#كحل_عرب
(احضان باردة )
((( بقلم زينب ماجد )))
الحلقة_٢٣
(ورقة اعتراف )
شكثر ليلك چـواني
و روحي عطـابة
اعلـى جرحك ..
لــِ عريان السيد خلف ||🖤
بيت الشيخ سرحان
الساعة ٨ ونص الصبح
هدوة : ياله يمه اكضي الريوك خاطر عمج يطلع ، عيب وادم تجيه غاد .. زحمة يتأخر
نوسة : خلصت يمه بس منتظرة الصمون راح يجيبه سجاد
- جا ما خابزة ييمه
- لا والله يمه نمت وبالمجمدة ب٧ كرص ، بس تعرفين الولد بالليل من يجوعون وياكلون ما مخلين شي .
- عوافي ييمه ، ياله اكضي شغلج بساعة ، عليوي طلع .
- اي هو ومأمون بس مروان نايم فوك .
- كعدي خاطر يتريك .
- يسهر هاذ يمه تلكينه نايم وجه الصبح ، هدي .
عافتني ومشت واني ظليت محضرة الريوك كله ومنتظرة سجاد ، اجا حطيت الريوك وكتله : ياله ماما حبيبي تعال تريك .
سجاد : يمه عليج الله خل اشتري التليفون .
- شتسوي بالتليفون يا يمه ، التهي بدراستك
- يمه والله التهي ، بس صحباني كلهم عدهم ، ويقلدون علي يكلولي انت عايش ببيت شيخ وما يطونك تليفون .
حجاها واني احط صينية الريوك ، حجت امي : مالك غرض بيهم بيبي ، ادرس وصير احسن منهم وادخل كلية واحطلك بدال التليفون سيارة وتليفون حالك حال عليوي .
سجاد : بيبي عليج الله والله اريده
طلع سرحان : يا الله ، اصبحنا واصبح الملك لله ، اصباح الخير بنيتي
نوسة : هلا بيك عمي صباح النور
سرحان : شماله سجودي شيريد
نوسة : لا هيج عمي نسولف
هدوة : الولد داك رجله يريد تليفون يكول ربعه يعايرونه جيف ابيت شيخ وما عده تليفون .. وامه تريده يدرس
سرحان : حكه .. بس اخافن يو اشتريتلك التليفون تهد دروسك وتلتهي بيه .
سجاد : لا وعلي جدو ما اعوف دروس ، والعباس .
نوسة : لا عمي والله عدي اشتريله بس اني رايدته يركز بدروسه .
- مالج غرض انا وياه .. لا تدخلين .
سجاد : صدك جدو يعني تشتريلي عليك العباس
- جم سجيد عدي يبعد جدك
كام لسرحان يحبحب بيه وكلاله : اني شايف واحد مستعمل صديقي يريد يبيعه اشتري من عده .
- لا تشتري من صديق ، يكعد مروان وتروح انت وياه للربيعي واختارلك تليفون يعجبك على حساب جدك .
نوسة : الله يخليك خيمة عمي .
سرحان : يحفظج بنيتي صبي الجاي .
صبيت الجاي واباوع لسجاد عيونه كامت تتلامع من الفرحة ، راح يركض لغرفة مروان ، صحت : تعاااال تريدك هسه .
- ما اريد يمه ما اريد
سرحان : هدي عدي سويلفة وياج ، ما طولها ام كاعدة
- اي عمي
- تمار كبل الفاتحة ، فاتحني بسالفة خطبة .. لجن انا ما رديتله ولا اسمعتله وكتله الله كريم ، وبالفاتحة شايفينج ناس وهم رايدينج .. الزلمة الرايدج هم الله امكنه وخوش رجال بس ما يريد وياج ذويل .. وانت يا عمي انظلمتي وانت زغيرة وما شفتي من عمرج شي .. القسمة التجيج اليوم ما تلاكينها باجر والعمر يمضي وما تهيسين الا شيب غزاج بلا علم
نوسة : عمي ان........ رادت تحجي قاطعها
:خليني اخلص كلامي واحجي بعدين بالتريدينه
وليدج ربيبي عدي والله شاهد ورسوله حاله حال عليوي ما افرقنه عن ولدي ، يظل هنا بين خواله وجدته فوك راسه وانت شوفي عمرج عمي دامج زغيرونه .
هدوة : والله يابو مامون انا طاحت وذرة الساني كثر ما احجي وياها واكللها لا تكعدين بعدج زغيرة .
نوسة : لا يمه المثلي مو زغيرة عشت وشفت هواي وجزت روحي واكتفيت
سرحان : الجزت هاي يا عمي ما يصير ، بعدج توج طبيتي الثلاثين هكو بكدج لهساع ما معرسات .
