#كحل_عرب
(الفوضى)
((( بقلم زينب ماجد )))
الحلقة_57
( موقف أهل حمزة )
حتى ازهگ
بيه اشبع غرورك يا أعز جتال ..!!
لــِ عريان السيد خلف ||
طب حمزة للبيت ، صاح : كوووووثر
- هلا خوية كول
- امي وابوي وينهم ؟
- عمي فوك جاي يصلح بتنور الطين .. انكسر من ثلمة ، و عمتي بالسوك
- يمتى تجي ؟
- هسه على جية ، اكو شي ؟
- شوفي شغلج
كعد على نار وهو سنتظرهم ، طبت امه من السوك العلاكة على متنها : هلا يمه تناوش عني
شال العلاكة من متنها وطلع نزل المسواك من ابو العربانة واطاه الكروة وراح ، طب للبيت و الحجية تصيح : ولج كوثر احنينة وينجن اطني اميه
حمزة: يمه رايدج بموضوع
- هلا بيك ييمه ، هم زين انت هنا ، تسوكيت للبيت وحتى ابو الطماطة و ابو اللحم ظل يطلبني يبعد امك
- هديني من الطلب جاي اكلج رايدج بموضوع
- خير يمه
- صيحي لابوي حتى احجي
عاينت على كترها وكالت : حنين صيحي لعمج خله يجي
راحت حنين مؤت احمد صاحتله واجه يسأل : ها شكرية شني ؟
- ابنك عده حجايتين ويانا ، اكعد خل يحجي
كعد بس لا رضة خاطر .. حجه حمزة : اني رايد اخطب بنية احبنها على سنة الله ورسولة ، واليوم
ظلوا صافنين بيه منتظرينه يخلص، حجه ابوه : اي
- شني حجيت العدي جاي اكلكم رايد اخطب لليوم
- هيج كبل بلا مقدمات ..
- البت اعرفها
قاطعته شكرية : بت بيت ابو ستار ما تاخذ منهم بت ان جانت ابالك
حمزة: مو انا الينكاله ياخذ لو ما ياخذ ومنين ياخذ ، ما جاي اخذ رأيكم جاي حتى تمشون وياي
حجه ابوه : ولك انت ما تستحي على روحك عمك بعده دمه اخضر وانت تفكر بعرس ، من اروح نخطب شكل لخوتي شكلل للوادم ..
شكرية : يا اخوك ويا وادم .. انت تعرف الرايد ياخذها شنهي .. طبت بنص بيتنا واتختلت وياه بغرفة علاء لوحيدهم مدري شعمل بيها وشسوا .
صرخ حمزة : بس من هالسيييييرة جيف ما هذيت بت اختج كمتي اتجيبين وتصفطين علي .. اخطبها يعجبكم يعجبكم ما يعجبكم يا حايط يلوك طخوا روسكم
صرخ ابوه : انعل والديك احترم ووووولك
- جاي اكلك رايد اخطب والبت متأذاية بسبب ورايدها بساع تكوم وياي لو لا
- المثلك هم ينطي مرة ؟ .. يا مدمغ وبايع بته ويطيها الك
- تكوم تروح تخطبلي لو لاااااا
- ولك لا تصييييييح احترم جاي اكلك
- تكوم لو لا
- ما اروح وياك ولا اتكفلك ولا اخطبلك .. كممممممم
- تظن اني بقيدك لو محتاجلك ؟ ولا تروح ، كومي يمه
- والله غير بت اختي ما اخطبك خصه هاي المسلوعة الرايدها ، ما اخطبها الك لو يصبونها ذهب
- جا خوش .
حجه بصيغة تهديد و كام ، طلع من البيت خابر على سيد صاحبه ، كاله : سيد رايدك وياي ، بت متورطة بسببي واني رايدها على سنة الله ورسولة ومتأذاية وكلش ضروري اليوم امشي لخطبتها وهلي عدهم عزا عمي ميت وابوي ما يرضى يخطب .
جاوبه الرجال: صدك جذب خوية عد عيناك ، كلنا ابوك واخوتك ويا بخته الجمع راسين بالحلال
- اي محتاجكم
- الظهر كلها المها عندي ونطلع من بيتي وانا خادم
- لا حشى خادم ربك مولاي ، ممنون منك سيد
توجه لبيت السيد خابرله معارفه .. للظهر لمهم بال٢٢ زلمة .. طلع بسيارات لبيت حاكم ، نزلوا عدهم .. حاكم احتار لا متحضر لهيج عدد وظل يوجهه باهله و بناته لخدمتهم .
الاء: عليج الله لو تشاقين
- والله ما جاي اتشاقة ، دمدي راسج وشوفي حمزة كاعد وياهم
كواغد : شتمد راسها موش وكت فرحجن ومنادسجن ، اطلعي بتي روحي اعلى هديوة كليلها ادزنا ٣ درازن ستكاين متشابهات هن واماعينهن وخواشيكهن .. ياله يمه .
