#كحل_عرب
(بيت بيوت)
((( بقلم زينب ماجد )))
الحلقة -2-
(ظهور جلال )
تعبانين چن ضحكة شهيد معلكة بصوره
لــِ عريان سيد خلف🖤
هدوة : لطمت اعلى اخدودي و كمت اصرخ وانحب و اكله : دهر الدهرهني بوية انسبى بيتي يمه هاذ تهديد وينك يسرحان الحك علييييي
حاكم : يواشج بويه خن نفتهم ..
حجاها و طلع من البيت و جمارة كربت لهدية : بسج يهدوة كولي يا الله على كيفج الجاهل ابطنج شنهو ذنبه
- ما سمعتي ابوي شقره يجمارة و لج ديه جاي يهدون بينا .. يما اعلى ضيمي يمه وينك عني يسرحان تعال وشوف حالي
وظليت انحب و ابجي .. اجت مفرزة امنية .. دش ابوي كال : تسترن خل الشرطة اطب تتفكد البيت
كمنا اعلى حيلنا وتلفلفنا بعبينا .. دشوا ما خلوا شي ما فتشوه .. وينشدون يا ساعة طلعتوا و الضوه معلوك لو طفيتوا ... ووووو
وانا اجاوب اعلى الاتضكره
ليما سجلوا كلشي و طلعوا ردت اخبر سرحان كال ابوي : خبرتيه هسه شنهي يجي بهالليل ؟
من غير شي الزلمة مبتلش بابن ثجيل هدي و الصباح رباح والله الستار لا تشغلين فكره بهالليل
- يظل يحجي علي و يعصب يو ما خبريته وعلي
- كليله ابوي منعني .. ياله اخذي اغريضاتج التريديهن و خلنا نرد لبيتنا يلا بوية .
انا باد حيلي و اجدامي بعد عيب يعينني مت عيني جمارة الكامت ادور اعلى المستمسكات بالكنتور و جابتهن و كمنا ..
ليما ردينا للبيت وسولفنا للاهل امي تسودنت و كالت: بعد يو رجلج راح ليغاد انت و جهالج تجون ليجاي ليما يرد .
انا ما رضيت بس سكتت كلبي محروك اعلى الصار .. تمدتت خاطر ارتاح لجني مزوهرة ما عرفت طعم الراحة .. فرشت جمارة لجهالي وناموا حذاي ..
يامن يطلع الصبح و اخبر سرحان يلحك علي .
.....
عرب ال چلوب
الساعة ال5 فجرا
سرحان : ها اصباح الخير
خنجر: اصباح النور ، ها جاهز
- ما عدي شي
ركبنا سيارتنا و طلعنا للبر نصيد طيور ، خص هالوكت الطيور تهاجر عبن الجو كسر و صار بيه خيط ابرودة و الشتا فج بيبانه .. والطيور سرب سرب تمر ...
كاض الكسرية و انيشن امن ابعيد
ثرتلي ٣ جيلات اجن بطيرتين طاحن ... ركضت ليهن
يرفرفن نا ميتات .. ذبحتهن و شلتهن من جناحهن بايد وحدة ... انداريت خنجر كاض الكسرية و يتملعب بيها و متجي روحه على السيارة .
- ها خويي ؟ جا موش اطلعنا واريد اطلع بر .. هاذ البر و الصيد خير من الله عليش موجف بمچينك ؟
خنجر : الا والعباس لوني اسد و غزيلة جدامي مالي نفس اصيدنها .
- رايك شنهو يخوي
- مالي كل راي وضايع و متيه علومي
- هدها و اخلص لا اهلها موافكين ولا هي بعد تناسبك
- انت تحجي هالحجي يسرحان ؟
- دامك اخوي احجيها .. اهلها ما موافكين والبت تهاونت بعشكك .. جا هي زور يو كوة ؟
- لا تدوس اعلى افادي بهالجلمات تراهن ياذني
- موش نيتي اذيتك بالعباس لجن حالك هاذ الياذيني
- الله كريم
- جا دامه كريم تعب روحك و صيد وياي
شال الكسرية وظل يعاين بالسما ليما شاف طيور ونيشناهن .. طك ... ما اجت جيلاته بطيرة ...
دارله سرحان و هو يستخف بيه : ما تعرف تنيشن خربان .
- خلني اجرب و انيشن بكصتك اشوف روحي خربان يو لاله
ضحك سرحان و تعالت ضحكاتهم و هم بالبر .
......
كعدت كواغد اول وحدة بالبيت .. حطت الجاي اعلى الجولة و هدرته .. فز حاكم : ها اصباح الخير
- اصباح النور
- اشتريلكم صمون لو عدكم خبز .
- عدنا خبز بس هديوة هنا جيبلنا صميمينات خل تاكل هي وجهالها.
- جا خوش .
كعدت ايمان و هي تكعد بجهالها مؤيد و هند وندهت هدوة وكومت جهالها ... كعدت هدوة تمشط لنوسه .. ومامون يبدل و مروان نايم .
هدوة : مامون يمه انده اخيك
ندهه ما كعد فززه جراه سحبه من الفراش ذاك نايم ما يشيل روحه ، صاحت هدوة : نايم يا شليف الصوف اكعد ولك شنهي عودين هاذ اول يوم و هيج جا تاليها شلون
جابت طاسة ماي بللت اديها و غسلت وجه فز يبجي وما يرضى يروح بدلتله غصب ... كعد يبجي و هي راحت للتليفون .. دكت على بيت سرحان دك دك محد جاوبها ..
