#كحل_عرب
(احضان باردة )
((( بقلم زينب ماجد )))
الحلقة_ ١١
(قبر مطلوب عشائريا )
أبد ماسامرتها الآه لولاكْ
ولا چان إعله دربك لاویــه الجیـــد
لـِ عريان السيد خلف||🖤
خلال ساعة وحدة الكل التم ابيت حاكم ..
وكل بناته حضرن .. اللي شكت ثوبها
واللي زلغت خدودها
وكلهن حفنه وهو ميت بفراشه ويصرخن يم راسه
هدوة
نهاد
الاء
نانة
زهراء
كل وحدة بيهم تصرخ وتنعى ابوها بكلب فاقد
كواغد جانت بالسوك
خابروها كالولها ارجعي للبيت بساع
عرفت رجلها العافها كل هالسنين وهجرها ... مات
بس جانت مثل كل مرة عراقية اصيلة توفي حتى لو ما لكت الموافى .. ذبت عباتها من الباب وصرخت من الباب وطاحت عليه تتملخ براسها وتصرخ .
صاح سرحان : بسهن .. شيلو بوية من النسوان .. شيلووو
طب مؤيد ومروان وعلي ومأمون .. شالوه من الفراش وهدوة فكت زيجها وصرخت : شلت يا بوي وياك الوداعية .. شلت يا بوووي .
وكلهن لطمن اعلى شيلته وصرخن .
شالوا منهن .. كضت بطرف دشداشته كواغد وهي فاقدة اعلى فراكة .. صاحت : بري الذمة يصويحبي .. بري يعزيز كلبييييي .. بري ورايتك بيضة يحااااااااكم .
خذوه وشالوه للمستشفى .. حطوه بتابوت وطلعوا شهادة الوفاة ورجعوه للبيت ، حطوه بنص ولده وبناته واحفاده ونسوانه .. كل واحد بيهم يصرخ عليه بصفحه .
علي كاض بامه ويجر بيها فقدت على فراك ابوها ..
وسرحان اجر كوستر وكال الهم : خلي كل بناته يصعدن بسيارة الدفنة يوادعنه .
انترست السيارة وطلعت للنجف
لفوا التابوت بمرقد الإمام علي .. وطلعوا بيه للمكبرة .
اكبر كسرة تعرض الها المرحوم حاكم .. واللي كانت سبب حقيقي بأنتكاسة حالته .. موت جمارة
عاش عمرة بتأنيب ضمير لإن جان يحبها ويخاف ينطيها لواحد مثل خنجر معروف عنه شراب عرك وصاحب خاوات ونسوان .. جان يشوفها بنته الدكتورة اليريد يفتخر بيها وينطيها لاحد يستاهلها .. بس الصار ويا جمارة لما نهبت ونزلت راسه ونهايتها غسل عار .. خلاه يعيش عمرة بتأنيب ضمير .. هذا التأنيب اخذ من صحته هواي لدرجة من بعد جمارة ما صحى ووكف على حيلة .. بموتت بطة .. انتهى وانتكس للأخير لحد ما عاش سنة مشلول و مات .
جانت اله وصية خفية ما سار بيها بس سرحان ..
وسرحان نفذ وصية حاكم .. وحفر كبر حاكم بصف كبر جمارة ، ودفنه بصفها .
بموتت حاكم
انكشف مكان قبر جمارة وخنجر !
والكل عرف مكان قبورهم اللي سرحان خفاه عن الناس كلها.
من بعد ما كضت الفاتحة
ومشت الايام ليوم السابع ..
كواغد جانت مشترية عكيكة وذابحتها
وبناته كل وحدة بيهم طابخة بثواب ابوها ع السابع
كون سابع يوم الفاتحة لازم يتقدم سبع اصناف من الاكل ثواب على روح الميت.
سرحان كاعد بالدوانية بنص الزلم ..
اتصل الدفان .. وكاله : شيخ كبر رفيجك خنجر لكيناه مكسر ومكتوب مطلوب عشائريا .
انتفض سرحان من مكانه : ياهو هاذ المتعدي اعلى كبر خنجر .