لبست نانة وهي تباوع لألاء ما مصدكة ، تباوع و عيونها تجري ، حضنتها كبل لا تمشي ، قابلها الاء وهي تحظنها من الفرحة وتبجي وتكله : ما مصدكة والله ما مصدكة
كواغد : ولج امشي الوادم جاعدة امشيييي ولج
نانة : اي اي
ركضت وخذت زهراء وياها حتى تشيل الاستكاين ، ونهاد ظلت حاضنة بالاء وقرحانة وياها ، طبت نانة وهي تكلها : هدوووة وينج ، بطةةةةة
بطة : ها خير ، الاء بيها شي
- لا حمزة جاب كومة زلم وجاي يخطبها وامي تريد الاستكاين بساع
-عليج الله اجا ؟
- اي والله بساع يلا
طلعت هدوة : ها
سولفتلها ، لفت ربطتها و خذينا الاستكاين و طلعت وياي اجت لاهلي ، باوعت لالاء فزعت : ياااع خايبة شمالج، ياهو العامل بوجيهج هجي ؟
ايمان : سكتي يهدوة السالفة طويلة
- يااا ، خايبات تحجن صكد
كواغد : خايبة دطي صاول توليتينا يا ويا ، كضوها تخابر زلمة بليل و هالاجة خطابها .. خلصت ... فتهمتي يو لا
- ياااااع .. صكد عود
- ايييي دطينا الستكايييين خلنا نصب للزلم مجودرة
هدوة كضت الاء تستفسر منها ، والزلم بالدوانية شربوا جايهم .. ومأمون و مروان كاعدين .
خطبوها ، حاكم رحب بيهم جيف سادة ومعممين و كاللهم : على راسي بس ناخذ شور عمامها اخوتها ونرد الكم خبر
حجه مأمون : من رخصة عمي انا اعرف اليخطب يجيب ابوه اخوه او واحد من اهله و عمامه ، بس الجاي اشوفنكم كلكم صحبانه ومعارفة ، جا اهله وين ؟
نفخ حمزة و دار وجهه لحاكم وكال : انا اتعذر منكم عمي استشهد كبل ٣ اشهر وابوي وعمامي كلهم حزنانين ومو وكت خطبة ، وجان ابالي اخطب من كبل وتعطلت عنها بس بعد توازيت .
مأمون : اخوة ما عدك
اغتاض حمزة ورد عنه السيد : كلنا اخوته إن شاءالله ، وحمزة انا اكفله الكم زلمة نشمي وابوه خير وابن اصول
حجه حاكم : والله إحنا ما شفنا من حمزة الا الخير ، صح صارت امور ما اصح بالاونة الاخيرة لجن الغلط يتصلح و حمزة ما رضى اعلى الغلط واجا من الباب ، ويا هلا باليجي من الباب .. ما نرده والرسول يكول من رضيتم دينه وخلقه فزوجوه .
مأمون : مع هذا احنا نطلب منكم مهلة والاتصال راح يصير وياك سيد دامك تكفلته وتكفلت اخلاقه .. نسأل عنه ونعرفه زين ونردلكم الخبر .
حجه السيد : ان شالله بوية ، انت شتكربلهم
حجه حاكم : مأمون ابن الشيخ ال ضاحي .. نسيبي وربيبي ، ربى عدي وبحسبة وليدي .
- الله يديمكم ان شالله .
كاموا والسيد يحجي ويا حاكم و يطلب من عنده مدة حتى يردله الخبر واخذ رقم مأمون ، طلعوا .. و حاكم طب جوا وصاح على مأمون : ابو الأكبر .. تعال بوية
- هلا عمي
- تعال وليدي انت مو غريب ولازم تتورج على كلشي و تفيدنا الاء اخيتك ان شاءالله
- خادم عمي
حاكم : ايمان صيحي على الاء خل نحج وياها
صاحت ايمان و دخلن البنات كلهن ، حجه حاكم : كعدي بوية خل نحجي
كعدت كباله سالها : وين تعرفين حمزة بوية وشلون وصلاج التليفون الكضه مؤيد امس
دنكت واستحت ترد ، حجت نانة : بوية المكتب اليشتغل بيه حمزة قريب على مدرستنا .. ودائما هو يوكف هنا كم مرة تعرضنا بس الاء صدته وكالتله ما اصعد ويا الغريب .. وكل مرة تصده .. بس غلطت بعدين من طاوعته و خذت الموبايل.