- انا غلبت حلي من يوم الزوجوني بعمر ٩ سنين
تمار عمي زلمه وما بيه عيب ومن زمان رايدني بالحلال وابوه مات وهسه رد يتخطبني ، عمي الما صح اول يصح من تالي ؟
هاي وحدة الشغلة الثانية عمي
مثل ما انا ربيت عدك وربيبتك ، الهام ربت عدك الجان هي والجان ياسر مثل حالي ما يدورون ابوهم مثل ما ندورك يعني كلنا ولدك ، اروحن اخذ رجلها ؟
حتى لو مطلكه منه .. روحي ما تقبلها .
سرحان : مو الا تمار عمي ، قسمة جايتج زينة
- هالتكول ما يريد وياج ذويل ، اهد ابني الداريته كل هالسنين على مود رجل ؟ ابني مو زغير شاب صار شواربة خطن عمره ١٦ سنة .. تالي هالعمر يشوف امه تعوفه لخاطر زلمه .. لو صافه بصف زلمه .. شنو شعوره ، انعل ابو الزلمه اليخليني اهين ابني واكسر عينه بهالسالفة .. ما اريدنها .
سرحان : مو حرام ولا عيب عمي ولا انت اول بت تعرس وعدها ......... قاطعته
- ادري مو حرام ولا عيب بس صعبه
غير ابني امي هالتشوفها مالها غيري ، اكلاص مي ما يعيننها رجليها تكوملهن ، خوبن ابر امي واكابلنها هي وولدي اخيرلي من الف زلمه .. ما اريدن عمي جزت روحي وراضية بعيشتي .. انت موجود واخوتي وابني وعايشة بخيركم بفضل الله .. شلي بالرجل وطلابته .. ما اريدنها .
هدوة : يمه باجر عكبه عرس ابنج .. واخوتج ما دايميلج ولا احنه دايمين .
- الله الدايم يمه جا ابني لو عرس يهدني يظل وياي .
سرحان : هذا بعد اختيارج انا ولون موش ابوج ولا الي حك ازوجنج عبن عمامج واخوتج يا عمي ما ينجرعون بس اتحملها لاجلج واكول زغيرونه وما شافت من عمرها شي .
- يطيك العافية عمي والله من بعد الله انت لو اشعلك العشرة شمع ما اجازيك ، تحملتني وتحملت ابني وعيشتنا بخيرك وما فد يوم سمعتنيلو سمعت ابني حجاية تكشن الكلب الجان انت وحتى الولد مروان ومامون الشاهد الله .. طالعين طابين ينكلون عليه بخيرات الله ... خو مروان ماكو شارع ابغداد ما مطلعنا ومونسنا بيه .
- انت بنيتي وهم اخوتج مو فضل من احد انت هم شايلتهم بويه اكلتهم شربتهم ملابسهم ياهو الكام منهم صاح نوسة
هدوة : جا غير اخوتها
- اي والله اخوتي الله يحفظهم بجاه علي .
جانت هاي اكثر دعوة ما مستجابة ..
بعدنا على هالكعدة ودك التليفون على عمي كالوله ( مامون مسوي حادث ع السريع )
فز سرحان وهو يصيح : بوووويه ، ولييييدي ، وينه هسه ، يااااااا بوييييه
على صوته فز مروان نزل بالشورت وهو يصيح : شنو شنو ... شكوووو
- امش ولك امش اخوك مسوي حادث ، سوووها الجلاب ، اخ يا مام ن يابويه حجيت وما فاد حجيي ويااااك ، امش نلحك اعلى اخيك
مروان : انعل اباهتهم اليوم والله ولد *****
طلع سرحان ومروان بسياراتهم وهدوة ونوسة يتلاطمن بالبيت وكلوبهن مفحمة على مأمون .....
وصلوا المستشفى ...
مأمون وجهه كله جروح وكدمات ما ينشاف منه شي .. شافه مروان كام يسب ويغلط ويريد يروح يهد على قاسم وبيت ام مروة
كضاه سرحان : يواشك اطي صاول
مروان : ظلت بيها يواش شوف شمسوين بيه اليوم **** ***** والله ، هدنييي
- ان جان ثارك بلاش سمعت اخوك موش بلاش .. اصبر
- شتاني يفلتون
- ما يفلتون ... جان فلتوا من ادينا من الاول خاطر يفلتون هسه ، موش مصلحة اخيك نحج .. اسكت
- بويه من صدكك رايدني اسكت
- ياله امش واخذ وهد واحرك بيوتهم عليهم .. شنكول ؟
بالقانون يذبونك سجن لهساه ماكو دليل على واحد منهم .. وبالعشاير نشتهر شنكول مهددين مأمون جيف غلطان ويا بتهم ، اكعد ابني وخلها اعلى يمناي ثار اخيك ما يطيح ، لجن خل نضمن مامون والباقي هين .
