كُحل عرب

البارت الثامن عشر

#كحل_عرب
(الفوضى)

((( بقلم زينب ماجد )))

الحلقة_59
( دينار )

متبدل بطبعة الوكت
لو إحنة ، التبدلنه ؟
لــِ عريان السيد خلف||🖤

وسن : الكل جاي يتحضر لخطبة الاء وحمزة باجر ، واني الم بجنطتيما اعرف بيا ساعة اجيبن ، زاد الثكل علي .. وحيل تعبت روحي ونفسيتي .. بطة ونوسة شايلات عني شوية ، بس ضيمي مو شغل بكثر ما هو هم گلب .‌

اشكد اكول اتغاضى عن سوالف مروان .. شرب و علاقات .. وبيته برا البيت ، بس من اصفى لوحدي واصفن بروحي انكسر حيل ، اكولن ( شنو القصرت بيه وهيجي يسوي وياي؟  استاهل اليصير بيه ؟ اخدمه واخدم بته و اهله وبطني ها علواتها وما اشكي ، بس ولا مرة سمعت منه ال الله يساعدج ! مو اقرن روحي بس اني بشر من اشوف كدامي شلون اخوه يعامل مرته ، من يشوفها تشتغل و يكوم يشيل عنها لو يحاول يساعدها لو بالضحك مرات يفزع نوسة حتى تساعد بطة في سبيل ما يشوفها تتعب .

لو مرات انزل جوا الكي كاض بته ويفتر بيها بالهول ومن اكله ( ها خوية جا بطة وينها )
يجاوبني(نايمة تعبانة خطية وطلعت نرجوسة منها خاف تكعد ) ويحتار بالفرخة وهو رجال صاحب شغل يكعد من ال٦ ونص ، واني لا شغل ولا عمل فنه الللتفت عليه لو كال ها تعبتي ..

ما اكول يكرهني اعرف مروان هاي طبيعته بس طبيعته تعبتني حيل .. كرهت حتى روحي، امثل القوة كدام الكل .. بس اسد الباب علي اظل دموعي لوحدهن يجرن على ضيمي .

كبل الخطبة بيوم بالليل .. جان مروان ما موجود بالبيت كل ظني عد بيت عمي حاكم .. وازتني الطلوكة وبس نويرة بتي يمه كتلها (روحي صيحي بابا من بيت جدو حاكم كليله ماما راح تجيب )

ركضت بتي ورجعت بساع وهي تكلي (تكول نانة مروان ما جاينه اليوم ) اغتاضيت حيل واتوازيت ، دكيت الباب على غرفة عمي وعمتي ، فزت عمتي وفكت الباب : ها يمه شنهي طلوووكة

- عمة احب ايدج راح اموت اتلاحكيني

فزعت وهي تنده عمي : سرحان كوم سرحان وسينة جاي تطلك .. كوم

فز عمي و هو يعاينلي ( ها بعد عمج .. الله يسهل الله يسهل جا رجلج المسربت وينه ، ام علي دكي الباب على مأمون بساعة )

ركضت عمتي وهي تنده مأمون .. لبس وخذاني ، رادت تمشي وياي عمتي بس رجليها يوجعنها نوسة ما خلتها ، كللتلها : يمه انت شتسوين للبت ورجليج يوجعنج انا امشي عنج واعاوننها .

لبستني الربطة والعباية ، و بطة طلعت خذت نور يمها ومامون يوصيها على البنية ، خذوني مأمون ونوسة وانا ادموعي تتجارى مو من وجع الطلوك ، من حال رجلي و اهماله الي .

وصلاني مأمون للجدة .. نزلت وياي وسن اول ما دخلتني ، كالت (الفر/خ واصل بس نامي ) ماكو نص ساعة هواي على جيابتي ، بساع جبت بس دموعي تجري واني اولد ، بس فرحت من كالتلي ( عليمن تبجين كولي يا الله رزقج الله بولد ) ونوسة تصلي على النبي ، لفته و عصبته وخلته يمه وطلعت تبشر مأمون .. حيل فرح .

خابر على عمي و وعمتي كال الهم ( مرت مروان جابت ولد ، حضرولها فراشها يمه ساعة ونرد )

لفلفني ومامون دفع فلوس الجدة ووياها بشارة الولد ٥٠ الف .. طلعت حبني براسي وهو يكلي ( الحمد لله على سلامتج خوية)

كوة امسي ما رديت عليه .. صعدتني نوسة وصعدت يمي ورديت للبيت بس كلش متضايقة ، طلكت وجبت ورجلي ما يدري .

رجعت للبيت وتلكني بالهلاهل وعمي يصلي على النبي ويحب براسي ، واخذ الولد يحبحب بيه ، حجيت : عمي جا مروان وين وعلي مليت

نتر بيه : عوينة ابو اصلة بويه شنهي مروان وتهمين بيه احنا هنا وياج خله يولي .

اذن بأذن الولد و سماه على أسم الإمام علي (مرتضى ) وحطه بحضني وطلع ورقة ١٠٠دولار .. جانت عجبة عدنا ياهو اليكضها ، حطاها بكماط الولد وكال ( الله يحفظه الج بوية ويخليه سند وعونه بجاه هو الحسين )

حجه مامون : جا سميت الولد غير تنتظر مروان يجي

- دخله يولي هاذ شنهو وانطرنه .. وليدي هاذ وامه بنيتي .