مأمون : هسه عمي مو المهم شلون تعرف عليها هالامور تصير .. حمزة انسان ساعداكم ... امنا بالله بس لازم تعرف مساعدته جانت بس حتى يختلط وياكم
ايمان : بس مأمون ما دام يريد يختلط ويانا يعني الرجال مو ملعب ومن درى بيها تأذت صبح وازلامه تارسه البيت .
- هاي مو مفازة عمة ، اليوم حتى لو ابوي اسم الله عليه ميت واخوي متوازي اعلى خطبة لإن اكو بت متأذية ولازم نوكف بيها ، ما افزع لاخوي واروح وياه ؟ حمزة لا ابوه ولا اخو ولا عمام جايين وياه بس ربعه .
حاكم : السالفة صارت بساع يمكن بعدين يجون
مأمون : نكدر نطي العذر صح السالفة صارت بساع بس اني ما مرتاح للقضية، اني اروح ان شاءالله بنفسي واسأل عنه و عن اخلاقه .
- ان شالله
اندار حاكم لالاء وكاللها : بوية احتا راح نسال ونسوي العلينا ، بس شما يصير هذا قرارج راضية
هدية : البت زغيرة بوية لا تحملها قرارها ، ان جان مو زين رده بتنا ما بايعينها .. شستفادينا من اطينا نهاد هالمجابلتنا وردت النا في اثنين عكب ما جانت مفردة .
تنهدت كواغد وهي تكله : الله يتمم اعلى خير ، بس يحاكم ما ادري انا وياك شلون راح نوكف بوجه الله غاد ونتحاسب
اندارلها حاكم: عليش ؟
- لون جلمتك هاي الكلتها البت المتيريسه .. حاجيها لجمارة جا هسه بنيتي بخير وسلامة ويمكن فروخها بحضني .
حجتها واختنكت بعبرتها .. وحطت شيلتها على وجهه
دنك حاكم بلا جواب يرده عليها .. والكل سكت على حجاية كواغد .
.. كامت الاء و البنات للغرفة و هن فرحانات ان الموضوع خلص على خير وحمزة نهى المصيبة بخطبته .
كعد مؤيد وسولفله حاكم .. كاله : ما عدنا بت اله ، ولو تموت ما نطيها
نهره حاكم وهو يكله : الزلمه اجا من الباب ، عليش ترده
مؤيد : بعديش بعد ما كعد تختل بيها بتليفون تالي البيل وتسرسر وياه .. لو تنكلب الدنيا الاء ما انطيها لهذا
حجت كواغد : هاي موش اسباب يمه اذا عدك سبب مو زين .. احجي
مؤيد : ما نطيها وبسسسس ما اريد حجي
ندست ايمان وهي تأشر يعوفونه ، الشرب براسه وتوه كاعد ، ورايد هيج بس يعارض عناد بلا سبب ، والمجاره وياه يخليه يزيد بعناده ويشوف روحه ويسوي مشاكل حتى بس يثبت نفسه وتتنفذ حجايته .
اندكت الباب اجا لؤي على ايمان ، تلكاه خاكم و سلم عليهم .. لكاهم متصافين والامور منحله ، اندلر الأيام : لعد شنو الموضوع خوية
ايمان : لا صارت مشكلة وردت عونتكم بس انحلت الحمد لله رب العالمين
- الحمد لله ، عرس ابني الجمعة هاي ، جبتلج بطاقة ياريت تشرفونا انت وابو ستار .
- ان شاءالله نجي
من بعد يومين .. مأمون راح وسأل عن حمزة بالمنطقة الكل مدحت بيه وباخلاقه و باخلاق بيت ابو علاء ، محد ذماه .
رجع مامون وكال العمه الحجي هيجي وهيج ، خابروا على السيد ونطوه موافقة ... واتفق وياهم حمزة .. الخميس الخطبة ، كالولة : هي مو هيج غير يجون اهلك يتفقون ع الحاضر على الغايب ، حتى لو محزنين وما يسوون صفكة .. المهم يثبتون حضورهم .
راح حمزة على ابوه وكاله : ترضى ما ترضى تمشي وياي باجر تتفق على الحاضر والغايب واذا تريد فلوس الروح ما عندي مانع انطيكياهن
وابوه يرده : والله لو تطلع نخلة براسك، ما اتحرك خطوة ولا اروح اخطبلك
- عناد هو لو شني .. بت رايدها عود شني معناتها وما تروح الناس رايدينك انت شني رايد تفشلني وياهم
- اي تفشل مالي غرض بيك ، اعرف قيمة اهلك من تكوم تكعد وانت تباوعلنا بالعين الزغيرة لا محترم اب ولا مقدر ام ولا محشم اخ ، خل فلوسك وربعك يكفلونك ويفيدونك.
