📜اشباه الرجال (مكتملة )📜

🌪الفصل الاول :جرح الروح🌪

°○ الكاتبة: إكرام أوشريف(ي)○°

  #الفصل الأول:جرح الروح🫀
°●الجزء: الأول(1)●°

- الواد وسط الحجار و الشجار ضايرين بيه الشتاء كاطيح بغرازة فصل الشتاء و الثلج حتى هو على الأبواب .. !
- جالسة على حجرة و طفلة فعمر 3 سنوات كاتلعب أمامها عاجباها الشتاء كاتلعب فيها و تهز راسها تحل فمها كاذوق من أمطار الخير .. ضحكتها الرقيقة بحال جسدها مسموعة فأرجاء المكان مستمتعة بالجو لي هي فيه حوايجها خفاف و صندالة دالميكة لي فرجليها البرد قتلها و صابرة ليه لقات فرصة و مابغاتش ضيعها و هي شحال طلبات و زاوكات باش تخرج تلعب فالشتاء ..

- شافت فمها لي جالسة على الحجرة دموعها مكايحبسوش ! ديما تاتشوفها على هاد الحال و هي على عقلها صغير ظناتها بغات تلعب .. مشات كاتجري لعندها عنقاتها من رجليها ..

***(بصوتها الطفولي قالت ليها): ماما ماقدرتيشي تلعب حيت كبارتي ياك ؟

- طلعات على الحجرة باش تكون قريبة ليها ..

***(كاتمسح ليها فدموعها لي على خدها):
نوض لعاب معايا مغايشوفكشي حد .. (حطات يديها الصغار على فمها و حيداتهم تاني ) .. ويانا مغانقولهاشي لحتا واحيد ..

-فينها هي ! أصلا مكايناش فهاد العالم كلامها ماسمعات منو حتى كلمة عينيها نيشان فالواد و عقلها خدام هي فقط حاسة بيها جالسة حداها مدة و هي ساهية و عقلها فيه فكرة وحدة ! .. الطفلة حداها كاتشوف فيها بعيون مدمعة قلبها حساس و فاش شافتها ماحبساتش البكاء بكاتها معاها ! .. مدة و هوما على حالهم الطفلة جاها البرد كولها فازكة عيات من اللعب ..

ياقوت(نغزاتها بصبعها باش تلتافت ليها): ماما فيا البرد ! ..

- أخيرا دارت ردة فعل  .. دورات وجهها تقابلات معاها و كاتبتاسم فوجهها إبتسامة مليئة بالحزن ! .. عيونها نظرتهم غريبة و كايدلو على بزااف دالحوايج و أي إنسان حزنه كايتجمع فعينيه ! ..

***(عنقاتها لحضنها كاتبوس فوق شعرها وشدات وجهها الصغيور بين يديها ): مابغيتينيشي نرتاح؟ .. (كاتلعب فشعرها و كاضحك ليها ): وترتاح حتا نتينا ؟

ياقوت(مسحات دموعها بكمام التريكو و قالت بإبتسامة طفولية): يانا مرتاحة .. (دلات شفتيها بقلق فاش ركزات فعوينها لي كايتساقطو منهم الباقي د الدموع): .. نتينا لي مامرتاحاش ! ..

***(كاتبوسها فكاع أنحاء وجهها): نتينا بغيتي يماك ترتاح؟ ..

ياقوت(وسعات ضحكتها و قالت ببراءة): اااه إدا رتاتحيت نتينا غانفرح بدزااف ..

***(طلعات ليها رأسها لفوق و أشارت بصبعها لسماء ):
روحي غاترتاح بدزااف تما .. شفتيه ؟

ياقوت(نزلات راسها و شافت فيها بعدم فهم): ولكن كيفاش غانعملو و نطالعو لفوق؟ .. (رجعات شافت فسماء و قالت بتساؤول ) .. نمشيو فالطائرة؟ (كاتشرح ليها بيديها الصغيورين) .. هاديك لي (صغرات صباعها) قودهاكا شفتا بعيني  ..

- قلبها كايتحرق ماقدراتش تستحمل و انفاجرات بالبكاء كلامها البريئ كمل عليها و هي الخطوة لي بغات ديرها صعيبة عليها و فنفس الوقت ظنات أنه غاتريحها من عذابها ! ..

***(حبسات شهقاتها بزز و قالت بصوت باكي و أشارت ليها جيهة الواد): لا لا! غانطلعولا من هنا ..

- ناضت لاحت عليها حايكها لي طاح و نوضاتها معاها الطفلة شدات ليها فديها ..

ياقوت(كاتشوف فيها من لتحت بحكم فرق الطول و نطقت بتساؤول): ماما إدا ميشنالا من تما غايشربنا الماء قبل مانوصلولا !! ..

- لارد! فقط اكتفت أنه تجرها معاها لجيهة لواد حتى وصلو لحافة و وقفو كايشوفو فالواد لي كان مجهد على غير عادته .. بحكم الشتاء لي كاطيح زادت ليه الماء .. عقلها مافكراتش ولو للحظة أنه غاضيع معاها روح ثانية من غير روحها هي لكن كل همها أنه ترتاح من العذاب لي كاتعيشه .. طلقات من يديها و عطات بظهرها لواد مع كاترجع لور كايزيد الماء يطلع مع جسدها مدات يديها لطفلة لي كاتشوف فيها شنو غادير ! ..

***(إبتسمت ليها و يديها باقا ممدودة): جي عندي ؟ ..

- الطفلة غير سمعاتها شنو قالت تبعاتها حتى قاسو رجليها الماء و عينيها فقط على اليد ديال ماماها باغا تشد فيها و كلما باغا توصل ليها كاتدخل الأم خطوة لداخل حتى و صلات لوسط و الواد كايجرها معاها . ياقوت شافت أمها بعدات عليها و مابقاتش كاتبان ليها فقط الحايك باش مغطية لي بان ليها جرو الواد .. شوية بانت ليها يديها كاطلعها ليها من فوق الماء كاتبقبق و كاتصارع الموت ! .. حتى فجأة اختفت ! .. الياقوت  تخلعات و بدات تبكي و كاتعيط ليها بسميتها .. كاتزيد دخل لداخل لواد تقلب على ماماها حتى غوتات بألم فاش حسات برجليها شداتها حجرة بين حجرة أخرى .. و قفات مضاربة معاها تخرجها لكن بدون جدوى وهي عن غفلة على الواد لي كايزيد يجهد على الأول حتى حسات بضر••بة قوية جاتها من طرف الماء لي تجهد خلاها تفقد توازنها و طاحت على راسها فوق حجرة كبيرة فاقدة الوعي و الدم كايتقطر من جيهة جبهتها و كايسيل على الحجرة و غادي مع ماء الواد ! ..

#في_معظم الأحداث التاريخية كان المجهول إمرأة <<فرجينيا وولف>> ...!♡

_(يتبع الكبيدات)❤