مسح على راسي وهو يكلي : ما ارضى تضوجين عمو واليشتهي كلبج اطلبي .

ووصى عليه البنات يدارني ، اني تعبت من الولادة ذبيت روحي نمت ما دريت .

البنات كفوا الشغل كله .. وايمان دزت على نوسة تاخذ الاء للصالون حتى يرتبونها قبل لا يجون الناس .

هدوة كالتلهن : روحن للخطبة انت انا اظلن يم وسينة توها جايبة نفسه ما تنعاف .

نوسة : جا انا راح اخذ نور وياي للصالون هم اجرلها بدلة وامكيجلها هناك .. اطلعها هي العروسة .

الاء : ما جنت مصدكة هاليوم اجا والكل وافق على حمزة واليوم خطوبتنا ، صح ابوي وافق على مسؤليتي وما راضي بهالخطبة ابد ، بس المهم عندي وافق فرحتي ما تنوصف .

نانة معافتني فرحانة على فرحتي .. بدلنا اني وياها حتى تاخذنا نوسة للصالون ، لبست عباية حجت نانة : شعدج لابسه العباية ومجفنه روحج .. البسي جبة

- لا حمزة ما يرضى هيجي

- وهاي من هسه بعدها ما صاير خطيبج ، قدمتيله الطاعة ، لعد بعد يومين شلون

- غير هو ما يرضى خو ما اخلي يزعل ؟

نوسة : تمشن مو وكت تشاورجن يرضى لو ما يرضى يلااااا

جاي نطلع ، حمزة صف سيارته ، باوعلي لابسه عباية ابتسم ، واجا تقرب من عدنا : جا وين رايحين

نوسة : هلا بيك خوية، للصالون غير

حمزة: جبت الكم البيبسي و الكيك لاهلج مال الخطبة

- يا وعمتي وصت عباس يجيب، خل ارد كبل لا يطلع

ركضت نوسة ،ظلت واكفة نانة يمنا و هو واكف ، حط اديه بجيوبه : شعدج بالصالون .. انا عاشكج بلا حمرة

ابتسمت ودنكت، حجت نانة : غير يجون خطار خوما يشوفوها هيجي وحواجبها جنهن ازدحام بانزين خانة

ندستها ، وهي تكلي ( اخ شبيييج قابل مجذبة ) ضحك هو ، حجيت : هاي اختي دائما اني وياها معارك

حمزة : ودعيها بعد ما تشوفينها

نانة : ليش شنو بعناها الك لو زوجنهاها ، كل جمعة تجي تبات عدنا هااا ، قبل الخطوبة جاي اتفق وياك

ظل يباوعلها استحكار وهو يضحك .. جان فرحان حيل وضحكته ما فاركته ، مبتسم ويا الك ، طلعت

طلع عباس، وامي وراه ، تقرب حمزة سلم عليها و نزل البيبسي و الكيك هو وعباس ، احنا عفناهم جاي نمشي صاح حمزة : وين

- خوية مو كلنالك للصالون

- اي اني اوصلكم خوما تروحون وحدكم

عباس اندار لنانة : طبي انت لا تروحين

- خب دروح .. غير خطبة اختي

- طبي لا اكتلج بالشارع والله

- ماما صيحي بيه

ظلت امي تخزر بيه وتأشر على حمزة وعباس يكللها : مالها روحه

كضتني نوسة ودفعتني للسيارة : عود من نرد تكافشوا مو وكتكم راح الوكت .

صعدت بساع و حمزة كعد كبال الستيرن ، و احنا تلاثتنه ورا ، حجه : الاء اكعد يمي تعاي

نوسة : لا خوية تلحك تكعد يمك امشينا فدوة اروحلك وعلي تاخرنا

حجتها وهي تعبر نور بت مروان تكعدها بالصدر ، سكت هو وساق اخذنا للصالون ، شفته كمش وكاتل روحه ع الاء .. و عمتي الفلوس الطتنياهن ما يكفن بس صالون مو فستان واجره ، حجيت خاطر احشمنه هلبت يطلع منه عليمن بعد اصرف العدي ، نكزت : يا ولج الاء

باوع هو من المرايا ، وهن فزن : ها

- نسيت الفلوس بالبيت .. صخام شيرجعني بعد

- صدك تحجين

- يلا هسه انزلجن وارد جا بعد شسوي

حمزة : سهلة خوية لا تحسبيلها

- لا يطيك العافية عمتي اطتني شكثر كالتلي اهم شي عدي فرحت الاء خ** بالفلوس ، و يالحظ المصخم نسيتهن .

الاء: شلون ترجعين

نوسة : جا سوي

سكت هو من وصلنا للصالون ورق وانطه لالاء مدري شكثر .. اني كتله : لا خوية صدك جذب الخطبة علينا ما يصير

حمزة : سهلة

- مشكور ، يلا نزلن تانني بالصالون على ما ارد للبيت اجيبن الفلوس واطلع للسوك اجر فستان الخطبة .