هدهم حمزة و طلع لبيت حاكم ، طلعله عبدالله ، سلم عليه : جدك هنا ؟
- اي
- كله حمزة رايدك بحجايتين
دخل عبد الله نده لجده حاكم طلعله ، السلام عليكم
وعليكم السلام
- ها بوية ؟
- والله عمي جايك بس خجلان منك
- لا وليدي كول
-الخطبة الخميس بس اهلي ما يرضون يجون وياي وخذولني
- شنهي الأسباب
- انا خطبت غصب عنها ما يرضون الغريبة ، جانوا رايديلي بت خالتي بس اني ما رايدها .. وما يرضون بالخطبتها الا اخذ بت خالتي
- زين وهسة شنهي بوية
- يعني الخطبة اتم بلايا اهلي
- لا بوية احنا ناس اجاويد ما نرضاها نطي بته بلا رضى اهل .. وخلك من هاي .. البت راح تعيش ويا اهلك .. شلون تعيش وهم ما راضين بيها ؟
- والله يا عمي ما ادري شكلك ، بس هاذ حالي واعتبرني وليدك وشيرني
- روح بوية اقنع اهلك ويمتى ما تجون هلا بيكم .
احتار حمزة شلون يخلي ابوه واخوه وعمامة يجون وياه يخطبولة ، كطع المصرف عن امه وما فاد .. كاام يتحجج عليهم وما فاد .
اخرها جان بموقف زغير .. طلب غده من مرت علاء ، وصاح مرته طبت ما طلعت بعد وظل بلا غده ، كض الطباخ كسره ، طلع شكو ماعون فرفوري خله طشاره بالكاع ، شكو ماعون وجدر فافون كسفاهن تخسف .. الكل طلع على صوت التكسير و الخسف ، وهو يصرخ : البيت اهجمه فوك روسكم .. تتكبرون علي و تتبرون مني ... اطلب غدا وما ينحط كدامي ، اليوم اهججكم بعلي .
كضاه علاء : ولك انت اشايف روحك .. اطلع منا لا اجرم بيه
انتفض ابو علاه وهو يكله: خله يولي علاء
حمزة : زلمة انت وتكضني
علاء - وانعل سلفاكم افتهمت لووو لا
احمد : دكافي يمعودين صلوا على محمد
حمزة : خرب بصدام اليوم لا ما اهججكممممممم
انهد باخوه بوكسيات .. علاء يرد و حمزة يضرب تكاتلوا و حمزة ادك على راسها ، فزعت مرت علاء حتى تفاكك بيناتهم وتصيح : حمزة هددددة
بعظمة گفى ايده جابها على وجهه خلى الدم يطافر من حلكها وخشمها .. الجهال ظلت تتصارخ ، والابو تعب راد يطيح ارتفع عده الضغط واحمد شبع بوكسيات وهو يفاكك بين حمزة وعلاء .
اخيرها امه صاحت : اروح وياك والله اروحن بس هد البيت بحالة ولك هجمت بيتي اعلى راسي حمززززة .
طلع من البيت وهو يهددهم ، اذا باجر ما يجون وياه للخطبة البيت يحركه عليهم .. ويعرفون حمزة من يحجي كلمة عناد ينفذها .
وابوه عاند اكثر منه ما يروح ، اندار علاء لامه وكاللها : روحي لعمامي خل يخطبوله ، فضينا من هالسالفة فكونا .. يومية احنا مصايح و مخازي من ورى حمزة .. اخطبيله وعساه لا يتهنى .
ابو علاء : ما تروحيله خله يولي هالنكس ، عوفي خلي ربعه يفيدونه
علاء: شيفيدون بوية تعبنا ، اجزينا من هالسالفة ترا لو كاتل لو مكتول اني وحمزة والله ، خلصها بيناتنا لا تخليها توصل لهالمواصيل .
شكرية : عساها ابحظها وابختها بعدها ما جاية وخلته يكلب البيت علينا جا لو احطنها ابيتي شيجرالنا
علاء: بت الناس مالها غرض كولي ابنج المستهتر وما عرفتي تضبينه
- ما عرفت اضبنه شنهي .. زلمه جان يجي شلونج يمه وشحلاته من يوم نوى اعلى هالبت سبى حالنا بهالخطبة الكشرة
- خطبيها اله و فضينا ، يطبه هرش
مشت شكرية على عمامة وحجتلهم السالفة وتنختهم يروحون وياه يخطبولة وهي تروح وياهم ، رضوا يمشون حتى يتكفون شره ، وثاني يوم طلع عمه وامه لبيت حاكم .
طبت امه .. قدمولها أستكان الجاي شربته وتسولف من ورا خشمها ، كواغد و البنات هم ما لحن وياها بالسوالف .. من طلعوا عمامه .
طب حاكم و كاللهم : يابه دام اجت امه و عمامة خل نفضها ، راضية بوية الاء ؟
الاء: بكيفك بوية
- على بركة الله .
