#كحل_عرب
(احضان باردة)
(((بقلم زينب ماجد )))
الحلقة_٢٦
(كتلة ال شمخي)
جبتهن بالتدرج هاي تدفع هاي
ومسايس عمر يا هاديَ اتهدّي..
الم بيهن سنة وتفلت سنة من الخيط
طشة وما نفعها اتبلبسي وشدّي..
- عريان السيد خلف ||
دخل مؤيد للبيت ، نانة وريحانة و نجوى كاعدات بالحوش منتظرات خبر من وحدة منهن ... فات فزتله ريحانة : شلونها حبوبتي ، عليك الله كول
مأمون : شصاير ما افتهمت من ابوي شي عباس شمسويلها ؟
ريحانة : طكاها وطاحت للكاع وبعد ما كدرت تكوم عمت عيني عليها والله لو صار بيها شي اكتل روحي وراها
- كولي يا الله ، هسه اخابرلهم
كض التليفون وخابر على ابوه .. ونانة كامت طبت جوا ، رد سرحان : ها بويه
- ها يابه شني شبيها الحجية
- بالله تعال ليه هذا عبيس شنسويله كلي .. شلون بيه
- صدك طاكها يعني
- بس طاكها يبوي المرة انشلت
- لاااااا ، عليك الله صدك
- اي وعلي يا بوية هدوة انتهت كلش وهسه انا مبتلي اعاين للحجية يو لهدوة من كون بحظه وبخته ناخي العباس ابو فاضل
- مالها علاج يعني
- بويه مرة خشت بال٧٠ يا علاج يعالج التهشم تظل ممطولة ليما الله يشافيها .
- ما تستاهل بالقرأن كلش قهرتني ، هسه هذا من اكضنه وابتلي بيه واحطه بركبتي هكو احد يكلي ليش ؟
- وسن شنهي ما جابت
- لا بعدها لليل هم متانيها وظال مربط لا اني الجايكم ولا اني الماخذها
- ظل وياها بويه ، عينك عليها ، وانا شيصير اخابرنك .
سد الخط اندار لنجوى سألها : ياهو البالبيت
- محد بس اني ونانة و ريحانة وجهالك
- ومؤيد ؟
- اجا ليجاي من درى وراح لحكهم
- ما درى بعباس ما سواله شي ؟
- لا عباس طلع كبل لا يجي
طب جوا صاح : نانة
من فوك ردتله : هااااا
- شني الها نزلي احاجيج
نزلت ع الدرج حواجبها مطبكة ، كال الها : تظلن هنا وحدجن تعالن للبيت اقلها
- ما علينا شي
طاحت عينه على ايدها : هاي شمالها ايدج ؟
- عباس طكاني
- شني هذا تسودن لو شنو ، شيريد على شنو تعاركو
- ما ادري
- شبيج انت
بس حجه بجت ، تقرب منها : شبيج احاجيج كليلي
-ما بيه شي
- جا علموديش تبجين ؟
- من الخير
عافته وصعدت ..
صف سيارته شاهين ودك الباب وطب سلم على ريحانة وكال الها : عمتي وين لعد ؟
طلع مأمون من الباب مال المطبخ ونجوى تجاوبه : راحت ويا حبوبتي
ظل يباوعله : منو الموجود
- بس واختي و نانة جوا .
اندار لمامون : داهل للبيت ومحد بيه
تجاهله مأمون وهو يكل لريحانه : اني راح اروحن اذا صار شي جديد بس رمشولي .
- ان شاءالله .
طلع وراح للبيت لكى نوسة تبجي والعيون مورمة على حبوبتها .. ونوسة تكله : جهالي لو جايبتهم لهنا ظلوا هناك لوحدهم ويا جدتهم .
- هسه اخابر مروان يجيبهم
- لا اني اروحن وبالليل عود امشي للجدة .
اصرت الا تمشي خذاها للبيت ، وبليل راحت ماكو توسع اجلتها للصبح ، وسرحان وهدوة و ايمان ومؤيد الليل كله ويا الحجية .
نانة : شاهين ظل بالحوش ما دامنا بس بنات بالبيت ، اني ما نزلتله .. دزالي رسالة تجاهلتها .
صعدتلي ريحانة : شاهين يريدج
- عوفي
- دنزلي احجي وياه خطية والله
- عوفيه هسه ريحانة
ما نزلتله لورا ساعتين نزلت للمطبخ عطشانة صار كدامي كاعد بالحوش ، حجه : الجلب العضج شحتنا شبيج ؟
- هلو شاهين
- اخابرلج وادز رسايل وادز عليج وما تنزلين ليش
- ما رايدة املك بيه ، روح شوف حياتك يا اخي كافي عوفني
- وهسه اني شطالب منج وشكايلج ترا بس ردت اسلم والسلام لله
- الله يسلمك
- شنو المخليج هيج متضايقة
-دشوف حياتي واو وكلشي تمام والحياة سعيدة واني كالبة خلقتي بلاش
- ليش دا تصيحين
- شاهين عوفني لخاطر الله
- اسمعي .. الاسبوع الجاي عدنا موكب بالكاظمية
- بمناسبة شنو ؟
- استشهاد الإمام الكاظم غير
- ما ادري ناسيته هو احنا برجب ؟
هز ايده وضحك ، حجيت : شسوي بالموكب
- هيج تشتغلين مراد .. واطلبين حاجبتج .
- بعد خل نشوف هسه صايرة هوسة .
- احنا من الاربعاء نبدي الموكب
- مأجورين ان شاءالله
- شبيج ليش هيج عيونج ذبلانات
- مقهورة وظال بالي على يمه كواغد ، واني وعباس تعاركنه وطكاني
- ليش ضربج ؟
- السواه شوية مرة جبيرة يطكها ويطيحها مو عيب عليه
- اي وانت الطحتي بيها
- مو بس اني ضربني حتى يرحانة ونجوى
- يجي واحجي وياه
- اشوف امورك زينه وياه ليش
- وشعندي وياه ؟
جاي نحجي طب عباس ومرته وياه وكفت بسرعة جاي احجي جراني شاهين : عوفي
- دوخر مني فوك فشارها وصساحها ذاك اليوم وجايبها
- يعني لو حجيتي راح يكلج امرج ويرجعها لو يضربج وتكبر .. عوفي
- ونظل راضين بظلم عباس شبيك
- خل يولي .
