#كحل_عرب
(بيت بيوت )
((( بقلم زينب ماجد )))
الحلقة - 4 -
(زواج بالخدعة )
وادعينـي
وداع الامـايـة لـولدها
ثنين اديها مـوزراته
لا تـبرد شـوگها
ولا تگـدر تهده لغلاته
لـِ عريان السيد خلف||🖤
اخترقت الطلقة راس جسام ، اتطشر دم راسه وطاح بين ادين ابوه ميت بس عيونه مفتحه و كأنه تارك شي بهالدنيا غالي وراح مغصوب اعلى موته ... ظلت عيونه مفتحه اعلى عايلته ... و ادين ابوه تحاوطه .
ركضتله راديون وهي تصرخ : جسااااااام ، ميلو اريدن اشون رجلي جسااااااااام
حضنه سلطان و يصيح : جسام بويه ، حاجيني وليدي ، جساااااام رد اعلى ابوك بويييييه ... جسااااام
اخوته التموا و الناس و راديون تجر بيهم وتشيل بروحه وتذبها و هي تصيح :بس خلوني اشوفنه ميلوا جسااااااام ، ولج يممممممممه تعزيت وتصخمت يمممه
: بعدتهم وانا اجرن بيهم وتكربيت يمه و اعاين الوجه ما ينشاف من الدم و عيونه مفتحات
كعدت يمه وانا اكضنه : جسام اكعد جساااام ، المن خليتني جسااااام ... كوووووم جسام كوووم حاجيني
سلطان : ولكم اخيكم ما يرد علي جسام بوية .
جاسم : الزلمة مات بويه ، يا خووووووية
تكابلوا اعليه اخوته و هم يجرون بيه يريدون ينكلونه ، حظنته حيل و حطيته اعلى صدري وانا اصرخ من كل كلبي : ااااااااالله لا يطيكم جتلتووووووووه الله لا يهنيييييييكم ... جسااااام .
بعدوني عنه غصب وشالوه و سلطان الوجه مدمه و يصيح : بويه جسام ، حاجيني ولك بويه
اعكاله طاح من راسه و موش داري بروحه
وانا الطم اعلى راسي ، نسوان السلف التمن علي ،وكامن يلطمن وياي ، و خواته و نسوان ابوه و واخوته طلعن كلهن و الشارع يون كلها تصرخ .
وانا اكللهم : ودوني ليه رجلي بعده عايش ودوووووني ، جسام ما يهدني انا وجهاله ، ما يهدنا .
ما اعرف ياهو الجراني شلون حطوني بسيارة يمتى وصلنا ما اعرف ، الاتضكره ... انا فقدت بالنياح و البجي اعليه .
وصلنا غاد للمستشفى ... ال ثجيل تارسين المستشفى مرة متجيتنه و رجال ينشدهم ( هااا شنهي )
:- ميت
انا من جاوبو هجي ، رجلية ما عانني ، طحت للكاع و كمت اصيح و اطك اعلى الكاع و ادعي اعلى ال ثجيل وابجي .
الخبر واصل لمضيف ابوي ، جاي عمي وازلامنا كلهم .. اول ما دشوا ، تعارك حمدان اخو جسام وي عمامي ... انا فاكده بصياح لجنها صارت هوسه واجو عليه اولاد عمي يصيحون ويكولون ( امشينا )
- ما اهدن جسام ما اهدننننه ، اريدن رجلي الجتلتو بثاراتكممممممم عساكم لا تهنيتوووووو جتلتو رجلي وابو بيتي جتلوووووووو
كومني ابن عمي بنتر و مشاني وانا اجر بروحي بس اريد اوادعنه ، كضني عمي و هو : عشرة وانكطع خيطها افتكي من ال ثجيل و عشرتهم خل يولون .
حمدان : اولاد المرحوم اليوم ابيت ال ثجيل و مالهم مجان ابيت ضاحي الحرامي .