رضى بالخطى ، لو مؤيد تسودن كام يكفر بنص البيت شلون وافق ابوه وما حطاله كدر .. وكام يصرخ : دخل احد يجي الا اكسر رجله ، ويا الاء ما اطيها واريد اشوف شلون توكفون بوجهي .
محد حجه وياه ولا ردوا عليه .. حسبوه سكران ومتعودين على طلايبه هاي ، لليل مر حمزة ، وطلب الحجية كواغد و ايمان ، طلعله : ها يمه
حمزة : هلا حجية اجوكم الاهل ان شالله واتفقتوا ٣ ب٣ ؟ ..
- اي يمه .. خطبتكم يمتى
- انا كلت الخميس و تصير الخميس
- اذا انت كلتها بعد بكيفكم احتا ما عدنا شي ، بس يمه لو تاجلها شوي عبن البت طاكينها وما اظنن للخميس تبرى اديتها ..
- هالكثرة متأذاية ؟
-اي والله ييمه متاذاية ، بس فرحانة بالخطبة وما هامة بطكتها ، جا ما تعرف طك الحبيب زبيب
- اوديها دكتور باجر ؟
- لا يمه عليمن .. خلها الاسبوع الجاي تكوم كلشي ما بيها جنها حصان
- بس ما مطمن ياريت اجي باجر ووحدة من يمكم تروح وياها حتى اخذها للدكتور واطمن .
- بعد بكيفك
- ومنها نروح نشتري الذهب
ايمان : هسه الذهب غير بالنيشان
حمزة: رايد اسويها هي خطبة هي نيشان وبأسبوعين افضها حتى ما اطول
كواغد : اي هو الاحسن فضها يمه ، بس ولو انا ما اريدن ادخل ، لجن اكول اهلك جنهم ما جايين من رضات خاطر ، عليش ما تاجرلك بيت وتعرس وتكعد لوحدك
- لا رضى خاطر شنو بكيفهم ، اعرس ابيت اهلي ، وبعدين يمه انا اكثر شغلي بالليل و البنية زغيرة والوضع مو امان تايه .. ما اكدر امن
- حكك ، جا بكيفكم بعد
جاي يحجن طلع اله مؤيد : شعدك هنا لك
تقرب من حمزة ، دار حمزة وجهه : يلا اودعناكم
- اسمع لك ، بت مالك عدنا ومن تجي ليجاي مرت الثانية رجلك اكصها افتهمممممت
تقربله حمزة ، شم بيه ريحة عرك : نصيحة بطل شرب لا تخليهم يخلونك تبطل
- جاي تهدد
- جاي انصحك
ابتسمله ، ورفع ايده يلوه وهو يكول : فيمان الله
ضل يصيح مؤيد ويغلط عليه .. خرك سيارته حمزة وطلع .. طبن ايمان وكواغد جوا وهن يخبرن الاء حتى تتحضر باجر ياخذها للدكتور ويروح يشتري الذهب
طارت من الفرح الاء ، بس احتارت : يمه شلبس باجر ، خاف امه تجي واني ما عدي ملابس طلعة زينات ، كل ملابسي جراويد .
ايمان : دزي على بطة ادزلج من ملابسها
الاء: يمه تحجين صدك ، اني وين بطة وين ، بطة سمينة ملابسها يصيرن عليه جوب
لالة : دلبسي العدج عمه وروحي
- عمة شني والله عيب يفشلن هدومي
كواغد : دزي على وسن البت خوش وما تكول .. وضعيفونه هلبت عدها اليجي على كدج .
- وسن طويلة واني مدحدحة
-هسه ددزي صحلها رجل وصاحت ءاعيور
دزن على وسن .. ودتلهن الملابس العدها الكصيفات الممكن يصيرن على كد الاء ، ظلت تقيس بيهن لحد ما شافت تنورة كابوي وبلوزة وردية مثل الجانت لابستها مايا نصري بأغنية ( اخبارك ايه ) الخضرة .. بس هاي ردن طويل مو نص رد ،
وانتظرت ثاني يوم على نار .. وحمزة جان منتظر اكثر ، الساعة ب٣ الظهر هو وامه اباب بيت حاكم ، صعدت ايمان و والاء بس ، كواغد جانت عدها ما تكدر تهد مخزنها .
الاء: صعدت بالسيارة ، كلبي يدك خوف على اشتاياق على لهفة على توتر .. ما اعرف احس كلبي راح يطلع من مكانه وهاي اول مرة هيج اشوف حمزة وما خايفة من احد بعلم اهلي ، شعور حيل حلو ويطير الواحد فوك .
عدل مرايته وخلاها كبالي ، عيونه تتلامع و هو يباوعلي ، ابتسم و هو يكول : شلونكم مالونكم
سبقتنا امه و هي تكول : دمشي وانت تعرف لونهن ، امشيلنا
تنادس وياها : شبيج يمه، وامي تردة : بخير خالة الله يحفظك .