دخل عند الدكتور ..
كاله : شنهو حال الولد ؟
الدكتور : عنده كسر بالساق ، وجرح براسه يحتاجله خياط ورض بأيده.. وباقي الكدامات و الجروح سهلة
صبوا رجل مأمون وهو يصرخ صوت بالسما وصوت بالكاع ومروان فرفح يامن يكضه وهو يسمع مأمون بهالحال .. وسرحان يشد اعلى ايده غيض من الجره بأبنه.
خلصوا من عنده ونقلوه يرتاح ، وكف على راسه سرحان حب كصته : الحمد لله على سلامتك وليدي
جاي يحجي طب مؤيد للردهة : واخيرا لكيتكم ، شنو ، شصاير وياه
مروان : اكضي بيهم التوبة اليوم وعلي
مؤيد : منو المتعدي علي ؟
سرحان : مامش احد بويه
خزر مروان ، ومأمون يون
طب ياسر : ها عمي شني الحمد لله على سلامته ، حادث لو ...
- بعدنا بويه ما نعرف ، خلنا نسلم اعلى وليدنا ويرتاح ويكعد هو يسولف النا .
بساعة وحدة انترست المستشفى باصدقاء مامون وازلام سرحان ، العكل ترس عين المستشفى وكلها تصيح : سلامات يبو مامون .
وسرحان يكللهم : حادث زغير والله دفع شرها ، الف الحمد لله والشكر ابو الاكبر بخير .
ارتاح مأمون وسرحان صف احذاه : حادث وليدي لو معتدين عليك .
- لا اعتداء
ندسه وكاله : كول حادث
مامون : ليش
- سمعتنا وليدي اهم منهم ، خلنا نوسع صدورنا وناخذ ثارنا بعقل .
سكت مامون عد ما اجا يحققون وياه ، مأمون كال الهم : واحد لحكني من ساحة الحمزة لحد ما طلعت ع السريع .. ما شفت شكله جان لابس نظارات والسيارة بلايا رقم .. من شفته صف وياي وبيده مسدس لفت السيارة بساع ونزلت بيها ع الترابي انكلبت بيه بعد ما حسيت غير اني بالسيارة ناقليني للمستشفى .
سرحان ظل ساكت ، والمحقق يحقق وياه : تشك بأحد ، اكو احد مهددك .
مأمون : حاليا لا .
ترك القضية مفتوحة والزلم تسودنت من عرفوا اكو احد معتدي على ابن الشيخ كل واحد يهدد بصفحة ويكله " شيخ ثارك اعلى يمناي .
وسرحان يجاوبهم : ما طول ابني بخير وسلامة كلشي هين يهلنا .
التليفونات ادك على سرحان ومروان والولد ، البيبيت يريدن يعرفن شنهو حال مأمون ، سرحان دار لمروان وكاله : رد على امك وكللها مامون بخير لحد يظل باله ، سويعة ونرد .
نانة : من ساعة العرفت بالحادث وكلبي فرفح بس نريد نعرف عنه خبر ، نخابر نتصل محد بيهم يرد .
لهناك رد مؤيد كال : كسور وجروح وملعوب بحاله طوبه ما ندري هسه ، الدنيا مكلوبه هنا كلها جماعته وجماعة ابوه بعدين اخابركم .
لبست الجهال ورحت يم بيت هدوة ، لكيت حالهن مو اقل من حالنا ، كلهن خايفات على مامون والولد لا يفزعون ويتورطون بثار وجيب ثار واخذ اذية .
نظفت غرفة علي وحضرتله جربايته ..
وعطرتها ، ومتتظرينه يجي .. لإن كالو ساعة ونجي
كعدت انتظره بالغرفة بس مختنكة حيل مختنكة ما ادري اضوج من الصار كله لو اضوج عليه .
لهناك وكالو ( اجو )
كل احنا فزينا للباب نستقبله علي ومروان ساندينه وكوة يمشي راسه ورجله واديه مشدشد .. حضنته هدوة وكامت تبجي، باس راسها وكلللها : ما بيه شي يمه كولي يا الله .
- والله ييمه كلوبنا كضت وراكم .. يمتى نرتاح ونهيد من الطلايب .