انتفض عمي و هو يكله : ابوي حرامي ولك
واسحب عليه السلاح و الناس كضته و هو يكللهم : هدوني خلوني انومنه بصف اخيه هدووووني .
جروني عنه و صعدوني بالسياره و تحركت السيارة و هديت العركه و طلعت بيه السيارة لبيت اهلي ... ادموعي هماله و العيون تتلاصف وانا اعاين ( جسام الجنت احاجي كبل ساعة مات !! شلون ما اصدك يربي وعلي ما اصدك كبل ساعة يحجي وياي شلون هدني ؟ هم غلطانين هو ماميت ... مدري انا بحلم ما جاي اصحى منه .... ااااااخ يا مطر يا بويه تعال وشوف حالي .
اصفن بزماني شلون ربي ... ياخذون جهالي
لا ما اخليهم احركه اليجيس شعره منهم
وصلوني البيت ابوي ، تلكني النسوان وهن يلاجن .
..........
جمارة : كمت للبيت اسوي الغدا وبس انا وحيدي ويا الجهال ... دك التليفون .. نشفت اديه و مشيت خذيت السماعة و كلت (الو )
- الو
- الو ياهي انت
- انا ليلى مرت زناد سرحان وينه ؟
- سرحان ويا هدوة اختي بالمستشفى مسوية عملية
- كليله لزوم يجي للسلف ... جسام مات
فزيت : ياااااا يمتى هالحجي
- كبل شواي
- شلون شلون
- يكولون انتحر ما ندري السلف مكلوب فوك حدر ، وتاهمين سرحان ما ادري شنهي و هساه ال ثجيل متحلفين .
- يمه سوده عليه والله ما يستاهل شلون رجال
كمت ابجي
- اي دكليلي عيوني لا تنسين بساع .
سديت الخط و كمت ابجي .. طلعت من باب الهول ، خنجر كاعد بالحديقة يشرب جكارة : خنجر
فز : عيون خنجر و كلبه ... انا كلت ما يطيها كلبها .
- هد عنك هالحجي
- شمالج تبجين ولج
- جسام
- وشماله صخام
- لا تحج هيج شمااالك
- جا هسه غير اعرف شماله
- مات
- يا حول الله ... دكولي والعباس
- جا شني اتقشمر وياك اكلك هسه خابرو على هاذ التليفون مدري ياهي من نسوان زناد وكالتلي انتحر .
- انا لله و انا اليه راجعون
تنهد ... خطية والله
- تكول سرحان الزوم يجي للسلف بساع
- راديون شلون حالها ما كالتلج
تخصرتله : وانت ياهو مالتك براديون .
- ال ثجيل ما راح يهدونها بحالها و راح يطكونها ابزرها و يحملونها ذنبهم .
- ما دريتك حنين يبعد كلبي اخذها هي و جهالها داريهم عيوني عليش يظل بالك منها ترد لايام كبل .
حجيتها و درت خاطر امشي
- تعاااي ، انت شمالج
- لا شمالي و لا شمالك .. هدني و روح خبر سرحان و فك عني .
- حيل ضاكت و كل ما جالها الامور تضطك .
- انقهرت عليها اتوهدن كلبك ياهو اليكضه اي بعد ترملت مو
- انت بعكلج شي ؟ ترا حد الما عده كلب هم يتضايك من يسمع هالعلوم ...
- اي اتضايك بس انت لا ادوس بيها كلش
- شعليج جا مو كبل شوي تكليلي انتهينا ؟.
- جا كول تريدها من الله
- انا يو انت البطكة جف وانا بلا وعي كلبتي علي
- اليوم انا غريبة و طكيتني جا من تاخذني شتسوي بحالي
- امرعدج
- يا تايهتلك
- انت شو صاير السان و تذربنين ترا اطلع السانج كضي روحج
- انت الكض روحك ماعت روحك ساعة العرفت براديون ترملت
- تظنين بيه اهدج واردلها ؟
- سكتت
- لا عليش تسكتين كولي .. تظنين بيها
- هي ما راح ترضى بيك
- هي لو انا ؟
- اييي ما ادري
- خاب هسه اذا اجيبج بجف لاخ واكلب وجهج مهفة بردي احد يلومني
- عليش اسلوبك صاير هجي وياي
حجيت واغتاضيت وعيوني حومرن .. وانداريت عنه ، كض ايدي ...