- ما ندري ، انت كلفتنا نبني كبر المرحوم حاكم
واجوا العمال صبحية حتى يبنون يكضونه .. لكوا كبر رفيجك متعدين عليه ومكتوب عليه بالاحمر (مطلوب عشائريا )
- انا اخيك يخنجر .. السواها ما رايد روحه
سد التليفون ودك على جبير ال ثجيل : السلام عليكم
- وعليكم السلام
- المرحوم خنجر وان جان ناهب بت من ال ثجيل لجن ثاركم خذيتوه وجتلتوه ، التعدي اعلى كبره ما اسكت عنه ، وكل واحد متورط بسالفة كبر خنجر .. احسابه وياي موش ويا غيري .
- يواشك شيخ ، انا ما اعرف عن كبر خنجر شي ، والاعرفنه كبره خفي .
- كبره ما ظل خفي وانعرف بموتت حاكم .. لجن حط ابالك يبن ال ثجيل ان جان وحيد منكم المسويها انا اعلى ثاراتنا ارد اردود .
- ديوان ال ثجيل بري من عالامر ، وانا استفسرلك عن الامر ، ان جان المسويها من ال ناصر ، شان ال ناصر ويحكلك الكوام .
- انشد ال ناصر وردلي خبر ، انا متانيك .
سداه وسرحان يرجف طلعله مأمون : ها بويه ، شني
- الكواوييي* متعدين اعلى كبر خنجر ومهدمينه
- ياهو هذا السواها ، ماكو غير ال ثجيل ، سواياتهم حتى الميت بكبره ما يخلص من شرهم .
- خبريت جبيرهم لون جان الفاعل منهم ، انا وياهم كوام .
- على كيفك بويه ، استراح وان شالله نعرف السواها
- هضيمة ولك يمامون بووويه ، سنين مرت ويتهدم كبره عليش .
ظليت اعاينله مفرفح ، عاف السبعة وطلع ، طلع مروان : شبيه ابوي ؟
- الدفان مخابر عليه مهدمين كبر خنجر .
- كبر كون هو ميت .
- عقليات تعبانة بعد شتسوي .
جاي يحجي وسمعوا رمي قوي ..
حجه مأمون : يا ستار شني هاي
الزلم طلعت على صوت الرمي .. سرحان برا يعاين ويسأل : شني الرمي هاذ ؟
اجا خبر كالوا اشتباكات بين الجيش العراقي و جيش المه/دي ، الناس بسرعة من سمعت اشتباكات .. كلمن صاح على مرته وعائلته وصاح : يلا .
طشت الوادم بساع ...
صاحت الاء على مأمون : خوية ما تكدر توصلني لبيتي ؟
- رجلج مو بالبصرة
- وياهو ماتي برجلي اريد ارجع لبيتي ما دام فضت الفاتحة .
سرحان : لا بوية تريثي بنيتي وظلي هنا ، الوضع موش تمام .. باتي الليلة هنا
- عمي تعبت اريد اروح لبيتي
مامون : ميخالف تحملي ، دسمعين رمي .. اكعدي لباجر عود .
طبت جوا نانة واكفة تعزل : ها ؟
- ما قبلوا اروحن
- مو تسمعيها رمي شعدج
- طكت روحي اريد اسبح اتمدد ابيتي ارتاح .. مليت
طب عباس من برا : نانة شكد عندج حدر ايدج فلوس
- عندي ؟!! منيلي
- دشوفيلي ١٠٠ الف محتاجهن بسرعة
- يا شبيك عباس منين اجيبلك ما عدي .
- امشي جيبي بساع بلا حجييي زايد
- منين اجيب
وكف مأمون : نانة اذا الجاي حار صبيلي استكان .
حجاها وجر كرسي وكعد ، عباس بساع مشى من المطبخ وطب جوا وصاح : نانة تعاي .
اشرلها مأمون تظل ، حجت : يمكن اباله مصرف الجهال ورايدهن مني .
مامون : مالج علاقة بيه ، صبي وسكتي واذا طالبج بيهن كليله مأمون ما يرضى .
كعد حيدوري على رجله واني صبيتله الجاي ، صاح عباس : مو احاجيييييييج
صاح مأمون : زقنبووووت حسك عباااااس .
- خل اروح اشوفه يمعود لا يتخبل عليه .
عفت استكان الجاي ومشيتله ، شو هاذ كضاني من راسي وجراني : عود انت شني اطيزيني من احاجيييييج .