الاء: خلي حمزة يوصلج

نوسة : يا شيصير الولد ما دكليلي دنززززلي

حمزة : لا بعد هو بطريقي هذا السوك ، اني اوديج .

- بكيفك بعد ، جا انتظرني بس اوصي ام الصالون عليهن وارد .

خذيتهن وطبيت للصالون ، كتلهن : باوعن الصدك ما ناسية الفلوس بس اني كلت هيج عرفته راح ينطي ، الفلوس الطتنياهن عمتي خل ناجر بيهن اني ونانة نجيب ملابس حلوة نكشخ شني .

صفكت نانة : هلا هلا هاي التفتهم

نوسة : شلون لا ما نطلع حكنا شلووون

الاء : فرهدتن رجلي

نوسة : خب دكووومي .. باع هاي مصدكة صار عدها رجل

ظلن يضحكن عفتهن ووصيت نانة على نويرة و رجعت ، صعدت وياه : خوية ما رايدة اكلفنك خاف ما عدك خلي ارد للبيت اجيب الفلوس

- شني السالفة خوية صدك جذب .. شتكلفيني .

نزلت للسوك ، كتله : تنزل وياي تختار الفستات التلبسه خاف ما تحبه مدلع او هاي .

- اي يلا

والله نزل وياي على سوك عريبة ، فرينا الفساتين ما كلش عجبني مثل البدلات ، كتله : ناخذ بدلة ما طولها هي خطبة ونيشان

- بس البدلات كلهن مصلخة يا خوية

- يا جا ما تظل هيج ، على بختك غير اهلنا يفصمونا ، شني وين كاعدين ، لا شال اربطننه الها هيج اسوي وفوكاه يجي قماش يغطيها من تطلع ، بس بين النسوان تفله .

- بكيفج بعد

باوعت اختاريتلها بدلة ليمونية جديدة تخبل ، هو اتفق ويا الولد واطاه العربون ، واني اخذ البدلة واطاني وياها بروش .

انداريت على بدلات الجهال ادور بيهن ، حجزت وحدة ، وفستان الي وبنطرون وقميص جدد لنانة .. رحت جاي اعاملنه على الايجار .. حمزة ما رضى احجي ويا الزلمه ، عامله هو وانطى الفلوس .

واني عوزني بس اهزن ركبة طلعت العرس كله ، ردني للصالون شايلتلي جوكة ملابس وفلوس عمتي بجيبي ، نزلني وكال : امرلكم اردكم لو شلون

- لا يطيك العافية تعبناك ابو الاكبر يمرلنا بس يجي من الشغل ..

- ما عدي شي اجي

- لا خوية ما يصير ، كلفناك اليوم وعلي مستحية منك

- لا تحجين هجي تره الاء غالية عدي وترخصلها العيون

- يحفظكم ان شالله بجاه ام البنين .

طبيت للصالون واني انحثل بجوكة الملابس تلكتني نانة : شني هااااي ولج

- خايبة جبتلج بنطرون وقميص ايجار ايشكن شك ..خايبة ماكو هيج كله مدلع اليون نكلبه على الاوربي .. لو يصلخون جلدنا لو نفر سلامات

ظلت تباوع بالملابس وفرحانة والاء طارت فرح بالبدلة ، ام الصالون طلبت مني البسها حتى تنتقل على المكياج . 

طبيت اني ونانة لبسناها البدلة، بس الاء مسفوطة صدر ماكو والبدلة ما تكعد وزن ، مدري هالرجال عليمن متخبل عليها وهي طاكينها اوتي جا تلام نانة من تسميها (ذبانة ) ، خب كتلها : نزعي جواريبج

نزعنه جواريبنا ومليت صدرها جواريب و هدوم حتى ارفعه الها واضبنه بالبدلة .. صارت البدلة عليها تكتل ،

كعدت ع المكياج ، بدلنا اني ونانة وبدلت لنورة ، شفت نانة تباوع على اليسرحن الشعر ، كتلها : تريدين تسوين شعرج

- وين عندي ، لا من ارجع اخلي نهاد تكويلياه

- خايبة شتحجين انتي
مديت ايدي بصدري طلعتلها فلوس عمتي ،  ظلت مفتحة عيونها : ولج نويسة بايكتلج واحد شو اليوم تذرعين فلوس منيلج

- يا مو انت خالتي امداج اي والله ابوكن شني بقيد احد انا
مديت راسي: خايبة الاصلع هاذ رجل الذبانة يكتكت فلوس كلت اليوم لا ما طلعتها كلها براسه بالعباس فلا اتسمى بسمي ، جا بس كاضنا تهديد وماعط كلوبنه هل معطت جيبة .

ظلت تضحك وتكلي : لعد يلا خل اسوي شعري

- سوي ولجن اليوم اخلي الخطابة سرا ابابنة بالعباس

كعدت نانة تسوي شعرها واني سويت مكياجي بيدي ، حتى نورة مكيجتلها طلعتها جنها اسماعيل ياسين بفلم (الانسة حنفي)

والله خلصنا وكملنا .. طلعت وحدتنا جنها نانسي عجرم باخصمك اه ..  نكطع  تكطع من الجمال .

