#كحل_عرب
(الفوضى)
(((بقلم زينب ماجد )))
الحلقة -44-
(تهمة باطلة)
وين الگاك ؟
ي فص ملحي الوگع بالماي
كلشي بغيبتك فاهي
_عريان السيد خلف
وسن : انخبصنا اعلى طيحة عمتي كلنا تراكضنا الها ، واصيح على الهام ( جيبي ماي بسااااع اركض ، عمة اصحي عممممة )
وعمي يصيح بالتليفون الووو ، خايبن ءهلا ، الووووو
جابت الهام طاسة الماي كمت ابلل ايدي و امسح اعلى وجهه ، ما تكعد ، شلت ماي نكثته بوجهه واضرب بيها راشديات لحد ما وعت تشهك ..
الهام خذت التليفون : ها عمي
- شنهي الصار ولكم هديتووووو حيلي هدوة شجالها عليوي شماله مأمون وييييين
- عمي فليح هد على البيت بطابوك و طلعوله الولد مامون وعلاوي كتلوه وفليح انتهى بديهم اجت الشرطة اخذتهم
- يااااا يابوووووية راحو ولدي بوووووويه .
صك الخط بساع بوجه الهام ، دكت رقم بيت اخوها ، ووكفت تنتظر يرد ، و هدوة تون وتصيح (عليوي يمه ، ولج نويسة خذوا اخوج يمممممه )
رد ياسر : الو
- ها ياسر اني الهام
- ها خير
- الحك الشرطة اخذت عليوي ابن عمي سرحان ومامون ... وعمتي هدية تخربطت وعمي ما هو ، بسرعة تعال
- شصاااير
- تعال وتعرف شصاير يمعووود
- مسافة الطريق .
كعدت هدوة من حيلها تكللهن : اطني عباتي
دخلوا كواغد و مؤيد للبيت : هاااا
- خذوا الولد يمممممه تصخم راسي يمه خذوووووه الامن خذووووووه تعاااااي ليه .
تحجي وهي تتجى على وسن وبطة تكض بديهن وتكوم ، و كواغد تصرخ : خايبة شصار غير نعرف ؟
- فليح الله لا يطيه هجمنا من صباحيات الله ، ولج يممممه
تجاها مؤيد وهو يكللها ( على كيفج يابه على كيفج هسه نروحله ) طب حاكم و عكازته بيده يتجى عليها ( هديوة بوية شنهييييي)
التموا عليها وكلهم يهدون بيها ووسن تحجيلها الصار بالتفصيل ، اندار مؤيد لبطة كال الها ( مفتاح سيارة مأمون جيبيلياه بسرعة روحي )
ركضت تجيبه ، صعدت هدوة وكواغد ليورا ومؤيد و حاكم ليكدام ، وطلعوا لمركز الشرطة .
نوسة : صعدت بالأسعاف ويا ابوي ، وانا كلبي يمه اعليوي اخوي ومأمون شالتهم الشرطة واني سودة علية فرفح كلبها ، دخيلك يا علي فكها والله تعبت يربي شوكت ارتاح بعمري ما ادري .
لابسة العباية بلايه حجاب ولافتها على وجهي وكاعدة ويمي الولد اليضمد ابوي، حجه الولد : الرجال دا يتنفس طبيعي ما عليه شي
- يعني ما ميت
- لا و حتى نبضات كلبه زينة بس اعتقد نايم
راد يكول جاي يمثل بس جملها بكلمة نايم تنهد وانا اعاين لابوي ( مصيبة وجبتك على راسي ااااااااااخ ) عضيت ايدي اعلى الساعة السودة السويت روحي بيها خيرة وجبته ليجاي .
وصلنا للمستشفى نزلوا ابوي وحطوا على ابسديا وركضوا بيه وانا وراهم ، دخلوا بغرفة كاموا يصحصون بيه ما يصحى ، جكوا اصبع رجله الصغير بأبره .. فز بساع وظل يصرخ ( يابووووووية جتلوني ثريحان ووولده يابه )
وصرعنا بصياحه والربدة مالته و المضمدين اثنين عليه خيطوله جرح بكصته و ضمدوها واديه ، كال الهم رجلي مكثورة جمجمتي كثروووه اكتبوووووووا
حجوا ( حجي مابيها شي رجلك سليمة )
- ثني ولكم ثليممممممه اكتبوا اثريحان وولده كثروا راثي و رجلي )
- عندك العافية حجي .
- عوينة ابيكم ثافييين ويثرحان علي كلكم وياه منااااااعيل الوالدين .
دوه وكالولي (انت وياه )
- اي والله خوية انا وياه
- اخذي ما بيه شي بعد ، اطلعوا
- مشكور رحمة الله والديك .