- دوخر ايدك شبيك عباااس ، رااااسي
- طلعي مية بساااع
- منين اجيبلك قابل اشتغل اني ... دوخر
طب مأمون للغرفة دفع ايده عني وكضاه من قميصة : اسمع لك امشي عدل عباس لا والسماك عباس احطك براسي وابهذلك .
- اني واختي ، وخر مني
دفعه : عباااااس لا تخليتي اتسودن عليك والقرأن ، جوووز
هز راسه وهو يتوعدلي وطلع من الغرفة ، اندار مأمون : امشي اليوم ابيتنا باتي هنا هوسة وحيدر تعب .
- والنسوان وامي والوضع هنا هوسة ، شيمشيني .
- وبس انت بالفاتحة يا بوية دمشي .
لبست عباية فوك ثوبي جريت نرجس و هو شال حيدر وطلعت وياه لبيتنا ، فرشت اليه وولجهال بغرفة علي ، وتمددت ما حسيت من التعب والقهر البيه على ابوي .. بساع غفيت ما حسيت ع الجهال .
كعدت على صوت حيدر يبجي فتحت باب الغرفة بالهول كاعدين ، علي شايله ويسكت بيه ومأمون جاي يحاول يسويله ممة ، باوعت للساعة ، ب١١
حجيت واني افرك بعيوني : دنيا الليل لو صبح
ضحك علي : يا صبح شبيج
مامون : رجعي نامي سويتله ممة هسه انومه
- لا ميسكت جيبة اني ارضعه ممة بصفي
خذيته وطبيت نومته بصفي وحطيت الممة بحلكه وغفيت ما دريت عنه ، فزيت مأمون دا يشيله : ها
- لج ابوية نامي ، كلساع فازة ومفززتنا دنامي .
رجعت راسي نمت بس حيدر ظال يبجي بديهم ما يقبل بيهم يريدني مثل كل مرة احط مخده على رجليه واخليه وانطي الممة واظل اهز اهز لحد مينام ، هيج متعود .. عذبهم وما جاي ينام .
مكدرت ارتاح بنومتي وهو هيج يبجي كمت خذيته من اديهم .. وبيا ما بيا تجيت ظهري للحايط وحطيته على رجليه اهز برجلية ، ومغمضة عيوني .
طب علي كعد يحجي ويا مدري منو ..
شوية وفات مأمون ، ندهني : نانة تمددي حيدر نام
شاله من رجلية واني نمت .
مجنت ادري للبيت محد بايت بيه غير مامون وعلي ومروان نوسة بايتة يم هدوة ابيت اهلي .
فزيت الصبح على صوت سرحان وهو يكول : هاه شنهي ولكم بويه .
مامون منطي وجهه للحايط وعلى على جربايته .. و اني وحيدر ونرجس مطشرين بفراشنه كل واحد نايم شكل ، شلت راسي : ها حجي ؟
-وحدج بايته هنا
- ما ادري اجيت البارحة .
- دكومي بوية كومي ، حتى لون متربية بيناتهم تظلين بت احديثة ما يجوز اتباتين ابيت بس شبان
كمت من مكاني مروان نايم ع القنفة على صوت سرحان كعد .. شال راسه : شني شبان بوية سويتها كلش .
- هاي الاصول بوية ما يجوز ، نوسة عليش ما جت ؟
كام مامون : شسويت ع الهدم كبر جنجر
- لهساه محد خابر ، بس الامور جنها ما اطمن
- ليش خير ؟
- شرطة وحرس بكل مكان
- الاشتباكات بعدها
- البارحة الرمي بفلس
- اي مسوين جولة يكولون على ذولة الربع .
- الله وايدهم ، اكو بيهم ناس زينين بس صاروا غطا لكل واحد ناقص ودوني يلتف جوا عبايتهم ، والمدينة صارت ما تنطاق من ورا كم واحد ارعن متفرعن وماخذ الدنيا طول بعرض .
نانة : مامون اني راح اروح من يكعدون الجهال دزهم عليه .
- خل اوصلج
لبس قميصه وطلع وياي ، وصلني لكيت امي كاعدة ولافة ربطتها على خشمها حجت وصوتها مطبك : وين رحتي يمه
- ابيت هدوة ، شكو
- عباس كلب الدنيا عليج ومتحلفلج .