طلعت اجرت تكسي و رديت للبيت .. عمتي ايمان فكت حلكها : اجرتيلها بدلة  ، بيش هاي

- مالج غرض عمه باوعي واسكتي 

- ولج يمفلوكة منين جبتي

- من حمزة وصلاني للسوك واجر الها والنا

- قصرتي عمه امه هسه تعيرنا

- وعليمن تعيرنا .. شنو كايليه اطينه هو ابنها من ذات نفسه

- لا تكولين هو انطى ، اسكتي ، بس عاشت ايدج طالعة لعابة ..

- عمة حطيني على يمناج

كعدت الاء .. والجهال كلها صفت كبالها تباوعلها على جمالها صدك طلعت لعابة .. مصبوبة اصبابة ..

ونانة شغلت البرتقالة وظلت تركص هي ونهاد وبطة والجهال .. طفت الكهرباء .. راحن ودن على المولد مال بيت سرحان جابها مأمون .. وشكلها و ظلن يردحن .

مروان لحد هسه ما راجع ، وهدوة مكابلة وسن.
اما بيت حمزة فعمام حمزة كلهم التموا ، وصفوا وياه على ابوه ، وظلوا يحجون عليه شلون ما يروح بخطبة ابنه ، لحد ما سووها و غصبوه يروح وياهم للخطبة ، الساعة ب٣ الظهر صفت سيارات الخطبة .. سد الفرع حمزة بالعازمهم وجايبهم للخطبة ، جيف ابوه عارض خطبته وراد يخربها .

نزلوا ابيت حاكم ، استقبالهم الشيخ سرحان و حاكم وحسن رجل نوسة ، و مامون و مؤيد وعباس ، وناس كرايبهم .

تقدملهم الجاي وشربوا جايهم .. وحجه عمهم الجبير بالخطبة ، رد عليه الشيخ سرحان : البت احنا مطينها امانة الله ورسولة ، هاي و الزلام شاهدة اليتعرضلها لو يذيها مو ابوها .. انا الاتصداله ويشوف مني شي ما يخطر على باله

حجه عمه : صلي على محمد احنا جايين نخطب مو ناخذها نكصبها

حجه سرحان : انت تعرف واحنا نعرف الخطبة هاي شلون صارت ، انا احطنكم اعلى راسي ، بس تتعدولي تتكفلون البت .

حجه عمه : انا كفالها .

قروا الفاتحه وصاحوا : يابه هلهلن ..

طكن خواته الهلوهلة ، خزرتهن امهن : عمجن ميت اكعدن .

- يمه جا غير خطبة شنسوي

- احححح اشوفن تاليها ويا حميزة وطلايبة .

قدمللهن الكيك و الشربت ، حجت نوسة : خطية حمزة والله اليوم ما قصر .. جاب الكيك و الشربت ودفع فلوس الصالون و البدلة  توسلت بيه كتلت روحي واني امنعه ما رضه يكلي مصدك انا حضيت بالاء .. فدوة لعينه شلون زلمة نشمي .

اندارت شكرية : بس الخطبة ع البت ما يصير

- يا جا غير كتله .. ما رضى كال ابد والله كله علي ، خوية عدل خوية بدل .. ماكو يجيب بالفلوس ويطي .

احتقنت امه طكت ، وايمان تكلها : لويش حجيتي عمة

كواغد.: خليها بعد ايدي ، هديها ..

نوسة : عمه ما تشوفينها كاعدة مبوزه واحححح واحح اليكول جايبينها غصب ، حجيت هجي علمود تعرف ابنها الكاتل روحه علينه مو احنه وتنحنح بروسنا .

صاح مأمون : عمممممة ام مؤيد ، سوي مجال للسيد يعقدلهم ..

كومن الاء كعدناها بالغرفة وطب حمزة وعمه وحاكم ومأمون والاء والحجية كواغد واخت حمزة الجبيرة ، ونوسة زركت ورا الاء حتى تعدللها خاف ترتبك وتتبهذل ، عدلت الها البركع و غطت جسممها ، وانزوت وراها ، كعد بصفها حمزة .

عقدلهم السيد بوجود الشهود لحد ما كاللهم ( على سنة الله ورسوله واهل بيته الكرام زوجين في السراء والضراء الف مبروك .. صلوا على محمد وال محمد )

هلهلت اخته و هي تكول ( نتشكر من عمها وبوها نتشكر من كال اخذوها ) واشتغلت الصفكات برا .

طلع السيد والزلم ، وحمزة ظل كاض بيد الاء وهي مدنكة ، نزعها البركع من راسها و حبها بكصتها وهو مبتسم ، همت : جاي ارجف من الخوف

حط ايده و حضنها وطلع بالهول وخواته يصفكن ، خالاته وامه صنفن الاء تصنف طلعنها من الكلجية ، مكياج هواي .. بدلة ما يصير ، شني دلع .

ونوسة تبعد بشعر الاء حتى تبرز صدرها كله .. وتغيضهن ، وحمزة كاض بيد الاء : احسبي حسابج اسبوع اسبوعين ونعرس

- بهالسرعة

- غير احتركت حركة كاعدة كدامي هجي وعلي لو ما منا ناس جا هسه عرست .