- وينك يسرحان تعال لية وشوف حالي .
جريت عباتي خاطر اطلع ، صاحت امي : جا تريكي وروحي
- ما الحك يمه .. خليني اروحن اودي هالولد هاذ
-جا وانا زيتيت ابوج خاطر يجيبلج صميمينات
- اودي والحك ما اطول
- روحي يمه مودعه بالله .
خذته و مشت
مامون و نوسه و مؤيد و هند طلعوا للمدرسة و دخلوا للاصطفاف بس هدوة ظلت كاضة بمروان المطنكر و ناطرة يخلص الاصطفاف خاطر تسجله ..
لما وصلت للادارة واطت المستمسكات يكللها : انتم مو علينا على مدرسة الجملونات .
- خوية انا ما عرف جا غير اخيه هنا و اريدنه وياه
- خوية الرقعة الجغرافية مالتكم مو علينا على مدرسة الجملونات .. سجلي غاد وعود انقلي واسهلج امر .
احتاريت بزماني انا شيوديني غاد و بطني هاكداتها و بيتي مهدد ... ما عدي غير اخذنه وامش للجملونات .. ويا ما دشينا طلاب تلعب طوبة بالساحة .. مريوان المطنكر اعلى غفله فز من ايدي وركض ليهم يلعب وياهم
شلون بهالفRخ هاذ العكلة ويا الطوبة ..
مشيت للادارة خاطر اسجلنه .
(بالبيت )
الكل تريك و ضمو ريوك هدوة ليما ترد ..
كواغد طلعت تشوف معاملتها هي ولالة
وحاكم طلع لشغله
وايمان خلصت شغلها ووصت جمارة ع البيت ومشت للسوك تتسوك للغدا .
جمارة : ظليت وحدي بالبيت و الجهال الزغار نايمين ..
لفيت شعري و نزليت البرجم ورتبت روحي جني معرسة تالي حطيت مواعين الريوك ع الحوض وكعدت اموصهن .. وافكر بخنجر وسارح بالي بيه .
اندكت الباب ، صحت : يااااااهو ؟
جلال : اني اني
فتحت الباب و انا انشف ادي بثوبي : ياهو انت ؟
- مرحبا
- هلا و مرحبا
- بيت حاكم هذا مو ؟
- اي
- انت منو ؟
- جا اهل الدار اليسئلون ياهو لو المجبل ؟
تبسم : لا مو اني اعرف اهل الدار بس ما شايف عدهم بنية ، بناتهم زغار .
- انا بت حاكم
- لا يكون من مرته الاولى بالسماوة
- خوية مو جنك طولتها ، فضها شرايد
- اني اخو ايمان جلال واجيت عليها
- ايمان راحت كبل شوية للسوك هساها اعلى جية ما ادري تنطر تروح بس محد موجود بالبيت اعذرني ما اكدر ادخلنك
تبسم : اصيلة ، لا راح انتظرها بسيارتي .
- بكيفك
رديت الباب ورجعت للحوض اغسل ، شوي و اندكت الباب : يا اهل الدار هسه ادري سكمتوني بالباب بس ع الأقل استكان جاي .
كمت فتحت الباب و تبسمت ليه : جنك على استكان جاي اعذرني ...
ركضت حميت الجاي و صبيتله بصينية و خذيته اله ، اخذ الأستكان من الصينية و حجه : شسمج ؟
- جمارة
- هااااا سامع باسمج اعتقد ابوج كالي عندي بنت تدرس
- اي انا
- وين وصلتي بدراستج ؟
توه سأل اجت ايمان من السوك ، رحبت بيه و دخلته جوا بالدوانية وتعذرت منه اعلى الهوسة وكالتله : عدنا خطار .
نشدته على ريوك كال الها : ما متريك بس جمارة اطتني استكان جاي .
ما رضت ومشت تسويله ريوك ودزتني اخذله صراحية مالت مي اسكي ... مشيت وانا اصب بالكلاص ، ردفني : ما جاوبتي
- عليش ؟
- وين وصلتي بدراستج ؟
- خلصت اعدادية و منتظرة امي تروح وياي خاطر اكضي معاملة التسجيل بالكلية .
- معاملة !!
- جا شني ؟
ضحك : اذا تريدين اني اساعدج بيها
- تعرف ؟
- طبعا مخلص ماجستير شكد معدلج
-٩٨
-طب !!
- هو انا اريدن طب
- بطلة والله
طبت ايمان وهي تحط الريوك كدامه ، طلع فلوس و انطاها و كال الها : ذني دزهن لؤي
- مشكور .
انا يحجي ويا اخته و كل بالي صار وياه عبنه يعرف للكلية هلبت يساعدني بالتسجيل انا كلشي ما اعرف .
شال عينه صدها بعيني و كال لايمان : ما توقعت حاكم عنده هيج بنية حلوة لا وراح تخش طب وتصير طبيبة
جمارة : يعني تكدر تساعدني انا امي خطية ما تعرف و هي حايرة بيني و بين معاملة الشهيد مالت اخوي
- تريدين امرلج باجر و اخذج نسويها ؟
- ابوي ما يرضى اروحن وحدي
- اي هسه اني قابل غريب .
