عذريتي مقابل براءتي

البارت العاشر

قالت لي :

أدعو عليك أن تصاب بدائي

وتموت شوقآ ميتة الآحياء

وتسير بين العاشقين معذب

متعطش من غير رشفة ماء

فقلت لها :

اهلآ بداء أنتي منه دوائي

في عشقك كم يطيب بلائي

يا معشر العشاق اني ميت فيها

وفيها لا أريد عزائي

يارين - بعد ما تعاركت ويا عمار وشفته يستعر مني كمت اتصلت على ماهر

رد كال  - ها يارين فكرتي لو بعدج

كتله - اي ماهر تعال باجر حتى أروح وياك

كال - ما معقوله خفتي من تهديدي شنو الي استجد يمج احجي بصراحه

كتله - ما اكدر اتحمل عمار وأهله بعد يعيروني بيك ويصيحولي الخدامه والضرب والإهانة

واني بعد ما أريد أبقى تبعت والله

كال - مثل ما اتوقعت عمار اذا اعوفج بيده والله يدمرج أكثر من هيجي

كتله - أروح وياك بس تحلف تبقى ويايه وما تعوفني

كال - وعد الحر دين اعوف روحي وما اعوفج واي شي بالمقابل أريد اسالج وجاوبيني بصراحه

كتله - اي سؤال أجاوب عليه وبكل صراحه

كال - عمار هاي الفتره الي مضت جان ينام وياج

بصراحه خفت لا اكول اي واخسره بقيت مثل بلاع الموس لا اكدر أبلعه ولا اكدر اطلعه

بس جان لازم استمر بالكذب حتى أطلع من يم عمار وماهر هو الوحيد الي بيده ينقذني

ويعرف امي وأختي وين استجمعت كل قواي المتهالكه

كتله - لا ما يتقرب مني

كال - حضري نفسج باجر أجي أخذج

على هذا الوعد انتهى حديثي ويا ماهر كمت حضرت مستمسكاتي وخليتهن بالجنطه للعصر

بعد لازم يفتقدون الخدامه مالتهم رجعوا يصيحون على دارين  رحت يمهن ما شاء الله

المطبخ هوسه وهن كاعدات يسولفن ورجعت على الشغل وياهن مر اليوم واني لنص

الليل وياهن وهنه يكولن اشتغلي حبيبتي شو الكعده على مودج انتي وصاحبج

من هذا الحجي الي ما يخلص  كملت بس رحت على المشتمل لحكني عمار

والله هذا عمار ما أعرف أفسر شخصيته بالنهار يضرب ويشك وبالليل يريد حقه الشرعي

ومن يشوفني كالبه خلقتي عليه يضوج