طبيت جوا عباس نايم سويت ريوك ويا الاء ونوسة وكضينا شغلنا ، جانت يمه كواغد تعبانة وسكرها صاعد ، من موتت ابوي ولليوم هي حالها ما يسر .
خلصت الريوك وكمنا للشغل جاي اغسل بالحوش ، الا عباس يجيني بطرك الشورت ، ويدفرني بنص الماي ورد كضاني من راسي : وين جنت تكو*** بالليل ولج
كمت اصرخ بيده ركضت امي وهدوة عليه ، اتخبل شلون كمت اصيح ، كضني رفسات كضاني كضيان ، اتريد تفلتني من اديه ما تكدر .
وهو يصيح : شعدج ويا مامون ولج ، يدافعلج وتتكوين براسه علييييييه نانة
- شتكويت ، تطلب مني فلوس جهالة وتريده يسكت
- والله من يطبون جهالة بعد للبيت الا اكصبهم واكصبج ويااااهم والله
ايمان : انت ما تستحي على روحك ما تكول امي بعدة ومكسورة على ابوي ، جهال اختك ذولة يتامة يالنذل .
- ما احطنهم بالبيت والله.
يحجي ويرفس بالجدورة الكبار مال الطبخ البالحوش هرج الدنيا هرج .. امي وهدوة تعاركن وياه ، زاد بصريخه وحجيه .
طب جوا وصاح : اني وجوهكم الزفرة ولا يلوكلي اكابلها من باجر البيت هذا ينباع وتنطوني حصتي بالورث .
ردته هدوة : ورثيش ولك جلب بعده تراب ابوي اخضر وتحجي بفلوس من عمت عينك كووون .
- معليج انت مرة ضحياويه ، لا تدخلين ولا تحجيييين ، ما عاجبج ولي لبيت رجلج وشوفينا كفاج .
- يااااع تطرني وابوي توة ميت .
كامتله كواغد : ما عاش اليطرد هديوة من بيت ابوها ، لا عدالك ابوك مات وباد حيلي يعبيس ، تهدة لا وحك ترابه اضيعنك .
- سكتي انت سكتيييي ، مالج غرض
لا ما امشي هاذ البيت صراط مستقيم ما اطلع عباس وغصبا ما على روسكم البيت هاذ ينباع وتطوني حقي .
كواغد : نعلة الله اعلى ابو ساسك ، تموت وما تشوف فلس احمر من بيتي ، ما جبته بجدك ولك ولا بجد وحيد .. بدم ابني جبت هالبيت ، ووصية ابوك لو مات البيت يظل لبنات ستار .
هدوة : هدي يمه ، جلب هاذ وتفرع فوك روسنا ، خل يولي
- دخل اشوف شلون ما ينباع ، والله اهجولكم بس اصبرولي .
طب جوا ويتعمد يغثهن يالحجي ويحجي ببيعة البيت ، وحط كوره وياي ، ويتوعدلي جيف مامون فزعلي ، ويحجي حجي سخيف عليه ، بس اني لا اترادد وياه ولا اتقربله ، اخاف يمنعني من حيدر ونرجس واخاف يمنعني من دراستي ويكسرني .
انفرض حظر تجوال بيومها ..
لا كدرنا نطلع ولا نمشي .. وعباس ظل دايس ببطونا يتحجج على اي شي .
هدوة مشت البيتها هي ونوسة ، حتى لا تخلي جهال مامون يجوني ويكتلهم عباس وتتفاشل ويا سرحان ، بس من جاي مامون من الشغل نرجس ظالة تبجي تريد تجيني ، ماخذها واجاني للبيت .
خذيتهم وصعدتهم فوك حتى لا يسمعهم عباس ...
بس من كعد وشاف نرجس كام وطردها بالشارع ، ورد طب للبيت صاح : ناااانة ، نااااانة ، ذاك وين ابن مامون النكس وينننننه
- ابن مامون شنو عباس هذا ابن بطة
- انعل ابو بطة ، وييييينه
صعدت فوك دخلت الغرفة ندهت مؤيد كتله : كافي دكوم حسسنا بوجودك ، ما جاي تشووووفه من الصبح لهسه يرعد فوك روسنا دكوووم .