- كله منك اصلا لو ما منطيه فلوس ومداينه جا ما تزوج من الاساس
- واني سويت غير على مودج كلت اذا ارفضه يروح يعاند بسالفتي وياج .
- ما عندي سالفة وياك حتى يعاند بيها ..
تنهد وسكت ما حجه ، شربت مي ورحت لغرفة امي نزلت ميادة : شعجب البيت هدوء ما بيه هوسة ومناحر .
- ولي من وجهي لا ابتلي بيج لو عندج كرامة ما تردين على بيت ما رايدج .
- مجاية لبيت احد البيت رجلي اله بيه حصة غصبا عن الكل واني راجعة لبيت رجلي وبرضاته .. الله ليعوزني لغيره بس كاتلتج الحركة .
- دولي من وجهي عساج بالمووت انت ورجلج .
- تدعين عليه شلون اخت ساقطة وطايحة حظ انت
ريحانة : واكفتلها شتريدين تجرجرين بلسانها حتى تذبين فوك راسنا بلية ثانية .
- البلاوي منجن يالحيايا وغصبا ما عنجن تحترمن عباس هو زلمت البيت .
- اي دروحي من عدنا وفاركي
غمتنا ومشت كامت نانة : هاي شحسبالها مالها رداد دعوفيها .
ظل شاهين بالبيت وعباس هو ومرته بغرفته ، فرشت نانة لشاهين بالاستقبال .. اجا مامون دك الباب ، شاهين كاعد : كبل لا اطبن محتاجين شي نانة
شاهين : وتشوف البيت محتاجك ؟ عباس هنا واني هنا انت ليش تلج روحك
مأمون : اكلك دايس ذيلك اني وكلساع نابص بوجهي ومحاسبني ياهو ماتك
- حيوان اني وادوس ذيلي احترم نفسك لا ومحمد ابتلي بيك
- شو ابتلي هاي اني كدامك
كام شاهين من مكانه صحت : هااا هااا ترا والله ما ناقصينين .. مامون ما محتاجين بس روحج
- احجي عدل وياي لا اكسر فجج والله روح شنو طفل عندج
- اهووووو
عفته وفتت جوا ومامون طلع من البيت ، نمت للصبح ما ردت اداوم بس ريحانة كالتلي : شعدج ضالة مكابلة ميادة دروخي خلصي محاضراتج وارجعي على ما نشوفلنا خبر من حبوبتي .
بدلت دا اطلع ، شاهين كال : اوكفي اني اوصلج
- خطي راح يجي
- عوفي
طلعت بسيارة شاهين وصلاني للكلية وراح كملت محاضراتي خابرت على امي كالت : عباس وين
- جاب مرته واجا للبيت البارحة لا بكصته مستحى ولا جن مسوي شي اصلا هو اباله يغثنا اكثر حتى نخضعله ونبيع البيت
- ال شمخي جايينه من السماوة اذا ما طلع من البيت يمكن يكسرونه اليوم
- والله حل يبردون كلبي لو كتلوه ، ياهو الكالج ال شمخي جايين
- خابر عبد الله على مؤيد وكاله جاي اني وخوالي وولد خالي اذا عباس بية ذرة رجولة خل يظل بالبيت اليوم .
- وانت شنو تريدين تنطينه خبر حتى يشرد
- لج ماما بعد ما بيه حيل مصايب والله
- عوفي انعل.... لا اتخلين الساني يطلع يمه لا تخبليني لا تحذرينه ولا تكليله خليهم يردونه
- والله تعبتوني بالله ..
سديته من عدها واني ادعي على عباس واتمنى صدك يجون اخوة كواغد وولد اخوتها يربونا بلكت يبرد كلبي بيه .
دا اطلع من الجامعة شفت مروة واكفة على باب سيارتها شوية عن الجامعة تجاهلتها ودا امشي .. مشت وصاحت : نانة
اخذت نفس : يربي بس صبرني على هالشكول بحياتي
...انداريت ؛ شرايدة ؟
- دا اريد احجي وياج شوية
- واني ما رايدة
- ليش راح من ايدج يا حرام مسكينة تكسرين الخاطر
- اذا اكو احد يكسر الخاطر هنا .. فهو انت .. مو اني
- ليش اني الدا احشر روحي واحد متزوج لو انت
- ههههههه اني الدا احشر روحي بمنو لازم نسيتي ماضيج
- صيري احسن مني واخذي بس راحت عليج اقتنعي انت واهلج مأمون مو الكم بعد دوريلج كمش غيره يصرف عليكم .
باوعتلها ووكفت صفح وتخصرتلها : منو اللي راح يحلوة اذا قصدج على مأمون فبطريق الرجعة من خطبتج .. طلبني للزواج
ظلت مصدومة بوجهي : انت جذابة
- تكدرين تسألي وهو يجاوبج اني احجي صدك لو لا
- ماعندج ذرة كرامة تلكينه شفق عليج لإن حالتج بالخطبة جانت كلش تقهر شوية وتموتين من حركتج .
تنهدت : شنو رايج نجي نلعب لعبة زغيرونة بيني وبينج ونشوف منو البينا خطية ولازم ينشفق عليه
تخصرتلي : وشلون
- نتصل بيه ونشوف لمنو يجي ومنو يخلها خطية ..
ضحكت : حتى تستغلين جهاله وتكوليلة تعال مأمون نرجس كذا بيها لو حيدوري يبجي عليك .
- شكلج خايفة .. لتجربين
- اجرب بشرط ما تستغلين جهالة
- موافقة ..
جرت التليفون ودكت رقم مأمون اتصلت ما رد عليها ، ضحكتها تنرفزت هي .. رجعت اتصلت بيه رد حجت : مأمون وين انت
- بالطريق راجع عدي شغل ليش
- سيارتي عاطلة بنص الشارع وبطني دا توجعني كلش .. تعالي بسرعة .
-وسن جاي تطلك واخذت زمنية حتى ارجعلها شوفيلج احد
- ششوف دا اكولك بنص الشارع ، تعال بسررررعة
- هسه خل اشوف .
سد الخط : شكله مشغول بمرت مروان القديمة راح تجيب بس راح يجي .
شلت التليفون اتصلت بيه ، رد ظلت مركزة وياي كلت : الو
- ها نانة
- خطي ما جاي اذا بالبيت تعال عليه
- بشارع فلسطين انت ؟
- اي
- يلا جايج قريب .