ايمان : يجي حاكم و اكلله .
عفتهم انا و طلعت .. و اسمعنه ينشد اخته عني ، طبت هدوة كوة تمشي و تنشدي : ياهو هاذ البدوانية
- اخو ايمان
- يااا ، خايبة عازنيني اكعد و علي انهد حيلي
كمت ليها اعاوننها وانشدها : - شنهي شسويتي ما سويتي
- دولبوني بالعباس لعبو بيه طنب تعاي روحي روحي تعاي هالدور ما رضوا احطنه ويا اخوه بنفس المدرسة يكلي اسمه اعلى ذيج المدرسة .
- درتاحي ارتاحي
هدوة: لا يا ارتاح خلني اخبر سرحان اعلى مصيبة امس .
..خابرت مامش رد كعدت الوبن اهيس الطلوكة اجتني مدري تشاليع جني حتى الجيابة ناسيتها الطركاعة الطاحت اعلى راسي دوهنتني .
راحت جميرة مت عيني عليها تسويلي اريوك لجني ما اشتهي العسل و كلساعة اردن للتليفون ليما ردت فخرية : الو
- الووو
- شلونج فخرية
- ياهي انت ؟
- انا هدية
- اح شرايدة .
- انشد اعلى سرحان من الصبح و ليجاي اخابر ومامش احد يرد شنهي صاير شي
- لا ما صاير و سرحان ماهوه
- امس دشو حرامية اعلى البيت و كاتبن هيج بكاغد قراه ابوي مهددينه مدري شني لزوم تكليلة ويعرف بالامر .
- اوله وتاليه يجي و يعرف هكو شي اخر
- اكلج مهددينه شنهي انت ما تفهمين هكو احد يمج اطيه السماعه خل احاجي عمي ابو فاضل وينه ؟
- ابوي بالديوان و سرحان غبش ويا خنيجر للبر اودعناج .
وسدت السماعة بوجهي !!
هاي صكد تحجي يو تتغشمر وياي!
اكللها مهددينا و اهي ما تحس اعلى دمها ، شلون انا بضيمي يربي منين اجيبن سرحان و يعاين حالي دخيلك يبو الحسنين و علي ما ظلي حيل يربي.
(في المدرسة)
دك الجرس و عجت المدرسة بصوت الطلاب و لعبهم ، اللي يروح للحانوت ويوكف بلا انتظام و هو يحاول يوصل شباج الحانوت حتى يشتري .
واللي ملتم على الحجية التبيع لفات لبلبي
واللي صاف ويا اصدقائه و يضحك و يسولف ، و بين الشحيتان و الركيضان وكض الحديد عاجة المدرسة بصوت الطلاب .
هند تلعب مربعات ويا اصدقائها
لعبة قديمة يوكف بيها اربع افراد على حواف المربع اللي مخطوط بالكاع، وواحد بالنص ، ويبقون اللي بالحواف يتبادلون الاماكن دور من بعد دور .. واذا واحدهم اتاخر .. اللي واكف بالوسط يحتل مكانه و يخسر .
هند تلعب و مؤيد و مامون غاد عنها واكفين ياكلون بلفاتهم ، اثناء ما جاي تلعب دفعها الولد الجاي يلعب وياها وطيحها ، وصاح : خذيته
صرخت هي تبجي بصوت عالي ، انتبه الها مؤيد و مامون تراكضولها شالوها من الكاع وهي تكللهم : والله مكاني هو خذاه
مامون : ميل منا مكانها
- لا ماتي اني خذيته
- تميل لو اسحكك
مؤيد : عوفه عوفه جاهل خل يولي .
دفعه مامون و مشه واميدي يسحب باخته ، اجاهم واحد من وره دفع مأمون واتعارك وياه شلون دفع اخوه .. وصارت كض اخوك لا يطيح ... ناس اطك بناس
حتى نوسه اجت تركض من بعيد طاحت عليهم واطك بيهم .
من سمعوا بالمعاون جاي كلها تراكضت ، الا هند مبسمرة بمكانها تبجي بعدها وتصيح : طيحانييييييي .
سكتاها المعاون و مشاها وفض الهوسة ، تراكضوا مامون واميدي ونوسه لهنوده ... وهاي ردت تبجي .
اميدي : بس طكيناه لا تبجين
مامون : فشخناه فشخ
نوسه : دكافي الناس انطكت وما بجت بكدج كااافي .
هند : اني ما جاي ابجي من هاذ الطكاني
اميدي: جا شبيج
- راح يدك الجرس واني جوعانة
كاموا يضحكون عليها وهذا يصيحلها ( ام كرش) هاذ يصيح ( سمينا سمين ) راح اميدي خاطر يجيبلها كيكة ، ما رضت تريد لفة .
راح مامون جاب الها لفة واجا انطاها الها و هو يكللها : هاج اعلفي الصخلة .
- انچب
طكاها على راسها : لا تغلطين هي صخلة
ما ردت عليه لان بيها لفة .. التهت و هي تعض بلفتها وتاكل .
مامون : امي هدوة كالت شوية ويجي مروان شو ما اجه ليش ؟
اميدي : يمكن ما رضو يسجلونه ؟
مامون : ما ادري !