طب عباس ودفر الباب وجر حيدر من اديه ، كضيت بيه : عباس الطفل ماله ذنب بمشاكلك عباااس .
نزل مؤيد وراه : انت شبيك تسودنت
- معليك انت خليك ابطل العرك مالتك وخر مني .
طكاه بوكس ، تكاضضو من للياخات وتعاركوا ، الاء جرت جهالها وطلعت من البيت راحت لبيتها ، واني اخذت حيدر وطلعت للحوش ابجي ، وامد راسي من الباب ، امي ماخذه نرجس من الشارع وحاطتها يم يمه كواغد ... وركضت تفازع بين مؤيد وعباس .
خابرت على مامون ابجي ، رد : الووو
- الو مأمون ، تعال
- هاي عليش تبجين
- والله تعبت تعاااال
- جاي بسرعة .
لاف السيارة بسرعة ماكو دقيقة وشوية مامون بالباب ، صف السيارة ونزل السويج بيدة ، عباس جاي يطلعلي للحوش يريد ياخذ حيدر من ايدي طب مأمون ، ومؤيد تبع عباس دفعه .
مامون : هاي شكو
عباس : لو حطيت جهالك عدنا بعد وعلي اكصبهم ، اخذ جهااااالك ، مو دار ايتام هنا ... يلاااااا
مأمون : صياحك هذا ويامن لك .. تعال جااااي .
دفع مؤيد وطب للبيت ويصيح ، دفع الباب مأمون ولحكه ، جراه من فالينته من ورا ورجعاه : تعال جاي اكلك ، صياحك هاذ ويامن .
كضته ايمان : بداعتي عليك يمه عوفه والله كلوبنا تعبت كااااااقي ولكم واحد بيكم يرحم ويقدر حالنا وااااااالله تعبنا .
دفعه وصاح : اسمع لك جلب من اكضنك وعلي ادفنك ، لا تندك وياي اندمك والعباس ، يتمرجل طايح الحظ ، اسمع لك غصبا ما عليك ، جهالي يظلون هنا ومن اسمعك طاخ واحد بيهم ، بالقرأن الا افلش وجهك .
طلع وهو يسمعه ويحاجيني : اسمعييييي من يمس شعرة منهم تخابريني يسااااع ، ادوس بمصارينه والله .
حجاها وطلع .. رد عباس حط كورة وياي يكلي : بس تخلينهم عدج اكتلج ، لو تطيني المية لو ما يظلووون
شلت ال١٠٠ انطيتها لامي .. كتلها انطيهياه خلصيني ..
اخذ الفلوس واجاني : اذاني كل العندج لو هكو بعد
- ما عندي بعد .. خلصني
- لزكة اني واخلصج طااااايحة الحظ ، لزكة اني .
اجا صكعني على راسي ومشى ، كضيت الجهال حطيتهم بحضني وكعدت ابجي .
تعطلت الدوائر
الشوارع عزلت .. انفرض حظر تام بالمدينة والرمي والاشتاباكات ما الها حدود .
جانت ايام صعبة ، نصعد فوك نلكة البوش مال الطلق مطشر اطشر من ورا الاشتباكات الامنية .
علاء جان كاض واجب على نفط البصرة انذار جيم ماكو نزول .. والاء وحدها بالبيت واشتباكات خابر علاء عليها حتى تروح لبيت اهله ما رضت ، خابر على مأمون جابها هي وجهالها البيتهم .
بيت ثجيل وال ناصر تبروا من سالفة هدم كبر خنجر .. وظلت هالسفلة علة بكلب سرحان يريد يعرف ياهو التعدى على كبر خنجر .
مروان بهالفترة تعارك هو وابتهال ، عركة جبيرة جيف ما يجيها ولا يمرها ، نهاها بطلاك .
بنفس اليوم اجته رسالة على التليفون مكتوبتله بيه ( تدري بوسن اتزوجت لو لا ، اذا ما تدري روح الحك جهالك ) .... يتبع
☆☆☆☆☆
بارت قصير اعرف بس احسن من ماكو ..
نعوض بغير يوم ، لإن نعست حيل وكوة سردت .. تصبحون على خير .
#زينب_ماجد