📜اشباه الرجال (مكتملة )📜

part108

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 108●°

كامل و هي كاتفيق مع الفجر تصلي بحكم زاينة كاتجي عندها و تفيقها و تنزل تصلي معاهم ! غير سالات صلاتها لي كاتعكز عليها غير زاينة لي كاتقنعها و تبززها عليها حتى تولفها .. طلعات لبيتها و بدلات حوايجها لبسات كسيوة و لاحت عليها الشال ديالها عاد رجعات نزلات و عقلها كامل لي مع عُمر لي سافر يوميين هادي بلا مايگول ليها والو حتى من التيليفون باقي محيدو ليها من داك النهار الكحل عندها ماهضر معاها كايجي ينعس و ينوض يخرج كاعي منها دبصاح و هي هادشي بدا يقلقها كتر و كتر و كل ليلة تبات تبكي بلا صوت حداه ! .. عارفة راسها غلطات لكن تحملات عقاب كبير على الغلط لي دارت طول هاد اليام كاتمشي تدوز وقتها مع اولوف و لكن عقلها مامعاهاش عقلها غير معاه هو ! .. توحشاتو بزاف ماقدراتش على فراقو و على تجاهله ليها .. دخلات عند اولوف فاش حلو ليها الباب مشات عنقاته كاتبوس فيه ..

ياقوت( بنبرة حنينة) .. اووولووف حبيبي ! ( حطات وجهها على وجهه

) .. سماحلي ماجيتشي عانداك البارح كونت مريطة ( .. غرغرو عينيها كاتشكي) .. عُمر مكايهضرشي معايا سافر و خلاني بوحديتي كانتحراق علو .. ( باستو ) .. تواحشتو (مسحات دموعها لي طاحو) .. هو عارفني مكنقدرشي نعوس بلا بيه و خلاني ! غير يماه خالتو زاينة كاتنعوس عاندي علاما يدجي .. ( رجعات كاتضحك غير بزز منها) .. بغايتي نخورجك من هنا ؟ نمشيو غير أنا و نتينا بواحدنا ..

شدات الجام دياله و خرجاتو و هو كايلعب بديله .. من نهار هداه ليها عُمر و هي مكاتفرقش عليه ولفاتو بزاف و فأغلب الأوقات كاتكون معاه .. جات عندها بنت واحد من العساسة لي كاتكون مرافقاها لحمايتها فاش كاتركب عليه .. عاوناتها حتى طلعات فوقه و تبعاتها بواحد من الخيول من لور .. حتى بدات تجري بيه

بشوية دازت بيه من الطريق لي كايدخل منها الخدم لي فالڤيلا حتى لمحات مينة دخلات منه بدات تشوف فيها بنص عين و لي هازاه فقلبها من جيهتها مكايعكسش النظرة ديالها كانت كاتشوف عادي ماشي كيما كانت كاتشوف قبل ! و ياقوت كاع ماتسوقات ليها عارفاها محاملاهاش و هي ماشي أقل منها واخا عمر مينة بينات ليها شي حاجة ولكن مايخفاوش عليها الشوفات لي كانت كادير فيها ! ..

دارت الجردة كاملة بلا ماتمل مع اولوف رجعاتو لإسطبل و دخلات لڤيلا لقات زاينة جالسة مع عائشة كاتوريها شي تصاور فالتيليفون مشات جلسات معاهم ..

زاينة( .. إبتسمت فاش شافتها) .. اجي تشوفي اجي ! كنت بغيت نعيطليك من گبل ولكن گال ليا العساس خرجتي اولوف !

ياقوت( .. قربات وجهها كاتشوف معاهم التصاور حتى حلات فمها بذهول) .. وااو ! كادحماق تبارك الله .. كونت مع اولوف خارجتو شويوش لبارا ..

زاينة: .. كي جاتك ؟

ياقوت: .. مزيونة بزااف و فاش غاتفرش غاتولي مزيونة كتار ..

رجعات كاتشوف معاها فدوك تصاور د الڤيلا لي كانت صغيرة مناسبة للأسرة فقط ..

عائشة : ماگلتيليش ديالمن ا مّا ؟

زاينة( كاضحك ) .. حتى لمن بعد و تعرفو !

قاطعات حديثهم وحدة من الخدم جات عند زاينة ناضت عندها كاتوشوش ليها فوذنيها و كاتشوف زاينة فياقوت وتبتاسم عيطات عليها تنوض عندها حتى جات و همسات ليها فوذنيها ..

زاينة: .. سيري شوفي راجلك راه جا !

ياقوت( .. وسعات عينيها) .. عُمر جا ؟

زاينة( .. طبطبات على ظهرها و باستها فخدها) .. واه ابنتي راه جا سيري شوفيه و تناقشي معاه بينك و بينو ! ..

هزات ياقوت يديها و باستها عاد مشات و رجعات زاينة عند عائشة جلسات حداها ..

عائشة( بنفور) .. شفتك وليتي تعامليها بحالي و حسن مني كاع ؟ و بان ليا بحالا نسيتيني و وليتي تديها فيها بزااف لا نتي لا خويا ..

زاينة( .. خرجات فيها عينيها) .. حاشا ابنتي! كولكوم بناتي و كبيداتي ماتگوليش هكدا !..

..