عذريتي مقابل براءتي

البارت الثامن عشر

  تسألني منو والله استحق ردك

أنه ألما شفت خير وراحه من بعدك

أنه الما قدرت حبك وكتلك روح 

وبحجة ظروف تعمدت صدك 

سمعتك كلام الما يقبله إنسان

شلون تحملتني شكد صبر عندك  

على كل شي انتقدتك جنت قاسي وياك

منك بيش احسن خاطر انتقدك

دارين -من شفته عاف الباب مفتوح ما صدكت نفسي رحت لغرفة النوم بسرعه لبست

جبتي وشالي وأخذت جنطتي الي بيها الذهب والفلوس وطلعت أركض نزلت

وهاي اول مره أطلع وحدي لأن كله أطلع ويا فرقد العماره الي ساكنه بيها اني وفرقد

على شارع عام وكفت سيارة واجرتها حتى يوصلني لأهلي 

جنت أفكر أروح واكول ألهم طلعت براءة وحتى على زواجي من فرقد وحملي

وشلون فرقد يريد ياخذه مني وأطلب منهم يسفروني لإيران حتى لا ياخذ ابني مني

السياره تمشي واني فكري شلون راح اشوفهم بعد ما  مر أكثر من 11 شهر ما شايفتهم 

السائق سألني انتي تندلين البيت من نوصل للمنطقه كتله اعرفها

بس المفاجئة هي لمن فتحت الجنطه وما لكيت اي شي لا فلوس ولا ذهب

جانت صدمه أليه ظليت أفكر شلون راح انطي الاجره ومنو اخذهن 

بعدين طمنت روحي  من أوصل الأهلي  انطي كروته

بعد ما مر وقت وصلت لبيت أهلي نزلت وكتله ينتظرني بس شنو من الخوف أحس

رجليه وحده اطك بالخ من الخوف وصحيح يكولون فاقد الشئ لا يعطيه اني ما انطيت

فرقد الآمان واريد الآمان بوجوده  بس يبقى قدري مرتبط بقدر فرقد

من نزلت يم بيتنا شفت سيارة فرقد فاتت بالفرع ركضت على الباب كمت ادك بيها قوي

ودك بالجرس هو جان أسرع وصل ونزل من سيارته واجى  يمي وجرني من أيدي ويسحل بيه

انفتحت الباب فرحت عبالي راح أشوف واحد من أهلي بس خيبة أملي من شفت رجال

يطلع أربعيني شافنا تفاجأ بينا وخصوصآ من شاف فرقد على جتفه رتبه

كال تفضل سيدي اكو شي

بعده ما مجاوب فرقد

كتله عفيه الي جانوا ساكنين بهذا البيت وينهم

كال والله باعولي البيت وراحوا للناصريه

من الصدمه كمت ما اعرف أبث واستلم كتله يعني بعد ما يرجعون