قفلت الخط منه وتخصرت الها مبتسمة ، حجت : شكال
- انتظري تشوفينه بعيونج ما يحتاج احجيلج شكال
اتصل على مروة ، ردت : الو مأمون وين صرت
- خابرت علي اخوي يجيج انطي السويج وارجعي للبيت اني لازم اطلع مستعجل .
- مستعجل على شنو مأمون
- مو كتلج وسن تطلك ما تسمعين انت لو لازم كل شوية اعييييييد .
حجاها وقفل الخط بوجهه
ضحكت : شفتي منو البينا خطية ؟ ومنو اللي لازك روحه ؟ بس نسيتي شغلة مهمة .. اني مو انت حتى افكر ولو للحظة ارتبط بأنسان مرتبط لو متزوج .. اني ما اخذ شي مو الي ولا اهين روحي ..
الفرق بيني وبينج الكرامة .. لو الأحبه كله الي وما يشاركني بيه امثالج لو بالعافية عليج .. متنازلة بيه الج شبعي بيه
ردت امشي .. رجعت كملت : اذا عبرج واهتملج طبعا .
عافتها وراحت صعدت بالخط
ومروة وكفت تباوع وراها مكسورة والغيض بين عيونها .. تحرك الخط مال نانة منا .. صفت سيارة مأمون ينتظر نانة .
تقربتله مروة : تنتظر منو مو على اساس وسن تطلك وانت ماخذ زمنية ؟
- شنو الديصير نانة وين
- لعبت عليك حتى تهينك كدامي جذابه لا خطها عايفها ولا كلشي رجعت بخطها
- وانت سيارتج ما عطلانة
- هي الكالتلي كليله هيج حتى تشوف تجيها لو تجيني ومبروك عليك هنتني كدامها وفضلتها عليه .
- يعني اني جاي من ضيم الله حتى اصير لعبة بديجن ، انعل الساعة الشفتجن بيها .. طايحاظت الحظ زعاطيط
- هذا الهامك ما هامتك كرامتي
- ولي من وجهي انت وكرامتج
عافها وحرك سيارته وخابر على علي كاله : ارجع للمستشفى .. دبرت امرها اني طالع لوسن .
- خوال امي اجو وهادين ع البيت ، لازم تلحك
- لا الحك ولا الي غرض .. يريدون يطكون عباس خير ما يسوون كافي عليه المشاكل البراسي ما اروح احير بعباس وادافعله .
- اني راجع للمستشفى يمكن اليوم يطلعونها حبوبتي .
- اي ارجع
سديت الخط من علي خابرت على الاء : الو
- الو هلا ابو الأكبر
- هلا بيج خوية شلونج
- والله بالي عد اهلي كلبي نار على الحجية سودة بوجه عباس كون
- علاء هنا
- لا والله بالبصرة باجر يجي ، ليش ؟
-مو محتاجج شوية ، نوسة راح تلتهي ويا امي ووسن اليوم تجيب اريدج وياها هاليومين على ما تكوم لحيلها
- يا اشيلها بعيوني
- الله يسلمج امر عليج يعني
- يلا راح احضر غراضي لعد
- ماشي مسافة الطريق واني يمج
طلعت بوجهي للفلاح مريت على بيت الاء جبتها هي وجهالها ورحت لنوسة خذيتها من البيت وطلعت على وسن .. كيفت من شافت الاء كالت : زين سوين جنت حايرة امي وين اعوفها لو رحت جهالي لو اجو من المدرسة ياهو الالهم .
- ديلا خوي خل اخذج انت ونوسة حتى اذبكم واطلع مناك .
....
نانة : دخلت للبيت مرت عباس واكفة بنص المطبخ شاوية سمج ومركبة تمن ومركة فاصولية .
اول ما دخلت ، تلكتني : سويت الغدا .. عليج تغسلين المواعين والكراج وتنظفين الأستقبال .. والهول
- بعد ما اركصلج وياهن
- شسوي اني من الصبح لحد الان اطبخ وذنيج المعوقات خاتلات بغرفة جدتهن عناد حتى ما ينظفن نشتغل عدهن الجايفات
- شاوية سمج
- اي خطية عباس يرجع جوعان كلت اشويله سمجة
- ومنين جبتيها ؟
- من المجمدة
- المجمدة مال يمه كواغد انت شلون عين صلفة انطردتي ومنعتج من زادها وترجعين بلا مستحة تشوين الرجلج من خيرها
- وشسويلها يعني قابل اني الضاربتها مالي غرض اني عدكم شي احجو ويا عباس اني ياهو مالتي ؟
- عباس شوكت يجي ؟
- هسه خابرته كال نص ساعة واني هنا
صعدت فوك طبيت لغرفتها موبايلها ع الشحن شلته البطارية منا وطلعت وشمرته بالسطح ..
جاي ابدل ، سمعت هوسة جوا وصوت عبدالله يصيح ويا خواته ويسالهن : عبااااس النذل وينه
ميادة انسلتت فوك حتى تخابر على عباي وتحذره ما يجي ، سويت روحي كلشي ما ادري نزلت على صوت الهوسة
تلكاني عبدالله : عبااااس وينه
- هسه على جيه ليش
- والله اليوم اشكه شك بالقران دخل يصبرلي لا ما ارده ***** فلا اطلع ابن ابوي
رد اندارلي ويصرخ : يتأخر لو يجي ؟
- هسه كبل لا تجون خابرت عليه ميادة وجاي .
اجت ميادة تندسني ؛ اطيني تليفونج
- ما عندي رصيدي
- دطيني بس ارمش ما تشوفينهم جايين وحادين سنونهم على عباس اطيني
- مو عندج تليفون شعليه اني
- ما يشتغل مدري شجراله بس اطيني اكلج
عفتها ومشيت من كدامها وعبدالله وخواله وولد خاله كل واحد بيهم متحزم حزام لعباس وناوين على طكته .
هو طب عباس وهم تلاكفوه من كل مكان كتل غسل ولبس خلو الدم يجري من سنونة وخشمه .. الجيران فزعت على صوت الهوسة وميادة الطلعت بالشارع تفزع الناس كوة جروه من اديهم ... طاح لا يشيل ايد ولا يشيل رجل خذوه الجيران للمستشفى .