باوعلي ابجي واني اصدله
ابتسم ومشى عني وسرحان يصيح : خلنه يستراح بويه تلحكن تشوفنه ، حضرتوله فريش ؟
هدوة : كلش حاضر .. بغرفة عليوي .
دخلو نومو ع الفراش وهوسة فوك راسه ، جهال اخذهم يبوس بيهم ، ظليت برا ما دخلت يمه لحد ما نوسة اطتني الشوربة وكالتلي وديها اله .
خذيتها وطبيت مروان كاعد يمه ، خذا الشوربة من ايدي وهو يسولف وياه حجه مأمون : بيج شي نانة ، شو مو على بعضج
- لاااا
- الحمد لله على السلامة ما كلتي
- الحمد لله على سلامتك
- الله يسلمج
مروان: شبيج
- ما بيه شي ، بس تعبانة ظل بالنا عليه هواية
مأمون : لا يظل بالج يابه بخير ، ارتاحي
- اني راح اروح للبيت ، الجهال تريد اعوفهم لو اخذهم وياي هناك .
مروان : اخذيهم راح تصير هوسة هنا
- ماشي
عفته وطلعت ..
خذيت الجهال ما لي خلك بكلشي ايدي لا تاخذ بشغل ولا بدراسة .. خابرني شاهين ما رديت عليه .
دزالي رسالة ( والله احبج افهميني لا تكليلي عوفني وابتعد وشوف حياتك ، حياتي كلها انت كافي صبرت هواي ما استحق كل هذا الجفا منج ، ردي عليه حتى لو برسالة وطيبيلي خاطر )
ما جاوبته
لإن جوابي اله ولو بحرف راح يبقى يتأمل
ليش امله واني مشاعري وعقلي مو يمه .
للمغرب اجت امي كالت : امشي لبيت هدوة ساعدي نوسة خطية صار الشغل عليهن مكوم ، روحي .
لبست عبايه على راسي ومشيت الهم
طبيت للمطبخ ، كالت : اذا تكدرين تخبزين .. اخبزي بمكاني على ما اخلص العشا ، بس يخلصون صلاة عمي يصيح السفرة .
كتلها اي رحت للترك كابلتني هدوة ، تخبزها وتخليها ع المخبازة وهي كاعدة واني اطركها بالتنور واشلع خبز لحد ما خلصنا السفرة منصوبة بالديوان .
خذوا الخبز وهو حار وزعوه على سفرة الزلم بالديوان وعلى سفرة النسوان بالهول ...
حجت هدوة : نانة اخضيلج كاسة ماي لحم ووديها لمامون يشربها زين لعظامه .
- اي رحت صبيتله مي لحم وحطيتله وذرة طبيت لكيته غافي وفاتح حلكه ، وجهه ازرك واسود وصاير شكل ثاني .
حطيت الصينية وكعدت اباوعله
قويت روحي ورفعتها عن الكل وخليت هواي يتمنوني وما انطيت كلبي لاحد ولا نزلت روحي لمحبة احد فد يوم ، لحد ما طحت هالطيحة هاي ، صرت اتاني نظرة من واحد اني كضيت صغري صاعدة على متونة .
وشما ادور الكى اختي كبالي .
شلون كلبي طاح وطلع من سيطرتي وياه ما ادري
كعدت كباله اباوعله وهو نايم .. يشخر من التعب ..
طب علي : ها نايم
فز مأمون باوعلنا ، حجه علي : اكعد اشربلك شي حتى تاخذ علاجك خوية .
مامون : خابر ابوي عليهم
علي : اي وقاسم مثل كل مرة نكر ولا جن مهدد وبالقران وبالله العظيم وكل حلف هاكبره ينكر هو اله علم بحادثتك .
هز راسه ومد ايده لعلي : ساعداه يكعد
اني كمت من عدهم وطلعت برا ظليت الهي روحي بالشغل وياهم لحد ما لل٩ خلصت ، طبيت سرحان يم مأمون يكله : ليش كلت اعتداء سمعتنا مو هينه بويه
مأمون: ما انمست سمعتنا بس خليت القضية مفتوحة لو لكيت زلة اكدر بيها احقه بدون ما انضر ما اقصر وياه لا بقانون ولا بعشيرة .
- وسمعة البت ، امها من الصبح ليجاي تخابر .
مأمون : خل اكومن والله كريم لا ترد عليهم هسه ، ماطولهم نكروا .. هدهم .
مروان : اذا ابوي هدهم اني ما اهد ، انعل والدي والديهم بعلي .
علي : بس الحق بويه ما نسكت ..
سرحان : نسكت ولدي ، بهالوكت نسكت ، سمعتوا لو لا .
