Sa mundong ito, na kung saan lahat nakikipaglaban,
Nakita kita sa gitna, lumuluha at duguan,
Balisa ka't tila gusto nang wakasan-
Ang buhay para sa walang kwentang dahilan.
Hindi mo alam na pinapanood kita,
Ganyan naman lagi, hindi mo ako nakikita,
Gayon paman, nakahanda akong sagipin ka,
Dahil buhay mo'y higit pa sa aking hininga.
Dito sa mundong kasiyahan ang iyong kamatayan,
Ako ay iyong pananggalang,
Ikaw ang hari at ako ang iyong sundalo-
Nakahandang itaya ang buhay ko, mapanatili lang ang sa iyo.
Hayaan mo lang ako,
Magtiwala kang kaya ko,
Kaya kong gamutin 'yang mga sugat na iyong natamo,
Kaya kong linisin ang putik na nakadikit sa'yo,
Hanggang sa mawala na ang kirot,
At ang mga maruruming ala-ala na bumahid sa iyong pagkatao.
Matulog ka-
Babantayan kita,
Magpahinga ka-
Hindi ko hahayaang gambalain ka nila,
Ayos lang maging mahina,
Pansamantala-
Ako ang magsisilbing lakas mo sa lahat ng pagdurusa,
Hanggang sa dumating ang umaga,
At kaya mo nang mag-isa.
Hindi ako isang bituin,
Subalit maaari mo akong tanawin,
Dito sa mundong makulimlim-
Maaari kang sa akin ay humiling,
Gagawin ko ano man ang iyong naisin,
Ako ang magsisilbing tanglaw mo sa dilim.
Poprotektahan kita-
Laban sa kanilang mapang-api't mapanghusga,
Hindi ko hahayaang magalusan ka,
O dumaplis man lang sa balat mo ang mga pasakit na ibabato nila.
Ako ang sasalo sa lahat ng iyong problema,
Ako ang magdadala sa mga pasanin kung nabibigatan ka na,
Tutulungan kita, manalig ka;
Tulungan mo rin ako, alisin natin 'yang iyong pangamba.
Maghihintay ako-
Sa araw ng pag bangon mo,
Sa araw na muli mong itatayo ,
Ang iyong matayog na imperyo.
Sa araw na iyon, hindi ako ang katabi mo sa trono,
Pero sapat nang ako ang iyong nangungunang sundalo,
Ipag-utos mo lang at ito'y masusunod,
Magiging tapat ako at mananatili sa pagkayod.
Kaya, magpalakas ka,
Dahil may naghihintay sa iyong umaga,
Manatili kang buhay at humihinga,
Sa ngayon, ako muna ang bahala sa iba.
007
Ang Iyong Sundalo
07/05/18
Azclar