طبت ميادة تلطم على رجليها وتصيح : الكح..... كله منج تدرين بيهم جايين يكتلون اخوج ومنعتين اكلله الساقطة الدااااايحة .
ردت اكوملها : ريحانة كالت عوفيها خل تولي
وهي تتحلفلي .. عبدالله وخواله راحو ع المستشفى .
طلعت ريحانة السمجة وكالت : تعالن نتغدى خاف يجيبون حبوبة
حطينه السمجة ودسنا بيها وكعدت اوكل بالجهال وياي ونرجوسة تضحك وتقلد عباس شلون كتلوه واحنا نتضاحك على تقليدها ... نزلت ميادة شافتنا اكلنا السمج ونرجس تقلد .. ركعت تليفونها بالكاع حسبالها ما يشتغل وصاحت : اعلمجن يالكحا****
عافتنا وطلعت من البيت
شوية وطب مامون احنا دنظف البيت صاح : نانة
طلعتله : ها
يباوعلي بخزره : اجا عباس
- اخذ المقسوم من عبدالله وخواله وشالو الجيران
- يطبه مرض
-متغدي ؟
- عوفج من الغدا شنو السويتي انت ومروة اليوم شنو هالمهزلة نانة
- هي الاجت تحاسبني
- واني ياهو ماتي تلعبن علي تخابريني خطي ما جاي وتخابرني سيارتي عطلانة وخليتني اطلع علي من نص المستشفى واجي لكليتج .. انت شصاير وياج ارد افتهم .
- يمه شوكت تطلع
- لتغلسين ع الموضوع
- لإن ما احب احجي بيه بالعافية عليك مروة وتتهنى بيك اني ما رايدة منكم اي شي .
ظل يباوع عليه ، درت وجهي : مامون كافي تأذيني والله البيه كافيني
- والبيج شنو ترا حيرتيني وياج
- وليش احيرك
- اعوفج كلتي تعبتج ، اكلج هاهيه التردينه واني مستعد اسوي التريدينه ما تجاوبين
- لإن الدا تسوي شفقة مو اقتناع .. واني ما ارضى اصير خطية .
- واني ليش كتلج مستعدة تعيشين ويا واحد مثلي ، هو الشال ابنه ومرته محتركين وشاف ارواحهم تطلع بين اديه وماتوا يظل عنده كلب يحس بيه والله البصدري ميت .
واني الهسبب كتلج ما اتمناج الي لإن تتأذين وياي هواي .
دمعت عيوني من حجيه وهزيت راسي ( اي )
تقرب من عندي : بعدج صغيرة وتلكين مني هواي واحسن ، لا تعذبين روحج وياي .
- كلبي ما اخذ رايي لم قرر بيك ، بس مستحيل احضع لكلبي وارضى بشخص مرتبط .. ما دام اختاريت مروة الله يوفقك وياها ، كلبي يتحمل غبائه
- اني يمتى اختاريت مروة
- هي على ذمتك حاليا
- وتشوفيتي مهتم بيها
باوعت بعيونه .. اخذت نفس : الاربعاء راح اروح لبيت خالي مسوين موكب للإمام الكاظم اخدم بيه .. وراح اخذ بس نرجس وياية لإن حيدوري اخاف عليه بالهوسة .
- بيت خالج .. شاهين يعني
- اي هو الطلبني اخدم بالموكب والصراحة محتاجة حيل بعدني ما كايلة لمؤيد بس اذا ما قبل انت تقنعه .
ابتسم : تأمرين ، بس ديري بالج على نفسج ، وحيدوري راح اخذه وياي واروح للنجف .. نرجع الجمعة بيوم الزيارة نزور الامام الكاظم .. ونجيبج ويانا ونجي .
- ماشي .
طلع من البيت
واجا مؤيد خبصنا حجي وسوالف ويسال على عباس وطلع بساع .. لليل جابوا يمه كواغد واجو خطية رايح نص حيلها .. ومتأذية كلش وغادية هاكداتها من الصار بيها .
كعد عبدالله وكال الها : حبوبه كافي لهنا وبسج ، خلي نبيع هالبيت .. واخذ انت وخواتي غاد يمنا
- واهدن بيت جدك وامش ، لالة يحبوبة ما اكدر
- لخاطر الله يا جدة هو انت اشفتي من جدي شو كضى عمره داير عنج .. دخل ننهيها هنا
- لا حبوبة ما اكدر و هديوة هنا شلون اهدنا
- عمتي عايشة بخير يا جدة شعليها
حجه اخوها جبار : كواغد الله بالخير عليج خوية ، كعدة ويا بزر حويكم مالج بعد تعاي غاد احذانا واحنا نحطج بماي عيونا
- سالمة عيونك يجبير بس لالة ما اكدر اهدن هديوة ، هي وبنيات المرحوم كل الضللي من ستير وابوه ما احمل اعلى فراكهن
- بنات ستار وياج
هدوة : انا اموتن وعلي يو فاركيت امي ، خلها تجي عدي وعلي اشيلنها بكلبي موش بس بعيوني
- لا ييمه اسم الله اعلى عمرج سالمة يم عليوي انا هنا ما علي شي .. وبنيات ستير حذاي .
- مو خاف هالجلب يرد ياذيج ساعتها نحط جيلة براسه ونتورط بيه .
مؤيد : لا شحده بعد .. تظل عدنا وكدام عيونا واني وامي والبنات نتعاون عليها .. لا تشيلون همها
حاولوا يقنعونها .. ما قنعت
ميادة واخوها جانت ويا عباس رجعلهم مؤيد ..
كسر برجله ورض بيدة والطحال متاذي فمبقينا بالمستشفى نايم .. اذا استدعت حالته عملية .. يحولونه .
وسن جابت ولد سمته ( موسى ) لإن صار بأيام استشهاد موسى الكاظم .. ورجعت للبيت
ظلت تعتني بيها الاء ..
وبأبنها .. ثاني يوم خابر عليها علاء كال الها : اني جاي انت بعدج ابيت كرايبج
- اي والله بعدني بس هسه اخابر على نوسة تجي ابدالي
- لا ظلي اني راح اروح عد اهلي شوية عدي شغل
- شغليش
- هيج شغلة .
براحتك
سديت الخط منه وظليت يومين عد وسن اداريها لحد ما كامت على حيلها وكدرت تكوم لبيها وجهالها ، خابرته اجاني بالطريق .. وهو جاي يردنا اجاه اتصال
رد عليه :
- الو ، ها كوثر ، ما ادري ، ان شاءالله .