حرك السيارة وحجه : جا مؤيد وينه كون سوالكم مشاكل
ايمان : نايم
- زين
باوعلي وكال : جروحج ياذنج
استحيت احجي وامه كاعده ، اشرت براسي بمعنى لاه، حجت امه : ليش هي مصوبة ؟
حمزة : كضها اخوها من جانت تحجي وياي
شكرية : اي جا ايده اله ياهو اليرضاها اخته تبسبس تالي الليل ويا الزلم وادير بروسهم .
ندسها : يممممه
سكتت و هي اطلع : اححح
وتحسسهم ما طايقتهم ، حجه حمزة : راح اول شي انزل احجز عد الدكتور و نروح للسوك نخلص مشترى ونرد ع الحجز احسن حتى نستغل الوقت وما نظل نتاني
ايمان : اللي يريحك امي براحتك
شكرية : احححح
تضايق من امه حيل ، صف سيارته ونزل حجز ، ورد صعد و حرك السيارة مشاها لسوك الاولى . صفها يم واحد عرف و نزلنا حتى نتمشى ، بس من نزلت عقد حاجبه ومبين ضاج ، ما ادري شكو .
مشينا وتقرب من وهو يحجي : عباتج وين ليش طالعة بلا عباة والله هسه يلا انتبهت عباتج عايفتها ، انوب حتى جواريب ما لابسه ، تحجين صدك
- عندي عباية اطلع بيها ، بس كلت هيج احلى
- لا العباية احلى
- المرة الثانية البسها
تبسم وهمس : اكض ايدج لو عيب ؟
- لا امك وامي منانه زحمة
هز راسه بمعنى اي و هو يمسح على لحيته ، من طبيت للسوك شاهت عيني على الملابس اشكال الوان نازلات بالسوك واني ابد كلش ما اطلع ، حدنا لبيت هدوة والمدرسة وهاهيه ، ظلت عيني شايهة على الملابس ، وكلساع انركع باحد كدامي ما اشوفه .
كض معصم ايدي وكال : انتبهي لطريقج حبيبتي
من كالها توترت .. امي وامه كدامنا .. حيل خجلت لإن سمعن بس بنفس الوكت فرحت حيل طرت من الفرحة ، ظليت مدنكة وامي وهو كاض ايدي .
حجه بصوت مسموع ، الي و لامي : اذا يعجبكم شي من السوك وتحتاجونه للخطبة كولوا ..
امه : الخطبة اعلى اهل البت شنهي غير هاي الاصول
حمزة: لا يعني خاف يعجب الاء ثوب او حاجة ، احجي اشتريها الج .
شكرية : احححح شني اهلها ما عدهم يشترولها
ايمان ؛ لا خالة تسلم عدها كلشي
حمزة : وشعلي بالعدها ، اذا يعجبها شي بس خل تكول وتدلل
- اححححححححح
وصلنا لمحل الذهب ، دخلنا سلم حمزة على الزلمة ، يمكن يعرفه ، وكعد يمه على الكرسي ويسولف وياه ، كعدت امه على المسطبة منا واني وامي واكفات ، حجه صاحب المحل : تفضلوا
شرحله حمزة ان رايد ذهب مال نيشان .. كاله : المحل كله كدامك مولاي
حمزة : تسلم يالغالي ، استنكوا اليعجبكم خالة
ظل يطلع النا الحلقات و التراجي و الكلايد .. و طلع المحابس ، حجت امه : لا النيشان بس كلادة و حلقة و تراجي هاي الاصول
حمزة: الاصول عوفي يمه خلي البنية تتخير باليعجبها
- الذهب غالي يمه شني .. هو هاذ الاصول
خزرها .. وكاموا يتنادسون بيناتهم .. امي كاضة بقالب الحلقات وتناوشني واني اقيس على ايدي ، لحد عجبني ٣ اختار منهن حمزة واحد .. وزنه مثقال ونص
حجت امه : شدعو اختارن غيره
وكف حمزة يمي وهو يكول : عاجبج يابه
هزيت راسي ، قدماه للرجال وهو يكول : اختاريلج محبس حلو
امه : عليش محبسة حلقة كافي
- يمه المرة راح تصير مرتي والفلوس فلوسي اذبهن بشط اشتريلها بيهن .. شنو المانع .
حجاها بصيغة منغث .. وهي انغثت حيل طلعت من المحل .. عجبني زجيل ابو البرمة بس جان غالي .. بس الزنجيل ب٧٠٠الف .. من حجه الرجال السعر طبت للمحل وهي تكله : شنهي اهلك ملوك وتشتريلها بس الزنجيل ب٧٠٠ الف الوادم حسرة عليها اللكمة .
