عذريتي مقابل براءتي

البارت الرابع

بقلم الكاتبة الزهيرية الزهيرية
عذريتي مقابل برائتي

محد فهمني من البشر محد حس بحالي
لا حب يداويلي جرح. ولا صاحب الوافالي
ما أريد أي راحه بعد بس هو راحة بالي
لحد يجيني ويعتذر ما عندي واحد غالي
كلهم يخونون كلهم يغدرون كلهم يضحكون من اوگع بشده
منهم شفت ويل دمع وسهر ليل
والجرح ينزف بعدة بس تدري هم صوچي
شعندي باقي هنا ذوله بشر مو خوش
ما فاد بيهم اي تعب حبهم طلع مغشوش
يارين - بعد ما انطاني تمام علاگه وگال هاي أمانه يمچ سلميها لدارين بصراحه بالبدايه قررت انطيها العلاگه بس من شفت شنو بالعلاگه تراجعت وخفت على دارين لا تنكشف لهذا قررت ما انطيها لدارين وأرجعله الأمانة واگله ما قبلت تاخذها وتشكرك وأسد الموضوع من يمي بس انا أريد وأنت تريد والله فعال لما يريد
رحت على أم كرار من دگيت الباب طلعتلي ام كرار فتحت الباب من شافتني
گالت - خير تريدين شي شكو جايه
تقربت عليها وبست راسها
وگتلها - أم كرار أني احبچ وأنتي أختي الله يشهد عليه وأني ما عندي بس الله وأنتي
گالت - أولآ تفضلي دخلي شنو راح نوگف بالباب نحچي
دخلت بس هي بعدها وجهه ثگيل عليه من گعدنه بالمطبخ
گالت - شوفي يارين أني احبچ واعزچ ودارين هم بس اذا واحد مس فرقد بحچايه والله العظيم لو شما تكون علاقتي بي راح أنسى منو هذا الشخص وأصرف ويا كأنه عدوي أنتي متعرفين شنو معزة فرقد عندي مثل ما  دارين عزيزه عندچ أني فرقد يصعد وينزل ويا النفس ما عدنه بس الله وهو
گتلها - اعرف والله بس أني انقهر على دارين لهذا من حرگت گلبي احچي
گالت - سؤال هذوله وين عرفتيهم  وشجابهم يمچ وما معقوله اجوي على غفله لازم عندچ وياهم اتصال يلا اجوي
وحچيتلها شلون خابر تمام ويريد يساعدنه وآني هم قبلت بالمساعده لأن أنتي تعرفين بالظروف
گالت - شوفي يارين أني ما صدكتچ وما أعرف شنو آلي بينچ وبينهم بس انصحچ لوجه الله ابتعدي عنهم ذوله شباب والناس ما ترحم من شوفهم يمچ واذا على دارين أدعي الله يهدي فرقد عليها وگتلچ قبل وهسه هم أگلچ ترى ما راح تگدرين تتحملين تكاليف علاج دارين خليها يم فرقد هو يتحمل مسوؤليتها
وعدتها مالي شغل بولد الشيخ ودارين هم ما أدخل بحياتها لدارين ورجعت ذكرتها بوعدها أنه اروح وياها اشوف دارين وهي  ما قصرت
گالت - انتظري أبدل ملابسي وأجي
وصدگ ما طولت هوايه بدلت واجتي طلعنه من بيتها وهي الطريق كله توصي بيه على يارين لاتحچين آي شي ولا سوين صوت لا يگعدون ألي بالبيت صير مصيبه
اخذنه تكسي من وصلنه
گالت - حبيبتي انتظري هنا خلي أشوف فرقد خاف موجود أو أهلي خاف گاعدين
دخلت تستكشف ورجعت گالت آمان ماكو أحد تعالي حتى اشوفين دارين
دخلت وياها دخلتني من الحديقه على بيت صغير وصلنه قريب على شباك البيت الجام مالته كله مكسروشفت دارين وهي نايمه على فراش بالگاع والبيت فارغ والله شفتها بهذا الوضع لو روحي شاغت لا والمصيبه الأكبر من گعدت وانتبهت عليها شافتني بس ما گامت من مكانها بس من تحركت أنتبهت هاي أيدها ورجلها مكلبچات هنا بعد ما تحملت
گمت احچيي
وگتلها لأم كرار- ليش هيچي مسوين بيها يا ضلام شنو هي مجرمه ومكلبچيها
بس ام كرار خلت أيدها على حلگي
وتگلي - اسكتي لا يگعدون والله ترى بعد ما تگدرين شوفيها
