📜اشباه الرجال (مكتملة )📜

part88

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 88●°

عضات فمها و جلسات على سريرها مغوبشة و الدموع تاينزلو ليها .. تقادات و حطات راسها على المخدة و عينيها على السقف مابغاتش تنعس حتى يجي حيت مستحيل تنعس بوحدها كاتخاف .. دازو ساعتيين و هو باقي ماجا حتى النعاس مابغا يجيها بالخوف حتى الحال بدا يصبح .. ناضت من بلاصتها و هزات تيليفونها رجعات لتصويرة كاتشوف فيها كانت قديمة واقف فيها قدام برج إفيل .. كان صيفطها ليها فاش يالاه مشى لفرنسا  .. تنهدات و مسحاتها و زادت كاتقلب ياكما كاينة شي تصويرة أخرى ليه قلبات مزيان و عاودات قلبات عاد طفات التيليفون .. و شدات راسها بين يديها و هي باقي كاتسنى فيه حتى عيات و ناضت من بلاصتها دخلات لدوش و دوشات عاد خرجات بدلات حوايجها ولبسات بيجامة و لاحت عباية طويلة عليها مع الشال غطات بيه راسها هزات تيليفونها و خرجات من البيت نازلة لتحت حتى تصادفات مع الحاجة لي ناضت تصلي و من ملامح وجهها باين فيه معصبة .. بانت ليها ياقوت قدامها عيطات عليها بصوت مسموع  ..

الحاجة فاطمة ( .. شادة عكازها فيديها ) .. اجي عاونيني اجي !! .. ( .. سمعاتها ياقوت و جات حتى وقفات عندها و الحاجة عاقدة فيها تعابيرها) .. عمري ليا الماء نتوضأ صلاتي فاتتني ..  سخني ليا الماء ! ..

ياقوت( .. حركات ليها رأسها) .. واخا .. ( يالاه بغات دور تمشي حتى تعرضات ليها وحدة من الخدامات يالاه فاقت ) ..

الخدامة( بإبتسامة) .. صباح الخير الالة .. ( شافت فالحاجة) .. راه كاين السخان الالة ماتحتاجش تعذب و تسخنو!!..

الحاجة فاطمة ( .. زيرات على عكازها)  .. نتي سيري وجدي الفطور ابنتي و .. ( شافت بنص عين ف ياقوت) .. توجد ليا الما ..

حنات راسها عارفة ناوايها هي ماشي بغلة باش ماتفهمش !! .. لكن فضلات تنفذ طلبها و ماتخلقش موشكيل معاها من الأول .. دخلات نيشان لكوزينة لي كانت مرتبة و تقليدية الفيلا كاملة دراوها تقليدية و داخل فيها شوية دالعصري بطريقة لائقة  .. جوج خدامات واقفين فيها و معاهم حفيظة .. مشافتش جيهتها كاع .. مشات نيشان كاتقلب على المقراج تسخن فيه الماء حتى قاطعاتها حفيظة ..

حفيظة: .. بلاتي بلاتي !! .. ( مشات حلات البلاكار دزاج جبدات منه طيرموس لي كايسخن الماء و شافت فيها) .. سخني فهادا !! .. ( عمراته بالماء و دارتو فالضوء) .. خمسة دقايق و يسخن ! ..

ياقوت( .. شافت فيها ببرود و حلات الماء عمرات المقراج) .. ربي يخاليك ولكن أنا بغيت نخسنو هنا ..

سدات الماء فاش عمر و طلبات من وحدة فالخدم تشعل ليها البوطاكاز .. و حطاته عليه تسنات حتى سخن و طفات عليه و خرجات من الكوزينة مخليا حفيظة كاتشوف فيها عاقدة تعابيرها من التصرف لي دارت معاها ! .. مشات كاتقلب على الحاجة تدي لها المقراج لقاتها فبيت الوضوء القسم لول دالنساء و القسم الثاني خاص لرجال .. دخلات عند الحاجة و حطات ليها المقراج حداها ..