- جمرة
- هد عنك ايدي ميل
- اسمعي و خل هالجلمة ترجية بأذنج وعلي ابن ابي طالب يو هسه نسوان الدنيا احلاهن يصفن جدامي ما ابدلهن بشعره منج ... بس انت هم اعلى كيفج وياي وعلي كلبي مورم اعلى سرحان و انت تزيدين بلواج اعلى كلبي .
- وطكتك امس
- تعذرنه وسحولنه ارواحنا جا هسه انا معصوم ما اغلط
- موش غلط هيج جا انا من اصير عدك شني هم كل يوم اطكني و تكلي غلطة .
- هسه انا واعديتج واخذي احجاية يالشرب لو رديتله و غضتج نعلي والدي وركعيني بالف نعال ولا تعاينين بوجهي .
- لا تحج هيج اعلى روحك
- جا من اكلج اعشكنج تلوميني
- لا بس طكة امس ما انساها شني انا ابوي ما يطكني
بعدني جاي احجي وطكني مرت الاخرى : هاي انت بعكلك
- جا غير نتصافى خوما بس هالخد ينحمس .. اثنينهن خاطر ما تغتاضين .
- انت مسودن و علي مسودن
- مسودن بيج يزغيرونه .
هديته و دشيت وانا احك بخدي ، حبه بيدك خدي حمى ... لا اسم الله على ايده شمالني ادعي عليه ...
شواي واجا سرحان.. خنجر من الباب بلغاه اعلى سالفة جسام ... دخل مسرع اخذ التليفون و خابر و ضل يتصايح بالتليفون ..
وسداه و هو يصيح : نعلة الله اعلى اليوم الدشيت هالسلف الاكشر و ابتلشت بكوامته
- راح تروح ليغاد
- جا اروح واهد المرة هنا فاكدة بتها و مسكطه رحمها .. شلون بلوة يربي بعدها و كلت اخلص وما خلصت من ال ثجيل وبلاويهم .
- جا شلون .
- والله يا جمرة ما ادري شنهي اللون عكل ما ظل براسي يوسع هالطلايب منين ما اندار انكفخ بمصيبة اعلى وجهي .
- هدوة شلونها ما طلعوها من الانعاش
- ما ادري عنها طلعت من المستشفى الصبح بعد ما رديت ..
دك التليفون .. رد يحجي ويا عمه ويوصي
......
ظلت هدوة بالمستشفى ٣ ايام ما طلعوها ليما يستقر حالها والفرخ وياها بالمستشفى خذته كواغد هلبت من تكعد.شواي ترضعه ولا ينشف صدرها من الحليب ... ثالث يوم طلعت هي اعلى مسؤليتها عبن فرفح كلبها اعلى بتها تريد تعرف حالها .
اما حال راديون يصعب على الكافر ...
عمها منعها تكرب فاتحة جسام ...
واهل جسام يريدون الفروخ و اهي تصرخ وتتنخى بالوادم و تصيح (دخيلكم و ادخيل الله جهالي )
ناس فزعتلها غربة وتدخلت و خذوا عطوة من ال ثجيل يهدون الفروخ لامهم هالفترة ليما تنحل مشاكل الشيخ سرحان و يصفى ويكعد و تتفاهم العشيرتين .
بس جانت المعادلة واضحة
حكم العشاير يحكم الجاهل لاهله و الام مالها حك بيه ... ويو رادت ابنها تتبعه و تعيش بخدمتهم ... وهذا الما يرضاه سرحان ولا ال ضاحي بخويطهم .. ردة لراديون لال ثجيل مستحيلة .
