HALIK SA HANGIN (BXB 2020)

HSH PART 12

HALIK SA HANGIN PART 12: AKO ANG BAHALA SA'YO

ZIDERICK

ARAW na ng Lunes pero hindi pa rin mawala sa isip ko si Nanay at kung bakit nagtungo siya sa tirahan ni Sky.

"Baka naman nagtatanong lang." Sabi ko sa harapan ng salamin.

"Pero pwedeng hindi rin." Dagdag ko at bigla akong sinapok ng mahina ni Danny at  Arkin.

"Aray!" Reklamo ko kahit hindi naman talaga masakit.

"Para kang siraulo, Zide. Kinakausap mo ang sarili mo sa salamin kahit nandito ka. Okay ka lang ba?" Sagot naman ni Arkin. Imbes na sagutin siya ay tinawanan ko lang siya at nagkamot ng ulo at tiningan ko ang cellphone ko. Mag-aalas otso pa lang ng umaga at nine pa ang klase namin ni Danny kaya napailing ako.

"Zide, okay ka lang?" Tanong ni Danny at hindi ko siya pinansin at iniwan ko sila na nakanganga dahil humiga na lang ako sa kama ko.

"Zide!" Bulalas pa ni Arkin at Danny kaya naman sabay kaming natawa ni Roniel na kanina lang ay busy sa pagbabasa.

"Kayo ata ang siraulo." Wika ni Roniel at ako naman ang tumawa.

"Magsama kayo ni Zide! Lakas niyong dalawa!" Sabay pa silang dalawa at lalo kaming natawa ni Roniel. Sabay na sabay kasi silang dawala. Parang mga tanga lang pero nakakaaliw silang dalawa.

Makalipas lang ang ilang minuto ay nag-ayos na kami ng gamit ni Danny dahil kami ang may maagang first subject habang 'yong dalawa ay hapon pa ang klase. Nakakainggit lang.

"Zide, tingnan mo 'yon." Ani Danny habang naglalakad kami sa hallway ng dormitory. Mayroon kasing nagkukumpulan sa baba kaya naman nagmadali kaming lumakad at nakita namin na patay na ibon lang pala.

"Malas daw 'yon." Sabat bigla ni Danny nang makalampas kami sa mga nagkukumpulang dormers.

"Paanong malas?" Tanong ko dahil hindi naman ako naniniwala sa pamahiin na 'yan kahit na taga Probinsya ako. Mas may sense pa rin sa akin 'yong logic.

"'Di ba sa tapat ng dorm natin 'yon nakita?" Tanong niya sa akin at tumango naman ako. "Kung ganoon ay mayroong babagsak na isa sa mga nagdo-dorm." Aniya kaya napahawak ako sa tiyan ko at tawa ako ng tawa.

"Seryoso ka d'yan?" Natatawa kong tanong pero mukang naasar siya sa sagot ko.

"Seryoso nga kasi ako pero ikaw na ang bahala kung maniniwala ka o hindi. Wala namang mawawala." Sagot niya.

"Walang mawawala? Katinuan ko siguro ang mawawala kapag naniwala ako." Sagot ko sabay tawa kaya binilisan niya ang paglalakad kaya't ganoon din ang aking ginawa.

"Dan, wuy!" Tawag ko sa kanya at mas binilisan niya pa ang paglalakad.

"Dan, hintay. Hinahapo na'ko." Biro ko habang nakahawak sa dibdib ko na animo'y naghahabol ng hininga. Effective ang drama ko dahil huminto siya at iniabot sa akin ang tubig na dala niya. Agad ko naman iyong kinuha at ininom.

"Okay ka na?" Tanong niya at tumango na lang ako bilang sagot.

"Pinag-alala mo'ko, loko!" Aniya at inakbayan pa ako at gaya no'n ay naging okay na kaming uli.

KINATANGHALIAN ay hindi na ako sumabay kay Danny kumain dahil nagtitipid ako. Imbes na sa canteen ako pumunta at dumiretso na lang ako sa dormitory at sakto namang nakita ko si Sky na papalapit sa akin.

"Anong oras ang next class mo?" Tanong niya sa'kin bigla.

"Two-thirty pa." Sagot ko.

"Good! Sabay na tayong kumain. Libre ko." Aniya.