عذريتي مقابل براءتي

البارت الثاني عشر

اللهم لا تريني في عائلتي بأساً
يؤلمني ويبكيني

يارين / چنت أريد اطلع من البيت من أتصل بيه أبو الصيرفه وبلغني أنه البطاقة كي كارد السحبت عليها 30 مليون لعملية دارين متوقفه لان مبلغين البنگ انه صاحبة البطاقة الي هي أمي متوفيه
وختم كلامه انه يحرگ البيت علينه اذا ما رجعت المبلغ للعصر وغلق الموبايل بوجهي

رفعت راسي للسما وگتله/ ربي حكمتك الناس كلها تجيها مصيبه وحده بالمفرد ألا يارين تجيها المصايب بالجمله جنت حايره بالحجي هسه حايره بأبو الصيرفة

طلعت واني اسوحل بروحي وادعي كون الله ياخذني حتى أخلص رجعت أفكر بالانتحار أحسن حل أنتحر وأخلص بس رجعت فكرت بهاي المسكينه دارين أخاف أنتحر ويرجعون عليها يأذوها حمد لله أكون خوش عفتلها ورث الناس تورث فلوس وأملاك وإني أورث لدارين ديون
بعدين أرجع على السؤال الأزلي منين اوفي هاي الديون وكل ما يمر الوقت اغرگ بالديون وبالمشاكل أكثر

وصلت للمحكمه حدود الساعه 8ونص دخلت اني عبالي القضيه يم الشرعية شافني هذا الي ياخذ البلاغات حتى يدخلهن يم القاضي شفته دى يلم البلاغات من الناس الواكفه اني هم انطيته التبليغ مالتي

اخذه شافه گال / هنا شرعيه بس طلاگ وزواج ونفقه انتي هاي على الجزائيه روحي هناك بالطابق الثاني
عفته ورحت على الطابق الثاني وصلت يم غرفة القاضي شفت أبو كرار رحت يمه آول ما سلمت عليه بس گلت آبو كرار
رفع حاجبه وگال / اني شگتلچ مو گلت گولي أحمد

گتله/ والله متعلمه اگول أبو كرار حتى متطلع مني اسمك حاف

گال / لا بعد ما مقبوله مال تگولين ابو كرار گولي أحمد بس

بس هزيت براسي موافقه على كلامه اخذ مني التبليغ وانطى لهذا الواگف بالباب وبقينه ننتظر
بعد يجي عمار وهسه يجي عمار وبعد شويه يجي عمار وماكو الى ساعه 12 بعد ما ياخذون اي تبليغ ما حسيت بالوقت ابد لان ظليت اسولف ويا ابو كرار وكلامه كلش حلو ورزن والله تمنيته لو ابويه

صدگ چان يحچي گد ما عجبني كلامه وطريقة واسلوبه ظليت بيني وبين نفسي أگول حقها حوراء چانت تعشقه هادئ بشكل ويصرف بعقل وكلامه موزون وشخصيته تجذب وتعامله راقي هذا كله واني مدققه بتفاصيل وجهه وهو من ماتت حوراء هو كله لابس أسود ناطي سحر وجاذبيه

انتبهت من تخيلاتي هو هم يدقق بتلاميح وجهي
وعلى وجهه ابتسامه خفيفه
گال /انت بغاية الجمال الله يحفظچ لشبابچ بس لا دققين بوجهي خجلتيني بنظراتچ

گتله/ آسفه والله ما قصدي شي بس صفنت
وبعدت وجهي عنه وأني أفكر اگول لأبو كرار على الحجي لو أبو الصيرفة وچنت راح اگوله بس صاحوا بسم عمار وأسمي وما لحگت بعد احچي شي دخلت يم القاضي وعمار ما حضر ولكون هو الدعوه وما حضر تعتبر الدعوه ساقطه لعدم حضور المدعي