سلطان من ساعة الطاح ابنه و اهو فاكد وبالمستشفى وولده بين فاتحة اخوهم و ابين ابوهم البالمستشفى و يهذي ( جسام وليدي ، وردلي بويه )
حاكم روحته للسلف صادفت كبل موتت جسام بشواي .. لاهو وكته و يعارك اعلى البت وناصر نكر كلشي ولا يدري وين الكاع ضمت بت هديوة ... رد وناطر تحقيق الشرطة يوصلهم ...
........
:- اسمي امنية ما ادري ياهو السماني بهالاسم الصعب بس خالتي جمارة تستثكل اسمي كامت وندهتلي نوسة ... و صارت الناس تصيحلي نوسه ويا نوسه .
وعيت اعلى الدنيا و امي وابوي ما متصافين و عيشتي اعلى خوالي .. انفكد ابوي وانا زغيرة مرات اضكر وجهه و مرات انسى ملامحه و انسى عدي ابو ...
جدي حاكم يحبني حيل وكمت اعتبره هو ابوي مثل خالتي جمارة واتاني يجينى واركضله يو اجه والاكيه بلهفة ... يشيلني و يحبني و يطيني فلوس
ليما امي عرست و خذتني وياها لبغداد
وكالتلي صاروا عدج اخوة اثنين اسمهم مامون ومروان وسرحان بحسبة ابوج تصيحيله بويه ، انا هم كمت اصيحله بويه .
مرات اصفن ويا روحي بعكل جاهل و اكولن عود انا ليش هيج من دون الجهال عدي ٣ اب ... فليح و حاكم و سرحان و يومية رايحة من بيت لبيت ... ليش ما اعيشن حالي حال الجهال .
تمنيت اضل عد خالتي جمارة
بس امنياتي كلها ما تصير واجيت لبغداد ويا امي .
وبيوم وانا طالعة من المدرسة صاحاني واحد ... : يبنية
ركضتله : انا
- اي انت
- شرايد ؟
- انا عمج
- انا ما اعرفك و امي تكلي لا تحجين ويا الغربة ما يصير
- فلاح موش ابوج
- اي
- ابوج يريد يشوفج
- خل اكل لامي خاف ما ترضى
- تعاي وياي خاطر نكللها ..
يله
اخذاني ورد بيه للمدرسة .. : عمي مناك نطلع
- لالة انا المدرسة الها باب ثاني امشينا .
اخذاني و طلعاني من الباب الثاني اليصير بالساحة الورى المدرسة .. هم مفتوح و الطلاب تطلع منه .
بيه درج تنزل منه و تطلع بالفرع ..
خذاني و مشينا بسيارة ...
لجنه ما مر من الدرب النمر بيه انا ومامون كل مرة .. ظليت اعاين ، و هو راكب بالتكسي وكاعد وياي ورى ... : عمي يمتى نوصل لامي
- هشش حسج عيب .
طول و هو يمشي ....
ليما وصلانا السايق لمكان كله سيارات : عمي وامي
- دمشي يا بويه
- عمي والله امي ما ترضى رد بيه للبيت
- امشي
كمت ابجي ، كضاني من زندي وكال : الوادم منا يو بجيتي و فشلتيني جدام الناس الا اكصبج ، عيييب لا تبجين .
صعدنا بسيارة و كعدنا ورى ... السيارة طولت وما مقبطة ، نزل من السيارة صعد بسيارات يصيحون نجف .. صعدني بيها وانا ابجي .
وصلاني غاد للنجف ، نزلانا وهم صعدنا بسيارة ... ليما وصلنا البيت .. بس بيت مو مثل بيت عمي البسماوة ولا هذا السلف ما ادري هاذ البيت وين صاير .
دخلت جدي ناصر كاعد ، من شافني صاحالي : تعاي بعد جدج عليش تبجين ؟
- هاذ عمي جاباني ليجاي و ما كال لامي .