استغربت هو صاله شكد مطلكها شنو ها كوثر ؟!
خلص الاتصال واني عاكدة حاجبي ، انداريتله : كوثر الجنت تحجي وياها
- اي
- وشلون هيج دا تريد ترجعها لو شنو
- لا مو اريد ارجعها ، رجعتها وهسه عد اهلي
- رجعتها ، زين اني ليش ما ادري ؟
- يعني شتدرين مثلا اجي اكلج الاء ارجعها لو ما ترضين لو شلون
- اني كتلك اخذ رأي ترجعها لو لا بس اقلها تنطيني علم
- وهاي صار عندج علم
- انت ليش هيجي تتعامل وياي
- اهووووو ردينا ، كافي الاء رحمة الوالديج
- هي مو قصة اهو هي احترام ترا .. ما بيها لو كلتلي راح نروح ونرجع كوثر وتحترمني مو اني اخر الناس يعرف بالصدفة مرتك اني لو غريبة
- اول البارحة رجعتها وناس سعوا بيها وطاحو علي واستحيت ما ارجعها .. رجعتها
- استحيت شنو هو انت دا تخابرها يعني مزعلانين
- تصالحنا
- ليش اني عرفت سبب طلاكك الها حتى اعرف ليش رجعتها وصالحتها عايفني على عيني اصلا ما الي كل تقدير .
- الاء كافي هسه جاي اكلج رجعتها وانتهت .. كافي تعيدين وتصقلين غلطت ما كتلج عمي اعتذر واحبن راسج بعد
درت وجهي منه ما حجيت وياه .
رجعت للبيت وصلاني وكال : محتاجة شي كبل لا اروح
- وين تروح
- لاهلي
- وانت مو صالك يومين يمها
- باجر اجيج
تنهدت : شكرا ما محتاجة شي
طلع اني ظل ابالي اعرف ليش طلك وشنو اسباب الطلاك ، خذيت تليفوني وخابرت على اخته منتهى الجبيرة ، ردت : الو
- الو هلو منتهى شلونج
- هلو الاء شلونج شلونج زينة الجهال شلونهم علاء
- الحمد لله كلنا بخير جنت يم كرايبي خطية جايبة وهسه اجيت لبيتي
-يا خطية الحمد لله على سلامتها
- الله يسلمج
- اكلج منتهى علاء مرجع كوثر
- ما كالج ؟
- لا سمعته يحجي بالتليفون بس ما فهمت
- اي غير خوالي تلحلحو ويا امي بس حك الله ما يردها هالكح... هاي لا والله الكح... اشرف منها ومن عمايلها
- اكلج منتهى فدوة هو ليش طلكها اني احسبج مثل اختي الجبيرة وعلاء ما اسئله ولا ادخل روحي بهااسالفة
- هو حتى لو سألتي ما يكلج يطمطملها شوفي بيا سحر طاكتها ودامغة راسه
- سحريش
- ليش هو مو تمرض من وراها وكوة يالله افتك منها هي وهاي حنينة الدايحة وحدة فضحت اللخ طالعات اثنينهن متفقات .. مشرباته وحتى انت مشرباتج ومسقطات ابنج .. ومشربات امي ما درينا الا من تعاركن هي وحنين ظلت وحدة تشهد على الثانية ، طاحو بيهن اخوتي وكتلوهن ونعلوا والديهن الا كويثر ام الدروب ما تابت لافت عليكم حركتكم .
- حركتنا
- خب انت الفاهية شتدرين نايمة على كفاج
- واني منين ادري قابل اشتم ايدي ، شلون حركتنا
- بساعتها عرفوها اهلي .. هي بليلة الحركتكم طالعة من اهلي ورايحة على بيتكم والكاميرات اللي اكبال بيتكم لاقطتها من طابة البيت ، على ما اشتكى عليها بس طاح بيها وطلكها من ساعتها .
- هذا كله ضامه عليه علاء مسقطة ابني وحاركة بيتي ورجعاها فوك كل هذا .
- شبيج تلكينها حركتله .
- حركتله شنو شعليه اني وشيضملي شتسوي ما تسوي بيه بعد كل السوته اذا مطيحة ابني وغيرت علاء عليه حتى وكتها والله كمت اسأل روحي شبيه متغير وياي طلع من وراها وهسه هم نفس الحالة يحجي وياي من ورى خشمه ، بس والله ما اسكت
- يمعودة لا تخليني اتندم حجيتلج تروح تطلع بوجهي واتفشل كدام اخوي
- تتفشلين ليش هو ضام عليه كل هذا وما كايلي بيه يطمطملها .. هو من طلكاها سوالها درس وربج مو اباله يطلك والا ليش ما كلالي خاف يرجعها واني اعترض عافها جم شهر ورجعها
- ميخالف غير على مود جهاله لو ما جهاله والله ما يعبرها
- شما يعبرها هو صاله ليلتين يمها وهاي الثالثة يريد يظل لباجر عود يجي
- ميخالف عيني على كيفج وياه لو تجا بالهداوة احجي وياه وتفاهمو
- ان شاءالله
سديت الخط منها اتصلت بيه رد : ها الاء
- عساها ماتت الاء وما شافتك ، هسه تجي
- طايحة الحظ شبيج
- بيه مرض تعال هسه
- اجي شسوي
- يا علاء لو اني لو كوثر على ذمتك والله ما ابقى
- شكو شبيج تخبلتي
- اي تخبلت .. لو اطلكها لو اطلكني وتتجازة انت وياها.
