عذريتي مقابل براءتي

الجزء العشرون

وين أشوفك يا الصرت عني بعيد

والمن أسأل عنك وانت سراب

تدري  من دونك اني أظل وحيد

وصارت أيامي بدونك بس ضباب

يارين - بعد ما أشتكيت على عمار جان لازم اخلي ببالي راح  أدفع الثمن بس كل شي نحسب

حسابه إلا ردت فعل إنسان ما تحسبين حسابها لهذا ما جنت متوقعه راح تكون ردت فعل

عمار بهاي الطريقه من دخل عليه مثل الوحش وخله حزامه بركبتي ويجر بيه يريد يشنقني

بالبنكه واني أجر بنفسي منه وهو يريد بس يسيطر عليه والله اختنكت أحس الهوه ما يدخل

برئتي من كد الخنك  وأحس روحي تنازع كمت أحس راح يغمى واشوف شلون الجهال تصرخ

وأمي تعيط بس تريد تتحرك من مكانها بين  عيوني الي غوشت وبين الي واعيه سمعت صوت

ام كرار وبعدين رخى الحزام من على ركبتي وتنفست وأم كرار أجتي يمي وهي تعيط عليه

وهي تفرك ركبتي وتكله - الله لا ينطيك لك يا مجرم خنكتها والله الا تشتكي عليك هذا

شروع بالقتل

وعمار يجاوبها - اذا هي مره خلي توصل باب المحكمه وشوف شيصير بيها والله إذ وصلت 

تحسب الله ما خلقها وهذا النغل الي رفعتي بي قضيه عليه انتي تحيرين بي لو تموتين ما

أعترف بي

وعافنه وطلع وأم كرار يمي وتسأل بيه 

وتكول - ولج ضربج على بطنج نزل عليج دم

كتلها - لا ما ضربني على بطني بس انتي شلون عرفتي

كالت - مو كرار جان بالباب من أجى هو  سأل  وناطي عنوانج واجى كالي زوج يارين أجى

عليها

كتله - منين عندها زوج  وبسرعه لبست عباتي واجيت اركض وشفت الباب مفتوح  وسمعت

صريخ الجهال ودخلت لكيته يريد يخنكج أن شاء الله كسر بيده 

ظليت أبجي كتلها - بس كليلي لشوكت راح أظل تحت رحمته

كالت - ولا يهمج والله لا نكلب الدنيا على رأسه هسه أتصل بفرقد وأريد أشوف شلون يتهجم

عليج

واني كمت رحت على المرايه وشفت آ ثأر الخنك بالحزام على ركبتي نرعبت شمسوي بيه

والله الا ادفعك الثمن غالي اجى يسترجل عليه لكون وحدي وما عندي أحد يرده بقت ام كرار

تتوسل بيه حتى أروح وياها لبيتها اني وامي وجهالي بس ما قبلت

كتلها - لو أموت بعد ما أتحرك من مكاني حتى لو يموتني