الاء: عادي رجعه واختار اللي يناسبك اني ما اريد اكلف عليكم .
ايمان : خالة اذا ما عدك خليها
ما رد علينه وانطه الزنجيل للرجال ..
الذهب كله صار ب٣ ملايين ، امه سحبته من المحل تعاركت وياه .. وتحاجوا ، حجه ابو المحل : والله مصيبة هسه الزلمه ممعارض هي شسالفتها
حجت ايمان : عينها ضيكة الظاهر ، ما اكول غير الله يساعدج شلون راح تحملينها هاي
ابو المحل : تشوفها انجوم الظهر والله ، بس حمزة مبين رايد رايته .
ايمان : الله يوفقهم شنكول
لف النا الذهب بعلبة .. وجنت طايرة من الفرح .. لإن اني اكثر ذهب بخواتي .. صفى النيشان بس ذهب وهاي بعد ورانا الغرفة والتحضيرات والملابس .. وحمزة كلهن متكفلهن .
طلعنا من السوك وجان كدام ابو المحل ، محل ملابس مال طلعة .. ظلت عيني تباوعلهن ، حمزة حجه بس عرفت بحجايته مو لخاطري انما لخاطر يغث امه زيادة : طبي لهالمحل واختاري اللي يعجبج من هالملابس ما دام باوعتيله
شكرية : انا جدامي وجعني ، ردني
- اصبري يمه
- لا ما اصبر ردني
- اكعدي
حجاها وهو يتقدم لابو المحل .. هي عافتنا ومشت ما اهتم الها .. تعجبنا شلون ما يهتم لامه .. الظاهر علاقته بأهله مو كلش ..
اني فرحت لإن هيج مهتملي وكتلها لامي : شفتي شسوا
حجت : لا تفرحين ماما الما بيه خير لاهله ما بيه خير لاحد .
سكتت وامي اكدتله انو احنا ما محتاجين الملابس ، وهو لح ، واني عجبني قميص كلش حلو و اشرت عليه ، بس امي سحبتني وما قبلت ، كلت الها: ليش خل اخذه
-ما يسوى تتعيرين بعدين عليه .. عوفي هو اول وتالي مشترين النيشان واخذي مثله ليش تشتري قبل الخطبة وينحسب عليج .
سكتت ورضيت بحجيها ، طلعنا للدكتور ، كعدنا وحمزة راح يشوف الحجز .. واجه كعد يمي وهو يحجي : كدامنا اثنين
ايمان : خالة ما بيها الشي اليحتاج دكتور
- الاء غالية عندي خالة ما ارتاح اذا ما اطمن عليها .
تبسمت واني مدنكه رجع راسه وهو يكلي : خدج كمين واني حيلي مهدود .
باوعتله مبتسمة ، همس :كم يوم وهالوجه يصبح حلالي .
- ان شالله
- ثقيتي بيه لو بعدج تشكين احبج
- احبك هواية
- جاي توازين وناس منا
- دنكت مبتسمة
اجا دورنا ، طبينا للدكتور وهو طب ويانا ، فحص الدكتور وكتب النا عصارات من برا .. نزلنا ، صعدنا بسيارته وهو مشى جاب العصارات واجا .
كعدت امي يمه واني وراه ، حجه : رسومج بعدها عندج لو ضيعتيهن
حجت امي : هي ما عدها غير الرسم ، كل وكتها كامشة بهالدفتر وتشخبط
- بس فنانة
- ميشجعوني
- لا ليش اني اجيبلج الوان وعدة رسم وشتحتاجين اجيبه الج للبيت
- ومدرستي ؟
- بعد راح نتزوج وتصيرين ام بيت شلج بيها
- بس حرامات ما بقى كم شهر وتخلص السنة
- الهلصت والما خلصت ما تضر ولا تنفع اول وتالي تكعدين جناينه كلهن بالبيت واني ما ارضى اطلعين من البيت يومية .
