حجه وياي بالتليفون كال اطيت ٥٠٠ الف لمنتهى اختي حتى تكف وياج النيشان
رحت الصبح اشتريت مكياج وملابس ما يطلعن ب١٥٠ الف ، والباقي اشترن بيه فرشات و نضدة وحصير وملابس .. مو اليه .
حجت وياهن نوسة كالتلهن : العصر هم نمر ؟
منتهى: لا هاهيه جا بعد شظل
- شني شظل سيتات النوم ما اشترينا ولا ملابس طلعة
- حمزة ما يرضى بغير الثوب ، التنورة والبنطرون ما يقبل حتى الجبة يتسودن منها والثواب هي اشترت تلاثه
- ما يرضى شنو .. احنا متغقين ملابس طلعة وتلبس فوكهم عباية ثوب شني
الاء : اي اني كتله ملابسي هاي والبس عليهم عباية كال ما عدي مانع ، المهم كون عباية تلبسين وتتسترين بيها .
منتهى : لا عيني ما يرضى مو بكيفج
نوسة : عوفج من اللبس ، هو كاللها خليت ٥٠٠ بيد منتهى للنيشان
- لا علي العباس اطاني ٥٠٠ نضدة وفرشة ونيشان .. منين اطاني ٥٠٠ للنيشان ، هو كلالي
الاء: ضجت حيل لإن نيشاني يفشل ، واهلي ما عدهم يطوني ، رديت للبيت ابجي ، ونوسة تكلي : لا تهمين صدك جذب اصيرلج هدوم بس لا تبجين عيونج وانت عروس
- جا ما شفتي نيشاني ما بيه جنطة وحدة ، شني والله هو كال ٥٠٠ خليتلج
- الظاهر حاسبها كلها .. لا تهتمين
باوعتها .. والله اهتمت وحقها عروس وفرحة العروس نيشانها ، اصلا البت هدفها من الزواج الهدوم وهوسة العرس اكثر من الرجال مو انوب هيج .
كلت مالي غير ابو الاكبر .. لبست عباتي ورحت لبيت امي ، لكيت امي ومأمون وعلي كاعدين ، صحت :ها خووووتي هاااااا
مأمون : ووجعاه .. ما تصيحين خوتي الا السالفة بيها فلوس من الاخير شرايدة
طكيتها ضحكة وكتله : اي وعلي محتاجة فلوس بس مو الي
- الله جان الفرهود الها ولبنها تحوسم بينها ، هسه صار على دول الجوار
- اي والعباس ، لويله كسرت خاطري عيالها جلاب وحمواتها ذني حياية اشترن نيشان يفشل وكاللها هاهيه وخلن دموعها تكت .. لمولي خل اخذها العصر اشتريلها دورت اللخ
هدوة : ياااع من عاب حالهن كون ..
جيبي جنطتي
مأمون : شكد محتاجة ؟
- خير ومدت ايده اليطلع منه ما ارده
نزل مروان وهو يصيح : ها ام الحواسم شعدج ..
- نزل ابو النسوان تعااال ، ورق يلا
- حتى اني
- اي جا شني وحد ، يلا كلكم ، يمكن اذا صارن هواي اشتري وياهة
مأمون : اي مو اعرفها اذا ما بيها الج ما تحطين ايدج
- وررررق ولا تحجي هواي
بطة : اي والله مأمون ورق خطية
نوسة : خو انت بالاسم اختج انا المبتلية بيها
- ليش يرضى مأمون اخذها سوك والله جان اخذتهة
مأمون : براس السوك تضيعين بعلي .. دكعدي بوي غير نوسة ما ادبرها
- اي ما عدكم غيري دورقوا
مأمون انطى ٧٥ الف و هدوة ١٠٠ .. و مروان حط ورقة .. باوعتله : خايب ابو النسوان كايم تشتغل بالورق
- ديلا فد شوية اخذهن من مأمون
مأمون : جا هي معروفه تعزب براسي دومك
بطة شالت ١٥٠ الف وخلت فوك نيشانها وكالت الها: كلشي بنفسها اشتريلها لا تخليلها شي بنفسها ابد .
- لا توصين ، بنيتي هاي ولو هي خالتي والسالفة مدري شلونها يمه شو خواتج ازغر مني شنييييي
لفيت عباتي وخذيت فليساتي ..
نكزت بطة : مأمون خل اروح وياهن عليك الله على مود اشتري
- والله انفجارات اخاف عليج
نوسة : واني شنيييي شماعة هنا وما تخااااافي
تخصرتله ، كام يضحك بصوت عالي وكال
- جا البسي خل اخذكم اني ، بس الجهال شلون ؟ يلا عود احطهم بسيارتي افرهم على ما تخلصين وارجعلكم
- اليوم بطة ويانا مدللين سيارة تاخذنا وسيارة تودينا ، هسه لو بس تكوم امي جا عمي سرحان ودانا بطيارة،
ظلت تضحك هدوة وتكلها : فلشج كون ام الطلايب
حجه مروان : مأمون اخذ وسن وياك
مأمون : اي خل تكوم ، يلا
وسن : لا ما اريدن الجاهل توة نفاس ما اكدر اعوفنه
مروان : اني وامي هدوة هنا ندير بالنا عليه ، امشي
- مشكور
- بكيفج
بطة : دكومي شبيج ، اشتري شي لروحج
- ما اريدطلعن نوسة والكل .. طلبت من عنده التليفون
اطاها لإن سكتت على قهرها من سالفة زواجه لا رجعت عاركته ولا تصايحت وياه ، حسها بلعت قهرها انكسر خاطره عليها ، اطاها التليفون و كال الها : اذا ضايجة اطلعج
- ما رايدة شي بس اطيني التليفون ، طلع مرتك عود
- انت مرتي
- اطيني مروان مالي خلك سوالفك هاي
- بكيفج .. هاج
خذيت التليفون ورحت كعدت بغرفة عمي وعمتي ، حجيت ويا امي اتفقنا بعرس الاء تجي واني اكون محضرة كل غراضي بلا ما يدرون ، من تطلع الزفة .. نطلع وياها بسيارة .