دنكت مبتسمة ، ظل يعصر بيدها ، والواهلية فوك روسهم ،

قدمتله اخت الذهب ، وهو طلع حلقته من جيبه انطاهياه ، حجت امه : جا حلقتك انت تجيبها لو هي ، شنهي يمه شمالك .

خزرها ، حجت أيمان : محد كال النا ، بكل بناتي الرجال هو اليجيب الحلقة

- لا شني المرة .. بس انتم مبختيم بحمزة وابني يذب بهالفلوس

ندسها : يمممه

- ظل سكت بيه وانت ذاب كل فلوسك عليها .

حجت خالته : خالة الصدك مو حلوة ظنينه تاخذ ملكة جمال على حلاتك .. انت احلى منها .

كواغد : يااااع خايبة ديه .. شو الزلمة اصيلع منيله بعد احلى من البت

حجت نوسة : من رخصتجن خالة كفن حجيجن هاذ واطن مجال خل يلبسها الذهب براحة

بعدتهن ووكفت كبالهم هي واخت حمزة، لبسوا الحلقات ، والذهب ، واطوهم السجينه يكطعون الكيك .

صفكن خواته : حبها ولك حبها ولا تخاف من امهم .

ابتسم هو وكام يمسح بكصته العرك ، ومد وجه باسها بركبتها ، اصطكت الاء ، همس الها : شوكت اكضج يا محمد

صاحو الزلم ، حتى يطلعون ، صاح هو على اخته الجبيرة تجيب العلاكة ، ركضت جابته ، حجه : خالة هذا تليفون و خط لالاء ، هدية الها ..

واندار الها : فعلي بسرعة بس اوصل للبيت اخابرج .

- ماشي

شكرية : ولجن راح يموتني هالولد ماخذ بت ملوك وهالكثر جاب وحط .. هالفلوس الذهبها حسابفة بهالمسلوعة .

واختها تردها : خايبة اذا ما طلعن طاكاته بسحر اطلع كلشي ما افتهم ، خايبة عايني الولد متسودن عليها وصايرلهن خادم شيامرن وشيريدن .

شكرية : جا انا شعال كلبي غير اسلوبه وياهن .. ولجن دافع فلوس الخطبة كلهااااااا ..يا نار كلبي .

طلع حمزة من البيت ورجع ، اول ما طب البيت كاللها : يمه عسى ما اشتري بيت شعشوع الها مالج غرض ، مو اني مو خوش و حطيتي كوكم وياي وعلي عناد بيكم الا اجيبها لهنا .. و انعل والديه اليحاجيني فتهمتو .

- ما احاجيك بس يا حمزة ما ارضى عليك ليوم الدين يوم العفت بت اختي الذهب وخذيت هالمسلعمة.

عافها ومشى ، وعلاء طب : شني يمه شبيج لخاطر الله

- ولك كتلني اخيك ذاب فلوسه كلهن و مغرك الفكور بيهن

- يطبه هرش فكينا منا .

طب حمزة لغرفته ،دك ع التليفون الجابه محد رد .. الاء ملتهية هي وخواتها يتراكص .. ظل يدك يدك ، لحد ما بطة انتبهت وكالتلها : ولج التليفون يرن

ركضت ابدلتها ردت عليه : الو

- مرتي ليش ما تردين علي ؟

ضحكت : جنت اركص ويا خواتي والله ممنتبها للتليفون

-اغار .. تركصين لخواتج واني ظال بالغرفة مكابل الحيطان .. وعلي ظليمة

- حمزة ممصدكة احنا خطبنا وكلشي تم على خير متتصور الفرحة بيها اني بودي اطير  

- الفرحة من احطج بغرفتي وانفرد بيج

- عييييب

- شكو عيب رايدة وياج

- حمزززة

- ااااخ ولج من اتذكرج واتذكر شكلج و بدلتج وشعرج .. خوب الصدر يا بووووووووية

الاء: بلعت ريكي .. تذكرت الجواريب النايمات جوا ضلعي ، نعلعليج نوسة ..  همس : خجلانة روحي

كحيت ، وكتله: يصيحوني

- بس اني رايدج

- مو بعدنا دنركص

- اركصيلي بس الي

- ما اعرف اركص

- جا جاي تسوين

- هيج بس اصفك واتمايل وياهن  ...

صاحت نوسة : خايبة تلحكين تعاااي يلا شلزكتي بالرجال .

ضحك هو : ماشي راح انام هسه ، بس من تخلصين كعديني لإن كعدتي هاي من الليل

- نام حبيبي لعد

- شو عيديها

ضحكته ، حجه : العباس عليج عيديها

-حبيبي

- اخ كون هيج احط راسي على رجلج و اغفى وانت تكليلي حبيبي ، وعلي ما اريد من الدنيا شي بعدها .

- ان شاءالله روح نام

- احبج

- واني هم

- خرب صدام البت هاي اليوم ناوية تخربني ، روحي روحي خليني كاض روحي كوة تره بعد ما اتحمل

ظليت اضحك وسديت الخط من عده .
رحت افرح واركص ويا خواتي من كل كلبي .. وحيل فرحانة بيه .. رغم امي وابوي و اهلي نصهم ما راضين ، بس من لا جارة وافقوا على زواجنا، بس من اباوع الحلقة بيدي .. انسى كلشي واظل بس اتذكره واتذكر حجاياته .