أني هم سكتت وهي اتصلت على فرقد ما أعرف شنو حچت ويا بس راحت ورجعت بيدها مفتاح فتحت الباب دخلنه وهي راحت على دارين فتحت الكلابچات الي بيدها ورجلها واني گعدت يمها أم كرار أعتذرت وگالت راح أروح أسوي ريوگ لدارين
ظلت دارين تباوع عليه أني هم بس دموعنه صب خلت راسها على كتفي مثل قبل
گالت دارين - بعد ما أريد أبقى ويا فرقد أريد طريقه أطلع بيها منا بس أريد أطفالي ويايه
من شفتها بهذا الوضع قررت انطيها الأمانة مال تمام لان وضعها ما ينسكت عليه طلعت من جنطتي العلاگه وانطيتها الها
گالت - هاي شنو
گتلها- هاي دزها الچ تمام
من فتحتها طلعت موبايل
گالت - والله ماكو واحد خرب حياتي غير الموبايل وهسه هم راح ترجع لعنة الموبايل عليه اذا شافه فرقد عندي صدگيني يدفني بمكان ماكو واحد يعرفه روحي رجعي اله گوليله دارين ما تريد كل شي منك
گتلها - دارين أني هم كان هذا ألي بالي بس من شفت الوضع مالتچ اگلچ أخذي حتى أبقى أتواصل وياچ لما نخلصچ من فرقد
گالت - أدري وين أخلي شو البيت فارغ أكيد راح يشوفه فرقد
سحبت المخده وفتحت الغطا ما لتها وسويت الموبايل صامت وخليته بالمخده
وگتلها - شوكت ما شوفين تگدرين تتصلين رمشي وأني أتصل عليچ
اجتي ام كرار جابت الريوگ اكلت دارين واخذت علاجها
گالت ام كرار - يلا يارين خلي نطلع قبل ما واحد يشوفچ
طلعت من يمها ورجعت ام كرار قفلت عليها الباب وهي ظلت بالشباك تباوع عليه راحت ام كرار رجعت المفتاح وطلعنه بس شنو طلعت من بيتهم نار والله العظيم گلت لنفسي اذا ما گدرت أسوي حل لدارين اجي بالليل واذب عليهم بانزين واحرگهم طالما دارين بيتها وحدها والطريق كله أم كرار تحچي ويايه وأني بالي مو يمها  ما أنتبهت إلا لما وصلنه للبيت  وهي هم نزلت ويايه دخلنه لبيتنه وسلمت على أمي ودخلت ويايه للغرفه
گالت أم كرار- أني أدري أنتي نقهرتي من شفتي دارين بهذا الوضع بس أنتي متعرفين هي البارحه شلون تعيط وملتمين الناس
گتلها - شوفي أم كرار أني دائمآ انتبه أنتي ما تغلطين فرقد وهي كله غلطانه يعني شتردين من وحده صار وياها الي صار ويا دارين شلون تصرف
وهي هم بعد ما جادلتني لأن عرفت آي كلام ما راح ينفع ويايه وراحت لبيتها وأني اتصلت على ماهر وهوجاوبني
من رجعت فتحت موضوع دارين ويا
گال - ما عندي أشكال باچر من الصبح اخذچ ونروح نشتكي عليه بالشوؤن
غلقت ويا الموبايل وأني أغلي شيجيب الصبح حتى أروح أشتكي عليه لليل أتصل عليه تمام وبلغته بالي مسوي فرقد بدارين وهو تخبل
گال- أني مستعد لأي مساعده
گتله - باچر راح أشتكي عليه بالشوؤن لان بالمركز ما يشكون
گال - آني أعرف ولد ضابط هناك وهو صاحبي هسه أخلي يساعدچ
بس گليلي أخذت الامانه
گتله - اي أخذتها
وبالفعل انطاني أسم الضابط ورقم تليفونه ورجع أكد انه هو راح يوصي عليه
لثاني يوم الصبح حدود 9 الصبح أتصل بيه ماهر وأني هم بدلت وطلعت التقيت بي خارج منطقتنه ورحت ويا للشوؤن مال وزارة الداخليه بس قبل ما ندخل
گال ماهر - شوفي يارين أريد انصحچ قبل ما ندخل ترى اذا عبالچ راح تحصلين شي من الشكوه ضد فرقد ترى أنتي غلطانه هذا ضابط ومعارفه هوايه والدوله نفسها ما تنطي بضباطها لهذا أرجع واگلچ صدگي ماكو قانون يحميهم لأن يشترون القانون بس أنتي ما عندج قانون يحميچ
بس أني ما اهتميت ودخلنه يم الاستعلامات ما قبلوا ادخل اتصلت على هذا الضابط وهو ما قصر الولد أجى طلع نقيب دخلنه ويا