مروان دار وجهه ما رضى بالكاله ابوه
خابر على علي كاله : جيبلك شطفة واطلع وياي
- وين نروح
- اني ادليك ، ثار مامون ما يبات ، ناخذه الليلة
طب علي اخذ غترتين ..
لفوا وجوهم بيها ومروا على واحد بالمنطقة يعرفونا عصابجي، انطاه مروان الف دولار وكاله : عدي دكة على بيت واحد عدي وياه بليه .
طلعوا بسيارتين ما بيهن رقم ..
نخلوا البيت برصاص وذبوا صوتيه جوا سيارة قاسم وفلتوا بسياراتهم .. خلوا بيته وسيارته وشالة ، ورجعوا كأنما ما مسوين شي .
تلكاهم سرحان : وين جنتو ، طالعين وهادين اخوكم لوحيدة ، ما عدكم احساس انتم رادين ب١ ، ما تستحون
علي : طلعنا ناكل كص بويه ، ما تعيشنا زين جانو زلم هنا ، والنسوان تعبن ما ردنا نتعبهن .
مروان : كص بويه كص
سرحان :شو تنوعولي ولكم كص لو بلية .. احجو
مروان : وجوهنا الفليحة تطلع منها البلية ، ما هكيتها من يشيخ .. افا والف وسفة .
حجاها وضحك .
وطب علي يضحك وراه راحوا لمامون نايم
دك اتصال على سرحان بلغوه بيت قاسم داكينه وقاسم متهم سرحان بمركز الشرطة .
بسرعة سرحان مشى لغرفة علي لكا علي جاي ينزع بقميصه و مروان حاط الكرسي عكس وكاعد كباله : رووووح ابو الاكبر فلتت اسبوعين اجازة وين لاكيه تكل ونوم .
سرحان : هادين على بيت قاسم ولكم
انداروله تلاثتهم باوعوله ، حجه مروان : منيلي افقير صجمة ما طاك .
مامون: شصاير ؟
سرحان : قاسم رايح لمركز الشرطة مشتكي يكول هادين عليه وداكين بيته ومفجرين سيارته
مروان : كله بالكزيز ولا بالعزيز تعيش وتاكل غيرها ، بعدني ما واصل لرجله وكاسرها والا كسرة رجل مأمون ما ابيتها اله وضلع الزهرة .
سرحان : يمتى مشيتوا شلون دكيتوا انتم شلون تمشون بلا راي وتحطوني وراكم
مروان : - وليش نحطك بوجه المدفع بويه ، امشي واحلف وكلهم لا هاد ولا الي غرض بكلشي .. وحلفك بمكانه .. انت ما تدري عن شي ، مو طكنا ونكر .. من لحم ثوره اطعمه وانعل والديه .
ضحك مأمون : حياكم
سرحان : شحايهم ، رحتوا بسياراتكم لو شنو
مروان : عاد ابنك بويه اني ما ينخاف عليّ ... علي سيارتك وين ؟
- اباب بيت حجي مونس
مروان : واني سيارتي اباب بيت عمي حاكم ، كواغد تشهد اني جنت اكل يمها لفات كص حتى كلت وياي .
ضحك سرحان وهز ايده : ثاريني مخلف ذياب موش ويلاد .
علي : البيته من جام لا يشامر حجار
مامون : عاشت اديكم .. خله يطك راسه بالحايط ما طول ما عنده دليل عليهم واتهامه خل ينكعه ويشرب ميه كدامه ايام سودة .. بس خل يصبر على رزقه .
مروان : نوووووسة عشاج بروح الميتين ميت جوع وعلي .
سرحان : جا والكص مناعيل الوالدين ؟
ضحكوا تلاثتهم ، وكامن نوسة ونانة عشا ثاني سون لعلي ومروان ومامون وياهم .
مروة اتصلت اكثر من مرة وهم يتعشون ، اخر شي كال الهم مامون : اطلعوا برا خل احجي .
طلعوا ...
نانة كاعدة بالهول منتجية ع القنفه وعلي يحجي لمروان : شكد فكر ولزكة هاي
مروان : نشوف وين تاليها
نانة : شنو
كعد يمها علي : على مروة كل المصايب من وراها والحسن .
نانة : جاي يخابرها
- اي
نانة : وصلني لبيت اهلي
مروان : الساعة ب٢ ونص حيوانة وين طالعة
- لا والله هنا هوسة خل ارتاح هناك دايخة
مروان: وضعج ما عاجبني ، هكو شي ؟
دمعت عيونها وكامت : لا ما بيه شي بس شوية دايخة
علي : دتعاي هنا شكو
- ماكو شي والله
مروان : خبرة بالنسوان اني من تكولن ماكو شي وتبجن يعني هكو طركاعة مو بس شي .