- اكعدي وبلا خبال
- تجيني علاء لو اجيك لبيت اهلك اشهركم واخزيكم والله تلفي ام السحورة واطمطملها .. تلكاها دامغتك بسحر وطايح جوا رجليها
- لا تخليني اكفر بيج وعلي احترمي نفسج احسلج
- لا احترم ولا اظل هسه تجيني
- اخذج وين
- اصبر اصلا ليش اطلع من بيتي اني اخابر على مأمون واحجيله دا اريد لشوف يرضى بام السحورة مالتك
- اكصبج والله بس تخابرين مام ن شنو ما تستحين يومية مورجة الزلمة على مشاكلنا
- ليش استحي مو هو السعى بهالقسمة الجايفة ، خلي يجي ويفكني منها وساعة ما اظل وياك والله
- جايج ومن اعرف مخابرة احد بالقران ابتلي بيج
ظليت كاعدة ... واتاني على نار
ومحضرتله بكلبي هلكد حجي
طب كالي : اطيني التليفون
- خايف اخابر مأمون ، والله اذا ما طلكتها مو مامون ، نوري المالكي هسه يشهد على سحورة مرتك
- اطيني التليفون اكلج
- ما انطيك وكلي ليش ضميت عليه
- انطينيييييي جاي اكلج
- هاك ... وحاجيني يلا ليش ما كتلي
- وليش اكلج وشنو الفايدة
- حاركة بيتي وساكت ... مسقطة ابتي وسااااااكت
- كافي الاء الموضوع انسد وانتهينا منا
- انتهيت اني اما اني فلا ... ما انتهيت ولا راح انتهي ، هسه اطلكها
- رجعتها على مود الجهال والله الا اني كل نفس ما ظلي بيها
- اي عمت عيني سودة عليه قهرتني اشوفك اليوم ما عفتني وركضت الها، انت جاي تجذبلك على جاهل لو شنو ... هنا هسه لو اطلكني لو اطلكها
- لا اني اريد اتخبل اتسودن اليوم شعدك وياي
- تسودني لوحدج
تعارك وياه اخذ مني التليفون وطلع
خذيت جهالي ورحت لهلي بالليل ..
طبيت لاهلي .. تلكتني امي : ها ولج
- والله لو يصير نبي منزل هم ما ارجعله
-شكو
كعدت سولفت لامي وخواتي ودلن ميخالف واهدي ومعليج بيها ولا تعوفين بيتج ، بس ابد اي بيت واتي كل احترام ما الي عنده .. يطلكها ونا ادري تحرك بيتي وما ادري عايفني على عمى عيني ..
ابد ما ارجع .
اجا ثاني يوم متخبل شلون طالعة من البيت وحدي
يحجي ويا امي بعصبية يريدني اطلع .. ما طلعت
كال الها : لو ما طلعت ما تلوم الا روحها .
ما طلعتله ..
وظليت عد اهلي كطع المصرف عليه ما دزالي بعد .
عباس ٣ ايام وطلع من المستشفى
بيوم اللي درت بيه نانة راح يطلع حجت ويا مؤيد على الموكب ونامت براسه الا يوافق ، كوة رضى تروح تخدم بموكب الإمام الكاظم
اجا شاهين خذاها هي ونرجس
ومؤيد طلع جاب عباس ونوماه بالاستقبال
وميادة يمه اداريه
اجتها ريحانة كالت الها : ممنوع اتفتحين ثلاجة لو مجمدة وتسوين اكل ، تجوعين انت ورجلج ذاك الشارع تودين وتاكلين
ميادة : امشي بكيفجن اني دروحي منا ... روحي
ريحانة : هذا الموجود يعجبج يعجبج ما يعبج الباب يوسعج انت ورجلج
صرخ بيها عباس وهو غافي : اكوملج بالعكازة اكسرج والله بت الجلب انعل ابوج لابو الخلفج امشي منا
- ياريتك تلحك ابوي حتى تسبه
- امشي منا حيوووووانه
عافته ومشت وميادة تكله : شفتهن شلون حياية شفتهن .. هاي ريحانة جا لو تشوف نانة كل كتلتك هاي من ورا نانة توسلت بيها كتلها اجو خل اخابر عباس لا يجي ليجلي تكلي يطبه طوب اني اريدهم يجون ويبردون كلبي بيه
- دخل اكومن الا اعلمها هالجلبة هاي
- وشنو الفايدة تهش عليك جلابها مامون ومروان وحتى شاهين خو اختك خبرة بالزلم دستات مخليتهم جواها وكت ما تحجي وتفك خلكك دزت عليك واحد وخلته يلصمك كول جذب
- غير اموتها
- دكعد تمووها حتى يسون داير ما دايرك شدة يا ورد وخاف هالمرة بالطحال المرة النوبة بالمكبرة ، لو بس تسمع كلامي والله اخليك تربيهن
- شسمع كلامج بس خل اطيب غير ما اخلي نانة عايشة وكلام الله
- ما يفيد والله ما يفيد تبطلها مامون ما يرضالك ، تكتلها يطلعلك مروان عضلة يتمرن بيك وانت هاكداتك .. شتكدر تسويلها .. والله لو تطيها لاخوي جا رباها الك وخلاها تمشي ميل الساعة
- اطيها لشاهين وافتك
- اي وتعيش مدللة وبيت وحدها وازت بنص الفكر عي الخلتك هذا حالك تطيها لشاهين اصلا نا تريدة شابجة لحية بلحية ويا مامون وشاهين تخمط من هذا وتمص بذاك .
خو اطيها لاخوي ما يكدر يتزوج جيف ما عده بس يعرف يربيها يخليها تمشي مثل ميل الساعة وعلي .
- وياهو اليرضى اطيها لاخوج غير مؤيد يكلب الدنيا .
- والله عباس حتى اني ما كمت احترمك على كثر ما محد محترمك بهالبيت وتخاف من هذا وذاك
- دخلي خ*** لا اكسرج والله
- شتكسرني اني احبك وهالظالة وياك لو غيري ما تحمل هالفكر شوفة عينك اهلك من جينا وليجاي محد سأل عنك غير ريحانة اجت خاطر تكللنا ما ناكل من اكلهم وظالة وياك ما اعوفك بس اتلحلح شنو مخليهم يركبونك شوف شسوو بيك وصلت للموت ، خليهن يخافنك وغصبا عن اليرضى والما يرضى مشي حجايتك .
عافته يفكر وكامت ردت كالتله : دشوف نانة ماخذها شاهين اليوم يمه باللبيت حتى هناك ياخذها للزيارة ، شوف .
- وياهو الخلاها تروح ، يمممه ، يممممه
- دسكت هسه انت من يكلولك ياهو الكالك اطيح براسي
طب مؤيد : ها
- نانة ياهو الموديها لبيت خالي
- شاهين اجا عليها
- شنو صايرلها كو*** انت ما تستحي على روحك مخليها تروح ليغاد
- خب ليش تخليني برفسه انومك بالنجف مالك غرض اني اخوها الجبير وبكيفي سمحتلها تروح
- شنو بكيفك جا اني شنو هنا رجل كرسي
- انت تكوم على حيلك وتاخذ هالسمة مرتك هاي وتشوفلك ايجار هالبيت ما يلفيك بعد
- والله اذا ما تطوني حقي بالبيت اشتكي عليكم والقران
- تندلها المحكمة لو ادليك ؟
.....