- لا تخافين خابرنا امج و كالت خلوها عدكم جم يوم لبين ما تولد بسلامة و تردين غاد ، الاريدنه منج ادشين بذيج الغريفة ويا عمتج هاي .
سكتت من كلالي هيج .. كمت طبيت وياها .. و اسمع واحد صاح : بويه شنهي هاي و تريدني اخذها ، بعدها جاهل و العباس ، ٩ سنوات بوية صدك جذب .
- انجب ومالك غرض ، يجي السيد وتملجون .
- بوية البت جاهل حرام عليكم بالعباس
- ولك البت عايشة عد سرحان وولد سرحان ما نعرف شنهو وبيت ضاحي ما يتأمنون ونحط عدهم بنيتنا شبشوا اعليها ليلية و عرسوا عليها و فضحونا جا هاذ مو عرضنا موش سمعتنا ، سرحان شنهو و نحط عده البت .. املج اعليها و خل البت تكعد ويانا
ما فهمت الحجي شنهو معناته ظليت كاعد و استمع ليهم ، اندكت الباب و هم يرحبون : هلا سيد هلا بيك .
قدموله جاي و هم يسلمون عليه واسمع عمي يكله : والله سيد شيليت ابني من السلف اخاف لا اعلى ساعة ويكضون الامن غاد .. كتله بويه جوز من سواليفك و بعديته .
- زين تسوي .
- بس انا سيد اليوم دزيت اعليك بسالفة
- خير ان شاءالله ؟
- عدي هاي بت ابني الاسروه بحرب ايران ... عرست امها واحد شيخ عدة عداوة ويا شيخنا و خذت بنيتنا غصب وياها واخافن لا ابتلش وياهم وانا ما احبن المشاكل يا سيد لجن بت هاي و العرض غالي .
- حكك
- اي هالجبتها منهم واريدن ابن ابني يملج عليها بلا عرس بس كون نحطها عدنا و نبعدها من كون امها معيشتها ويا اولاد الشيخ تنام و تكعد وياهم و الشرف عزيز
- هسه التريدونه شنهي ملجة يو شنهي
- البت عمرها ٩ سنين .. يصير نخلي ابنا يملج اعليها .
- اذا غاب الاب فقدة النكاح بيد الجد ابو الاب
- اي انا جدها .
- دام انت جدها و حريص على سمعة البنية وتصرفك هاذ بداع الخوف على شرفها الشرع يجيزلك تزوجها من ابن عمها .
- الله يبارك بيك سيد ، نجيبلك البت تعقدنا
- اي على بركة الله .
كام جدي واجاني و شالف فلوس جثيرة و حطها بايدي و كال : يو نشدج الشيخ كولي اي راضية خوش
- ليش جدي
- انت كولي و الباكي علي انا جدج واحبنج كا اريدج تنظرين .
- خوش
كوماني وهو يكللها : سميعه .. باجر اريدج تروحين للسوك و تشتريلها احلى نفنوف لبنيتنا خوش
- صدك جدي ؟
- جا انا شجم حلوة عدي و ما اشتريلها ، الفلوس كلها الج .
- كمت وياه فرحانة .. فلوس و راح يشتريلي نفنوف .. لبستني عمتي ربطة و هو يكلي : شحلاتج جنج كمرة .
ضحكت وانا اعاين للفلوس البيدي
: نصي الربطة جدي عيب من السيد
- خوش جدي
- نزليت الربطة و كعدت يم ابن عمي اسمه حسن ... مدري شحاجاني السيد ما افتهمت ولا بالي جان يمه بس جدي ندسني و كالي كولي : كولي اي راضية
رفعت راسي ليه و كلتله : اي راضية ...... يتبع
☆☆☆☆☆☆
اعتذر البارت قصير لكن شوي تعبانة ، اذا فضيت اكتب التكملة و انزلها بالليل .
متابعة شيقة للجميع
#زينب_ماجد