ايمان : انت وياها تتفقون بعدين ، بس خالة امك السوم تعاملها ما جان حلو ، وتعاملك وياها هم نفس الحالة .. حتى لو هي ما راضية بألاء مرة جبيرة نقدر ، بس انت ما جان لازم تعاملها هيج .. المسكينه رجليها يوجعوها ورجعت وحدها
- خالة عذبوني هواي مللوني
- حتى لو خالة الاهل مالنا غنى عنهم وخاصة الام
- الله كريم
وصلنا للبيت ، نزلنا واني طايرة طيران بالذهب ، رادن يشوفنه خواتي بس حمزة خذاه وياه ، كال بيوم الخطبة يتلبس الها بس ما راح نسوي صفكة وهلهولة عثد سيد و كص كيكة وتلبيس ذهب وهاهية
بس احس روحي طير من الفرحة الكاع ما شايلتني ، امشي واركص ( يالبرتقالة طرا طرا عذبتي حالة ) ونانة تكلي : ها ذبانة .. مو على اساس ما تحبين الطربكة
- حبيتها حبيتها
واهزلها جتف ، ظلت تضحك وتشاركني فرحتي
لليل اندكت الباب ، ما نحس الا ابو حمزة على الباب ، استقبله ابوي ، السلام عليكم وعليكم السلام
- هلا بيك خوية
ابو علاء: والله خوية انا جاي ابري ذمتي اما الله ورسولة
- خير
- انا من ما اجيت مو مثل ما كالك حمزة ما راضي ابتك ، لا والله انتم ناس اجاويد واعلى راسي بس الخلة بأبني ، وجاي اني اسولفلك خافن باجر عكبة يصير ما يصير وتلومنا انا رايد ابري ذمتي
- خير ان شاءالله ؟
- يابو ستار حمزة ابني وطالع مني مو غريب ، بس الله فوك الراس ابني واحد مستهتر .. لا يحترمني واني ابوه وسبق وخطف اخوه وراد يكتله .. وشغله حرام كاض التجاوزات والكراجات سطوا عليها هو وربعه يبيعون على الوادم وفلوسها بجيوبهم .. وانا زلمه ما ارضى بالحرام .. هالتشوفني كدامك اجيتك مشي لا عدي سيارة ولا ابوي عده سيارة ولا جدي عده .. وحمزة طكله سيارة بيومين .. ومن انشدة يكول مال المكتب بس مالي ثقة بأبني ..
تريدون تطونه بتكم انتم مخيرين بس يصير ما يصير عليكم وعلى بتكم انا واخوته وعمامة مو كفالينه .. انتم وياه .
حاكم وسمع هالحجي تسودن .. رد خبر على حمزة .. كاله ما عدي بت للزواج
الاء سمعت كامت تبجي .. وصلت للحلك و الخطبة راح تصير شنو زواج ماكو .. شلون
حاكم كلالهم .. زواج ماكو وبس خلصت
وصل لحمزة .. اجاه كاله : عمي شني الاسباب
كاله : ابوك اجاني وكيت وكيت كالي ، واني ما مستعد انطي بتي بوية اعذرنا مالك عدنا مرة .
- والذهب الاشتريته
- شوفلك مرة من غيرنا واخطب ، اعذرني بتي ما اطيها
- اسمع عمي ما طول الحجي صار هجي اسمه .. الخميس الجاي الخطبة .. والبيه زود يعارض .
حجاها وطلع ، حاكم تسودن راح على بيت سرحان يركض ويصيح : خايب مامون ، الحك بوية
- ها عمي
- خابر على ابيك كله ابوي رايدك بساع
- شني القصة ؟
سولفاله و كاله ، مأمون : اني ما ارتاحيتله .. سبحان الله .. الوجوه مبينه من اشكاله ، عمي صكاك كوة هي .
- دخابر ابني خابر .. خل يجي الشيخ ايحلها ليه انا ويني ووين هالجماعات بوية وبنيات عدي .
خابر على سرحان .. سرحان كال الهم ، دزولي رقمه .. و انا باجر ابغداد ..
دزله مأمون رقم حمزة .. اتصل سرحان : الو
حمزة : الو منو
- وياك الشيخ سرحان .. الشيخ العام لال جلوب ، شنهي سالفتك ويا بيت حاكم عمي
- ما عدي كل سالفة ، خطبت بتهم بخير وسلامة
- وهم ما رايدين الخطبة بعد ابوك
- مشكلتهم . احنا اتفقنا واشترينا الذهب هو مو لعب جهال
- لا هي صدك مو لعب جهال .. البت انا اخطبنها لابني .. العدج حجي .. يحجي وياي .
- شيخ وتخطب على خطبتي
- بعدها الخطبة ما تمت وانا خذيت منه بت كبل مرة ، ومرت الاخرى اخذ وبرضات اهلها ، عدك وياي شي ؟
- شيخنا انت حمل ملاواتي ؟
- اعتبرنه تهديد منك
- لا انا ما اريدنك تعتبره .. اخذه بلا اعتبار تهديد صريح ، ابنك اليخطب مرة رايدها .. دور راسه وره السدة .
الشيخ : ههههههه البكدك يبوي عبرناهم لا انت ولا غيرك . يشخط ولدي مو يصكهم .
- لو ما حرام الرهن راهنتك
- يا حلاتكم وانتم تحجون بالدين ، خايب مو شفت الضيم بسجون صدام عليش تخليني اترحم اعلى ايامه بويه .
- اترحم باليعجبك .. بس اخذ احجايتي شرف .
- والله من انعل شرفكم اذا عدكم شرف .
- على راسي شيخنا...... يتبع
☆☆☆☆☆☆
#زينب_ماجد