نانة : اجينا اني ونرجس لبيت خالي شاهين جان طاير بيه طير لإن اجيت وياه ، يضحك وياي ويقربني لامه ويسولفلها عليه ، وامه احسها ما طايقتني
خو خالي ما شافني اذا ما كلالي هلا باخت جمارة شلونج شلون الاحوال ، يعيرني باختي .
بس الاحلى جانت اجوا الموكب
طول اليوم ملتهين بخدمة الزوار .. البيت عبارة عن نسوان .. والزلم ناصبين جادر الهم برا .
خالو ذابح ١٠ عجول
كواني التمن والطحين فوك السطح نخبز ما يقارب ٦ الاف كرصة .
رغم كل هالاعداد ..
بس ما جان اكو تعب
جنا نشتغل بحب للإمام
لو حسينا اكو نقص او تعب بس نصيح بالموكب منو يساعدنا بكذا شغلة الزوار تتسابق تشتغل خاصة الخبز .. من نصيح منو تخبز للإمام .. نسوان كل وحدة تتوسل وتصيح : عدي حاجة عليج الله حتى لو بس جم كرصة اخبز .
ونصعد خليها تغسل وتعقم اديها وتخبز ويانا وتاخذ مرادها وتمشي ..
بيوم الزيارة اختنكنا ..
الناس من كل مكان بالعراق والعالم تجمعوا بمدينة الكاظمية .. البيوت ما بيها محط رجل .
دخلنا الأكل والطبخ والشغل بالكراج ونصبنا جادر للنساء الزوار برا حتى نسهل الزيارة عليهم ما يتقيدون بالعمال والخدمة .
جانت مهمة نرجوسة تترس مبردات للزوار
بس حيل تعبت .. تركض بين هاية وهاية
واني كاعدة على البريمز .. اكلي بالدجاج لإن لحم وحدة ما يكفي .. الزيت اترس بيه الطشت واكلي اني واخت شاهين .
والديجي بظهورنا يصدح ( يا جسر جينا لإمام المتقين لا توكفنا كبل وفينا دين )
للعصر خله شاهين واخوه المشواية مال الكص .. يشوون ويكصون واحنا نسويهن لفات بسرعة حتى نوزعهن للزوار البقوا .
صاح اخو شاهين الجبير حسين : نانة اخذي هاي الكارتونة وطلعي وزعيها بجادر النسوان
لبست عباتي ومشيت وزعت ونرجوسة وراي توزع بيبسي ، دك تليفوني انطيت اللفات لاخت شاهين وطلعت كوة تجي الشبكة . باوعت مأمون رديت : الو
- الو يمعودة متت يلا حصلتج ليش خطج خارج نطاق الخدمة
- مو خارج نطاق الخدمة بس سوو تشويش ع الشبكة مال الكاظمية علمود الزيارة .. فشبكة مختفية
- هم يمي تروح تجي ، اجيج لو شنو
- اي تعال نرجوسة حيل تعبت
- دطيني العنوان
- اني ما اندل
درت فتت لحسين جريت التيشيرت ماله : هاك بس دلي مامون ديريد يجي على مود بته
- اي
اخذه من عندي سلم عليه .. ودلاه المكان
لما راد يوصل هم خابر بس اني اندل المكان الوصلة كمت انطي وصف وادلي كال : هاهيه اندليت
ظليت واكفة .. زوار الامام بتراجع يجرون برجليهم جر من التعب سيارات قليلة كوة يمشون .
وكفت انخي رب العالمين وادعي بجاه الإمام يكتبلي اللي يشوفلي بيه الخير .. واني عيني بالزوار ادعي صد بوجعي من بينهم مأمون ، ابتسمت وانداريت للجادر صحت : نرجس اجا بابا
ملبستها فستان مستور اسود وحجاب اميرة اسود وبوند على راسها اخضر مكتوب بيه ( يا زهراء )
شافها مأمون تخبل فتحلها اديه وكل وجهه يضحك بشوفتها ، راحتله تركض.
وحيدوري اجاني ركض شلته لكلبي ابوس بيه ، اجاني : ها مأجورين ان شاءالله شلونكم
- الحمد لله
- تعبتو
نرجس : لا بابا ميصير واحد يكول تعبت حرام
- ليش
- غير للامام بابا
ضحكت وهو يبوس بيها ويكللها : تعرفين الامام هذا التخدمينا
- اييي
- منوه ؟
- الامام الكاظم
- اي شسمه الامام الكاظم
-هو امام الكاظم
شالها وكام يشرحلها انو هو حفيد الرسول محمد والاشرار سجنوه وعذبوه وقتلوه وشرح يفهمها عقلها ، ختمها : انت تعرفين منو الرسول محمد
كالتله : شبيك يا بابا ماخذينا بالاسلامية الله ربنا محمد نبينا القران كتابنا
ولبكته لبك ظل يضحك ويبوس بيها ، كتله : تربيتي لا ادور وراي .
- اي والنعم ، تروحين لو تظلين
- لا بس ازور الامام ونرجع
- وين اكو اصلا باب النساء فاتحينه للزلم صايرة كض اخوك لا يطيح ولا مرة اطب
- لا كالو للعصر يفتحونه
- شيفتحون هيج صاير غير يوم نجيب امج ونجي نزور ، لو تريدين تظلين هنا ويجيبونج خوالج بكيفج
- لا ارجع ما اكدر بعد ابقى رجليه تخيطن .
- ديلا لعد بس خل اسلم ع الجماعة
طب سلم على خالو طلع يعرف ابوه ما رضى الا يطب ويضيفونه .. وصدك دخلوه جوا ونصبولة سفرة تغدا هو وحيدوري .. وشبع وكام سلم عليهم وكال : يلا احنا نروح
شاهين : انت وين رايحة ابقي اني ارجعج بس يفتح الطريق بالليل
- لا امي تريدني مناك لازم ارجع
- اني اخابر عمتي ابقي
- لا بعد اروح ويا نرجس ما اكدر اعوف الجهال اكثر
ما قبل بروحتي
بس اني جنت بس اريد اطلع اريد ارجع اسبح واتمدد متت .. بس عساني لا رحت مامون دك بينا مشي الا مشكنا يلا وصلنا لمكان يشيلنا بسيارة ومن سيارة لسيارة يلا وصلنا الاورفلي .. ونزلت على بيت هدوة كبل للحمام
وهدوة تصيح : هدومج اريدنها ، لا تشمرينهن
- شتريدين بيهن هدوة دوخري ميته بس خل اسبح
- اريدنهن الف امي بيهن من بخت الامام وجده محمد اليطيبون امي ويكومونها بعافية .