وحچيتله كل شي
واجى ويانه من قدمنه الشكوه ضد فرقد بشوؤن المواطنين وتركت عنوان بيتي ورقم تليفوني وطلعنه بعد ما شكرته
بس أنتبهت على ماهر ساكت أبد ما حچى من سألته
گال - لمن عندچ معارف المن جايبتني وياچ روحي وحدچ بس الظاهر أنتي صرتي ماتهتمين لماهر بس ارجع اذكرچ والله راح تكونين أنتي الخسرانه الوحيده بس اشكرچ على استغلالچ إلي وياريت بعد ما تتصلين بيه وتمسحين رقمي وطلع موبايله ومسح رقمي من موبايله
گال - بس احب انبهچ على شي واحد قبل ما أروح وهو مو بكل وقت تلگين إنسان يحبچ مثل ماهر وهسه الله وياچ 
وعافني وراح رجعت للبيت وأني ما أعرف ألي صرفته كان صحيح لو لا بس بعد ماكو وقت للتراجع مرات نمشي بطريق يخسرنه هواي أشياء بحياتنه وأشخاص نثق بيهم لهذا ما نعرف نهاية الطريق الماشين بي وهذا الطريق المشيت بي خسرت بي هوايه أول خساره إلي كانت ماهر وهاي من عواقب غبائي
رجع أتصل بيه تمام وگتله على ألي سويته شجعني بعدها
گال - اتصل على دارين ما جاوب ليش
گتله- أني اتفقت وياها ترمش من تكون متفرغه وما عدها شي وما. يمها واحد
شكرني وسديت ويا الخط ورجعت أفكر إذا وصل لفرقد أنه أني بلغت عليه شراح يصير بس هدئت نفسي مر اليوم عادي بس لليل بعد ما عشيت الجهال وأمي ندگت الباب طلعت لگيته كرار
گال - أمي تريدچ 
رحت ويا لبيتهم دخلت سلمت على ابو كرار ودخلت لغرفتهم لگيت أم كرار گاعده تبچي
سألتها - خيرچ بيچ شي
وهي ما جاوبتني شي بس طلعت صدرها وهم نفس الوضع بي عقد هوايه بيهن صغار وبيهن كبار ظليت متفاجئه وهي گامت تلطم على وجهه وتگلي- ولچ يارين أني متأكده راح أموت بي
گتلها - والحل شراح اسوين
گالت - خابرت على دكتورتي وشرحتلها الوضع تگول طالما رجع وبسرعه أكيد هذا هاي غددخبيثه وانطتني موعد باچر من الصبح أروح للمستشفى حتى يسولي عمليه بس هاي المره تگول الدكتورة راح نرفع صدرچ كله حتى لا يرجع بي بعد
وظلت تبچي وأني والله شما أگول واوصف طيبة گلبها قليله بحقها انقهرت عليها وظليت ابچي عليها ما أعرف أسكت نفسي ما أدري أسكت أم كرار وگمت وحضرت وياها شتحتاج  للمستشفى رجعت من يمها منهاره
والله حبي لام كرار مثل حبي لدارين من رجعت لبيتي شفت أمي تقرأ القران بست راسهاوترجيتها تدعي لام كرار ودارين
مر ذاك الليل طويل لساعه 3 اتصلت بيه دارين وظلينه نسولف للفجر نمت گعدت  ب8 اتصلت بأم كرار ردت عليه
وگالت - احنه بالمستشفى ودى أنتظر الدكتوره تجي
تمنيتلها السلامه وغلقت وياها وظليت ما أعرف متردده أروح عليها للمستشفى لو لا لأن بصراحه أخاف من فرقد بس بعدين گلت شيريد يسوي خلي يسوي ما اعوف ام كرار وحدها وصدگ كملت الريوگ لأمي والجهال وبدلت طلعت من وصلت للمستشفى سبحان الله أول واحد شفته فرقد
وهو هم من شافني عگد حواجبه وتأفأف
گال - خير شكو جاييه امشي ولي طلعي بره
گتله - أني اجيت على ام كرار ما جاييه عليك والمستشفى مكان عام مو ملكك حتى تطرد منه
گال - والله وبالله شگد شفت ناس ما عدها كرامه إلى أن شيب راسي الا مثلچن ما شفت أبد أني كم مره نهيتچ وگتلچ ابتعدي عن ام كرار ولا اشوفچ گدامي
گتله - والله عقيد فرقد الطيور على اشكالها تقع احنه اصير عدنه كرامه من نشوف عندك كرامه وطلگ أختي ألي شهرتك بين الناس وتگلك ما اريدك وأنت عندك الكرامه صفر ومچلب بيها ما تقبل تعوفها وحمد لله اعترفت على نفسك أنت شايب وماخذ بنيه بگد بنتك