نوسة: جاي اطلع من بيت جدي حاكم ، وكاضة بيد نورة حتى اردن لامي ظلت وحدها هناك ، صفت السيارة ولنه ، تمار والهام .. وابنهم وياهم .

نزلت سلمت عليه و هو وكف ، يباوعلي : شلونج نوسة

دخلت بساع هي كلتله : هلا بيك خوية، هسه اصيحلك الولد

- لحظة

- ما بيناتنا لحظة .. اني متزوجة وانت متزوج تمار ، والبيت بيت عم مرتك

- وكلش زين تعرفين زواجج مو حقيقي ، وزواجي ع الحافة

- خلينا لا نبرر .. و كف اوهام .. بزمانه ما صرنا نصير واحنا بهالحال ؟ كفني وكف روحك تعشيم بشي عمره ما يصير

دخلت جوا واني ابلغ مامون يطلع لتمار ، لحكته الهام ودخلت وياهم للاستقبال كعدت يمهم .

نورة كاعدة بحضن امها تسولفلها شلون ركصنا وشلون اشتريت الها ومكيجت الها ، حجت وسن : مشكورة نوسة ما اعرف شلون اشكرج على فرحة هالطفلة

- خب دنجبي .. بتمن هي و تشكريني .. غير بت اخوي ، وانت هم اخيتي ، لا اظلين اشكرين .. ريحي نفسج .

- شرتاح ومروان لهسه لا راد ولا داري اني جبت اصلا .

- شوية وتلاكينه يجي لا يظل بالج .

دارتلي امي تسألني ع للخطبة ظليت اسولفلعا مغامراتي .. شوي وطب مروان ، تفاجئ وسن جايبة ، تحمدلها بالسلامة وباس الطفل وشالة ، بس هي ما تحجي ويا .. وثكلت بزعلها عليه .

عاد هو من ما شاف منها وجه رحب ، عافها وصعد فوك نام ،  دخلت الهام ومامون بعد ما راح تمار ..  ظلوا يسولفون .. بطة وصلها خبر الهام عدنا .. بساع لبست عبايتها واجت .

من بعد يومين ..
دك التليفون، رد مأمون : الو

- الو مرحبا ، هذا بيت الشيخ سرحان الثاني ؟

- نعم تفضلي

- وسن كريم تعرفها

- منو انت

- بس دا اسأل عنها

- مرت اخوي ، ليش ؟

- اكدر احجي وياها

- لا والله ما تكدرين اذا ما تكليلي انت منو

- اني دينار

- دينار منو ؟

- اسأل ابوك هو يكلك منو اني

- ابوي ما موجود ، بعد اخوج تكليلي انت منو حتى اعرفج لو اظلين تحزرين

- انت ابن سرحان

- اي انا مأمون

- فدوة كبرت مأمون

- عرفيني عليج

- اني مرت عمك كريم ، ام وسن

- هاااا ، يعني انت ...... سكت

- الكاولية على كولتكم .. اي اني ، اكدر احجي ويا بتي

- ما اعتقد لازم تحجين وياها ... واذا تريدين لازم اطلبين من الوالد .. اذا رضالج

- بس اني امها

- اترخص منج خوية العدي حجيته ، ما ادري اذا تندلين مضيف ابوي بس التعرف تليفون بيته لابد تندل مضيفه ، امشيله وهو يشوف امرج .. مع السلامة .

سده ، نوسة نايمة بالهول وابنها بصفها ، ظل يباوعلها .. حجت هدوة : ياهي هاي الجانت ع التليفون ؟

- تكول اني دينار ام وسن

- دخيلك ربي .. شطلعاها هاي ؟

فتحت عينها وسن وباوعتلهم : ياهيه ؟

ظلوا يباوعون بوجه بعض .. وحجالها مأمون .. سكتت ما انطت اي ردة فعل .

رجعت دينار خابرت ع الشيخ سرحان وعرفت بنفسها ..  نهرها وكاللها : خابرتي هالمرة مرت الثانية لا تخابرين ولا توصلين .

رجعت اتصلت على مروان .. واترجته حتى تحجي ويا بتها وتشوفها .. مروان نزل لوسن و كال الها : هاج

ما دارتله وجهه ، حجه : هاي مرة تكول اني ام وسن تريدين تحجين وياها؟

سحبت التليفون من ايده وحطته على اذانها : الو

دينار : الو انت وسن ؟

- اي اني ، شرايدة ؟

- رايدة اشوفج ولو مرة بحياتي .. لا ترديني فدوة امي

- وشتنفعج شوفتي بعد ما هديتيني كل هالسنين وما خليتلي بس سمعة الكاولية الاتعير بيها ع الكعدة والكومة ؟

- اني رايد اصلح كلشي صار بذيج السنين ، لازم اشوفج

- واني ما رايدة اشوفج .

- اعذريني ما اريد اشوفج .

قفلت الخط ، رجعت اتصلت رفضته .. باوعت مروان ماكو بس عمتي لافه راسها ونايمة ، فتحت التليفون وظليت اكلب بيه .

بعدني هسوتني جاي اكلب بالاتصالات ، رن ردت ارفضه بس شفت الرقم عليه اسم ( عبوة ناسفة ) .. صار عدي فضول اعرف شنو عبوة ناسفة .