نزعت ثوبي الاسود وانطيته الها وسبحت .. صحت على نوسة تجيبلي ثوب البسه منها .. جابتلي ثوب ما ادري منين جايبته هالنوسة هاي احمر ابو الزخمتين وبيه كتافيات ..
طلع اباوع لروحي واكول : شني يا نوسة متكليلي منين جايبته هذا الثوب من زمن العصملي
نزل مروان واني احجي ويا روحي ع الثوب فززني : ياهو هاااااذ .. هارون الرشيد
- رشيد بعينك
وكف خربان من الضحك على شكلي ، كتله : خب دروح
عفته وطبيت لغرفة علي مأمون متمدد كتله : تكوم منا لا والقران ابتلي بيكم ... وخرووووو
ضل يضحك وكام من مكانه : ولج تعبان والله هستوني جاي من الزيارة وكبلها نجف
- روح لغرفة ابوك روح
عفته وتمددت ع الجرباية مال علي ، طفى المكيف صحت : هاي ليييش
- لج باردة بابا تتمرضيني
- هو اني رايدة اتمرض افتح
فتح المكيف تلفلفت بالبطانية ونمت ومروان يصيح : هارون الرشيد وينه نام
مامون : دعوفها خطية تعبانة يمه راح انام على جربايتج
- نام يبعد امك انا رايحة لاهلي يم امي شويتلها سميجة
- بالعافية
نمت ونرجس حضنتني ونامت بفد فراش واجا حيدور كملها ما صارت نومة حصرة .. لهناك كعدت مصخنة وعيوني كابة نار واون ومروان يصنف عليه واني لاوية خشمي مالي خلكه جسمي كله متشنج .. واون من راسي
اجا سرحان كض كصتي وطلعلي دوا من جرارته واطاني وصاح على سجاد يجيبلي مي .. راح جابلي وشربت دوا وظليت متمددة ع القنفة
شوي واجاني سرحان : ها بوية شلون صرتي
- ها عمو .. لا احسن شوية
كض كصتي كال : لا لا نعمة نعمة كواكة
تعدلت من كعدتي كال : خليج بنيتي خليج
- لا ما زينة ما بيه شي
- تعب الامام هذا كله فدوة
- فدوة اله .. حتى نرجوسة تعبت خطية
- بعد جدها وكلبه عفية هسه اطيها ١٠ هدية .
ظل كاعد يمي ويباوع للتلفزيون حجه : بوية صدك مامون كلالج رايدج مرة ورايد يتزوجج
- ها ، ليش منو كالك
- مروان يكول مامون اطاها علم الرضت بيه .. ياخذها الما رضت يعوفها ما يخليه الحجي الغيرها
- اي كلالي بس اني ما اريد عمو
- ليش يبعد عمج جا انا ما اكيف وانت بنيتنا اخير من الذيج الما ينعرف خيطها من ذويلها
- بس ذيج موجودة
- وياهو ماتج بيها انت هنا وذيج غاد
- لا عمو ما اكدر
- وداعتج يا بنيتي ذيج زواجة وكت وينهيها مامون واخذيها مني .
- حتى لو ما اكدر .. اني دا ادرس ما اريد زواج
- اني كلت انت بنيتنا وجهالنا مرتاحيلج وهو يحترمج ويقدرج وحتى يحبج والله يا عمي .. لو تخليني ازوجته واخلي يستقر يا بتي شني عيشته هاي جاي ونايم على جربايتي ماله بيت
- كم يوم يتزوج مروة ويصيرله بيت
- انا ما اريدة يلفي غاد اريدنه يمي
- والله عمو ما اكدر ، اعذرني ما ارضى اصير ثانية
- بكيفج بعد عمي .. بس انت فكري .
- ان شاءالله
كام مني راح جاب هدوة واجا ..
واني رجعت لغرفة علي نمت للصبح
ثاني يوم رجعت لبيت اهلي ..
ورجعت لحياتي الطبيعية بس عباس من امر من عنده يخزرني بعيونه
مامر اسبوع ونص وكام على حيله
كال لامي : اليوم راح يجونه خطابة
كالتله : امي نانة ما تريد تتزوج ..
كال الها : مو بكيفها .. تختار يا تتزوج يا دراسة ما تروح ولا تكولين مامون لو مؤيد لو مروان عفطة يخلصونها مني بالله هنا اوزنها توزن وصلة وصلة
- منو هم الناس ؟
- اخو ميادة طالبها
ايمان : ياااا عاب حاله خو انطيها لابن اخ ي يتمنى ذيالها وحال ومال وميت عليها هذا شنو
- لو تموت ما اطيها لابن اختج وعلي لا اخلي نانة تتمنى الموت وما تلكى اني تصف ويا ال شمخي على كتلتي دخل تشوف
جان ناوي نية كشرة عليه
اجو اهل ميادة وهو انطى كلمة وخطبوني منا وقروا الفاتحة ومؤيد سكران فوك ما يدرون
كل هالحجي هذا ..
اني ما ادري بيه .. لحد ثاني يوم جاب السيد وكال : يريدون يعقدون ، امي تسودنت تعارك ويا امي ، تعارك ويا الاء كض الاء كطعها تكطع شلون صيحت عليه من جاب السيد
صعدلي ليفوك نزلاني كال : اطبين للسيد تكولين اي من ما تكولين اي والقران كلية ما اداومين واموتج تموت
كمت اتعارك وياه واجر بنفسي واصرخ
كضني رفسات جلاليق وماكو اي واحد يحميني منا .. ومن تصف امي وياي يطكها ويوخرها عني البيت انكلب كلاب ..
رضيت اطبن وياه واعقد بس كون يفكني
طبيت غسلت وجهي .. ولبست حجاب وعباية وخابر ع الزلم اجو يحتى يعقدولي على اخو ميادة ....يتبع
☆☆☆☆☆
#زينب_ماجد