دك الجرس للصفوف ..
ركضت نوسة لصفها و هند بعدها تاكل بلفتها ، كام مامون و هو يحط ايده على جتف مؤيد حتى يمشون الصفهم ، صاحت هنوده : مؤيد اروح للصف .
مامون : بسج علف وروحي الصفج يلا
- محد حاجي وياك اني جاي احجي ويا ميمو
مؤيد : دروحي لا يجي المعلم روحي
- اخاف من هذا الطيحاني لا يطكني النوبة
مامون : خل نوديها و نمشي لصفنا .
خذوها وودوها للصف ، كعدت هي و مشى مامون للولد الطيحها : اسمع لك اذا طخيتها هيج طخة بالعباس انكضك انا واميدي بالطلعة الا انسكطك خوووش .
ما رد عليهم ، دخل المعلم ، هم تراكضوا يطلعون .
(السماوة)
ليلى مرت زناد : ياهي هاي الجنتي تهجين وياها اعلى هالواحد ؟
- عشتو هديوة
- زلمتج و كوشت عليه وخضته شرايدة بعد و تخبر
- اها سرحان هنا و تكعد لا ما اطلع الها الف حجه وسالفة خاطر يرد سرحان ليغادي ويجابلها .
- الا صكد يكولون بيها ولد ؟
- منيلج الحجي هاذ ؟
- سمعت راديون تكل لعمتي سرحان كايل الها وحتى يريد يسمي (علي)
- عساها تفطس وتموت هي و البطنها .
جاي يحجن طبت وسن من المدرسة تبجي ، زوخت بيها فخرية : اشماله الوجه مكشر
وسن :- بعد ما اروحن للمدرسة اخافن
- اي يطبج هرش لا تروحين جا انا موش كتلج ما تفيدج ، اخذي وردة وشطفيلها ياله امشي .
وسن : ظليت واكفة اعاين الهن بخوف ، زمخت بيه ( يلاااا) تحركت بساع و اخذت بت عمي خاطر اشطف الها وانا ارجف .
وكفت اشطف على الحوض دخلت امي من برا وعبايتها اعلى راسها، صاحت :
راديون : شجاي تسوين يمه ؟
- اشطف لوردة
- وعليش شنهي ما عدها ام و تشطفيلها انت ، هديها
- اخاف عمه فخرية تكتلني .
- مالج غرض شطفي اديج و تعاي .
نزعت العباية من راسها و طبت جوا ، وهي تصيح : فخريييية بالله عكل براسج و تخلين الجاهلة تشطف لبتج .
- وشصارلها نكص منها
هزت ايدها و كعدت و هي تأشرلي : تعاي يمه سولفيلي شلونج بالمدرسة اليوم
- بعد ما اروحن
- ليش ؟
- اخافن
- لا باجر تتعودين و تكبرين و تصيرين دكتورة خوش ، بس انت ليش اجيتي ليجاي ما مشيتي للبيت غاد .
- رحت وانت ماكو حسبالي هنا
- لا ييمه طلعت للبستان جن هموم الدنيا طاحت اعلى راسي وبس الله يصفيها .
ظلت كاعدة امي ابيت عمي سرحان ومشت لحجرة حبةبة ردحة مريضة ونايمة بغرفتها ... لهناك دش عمي سرحان تلكته عمتي فخرية و هي تنشده على غده .
حاجاها ورد يعلينلي : وسينه عمو تعاي احبج
ركضتله ، حباني و تجاني على رجله : شلونها الحبابة ؟
-زينة
- عليش ضايجة
- عمي مروان و ميمون ما يردون بعد
- لا يعمي بعد غاد عيشتهم ، اشتاكيتيلهم ؟
- اي
- انا اخذج الهم ، ياله بالحبابة
طلع فلوس من محفظته اطاني ، دخلت امي و هي تسلم عليه : ها الله يساعدك
- كواج الله
- حجيت ويا جسام ؟
- تلاكيت وياه كبل اجي ليجاي
- وشنهو الحل يخوي
- رجلج عازم اعلى الرده ويا ابوه وانا ياخوية كلت اله جلمة ورد غطاها يو رديت مالك مرة عدي .
- و جهالي خوية
- انعل ابو الجهال شنهي بعد كل ذيج الدموم و الطلايب الصارت رايدة الردة لبيت سلطان .
- عسى ما يذبحوني جهالي ما اطيهم
- هاذ حجيج ويا رجلج انتم التلاكون الحل انا العلي اكللج يا راديون يا خوية مالج ردة لبيت سلطان ، خوش يو اعيدن احجايتي ؟ .
دارت وجهه اداري دمعتها عنه ، و هو كام للتليفون و يكول : هديت المرة بشهرها و الجهال بركبتها خن اخابرنها اشوفنها شصار ما صار .
اخذ سماعة التليفون و دك رقم بيت حاكم ، دك وهدوة شادة راسها من الوجع و تون اعلى حالها ساعة السمعت رنة التليفون همت ليها و خذت السماعة : الووو
سرحان : الو ، ها بوية شلونج
- شلوني يسرحان مشيت عني لا دريت بحالي لا شفت شجرالي
ونحبت ، تسودن ساعة السمعها تنحب : اها شمالج تنحبين .