وامي وافقت وكالت( بيوم العرس احسبيني يمج )
الاء : ظليت ابجي من هيج صار بنيشاني ، خابر علي حمزة كال ( ها شني ما شني الاخبار شتريتوا النيشان )
- ششتريت فضالة السوك ورديت ، كلتلي ٥٠٠ مخليلج يم منتهى .. تالي بس١٥٠ وما لحكت كلشي اشتري بيهن .
- ١٥٠ شني والعباس ٥٠٠
- ماكو هيج اختك تكول ٥٠٠ اطاني نضدة وفرشة ونيشان
- شني هالكلاوات هاي ، النضدة ةالفرشة اطيت لامي ٣٠٠ مو لمنتهى
- هي كالت هيج
كام من مكانه و طب للبيت ، هوسة جهال و زلم ونسوان .. صاح : يممممه وينج
صاحت : هاااا هنا بالمطبخ انا وخواتك تعال
مشالهن : النضدة انا مو مطيج فلوسها ٣٠٠
- شنو الجري شصاير
- منتهى ششتريتوا بالنيشان ؟
- خلصناه كله
- تكول ب١٥٠ مشترين ما يطلعن نص التحتاجهن
- يا خوية صرفت الخمسمية كلها بالعباس
الاء: والله العظيم اشترت بيهن نضدة وملابس الهن مو الي .. اني مشتريت شوية
حمزة : لا تخبلوني .. منتهى لبسي ملابسج خل نروح لبيتهم اشوف النيشان واحسب شمشترين
- يا خوية علي العباس اشترت كامل هاي مبينه من هسه استغفر الله تحرضك علينا
الاء: لا والله مو احرضك ، بعد ما اريدهم عادي اقبل بذني
حمزة: روحي الاء هسه اخابرج
قفل الخط منهم وكال الها : يمه كومي وياي طلعيلي النضدة الاشتريتيها .. مشى جاي يصعد شاف حصران جدد مشتريهن .. وملابس بجاس مشمورة بزاوية على جنطة منتهى .. نزل اندار : الحصران ذني ياهو الاشتراهن
شكرية : انا وصيت اختك تشتريهن واطيتها حكهن
- صعدي
صعد النضدة ما تطلع بيها دوشكين و ٣ بطانيات شرارة واربع مخدات ، اندار : ذن يمه ما بيهن ١٠٠ الف تحجين صدك
-وبعد الغرشة ما اشتريتها
- ادري الفرشة ابيش ٢٠٠ ؟ يمه جاي تلعبين علي ... طلعولي الفلوس الطيتهت الكم كلها .
ظلن يتلاسنن وياه ويكلله الطيتنياهن اشترينا بيهن ، كام يغلط و يصيح ، صعد عمه و هو يحاول يهدي ، عرف النسوان مدورات غلب وكاله : ميخالف عديها
وامه تصيح : بعدها ما جت البيت كلبتك علي يبن بطني الله لا يطيها كون .
- تدعين عليها وانت المفشلتني كدامها ومطلعتني واحد بلا كلمه و غاشها بنيشان فضااااالة .
طلع من البيت عصبي يخابر .. الاء ما ترد
مرة ٢ .. عشرة ما ترد .. كبت عنده ، اشتعل نار شحط السيارة وطلع لبيت حاكم ووكف بالباب ، طلعتله ايمان : ها خالة ؟
- الاء وينها مو جاي اخابر عليها
- خذاها رجل اختها راح يكمللها النيشان لإن ظل ناقص
- رجل اختها ياهو
- مأمون
- ومامون يكمل نيشان مرتي شبيه اني مجدي منه لو ما عدي ، وينهم هم هسه ؟
-راحن السوك الأولى
لحكهن ودار السيارة للسوك بس ما لكاهن والسوك مال نسوان ما يرضاها يطخطخ وياهن ويدور على الاء ، عاف السوك وطلع .
رجعت الاء مشترية كل البالها .. طاير من الفرح
نست ابو التليفون التهت بالمكياج والملابس الجديدة و الغراض ، لل٩ بالليل يلا انتبهت للتليفون ٥٥ مرة متصل .
- صخام الصخمني حمزة كالب الأمة شكو
ايمان : يا مو نسيت اكلج ، اجاج لهنا وضاج من درى مأمون ماخذكم ، وراح وراكم
امي تحجي اني عفت كلشي وصعدت اركض ، سويتله مسكول ما عدي ، اتصل .. يسب هيج من اهلج هيج من عشيرتج هيج من الجابج
- خلصت
- انعل والديج
- ما يحتاج كل هالغلط و الصياح ، هاي بعدنا ما تزوجنا
- بت **** من اطلعين احجي خابري كولي يابه اني راح اروح ظال على عمى عيني ادور وراج بت ****
- هسه دكافي لا اظل تغلط
- هاي عليمن الدكافي ؟
- حمزة شرايد
- رايد اخذ روحج دصطبريلي جاي .... يتبع
☆☆☆☆☆
#زينب_ماجد