باوع عليه وگال- من أصير عندچ كرامه وتعوفين عمار وتروحين شوفين منو أبو لابنچ النغل يصير أني عندي كرامه مثلچ
بعدني أريد اجاوبه أجى أبو كرار سلمت عليه وسألته على ام كرار
گال - والله بعدها بصالة العمليات
وأني عفتهم ورحت على صاله العمليات شفت أمه وقمر باب الصاله ويا سبحان الله عفت فرقد استلمني هذني على شكو جاييه حتى تشفين بينه وان شاء الله يوم ألچن أنتي واختچ
گتلها لأم فرقد- لا خاله أني أموت وما أشفى بأم كرار هاي الانسانه النظيفه بس گولي حوبة القرآن إلي حلفتوا كذب طلع بهاي الانسانه الطيبه بس أحب ااگلچ بعد وبعد هوايه راح يحترگ گلبچ ترى الحوبه تلحگ وتسحگ وتاخذ ثلثين من الحگ وصدگي حوبة دارين راح تطلع بيكم احنه مرينه قبلكم بهذا الشي والله عائله شكبرها صرنه هباءً منثورًا وصرنه جوه أيد اليسوه والمايسوى
وهي وقمر تخبلن على تشفين بأم كرار وانتي منو وان شاء الله يوم بعزيز گلبچ
أجى فرقد وأبو كرار وأمه لفرقد تولت القياده على جايه تشفى بحوراء
وأبو كرار ترجاني اروح للبيت وگلي من تطلع من المستشفى تعالي شوفيها
وأني هم عفتهم وطلعت وتعجبت على التأليف إلي يألفنه وگلت لنفسي مثل ما گالت رازقيه الله يساعدچ دارين ظليت أسأل لنفسي واگول ليش هاي الانسانه ام كرار صار بيها هيچي لو بقمر أو أمه هنا الواحد يگول هاي عدالة رب العالمين بس ام كرار يصير بيها هيچي بس العلم عند الله وشنو حكمته ماكو واحد يعرف بي الله سبحانه
رجعت للبيت وأني بالي يم دارين هسه هي وحدها بحجر الثعابين خفت لا يسون بيها شي اتصلت عليها جاوبتني تعجبت
گتلها- شعجب شو جاوبتي بسرعه
گالت - اي مو ماكو أحد بس منتهي وحياة بالبيت وذني ما يجن على  البيت إلي أني بي لان اليوم عملية حوراء
گتلها- على الي صار بالمستشفى
گالت - يارين لا توگفين بوجهه فرقد ترى تخسرين
گتلها - وشنخسر أكثر من هيچي
گالت - قبل شويه چنت احچي ويا رازقيه وضحى
وظلينه نسولف الى ان
گالت دارين  - دى أسمع صوت قريب عليه يلا مع سلامه بعدين نحچي
وسدته ويايه ظليت ما أعرف أفكر بمنو أفكر بدارين لو بأم كرار
بس گلت خلي أتصل بأبو كرار وسأله إتصلت هوايه دگ يلا جاوب من سألته على أم كرار
گال - والله طلعوها من صالة العمليات بس من صحت من البنج أعصابها انهارت وگامت صيح وتعيط وانطوها أبرة مهدئ وهسه نايمه
سألته شوكت تطلع من المستشفى
گال - دكتور يگول خلال يومين نطلعها
تمنيتلها السلامه وغلقته الخط ويا مرت اليومين وطلعت من المستشفى بس شنو من طلعت أعصاب حتى ولدها وبنتها متريدهم
رحت دى أشوفها ظلت تبچي
وتگول - بس أريد أعرف ليش هيچي صار بيه ليش الله دى يعاقبني شنو إلي سويته يارين
گتلها - أنتي ما سويتي شي رب العالمين يحبچ ويريد يشوف انتي تحبي لهذا دى يمتحنچ
بس هذا الكلام ما فاد وياها ظلت دگ وتلطم على وجهه وتعيط دخل ابو كرار وطلع أبره وضربها بالوريد ما مر وقت هوايه حتى نامت
طلعنه من غرفتها
أبو كرار گال - دكتور يگول لازم أبد ما تعوفوها وحدها لأن أحتمال تأذي نفسها وتوصل مرحله تنتحر وأني حاير أني ماخذ أجازه وهسه وياها من أداوم منو يمها
ظليت متفاجئه على الحاله الي وصلت الها ام كرار