ظلت تبجي ليما سمعت حسه ، وهو يصيح : هدوة بعد كلبي بوية بس يواشج لا تبجين و حاجين بهداي شنهي طلكتي .
- علواه يو اعلى الطلكة امس حرامية طفروا اعلى بيتنا وكالبينه فوك حدر و حاطين كاغد و كاتبين بيه اليوم بالكزيز و باجر بالعزيز .
- شلووون ؟ يمتى هالحجي انا العصر يمكم وين انتم هسه ، ابوج وينه .
- تعال ليه يسرحان و علي اعلى ساعة اطيحن من طولي ليلي ذاك ما ضكت طعم النوم وكل كتر بيه يون .
صك السماعة و هو مغتاض و طلع من البيت مسرع ، النسوان تراكضن وراه يردن يعرفن شماله وهيج تعصب و صياحه عله ...
وكفن بالباب وهن يستفسرن ( يا ستار يا ربي شصاير شنهو الجرى )
فخرية : مامش شي سوالف حريم ورادت يرد ليها و دربته وهو اعلى ممشاها.
وكف سرحان بنص المضيف و خبراهم بالتهديد اعلى ابيته البغداد ، كلها انتفضت وياه و طلعت ٣ سيارات من السماوة توجهن ورى سيارته لبغداد كلها زلم مشوربة معكلة .
خنجر : بهداي يخوي يواشك جا راح تكلبنا
- بيتي انا يتهدد يخنجر و مرتي هاذ حالها
ضرب اعلى رجله بحركه و هو يسوق ، صاح خنجر
- عنك عنك شو انزل انا اسوقن بدالك ، انزل .
وكف السيارة سرحان و نزل و كفتله السيارات الوراه : ها يشيخ ؟
- كملوا الله يكويكم بوية .
(في البيت )
طبت كواغد للبيت وذبت عبايتها و هي تصيح : خايبة جميرة يمه كلاص ماي .
راحت جابتلها دولكة واجت تركض تطيها و تاخذ عبايتها والشيلة : شنهي ما شنهي شسويتي .
- لزوم اروحن للسماوة
كطعت جلمتها و هي تشرب الماي ، حطت الدولكه و هي تكول ( سلام الله اعليك يابا عبدلله شنهي العطش هاذ )
جمارة : هسه كليلي شياخذج للسماوة
- جا بعد شسوي غير هم
اشرتلي اكعد ، تكربت يمها و كعدت : ها يمه
- خايبة يكولون الريس راح يطينا بيت و سيارة وفلوس مدري شكثر
- عليج العباس يمه
- اي بالعباس هم كالولي لون وليدي ما تعوضه فلوس الدنيا لجن ييمه فرحت هلبت الله نشتريلنا ابيت وسويويره حدر ايد ابوج يشتغل بيها المسيجين بدل هالهبري الطاكه .
- ءءءء يرادلها بخت ييمه هيج وتشتريلي كوستم للكلية واتمزهد بيه جدام البغداديات .
- اجيبلج اثنين موش واحد ومن هاذ ابو الكتافيه الهامتنها بس خل استلم و علي الا اجيبلج
- هله هله بامي ، ناخية الحسين كون صدك و تستلمين .
- اخيتج شمالها
- يمه تعبانة من ردت كبل ساعتين و ليهساها تون و شادة راسها .
كامت من حيلها وتكربت من هدية كضت راسها : هديوة يمه شمالج يبعد امج ؟
- ها يالحبيبة راسي يون و بطني توجعني
- خافنج تطلكين ييمه ؟
- لا ييمه موش وجع طلوك
حجت و هي تون من راسها
- سرحان حصليتيه ؟
- اي كال جاي
- مت عيني عليج يا يمه كاضية ظاله جلد و عظم
- لا يالحبيبة اسم الله عليج ، هسه انامن و اصيرن زينة .
- خايبة جميرة يمه اخيتج ما كلت الها الگيمة ؟
- لا والله ييمه ما رضت
- جا يمه خافنه ضغطها هبط ، امشي جيبيلي لبينه مالت الهوش وحطي اعليه امليحه خن اشربنها .
طبت ايمان : ها ام ستار الله يساعدج
- هلا بيج دية
- شسويتي ما سويتي
- اسولفلج بعدين خن اشوفن ضيم هالبت هاي شجالها
ايمان : لو تاخذينها للمستشفى هاي مستشفى القادسية هنا قريبة خطية .
- بيش اخذنها وعلي اجدامي مكطعه خايبة لالة .. لوييييييلة .
- ها عمة
- يا عمة ولونج تعيبانة ما تخلينا ناخذها انا وياج للمستشفى .
ايمان : وعلويش اذا تريدين اني وياج ناخذها بس خلي عبوسي عد جمارة خاف لالة تعبانة و اذا ما بيج حيل انتظري مؤيد يحل وناخذها اني وياه .
- لا يطيج العافية انت هم جهالج منا .
جابت جمارة اللبن و هدوة تون ، حاجتها امها : هديوة يمه شو كعدي شربي هالبينة هاي
- يمه ما اشتهي وعلي
- جا يمه من امس وليجاي ما ماكلة وانت حبلة وتطلكين شيظل بيج كومي لا تتعايرين بس هاي .