رديت وسكتت حتى اسمع الصوت مال زلمه لو مرة ، اجا صوت بنية : الو ميمووو ويا منو جنت مشغوووول .

حجيت : منو انت

فزت هي : انت منو وموبايلي ميمو شعنده بيدج

- موبايل رجلي وهو حطه بيدي ، انت ياهي

- شنو شنوووووو ، رجلج منو .. مروان متزوج ؟

-ليش هو ما حاجيلج

- لا مكايل ومروان ميجذب ، وانت وحدة سوسة دا تريدين تفرقين بيني وبين زوجي حبيبي .

- زوجج !!!؟ من يمتى تزوجتوا

- وانت شعليج تسألين ؟ ، اشمري التليفون ولا عاد تكمشين شي يخص زوجي افتهمتي لو لا .

قفلت الخط بوجهه ، وكمت من فراشي ، طلعت برا مروان واكف يم مأمون بالباب، صحت : مرووووان

انتبهوا اثنينهم .. اجا .. تخصرتله : مروان متزوج عليه

- ياهو الكالج

- ياهو الكالي شنو وعبوة ناسفة الحاطه بتليفونك

طب مامون : صوتكم .. خير شكو

وسن : تعال شوف اخوك .. متزوج عليه واني يا غافلين الكم الله ... هاااااي جزاااااتها مروووووان تتزوج علييييه

مروان : اطيني التليفون

- ما اطي حاااااجيني

مأمون : مو هيج الحجي خوية ، خل نطب نتفاهم جوا ، الناس منا عيب

- ما اطب ولا ارتاح والله الا يكلي الحجته هالبربوك البتلفون صدك لو لا ؟

مروان : وانت شلج علاقة ، اتزوج ما اتزوج ياهو ماتج ؟ اطيني التليفووووون

- صالي ٣ ايام جايبة وزعلانه ما كلفت روحك تراضيني بكلمة ، تالي هاي التلكاها منننننننك ؟

- اطيني التليفوووون اكلج

مأمون: اني اخذه طب جوا .. مرووووان

وسن : هذا التريده
شلت التليفون وركعته بالكاع .. اطشرت غراضه بالكاع ، انهد علي يريد يطكني وكف بوجهه مأمون و دفعه : امشييييي لك وخررر عنهاااااا

- هدها اربيها الهال الساقطة ، هدنييييي

وسن : والله ما غيرك ساقط ومعاشر الساقطااااات ، تتزوج علييييه ليييش بشنو قصرت وياك كلييييي ، البت والولد حطيتهم بحضنك واركض كبل لا تنطق الكلمة تالي هااااااي مجازاتي

طلعت عمتي تركض و البنات التمن ومأمون يفازع بينا ومروان يريد يهد عليه .. كامن يجرن بيه ليجوا ، ومأمون يدفع بمروان للدوانية

طببني للغرفة واني شاطت روحي لا خليت شعر ما ملخته لا خليت خدود ما زلغتها واصرخ ( شناقصني ويسوي بيه هيج شنااااقصني يس كللي مو احتؤك كلبيييييي)

دفع الباب وطب ومأمون يتصايح وياه ويغلط ، عليه ، راد يتقرب مني  ، وكفت كدامه عمتي وهي ادفعه وتغلط عليه ، عافنا وصعد فوك .. كابلني البنات واني ابجي ، وعمتي تكلي : ولج عمه ما يصلح وانت نفسه ، هدي خله يولي جا اسوي ، اغم لو ما اغم ما يهد هالحسن هاذ ويركض ع الدايحات والمستهترات .

ظلت وسن تفرفح بنصهن وتبجي ، الجهال كامت تتباجة جرتهم بطة وطبت للغرفة تنومهم ، طب مأمون ، وهو ينزع قميصه ويأفاف .. حجت بطة : صدك مروان متزوج لو جذب

- ما نكر معناتها صدك

- والله انتم فلا تتأمنون

- اي جمعيني ، زيديها علي

- وحد انت نبي والله هسه الكاك خاطب مروة من وراي وما ادري

- واخاف منج لو ردت اسويها ؟

- هاااه يعني ما تخاف

- بطة ليش ما تتجفين المشكلة وتسكتين

- لا ليش طلعهن سوالفك طلعهن

- عود تسكتين ، لا بعلي

ضرب القميص بالكاع وطلع من الغرفة .

الاء : مشيت لإمي بلغتها انو حمزة باجر يجيني للبيت يشوفني ، كالت (الله كريم )

راحت هي تبلغ ابوي واني مشيت لغرفة يمه كواغد ، كعدت وخابرت حمزة : الو

- هلا حبيبتي ، بلغتي اهلج

- اي كلت لماما بجيتك باجر

- واشوفج

- اني المشتاقة اشوفك .. باقية بس ارسم بملامحك

-راسمتني بعد

- اوووو كومة .. اصلا رسومي صارت بس بشكلك

- اخذهم الي لو اجيت

- لا .. مالتي اتمتع بيهم واني اشوف تفاصيلك

- معلي ، تطينياهم وترسمين غيرهم .

