HALIK SA HANGIN (BXB 2020)

HSH SEASON 2: PART 38

HALIK SA HANGIN PART 38: PAHINGA

ZIDERICK

UMAGA na at nagising ako dahil sa pagtama ng sinag ng araw sa aking mukha. Inikot ko ang aking paningin at nasa kwarto pa rin ako ni Sky. Mahimbing pa rin siyang natutulog at kitang-kita ko na mahimbing pa rin ang kaniyang pagkakatulog. Medyo mahapdi ang aking mga mata dahil sa pag-iyak magdamag kaya naman hindi na ako nag-abalang kumilos para sa NSTP class ko, bagkus ay minabuti ko na lamang na yakapin si Sky at hindi ko alam kung bakit tila may sariling utak ang aking mga mata at may pumatak na namang luha mula roon.

"Sky, sana maging okay na uli tayo." Sabi ko sa harapan niya at sumiksik ako sa dibdib niya.

"Pagod na'ko, Zide." Sabi niya bigla kaya napatingin ako sa mga mata niya.

"Anong ibig mong sabihin, Sky. Hindi kita maunawaan. Okay naman tayo ah?" Sagot ko.

"Hihiwalayan ko ba ako kapag nalaman ng mundo na tayo, Zide?" Tanong niya kaya napailing ako.

"Hindi!" Madiin kong sagot pero umiling siya.

"Parang hindi naman, Zide. Hindi ganoon ang nakikita ko. Parang kahit anong oras kaya mo'kong iwanan," malungkot niyang tugon.

"Sky naman. Huwag kang magsalita ng ganyan." Sabi ko at bigla niyang ipinilay ang isang pag-uusap na tandang-tanda ko pa.

"SA tingin mo, Jepoy, healthy pa ba 'tong relasyon namin ni Sky?" Tanong ko Jepoy isang hapon sa itaas ng rooftop ng aming building.

"Bakit mo naman naitanong?" Sagot naman niya.

"Wala lang. Napapaisip lang ako kung bakit parang ayaw ng mundo na maging kami ni Sky," sagot ko.

"Dahil lang do'n?" Tanong pa niya.

"Actually, nagdadalawang-isip ako kung hihiwalayan ko si Sky. Mahal ko siya pero hindi ko siya kayang ipaglaban. Hindi ko alam kung hanggang saaan kami at hindi ko alam ang  mangyayari kapag nalaman ni Tito ang lahat." Seryoso kong sagot.

"Kaya hihiwalayan mo siya kapag hindi naging ayos ang lahat? Ganoon ba, Zide?" Muling tanong ni Jepoy.

"Hindi sa ganoon, Poy. Ang sa'kin lang ay wala akong kakayahang labanan ang si Tito Arman. Marami siyang kayang gawin para paglayuin at paghiwalayin kami ni Sky kaya napapaisip lang ako." Sagot ko at tumabi siya sa akin.

"Mali 'yan, Zide. Dapat hindi ka ganyan mag-isip, Zide. Hindi mo dapat iniisip na hiwalayan ang tao lalo na kapag mahal mo," payo pa ni Jepoy na totoo naman.

"Hindi ko alam, Jepoy. Kabado lang siguro ako kaya naisip kong hiwalayan na si Sky. Maling-mali. pero kung iyon na lang ang natitirang option ay hihiwalayan ko si Sky." Sabi ko pa at napatingin na lang ako sa langit habang inaalala ko kung saan kami nagsimula ni Sky.

"Dahil lang d'yan ginaganito mo ako, Sky?" Tanong ko sa kanya at umupo kami parehas.

"Ewan ko, Zide. Kung hihiwalayan mo ako ay gawin mo na. Huwag mo ng patagalin para hindi ka na nahihirapan sa'kin. Ang dali sa'yong sabihin na hihiwalayan mo ako kahit alam mong mahal na mahal kita, Zide. Bakit ganyan ka?" Aniya kaya nasapak ko siya ng isa.

"Nasabi ko lang 'yon, Sky dahil hindi ako kasing tapang mo. Hindi naman porke't mahal kita aY matapang na ako laging harapin ang mundo. Sky, I am sorry kung narinig mong nanghihina ako pero sana hindi ka nagkakaganyan. Sana pinapalakas mo pa ang dibdib ko dahil nahihirapan din ako." Sabi ko sa kanya at napahawak ako sa dibdib ko dahil sa napakaraming dahilan. Una ay ang usapan namin ni Jepoy na na-send sa kanya at pangalawa ay ang bigat sa dibdib ko dahil nagbitiw siya ng masasakit na salita.