هدية : كومتني غصب و خلتني اشرب لبن من ايدها ، شلت وجيهي الها والاكيها تتنوعلي وعيونها مدمعات
- عليمن تبجين يمه مابياش شي
- لا مابيج ان شاءالله ، كومي خل ناخذج للمستشفى
- لاله لا هسه يجي سرحان وياخذني .
- يا يمه ويجي و يشوف هاذ حالج حتى فشله منه شيكول ما بيهم وحيد ياخذها للمستشفى و هو المأمنج عدي كومي شو كومي .
كومتها و ايمان لبست عبايتها ووصت جماره على عباس و طلعت جابت تكسي و اجت شيلنها للمستشفى .
من وصلت غاد سوولها تحويل لمستشفى الحبيبية ، طلعن بوجهن لمستشفى الحبيبية ، وصلن غاد دخلنها صالة الولادة فحصنها كال الها : روحي و بالليل تعاي عندج ولادة بس بعدلج .
ردن بيها للبيت ، وصلن لكن الفرع مسدود بسيارات سرحان وولد عشيرتهم وكلهم مسلحين ، ما داخل للبيت لإن حاكم ما موجود .. ورايدين يرجعون صفت التكسي البيها هدوة...
تلكاها سرحان : ها بوية ، شمالها
كواغد : لا تخاف ييمه عدها ولادة بس بالليل
سرحان : فهميني ام ستار شنهو الجرى ؟
- والله ييمه حالي من حالك يجي ابو ستار و يكلك شسوا ، تفضلوا جا هاد الزلام بالشارع زحمة .
- لا دايمة البيت ما بيه محرم انا اخذ المرة و الجهال غاد
- البت تعبانه خلها عدنا
- لا ام ستار خلني امن عليهم غاد بوجود هالزلام ، اذا تكدرين خل تجي وياها جماره اداريها غاد .
- اي
دخلت كواغد ، او ما فتحت الباب انضرب بجماره اثاريها تعاينلهم من ورى الباب : شعدج تتنوعين للزلام ولج ، ما تستحييين
طكتها اعلى راسها
- لا يمه لا شمااالج وياي اااخ انا بس اريدن اشوفن شمالهم .
- مال البين عدوج البسي عباتج خاطر تمشين ويا اخيتج غاد ادارينها .
- صكد يمه
- و غمه ، اسمعي ولج حسج عينج تتكربين من خنيجر يو تحجين وياه تراها العطابة تعرفين وين ادهديها .
- لا يمه اعلى بختج يا خنجر ، اخيتي بيا حال .
- ديلا استعجلي رجل اختج بالباب ناطر ياله .
- اي اي .
ركضت جبت ثوب واحد حطيته بعلاكة شلت العباية و خليتها اعلى راسي و ركضت بس اريدن اشوفن خنجر كلبي طاك اعلى شوفته
مدري شوصت امي وشحجت عكلي طار طار ...
طلعت و هدوة بالسيارة كاعدة و سرحان واكف احذاها عد باب السيارة و خنجر عاينتله ليغادي واكف ، حجه سرحان : يلا بوية اصعدي .
درت من الباب الاخرة التفت خنجر ظلت عيونه مبحلكه ساعة الشافني بكفاه ، كضيت روحي كض هاطر لا اتبسم و صعدت بالسيارة و هو صعد جدام يسوق ، عاين علي بالمرايا ..
واني اعدل بالعباية جيف ما لبست ربطة تتمزلك ، مامون ونوسه كعدوا يمي و مروان يم ابوه ، مشت السيارة ، انا دنجت ما رفعت عيني ابد سرحان كاعد استحي منه .
وصلنا للبيت و ازلام هوسة كلها عكل و تتلكا سرحان ، كضيت هدوة تجيتها و دخلنا البيت و الجهال وراي وهيست خنجر ضاج جيف ما عاينتله حسبالة ما اريدنه ، كام كل حسرة يذبها متعمد ... هاكبرها
دخلت هدوة و سرحان دخل كعد عد راسها حب و كض ايدها : هدوة افادي بوية شنهو الاعملنه و اشيل الاذى عنج .
جمارة : خلها تنام تهود وراها ولادة .
- تظلين يمها خوية لا تفاركينها .
- صدك جذب توصيني اعلى خيتي .
كام منها و هو يتفكد الغرفة و يصفك ايد بايد من القهر ، حس خنجر من برا و هو يصيح : ابو ماموووون .
راد يطلع حاجيته : اعزل الغرفة لو ما يصير ؟
- لا عزليها خوية
غطيت هدوة بازار و كمت للغرفة اعزل بيها ، شفتلي دشداشة حمرة حلوة عد اهديوة ، خليتها حدر كتري خاطر البسنها احسن من ثوبي هاذ ..
من شفتها هودت ونامت صكيت الباب و طلعت ، لاكاني سرحان : ها شنهي نامت
- اي والله نامت
- خلها ترتاح ، بعد اخوج تكدرين تسوين جاي يو ازاحمنج .
- لا يا شدعوة هسه دقايق .
ركضت لمطبخها ، طباخها مو مثلنا شو جنه ميز حتى بيه خانه ، صحت لمامون ، علماني شلون اعلكنه ، طلعت كيتلي جبير عدها و سويت جاي ، وصرت جايجي الهم صب ودي .
ليما خلصت دخلت اتغوسل ، ولن سرحان يصيح علي : جمرة ، جمااارة .
