📜اشباه الرجال (مكتملة )📜

part66

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء:  (66)●°

ياقوت من كلامه حسات بالدنيا دارت بيها ماعرفات تبكي ولا تضحك ! .. لهاد درجة شاك فيها ! لهاد درجة ظن فيها شي حاجة مكايناش ! .. مابغاتش تبكي مابغاتش تزيد تقهر راسها يكفي داكشي لي دوزاته معاه و العذاب لي شافته معاه .. حنات راسها بلا ماطيح دمعة وحدة .. كارزة على ظفرانها وسط يديها ماباغاش تبكي .. دخلاتها معاها و هو بقا واقف حدا الباب كايتسنى بفارغ الصبر ! .. ماراضيش أنها تبات مع واحد فداره هو صيفطها على أساس الزواج حتى داز شحال عاد عرف بلي محمد مات و بدا يقلب عليها هي و ظن أنه كاينة عند باها حتى صدمه بلي قبل ماتمشي عند باها مشات مع واحد أخر لداره ! واخا عُمر غير عاونها و بجوج بيهوم هو و ياقوت مكانتش فنيتهم شي حاجة خايبة كيما يحساب ل خيري ! .. لاخرجات و قالت ليه القابلة  بلي راها تقاست يطلع روحها و مايبردش ! ..

دخلاتها معاها لدار و جلساتها فواحد البيت فيه مفرشين زرابي تقليدية و الشمع وسط الطبيلة لي من الخشب  .. و المخاد صغار قاصحين تكات على وحدة منهم و عينيها فالسقف لي بدوره مشدود بالخشب ..

القابلة(مشات تاتقلب على شي إيزار تغطيها بيه و كاتهضر معاها بعتاب): .. و شكون يالعايلة هايد الملعوق لي ضحاك علك بيجوح كلمات .. (فاهمة كولشي غلط) .. عجباك زينك يالعايلة و ضيعتي راسك و شرفك .. (جبدات إيزار من الصندوق لي فزاوية دالبيت و تنهدات) .. و شني غاتعمال دبا و فاين تعطي راسك ياضْحية الغرام ..

ياقوت(كانت ساكتة و جالسة كاتسمع ليها كلامها زاد حك ليها على الحرح عينيها غرغرو ماقدراتش تحبس البكية و قالت بصوت مغنغ): .. ماعملت والو! ماعملت والو ..

القابلة(جلسات حداها و بين يديها الإزار): .. حيد سروالك العايلة و ماتزيدشي تهضار ..

ماحملاتش راسها فهاد اللحظة! .. حسسوها بحالا بصاح نيت دارت شي حاجة خايبة .. لاحت عليها القابلة الإيزار و بدات تحيد سروالها تحته و تبعاته السليب حتى بقات عريانة لتحت .. بدات تقلبها و كلما كاتقيسها كلما كاتزيد تخسر ملامحها كارهة هاد الموقف لي تحطات فيه .. !!

بدات تلبس سروالها كاتمسح فدموعها لي طاحو بلا هواها .. لاحت شالها على راسها لي كان طاح ليها .. خرجات من تما بلا حتى ماتسمع للقابلة يكفي انها تايقة فراسها و عارفة بلي مدارت والو و مغايزعزعوش تقتها فراسها بهاد الأفعال !! .. لقات خيري واقف حدا الباب دازت من حداه بلا ماتشوف فيه .. و هو كيعيط عليها ومن نبرته باين مزاله غضبان .. داته بدات ترعد عليه من فرط الأعصاب حتى جرى باش يتبعها مايقدرش يجريه بسبب رجليه ..
..#التتمة

خرجات عنده القابلة تتشوف فيه كيفاش باين فيه معصب و مناويش على الخير ..

القابلة(تنهدات و قالت مخاطباه): .. العايلة عزبة عومورا تقاست ..

خيري(صعقه كلامها و فنفس الوقت ريحه شوية و خفف غضبه): .. يرحام يماك !ريحتيلي عقلي !

ياقوت رجعات لدار ولاحت شالها لأرض و دخلات نيشان كاتقلب على حليمة لقاتها فالكوزينة طاحت عليها معناقاها كاتبكي فحضنها و تشكي ليها على ماجرا فيها هاد النهار و حتى البارح !! .. خيري دخل لدار و نكيره ماحبس باقي كيعاتبها و كيخاصم عليها .. واخا القابلة خبراته بلي باقا عذراء لكن مابردش من جيهتها ! ..
..