جاي نحجي فك الباب ابوي بعصبية وحجه : اسمعي ولج اتبلغين هاذ طبتين اله لبيتي مالهن ثالث الاولى بخالطبة والثاننية بالعرس ، يطبة وماله حطة رجل اعلى عتبة داري بعدها .. افتهمي .

سكتت وهو يسمع .. بس اختنكت حيل .. فشلني كدامه ، كضته امي: هو هيج يا حاكم ..

- هالسرسري هاذ ماله دوسة ابيتي ومن اسمعه جاي ليجاي وعلي البيت اكلبه فوك روسكممممم

حجاها وطلع من الغرفة .. ظلت دموعي تتجارة وكتله : حمزة مع السلامة

- ظلي ع الخط

-حمزة يعني ابوي

- مالج غرض .. اني اتصرف

- شتسوي

- معليج
كام من مكانه ، وامي تأشرلي اكطع الاتصال ، كطعته بلا ما اسلم ، ورحت احجي وياها : يعني ليش ابوي هيج ييتصرف ، رجال اجاني من الباب لا لعب عليه ولا غشني ،ليش تفششلوني وياه

- انت من سمعتيي ابوج طب اكطعيي التليفون عايفته يستمع شكووو

- غير ابوي طب يسمع بيه

- وانت كيفتي خليتي يسمع

- يعني هسه هاي المشكلة متشوفين بابا شسوا

- شيسوي ابوج حقه ليش شنو نسيتي السواه بأخوج حتى تفض هالخطبة ؟ لو نسيتي تهاديده ؟

ظليت ابجي وراحت يمه كواغد تحاجي وتلوم عليه ، ظل يتعارك وياها .. وكبت العركة بالبيت كله ابوي صار عصبي فات بالكل .

دك التليفون .. حمزة
ما رديت .. اتصل ٣ مرات بالرابعة رديت : الو حمزة

- اصعدي

- وين

- اني ع السطح منتظرج

- حمزة شجي تسوي لخاطر الله ، روح ابوي عصبي

-طز بيه ، صعدي

- حمزة روح عليك الله

- راح احسب للعشرة، اذا ما صعدتي راح انزللكم

فزيت من مكاني اركض : شرايد دخيل الله شرايد ، حمزززة .

صعدت فوك ، فتحت باب السطح ، سحبني من ايدي : حمززززة روح

- اششش تعالي

- شرايد مني روح دخيلك

- رايدج
دفعني على باب السطح يبوسني .. طاح التليفون من ايدي .

وسن : لل٢ واني اناشغ ابجي .. ما جاي استوعب شسويت ويتزوج علي ؟ عاشر كح*** و كلت نزوة بس توصل بيه يتزوج عليه !!

عافني الكل ونام وظليت مكابلة الطفل ، رضعته ونومته .. بس ظل ابالي اكعد ويا مروان واحاجي .. حتى افتهم مني على الاقل ابرد نار كلبي .

صعدت فوك كبل لا اطب الغرفة سمعته يحجي ، ما فتحت الباب .. ظليت اتصنت عليه : ولج  ما احبها اصلا اني وياها اخوان .. لهذا كتلج ما متزوج .. ولج بس افهميني لخاطر الله ، بس اسمعي .

طبيت عليه ، حجه : بيباي بعدين نحجي .
سد الخط : شرايدة

- طلكني

- انزلي من عندي وسن

- لا ما انزل .. الا اطلكني

- الجاهل جوا .. انزلي عني

- انعل ابو الجاهل جاي اكلك طلكني

- اكعدي نتفاهم

- ما الي وياك كل تفاهم .. طلكني حجيتها وبجيت

- ما اطلك   نزلي عني

- هيج تجبرني على امور ما اودنها

- اعلى ما بخيلج اركبي .

- تذكرها مني مروان لا ما خليتك تتندم وتبوس الكاع بس حتى تصلح الصار فلا ارتاح .

حجيتها ونزلت .. عافني ولا نزل وراي اصلا وهذا زاد بحقدي اكثر .. ظلت الافكار تجيب وتودي واني ادور طريقة اذله بيها .. بساع خطرت على بالي امي الطلعت بالجديد .

بس رقمها ما عدي ، بموبايله ..
ظليت اتاني للفجر يلا صعدت ، تسمعت صوت ماكو .. الضوا مطفي ، دخلت للغرفة .. هو نايم غاط بنومة ، سحبت التليفون على كيف ما حس

خذيته ونزلت .. دست الدكمة .. الجهاز مطفي شغلته
طلع صوت وصورة ادين يسلمن على بعض واسم نوكيا ، صميت التليفون بيدي حتى ما ينسمع .

دورت بالاتصالات .. مخابرها شكثر النذل
تعديت المخابرات ورحت طلعت رقم امي ، دكيت عليها ، مرة مرتين ردت : الو

- الو اني وسن

- هلا عيني هلا ماما

- اسمعي اذا رايدتني صدك ورايدة تعوضين السويتي بيه بهالسنين .. تأمنيلي مكان يمج اني وجهالي .. وما اريد جنس مخلوق يعرف بمكانه

- المكان موجود امي ، بس كولي اجيج والله .

همست : الا ابهذلك يا مروان .... يتبع

☆☆☆☆☆

#زينب_ماجد