ابتسمت ومسحت عيونها : لا والله بس دايخة
مروان : احجيلي باباتي شنو المضوجج
حطت راسها نوسة وكالت : اكول لو اسكت ؟
خزرتها نانة ظلوا يباوعولها : شني اسرار نسوان دحجن
نانة : لا والله ماكو ، كافي اريد اروح
عفتهم وطلعت للحوش تبعوني اثنينهم ما فكوني .
مأمون : الو
ردت مروة وهي تبجي : هلو مأمون
- شنهو اليجرالي منج بعد
- هذا يمكن اخر اتصال وبعد ما تسمع مني شي .. اني بالمستشفى والطفل سقطته اليوم
- شلون طيحتي .. الطفل جبير
-سقطته وبس ولا تسالني شلون وليش .. اني ما رايده اضرك ولا اتحمل انت تتأذى ما تمسكت بيه بس لإن احبك ، بس اذا ما تحبني وهانت عليك سمعتي وحالي ، اعتبرني ما مريت عليك ، وانسى كلشي .
حجتها وظلت وتشهك وصارت تبجي بقوة وهو ساكت ، جرت نفس وهدت نفسه وحجت : ما رايد تكول شي كبل لا انهي الاتصال .
- هسه اني بوضع ما اكولن بيه شي اكوم على حيلي واكول كلمتي .
جرت نفس : ماشي ، بيباي .
قفلت الخط
ومشت الايام
خوال مروة تعاركوا ويا عمامها جيف تهموها حامل وداسوا بسمعتها .. بعد ما ام مروة قدمت تقرير لاهلها براتها بيها لا حمل ولا بتها مأخوذة اساسا .
خابروا على سرحان على سمعة بتهم والسالفة الصارت وان هم مالهم غرض بعمامها ناس شرايين وداعينكم بثار وحطو بتهم حجة لثارهم .. والبنية وامها تشوهت سمعتهن وانت شيخ وما ترضى بالعيبة ومن هالكلام .
سرحان كال الهم : يكوم ابو الاكبر على حيله ويصير خير ، هساه ابني معضب وانا صاحب مصاب الوالدة ما طالع اربعينها .
مشت الايام ..
واجا لؤي خال نانة ووياه ولده الكبار اثنين على بيت حاكم ، استقبلهم مؤيد و عباس .. وايمان مدتلهم سفرة الغدا ، كلوا وخلصوا ، حجه لؤي : اني هنا جاي انهي سالفة شاهين مو حالة هاي الولد صاله ٤ سنين محضر بيت ومنتظر كلمة من البنية وبتكم تتعزز عليه ، بت باشا بت قصور وهيج شايخة علينا ، فضونا ترا طلعت ارواحنا ، جنت اني رافضت ورضيت لرضاته وكلت مالي علاقة خل ياخذ اليريدها ويتزوج ، بس احنا تايبين من وكت جمارة مو حتى نستفاد بنانة
ردته مؤيد : جاي تعايرنا خالي لو تخطب من عدنا .
لؤي : طفح الكيل وطلعت ارواحنا جزعنا واحنا نكله اتزوج وهو يتجاهلنا وصلت الحالة بيه حتى البيت كام ما يطبله من ورا بتكم خاف نحاجي بسالفتها لو نكله ليش منتظرها .
عباس : شاهين ما ينرد ، وخوش ولد ، وان شاءالله باقرب وقت اتم سالفتهم
مؤيد : مو هيج الحجي ، قابل من عدنا غير تجي نانة وناخذ الحجي منها
لؤي : هي رضت كبل سنوات ، كلبت ع الولد شنو معناتها
ايمان :يوم الرضت قبل ٤ سنين جانت بعقل طيش واليوم بعقل ثاني ماتت اختها وابوها ومر ما مر عليها وعلينا ، وهي ما واعدته بشي وكتها كالت اخلص السادس ويصير خير
لؤي : وخلصت السادس وراح تخلص اول كلية شضال بعد ؟
مؤيد : خالو نشوف نانة ونردلك خبر .
طلعوا ، صاحو لنانة وكعدوها وكالولها انطينا قرار ترا جزعنا كافي .. شنو قرارج
كالت الهم : ما اريده ، خل يشوف حياته ويتزوج .
تعارك عباس ونانة لإن ما تريده ، شلون ترفضة .. كام وضربها ومؤيد فاككاها من اديه، وهي تبجي .