استحيت اردن علي وانا بالحمام طلعت بساع جايب كباب لهدوة اطانياه و كالي حطي عدها و جبريها تاكل وراها ولادة .
كعدتها : خب هي يالمسعده اكعدي رجلج جابلج كوباب كوووباب كعدي .
- خايبة ما اشتهي وعلي
- وعلي التحلفين بيه اطخ براسي ادوسن ابطنج و ابيس بيج انت و هالفر*خ العاصي ابكرشج ، دكووومي اكللها جايبلج كووووباب تكول ما اشتهي .
ضحكت : جا صيحي الفريخات خطية ياكلون وياي خافنهم ما ماكلين
- صبيتلهم غاد عد اهلي واكلو ليما شبعوا ، اكليي .
- عاد صيحي بس نويسة عليج العباس خل تاكللها الكيمه وياي هي تحب الكباب .
- دهاج اكلي وهسه اصيحلها .
حطيت الها الاكل ومشيت اصيح بنيتها ورديت ، هن ياكلن وانا امشط بشعري و اتعطر و اخلي حمرة لحلكي
هدية : ولج جميرة امي يو شافتج تحطين حمرة الا تفرك حلكج وعلي .
- امج لو بيدها تدفني بين الكبور الا شوفي بروح اهلج هاذ حاجب مال وحدة راح تدخل كلية اطب وابغداد حتى ابو الجعفر المنصور هم حاجبه ارحم من حاجبي .
ضلت تضحك .
كح سرحان ع الباب لبست ربطة زطلعت ... دش هو يم مرته يسولف وياها ... تمشيت وكفت اعلى باب الهول اعاين الزلام برا واكفة والبساطات مفروشه بالحوش و بالحديقة .
طلع خنجر من الاستقبال و هو لام المنفضات و يصيح : ولك ميمووون تعال اخذ ذن.
جمارة : اطني عنك انا اخذهن
عاين عليه متفاجئ ساعة الشافني جدامه : حتى جلمة الهلا و الشلونك شح بشفاك يهواي .
- مشتاكتلك
- كلش الشوك متبدي و مغركني ليجاي ، هاج هاج اخذي وامشي .
- ليش تحجي وياي هجي ؟
- وتغتاضين ؟
- اعرف انا اجيت ليجاي وما ودعيتك بس ما كدرت اطلع وانت تعرف امي كابسه اعلى زردومي .
- حجتج حدر السانج
- يعني بعد هالشهور و الشوك تلاكيني بهالجفا وانا الجاية واكلك مشتاكتلك .
- الشوك موش حجي يبت امس ، العشك و الشوك فعل وانت فعايلج شحت وياي ، كلت راح تصعد وما ادير عينها عني من الشوك تالي تستكثرين النظرة التعاينيلها بعيوني .
- جا اعاين و اتمعشك ورجل اختي كاعد شنهي جليلة حيا لو ما استحي .
- الكاع محظورة والحجي موش وكته جا عرفت شحجي ، دشي داخل ومرت الاخرى يو لبستي العباية بلا ربطة و اتبغددتي ... احسبي هذا اخر يوم بيني و بينج .
- حجي جديد هاذ ؟
- استلمي جديد منا وغاد
اطاني المنفضات ويا ما جاي يناوشني ولن اهلي يطبون امي وابوي و لالة و الجهال ، امي تسودنت ساعة الشافته صاف وياي عيونها حطن بكصتها ، انا بساع طبيت جوا للمطبخ داخل .
طلع سرحان و حجيه العالي ويا ابوي و هم يحققون ويسولفون بالسالفة ، امي دشت يم هدوة ، دخلت يمهن وهن يسولفن و هدوة تنشدهن: جا ايمان ليش ما اجت وياكم .
كواغد : وين تجي يمه شعدنا ظلت غادي يم فر*وخها بس هاي النمرة بطة ( هند ) جلبت بابوها و جابها وياه .
كعدت اندارت امي علي خزرتني بس ما حجت ضلت هدوة ولالة يحجن وهي ساكته و دايره عني ، خفت لا ادور تتحلفلي و اتجويني .
صاح علي مامون خاطر اسوي الجاي .. كمت لحكتني ، ولنها تلوي لحمة من زندي و تكول : انا شوصيت يبتي
- يمه وعلي اخذت منه المنفضات ما عدي شي .
- المنفضات ولج مامش جهال بالبيت وياخذون واكفة اباب الهول و الزلام تارسة البيت شافج احد ماحود شكولن و شحجي للوادم خايبة انت تريدين اتموتيني ، ولج علي افادي جميييرة
- اخ يمه ايدي وعلي ما اعيدنها بعد يمه ايدي .
- و غمة التغمج ، هساه تبدلين و تردين ويا ابوج ياله بربوك ما تنعافين انت امشي جدامي .
- اي اي بس ايدي عليج العباس يمه .
دفعتني كدام .. عرضنا سرحان : ها خير هكو شي
كواغد : لا انا وبتي نتغشمر ، كول يمه .
- بس الجاي للزلم جمرة .
- اي
سرحان : ام ستار ولو اكلفنج انا لجن جمرة لوحيدها ما تكفي هلبت تخلين البنيات هالجم يوم هنا زلم عدي و يعتاز مرة تشيل الوادم .
