عذريتي مقابل براءتي

البارت التاسع عشر

يارين - اي انتقلت بس شوفي منو يمي

من وجهت الكاميرا على امي كامت تبجي وتكول أكلج يارين تتصورين الله بعد ما يعاقبها

ولا  يعاقبنه لأن احنه شفنه أنواع العقاب

كتلها - شوفي دارين احنه الله شكاتبلنه نشوف

كالت - يارين هنا ابن الشيخ الجبير تمام عرض عليه أطلك من فرقد وهو يزوجني

   كتلها - دارين صدكي احسن ألج ولج شيسوي بيج بعد حتى صحه ما بقت عندج شتنتظرين

لما يموتج

كالت - يارين أطفالي عنده وهو ما راح يعوفني بسهوله والعب ويا فرقد مو سهل

يارين - لا كولي تحبي لفرقد وما تكدرين تعيشين بدونه

دارين - وهذا سبب من الأسباب اني فتحت عيني على فرقد اول لمسه جانت من فرقد

وأول حضن نمت بي جان حضن فرقد وصحيح جان جنت بالبدايه ما أحبه بس بعدين أثنينه

جمعتنه علاقة حب والله شما احجيلج ما صدكين بس هو عيبه يشك بيه وما يصدك اي كلمه

أكولها

يارين - وتصورين اذا رجعتي أله راح يرحمج

دارين - لا يمعوده ما يرحمني بس أطفالي شلون ولج والله كل ما اذكر هذا الصغير شلون اني

بعيده عنه اموت والله ولج هو بروقي جمرة بكلبي انوب هذا الصغير وانتي جربتي فرقد من

رحتي عليهم

يارين  - انتي حره بس اكلج العيشه ويا مستحيلة اني راح أرفع قضيه على عمار وتعالي ارفعي
قضيه على فرقد

دارين - ليش انتي كل عقلج أرفع قضيه على  فرقد اني هو اسمه يرعبني انوب أوكف كدامه

بمحكمه بس اكلج اذا تريدين ترفعين قضيه على عمار اكو باحثه أجتماعيه أصير بنت خالة ضحى

وسجى تواصلي وياها حتى تعرفين شسوين هسه اخلي ضحى ترسله ألج واحجي وياها 

كتلها  -  انتي الظاهر تريدين فرقد والحجي وياج ما يفيد عليمن مدوخه روحي

وانتهى الاتصال بينه على هذا الحد وعرفت دارين تحب فرقد وتريد أي حجه حتى ترجعله

وبقيت صافنه على دارين شلون بهاي السنوات شلون تغيرت تغير جذري وحبها لفرقد  الي

راح يكلفها عمرها

مرت 3 ايام  واتصلت على  الباحثه الزهيريه وحجيت وياها من اتصلت بيها بعد السلام

كتلها - إني يارين أخت دارين الي هي دخيله عند بيت خالتج والشيخ شاهين

الزهيريه - اهلآ وسهلآ تفضلي بشنو أكدر اخدمج