نانة : التمت عليه من كل مكان ..
عباس وشاهين ومامون .. كلش جزعت روحي بس اريد ارتاح من التفكير واعوف كلشي واهجر ما جاي الكا الراحة بمكان .
على كثر ما بجيت امي ودتني لبيت هدوة ووصت علي يطلعني يونسيني .. بدلت ورحت ويا علي بس ما جان الي نفس بكلشي .
رجعت بيومها وجان هذا اقسى يوم اتجرعته ..
وكت الدخلت لبيت هدوة مامون جان بالدوانية يم ابوه ، وابوه كاله : هاهيه ماطولك راضي على بركة الله .
حجت هدوة : يعني راح تخطبونها .
مامون : يمه البنية اني غلطت بحقها وعيب عليه وعلى مضيف ابوي اعوفها هي وامها والسمعة عليهن ، لا ثوبي ولا ثوب اجدادي .. اخذنها والف السالفة .. واني قررت اشتري البيت الكاعدة بيه ام مروة منها ، لإني المرة ما الها غير بتها .. وما اقبل اجيهم كعيدي غير هاي الطابق الثاني يخصني .. منها افض سالفة حصة قاسم ومرته واخلص منه للابد وافتك من هالاطلابة .
وهو يحجي اني كمت من الكعدة وطلعت لوحدي لبيت اهلي ، طبيت للبيت دموعي تجري ، صعدت للغرفة بسرعة .
طبت امي شبيج .. حاجيني ليش تبجين
ما حجيت ولا فكيت حلكي بس نايمة ودايرة عنها
طبت ريحانة رادتني افتح كلبي وافضفضلها بس ما جنت بخلك احجي شي مختنكة لدرجة رايدة بس اختلي بروحي وابجي .
جانت كلمة وحدة ارد بيها عليهم ( بس عوفوني وحدي ، اطلعوا وعوفوني )
عافوني وحدي .. بجيت
عاتبت روحي وكلبي هواي جيف ذبوني بهيج اذية .. ليش حبيته وشلون مادري ، شلون انجرفت مشاعري اله وتعلقت بيه .
جان اكو كلام بكلبي اتمنى اطلعه من صدري واحجي لمأمون بس كلش استحي احاجي بهيج صيغة ، خصوصا هو ما يحاجيني ولا يشوفني غير بنية صغيرة محتاجة واحد يساندها ويوكفلها مثل ما وكفتله ما يشوف بيه غير شي .. صدرة جن ما بيه مشاعر ولا حتى يحس .
طلعت ورقة وقلم وكعدت اكتب وافضفض البكلبي كل اللي بصدري واريد احجي لمأمون .. وكتبت
ما ادري شريد اكولك
ولا حتى شريد اكتبلك
بس واني دا اكتب دموعي جاي يجرن وكلبي مثل القنبلة بين ضلوعي .. ما دا اعرف شلون اسيطر عليه ، كلش ديأذيني .. من ساعة لما عرفت انت راح تخطب واني دموعي ما نشوف ، هواي سألت نفسي شعليه وبالعافية ومن حقك بس جاي اتعذب بكل دقيقة تمر عليه .. لو سألتني عن السبب جوابي واحد ولاول مرة انطقها كدام نفسي (اني احبك ) .
كضيت الورقة كمت اقراها شي ٥٠ مرة
وبكل مرة ابجي واني اقراها
فجأة اجاني صوت مأمون من جوا : ناااااااانة ، ناااااانة ، شبيها هي شبيها .
يحجي ويصعد ع الدرج ، لميت الكدامي وضميت الورقة بساع ، فتح الباب وحجه : كاعدة واني اصيح ليش ما تكولين ها
ما رديت عليه ، كعد يمه : بيج شي نونه ، احجيلي
باوعتله الكبالي جبل بلا احساس شحجي ..
فركت وجهي : ما بيه شي
- كل هالدموع وماكو شي ، ترا مو غريب اذا احد مأذيج اكطملج راسه والله .
بجيت ، كض وجهي : اها نانة صدك تحجين ، غير اعرف شبيج
- متضايقة بس
- من شنو ، علاوي كال ما رضت تاكل ولا نوكف ، خلصتها بجي بالسيارة غير نفتهم علتج شنو اكو اخد ماذيج بالجامعة ، حتى لو صاير شي قوي كولي ، والعباس سترج وغطاج ما اخلي جنس مخلوق يدري بسرج ، بس احجي ليش مبتليه بروحج .