- اييي يمه بلايا ما تكول انا جبت لويله خاطر تضل هنا وانا يمها ، بس مناك المتيريسه ظالة لوحيدها و الجهال معلعلينها جمارة تروح ويا الحجي .
- بكيفكم بعد .
جمارة : اغتاضيت حيل كمت الوبن و اخافن اعترض وامي تتولاني ، مشيت لابوي ، نزيته من ظهره بلاية ما تشوف امي ، اندارلي : ها جمرة بويه .
حاجيته وانا عيوني تلالي : بوية عليك العباس خل اضلن هنا يم هدوة وعلي ما اطلع للزلم ولا اوصل الباب بس اريدن اظلن يم هديوة
- اي ظلي
- امي بس تسمع تشعلي العطابة ما ترضى ، لا تكللها انا كلتلك فدوة بوية .
- لا لا ظلي يم اختج وجهالها مالج غرض بامج .
طلعت بساع من ابوي كبل لا تشوفني امي صافة وياه ، ويا ما جاي يروح صاح ابوي : يلا بطة بوية
هند : اريد اظل يم نوسه ومامون العب وياهم .
- باجر اجيبج و العبي وياهم
كواغد : ابو ستار جميرة اخذها وياك انا ولالة هنا .
حاكم : لا لا انت وين بيج حيل جهال و هوسة خل وحدة عد هدوة ووحدة لخطارها امشي وياي انت
- انا يم بتي ما عدي شي
- لا لا ما ارضى امشي عود بالليل نجي
-يا جا اظل رايحة جاية
- امشي جاي اكلج ، حسي لا اطلعينه من الوادم امشي ياله .
صاحت علي بعصبية خاطر امشي وياها اغتاض ابوي و صاح : جاي اكلج هدي البت عد اختها تعاونها شنهي انت بس تريدين تكسرين حجايتي .
- احجايتيش حجي ابتي ارد اخذنها وياي
سرحان : خير بويه شسالفتكم
حاكم : ماكو شي ياله اودعناكم ، بالليل امرلكم .
- هلا بيكم .
طلعوا .. واثاري حاجيه كل الحجي لهدوة ومرزلتها شلون شايفتني ويا خنجر ، ظلت هدوة تحجي علي و تكلي : ظلي يمي لا اطلعين بعد .
ظليت مجابلة الجهال وكاعدة و ياهديوة
لليل خذوا هدية للمستشفى .. ساعة ٣ ردوها وكايليلها للصبح عود تعاي ما عدج هسه ولادة .
وردت تلوم و تصيح يبو الحسن ولا نمنا ولا هجعنا ، للسبعة بالكوات غفت انا مهدود حيلي ريكت الجهال و طلعتهم للمدرسة .
خذاهم خنجر بسيارته ...
اجاني سرحان : خوية بيج ما بيج بس سوي ريوك للجماعة و نامي .
وكفت لا ساعة ولا ساعتين ليما كضيت ريوك البيت كله اهيس حيلي باد ، كامت تصيح هدوة من الوجع
- سرحااان تعال ليه
فز خطية وركض الها و لالة لبست عباتها وعبد الله يبجي وراها شلت عبدلله و دخلت جوا اسكتنه .
الظهر
رجع خنجر حتى ياخذ الجهال من المدرسة ، طلع مروان بالاول ، ووكف بالمفرك جدام فرع مدرسة عبد القادر الجزائري ينطرهم يطلعون خاطر يردهم .
طلع مامون و مؤيد صعد مامون و اميدي يتشاقى وياه ، ظل خنجر واكف ، حجه مامون : عمي شناطر
- غير هاي البت
- نوسة
- اي شو اتاخرت
- ما ادري بس المدرسة كلها طلعت خاف راحت ويا بطة لبيت عمي حاكم
- منين طلعتويا غمه جا غير انا واكف هنا صالي ساعة دنزل بعد عمك بس شوفها بالمدرسة لو لا
نزل مامون ركض للحارس ، كاله : الكل طلع
رجع للسيارة : عمي ماكو احد تلاكي ردت ويا بطة
- بطة ياهي جا انا موش وصيتكم ما تروحون يمنه يسرى تنطروني ، هاذ باب المدرسة يو لاله
- عمي دروح بس شوفه خاف مشت لبيت جدها .
- من نعلعلا الساعة الشفتكم بيها يا ***** ولد القنادرة انا وصيت يو لا ، غير تلزكون بمجانكم انعل ابوكم لابو راعيكم .
لاف السيارة ومشى البيت حاكم دك الباب طلعتله كواغد : ها شنهي هدوة جابت يو لا ؟
- يا صخمه حاجيني بتها اجت ليجاي يو لا
- يا بتها
مامون : نوسة ماكو بالمدرسة خاف جاية ويا هنوده
ايمان : بطة اجت اول وحدة ما اجت وياها نوسة .
لطمت كواغد اعلى وجهه : انا امج يهدووووة ..... يتبع
☆☆☆☆
عيد فطر سعيد وكل عام وانتم بألف خير
للما مستلم عيدية و هاي عيديتي الكم . وان شاء الله التنزيل يومين نشر و يوم استراحة ... و ها گووو كلبكم الجاي صعب .
متابعة شيقة للجميع
#زينب_ماجد