- ما صاير شي
- ليش هلكد كاتمة على نفسج
- مامون عوفني الله يخليك والله تعبانة
- لا ما اعوفج احجيلي
ظليت كاعدة اني ساكته وهو ساكت منتظر احجي ، كض الدفتر البيه الورقة ، فزيت اريد اخذه منه ضربني على راسي : دكافي والله دوختينا .. احجي .
خذيت الدفتر من عنده وكتله : لا تشغل مخك بيه ، عيش وقتك ، باجر راح تخطب .
- هههه انطيني وصلة خل اركص
- ما فرحان
- لا شلون طاير من الفرحة شعبالج ، دحجي ياله
- والجهال
- يعني هالدموع والبجي تخافين لا اخذ الجهال منج
بجيت ، حجه : صدك تحجين انت ، الجهال يمج وكت ما تتزوجين لو تملين منهم اخذهم منج والله ما يتغير شي ، اصلا الحال نفسه اني مالي كل نفس بيها ، والسالفة صارت هيج ، بس والله ما احرمج منهم .
كمت امسح بدموعي وبس اريد شي اضيع الموضوع واغيره لإن لو طولت انفضح : - شاهين خطبني من اهلي واني رفضته وعباس طكاني
- طايح حظه ، بس نانة تريدين نصيحتي لو لا تعرفيني والله اريدلج الخير ، شاهين مثله ما تلكين ، يحبج ومنتظرج كل هالسنين ، هيج شخص حرام تضيعينه من اديج ، شوفي حال خواتج واحمد الله على قسمه مثل شاهين ، مو كل يوم تجيج هيجي قسمة .
- ما احبه
- بالعشرة تحبينه والولد ما بيه شي ما ينحب خلوق وخوش انسان
باوعتله وطولت بنظرتي بعيونه وهو يسولف ، تنهدت : - دتحاول تقنعني بيه ؟
- لا بس رايد مصلحتج وعلي .
هزيت راسي : دايخة اريد انام
-ماشي بس لا تظلين تبجين واذا رايدة اطلعين تتونسين او اي شي .. كليلي اجيج بساع خوش .
- ميخالف
عافني وطلعت
هلكد بجيت
ابجيله وهو يقنعني بشاهين ..
شنو الكدامي حايط لو هو يسوي نفسه ما يحس بشي .
لثاني يوم داومت بالكلية حتى اتهرب من واقعي ما اريد افكر بأي شي .. بس عبث
رغم حضرت كل المحاضرات وما طلعت من القسم ولا خطيت خطوة برا بس بالي ونفسي وخلكي كله هناك .
رجعت من الكلية ..
ذباني ابو الخط براس الفرع يم بيت اهلي ، رجليه خذوني لبيت هدوة بلا شعور ، وكاضة بالدفتر البيه الورقة القريتها ما يقارب الف مرة وحفظت كل حرف بيها .
طبيت لبيتهم .. مامون جان بالشغل
سألت هدوة : شو مداوم مامون مو اليوم يروحون يخطبون
- ما رضى ياخذ اجازة كال ارجع من الدوام وانروح .
طبيت لغرفة علي ..
بيها كنتور ابو ٦ طلاقات
طلاقتين مشتركات يعلكون هدومهم بيها
وطلاقتين لعلي
وطلاقتين لمامون
فتحت طلاقة مامون .. ملابسه كلها مصفطة
وغراضه كلها كدامي .. فتحت الدفتر مالتي ردت احط الورقة بيها وارجع لاهلي وشريد يصير يصير .
هستوني سديت باب الكنتور طب مامون
انرعب كلبي ... لا وكف من الخوف ، بساع فتحت الطلاقة وجريت الورقة من خانته ، وهو يحاجيني
- اليوم هنا ، بكتيني بكتيني .. شنو الضميتي ورا ظهرج
- ولا شي
جريت نفسي وسديت باب الكنتور حيل ، تقرب من عندي : شو انطيني
- ماكو شي مامون والله
- دا اكلج انطيني
ردت ابتعد غصب من عنده وكف كبال الباب : الضميتي طلعي كبالي
- ورقة والله
- اي ادري ورقة شوفيني شبيها
- عوفها مأمون عليك الله
حجيت والدموع تجمعت بعيوني تقرب من عندي حيل ومد ايده وراي ، حاول يفتح بيدي ، ادموعي جرن من الخوف والاحراج وكلبي يدك حيل
خزرني : فكي ايدج وانطيني الضامته
فكيت ايدي بيده خذا الورقه وكتله : بس خليني اطلع
وكف كدام الباب وجر الورقة يقراها ، ظل عاقد حواجبه وهو يقرأ ، رجع باوعلي ......يتبع
☆☆☆☆☆☆
#زينب_ماجد