وهو يصيح كضيت ايده خاطر اعاوننه نمي ، ظل يفشر ويغلط علي .. صيحوا عليه وطردوا ، وانا اكله ( كافي بسك .. ابتليت خوما ابتليت دممممشي من خذاك الله و خلصاني منك )
- بت الجلبة خاطر اضليت تكو*** انت وامج من اموتن موووو ، انعل والديج اليوم ووالديهم ، الا اجتل ثريحان النذل .
- دبسك خلصت عمرك تهوبز وتفشر وانت عليوي اخوي الها علواته حطاك جواه دمش .
ظل يغلط ويسب ويصيح و الوادم كلها تعلين علينا، ما جنت شايلة فلوس وياي ، كلت اله : وكفلنا سيارة خل نرد
- اثرف عليج انا بت الجلبة امثيييي
- جا اهدنك وارد لوحيدي لبيت اجدادي
- انعل اجدادج كلهم امثييييي
ظليت اترادد وياه ودرت وجهي كضاني من راسي و طكاني بالشارع ، تفرع والعباية طاحت كمت ابجي وابعد بيه وجريت العباية الراسي .. واضطريت اردن وياه خاطر ما نتعارك بالشارع
وكرف بيه مشي من مستشفى القادسية للاورفلي ، وجاب الدرب كله يصيح ويغلط ويفشر هكو احد ما علين علينا و ما استغرب سوادين ابوي .
لحد ما وصلنا البيتنا و طبيت ، راد مني افرشلة وهو يسوي روحه موات و يغلط على سرحان واخوتي ، فرشتله .. وكتله (ابني ظل غاد خل اروح اجيبنه )
- هدي كعدي لا انعل والديج
- شني هدي ، غير ابني تلكاه يبجي
- بث اطلعين اكتلج بالثارع والله بت اهدية الكح***
عفته و رحت للمطبخ وانا جزعانة روحي ولايبة اعلى امي واخوتي ما ادري شصار بيهم ، اطلع اخافن لا يسويلي سالفة وانا الفرع يعرفوني ويودوني زحمة افرج الوادم علينا .
ذبيت حركتي بالشغل .. غسلت البيت كله جاي اجرن كونية الشكر ولن فلوس ها كثرها اطيح من ورا الكونية ، جريتهن ( المن ذني ؟ يعني المن هو ياهو غيري انا وابوي هنا ما دامهن مو الي لابوي يس منيله كل هالفلوس ؟)
كعدت بالكاع وحسبتهن ولنهن ٢٠٠ الف .. صخام الصخمني ابوي بايكهن يو شني ، ياهو العده ٢٠٠ الف ، اذا هاذ الضابط جوارينة راتبه ٧٥ الف .
ظلت حسبة تاخذني و حسبة تردني و شكيت بابوي بايكهن ، شلتهن ولفيتهن بعلاكة سودة ودحستهن حدر الثلاجة.
سرحان ساعة العرف فليح هاد اعلى بيته وولده كاتلينه ، حسبها صح وراح اعلى ال ثجيل مغبش كال الهم (فليح ال ناصر هاد اعلى بيتي بالطابوك و مفشر اعلى حرمتي وولدي طاكينه و هاي دوسة بحكي من يهد اعلى بيتي ، يا تكتبون بيه سند وتذبونه من العشيرة وانا اتولاه يا انا وياكم كوام و افصلنكم اعلى دوسة بيتي )
تسودنوا ساعة العرفوا فليح هاد اعلى بيت شيخ ال ضاحي بالطابوك ، هدهم سرحان و طلع و هم ودوا اعلى بيت ناصر ، وطلبوا ولده يجون خاطر يفتهمون من ولده يتكفلون ابوهم لو شنهي .
بلغهم سرحان و طلع للسماوة ووياه ١١ زلمة من ازلام عشيرته .
علي متهور و يغلط على فليح ويفشر ومامون يكرص بيه و يندس ويكله (بس لا تعمي على روحك ) وهاذ ماخذ السالفة بحيل صدر شلون متعدي اعلى بيتهم ومفشر على امه .
دخلوهم المركز وظلوا يحققون وياهم ، عرفوا مأمون مهندس نفط وعرف عن نفسه ان هو ابن شيخ من اهل السماوة ، وان الرجال هو الهد عليهم من الصبح بالطابوك ويفشر على اعراضنا و احنا طلعنا نرده .. واخوي هاذ مراهق ما اتحمل واحد يفشر على امه بصوت عالي بنص المنطقة واحنا ناس معروفين بيت شيخ وسمعتنا طيبة بالمنطقة .
حجه وياه برهدنه وقنع الملازم ان الحادثة صارت بالدفاع عن النفس و العرض وهو المتهجم ... بس علي ما يسكت .
وصل حاكم و مؤيد و هدوة تبجي يم السيارة وتنوح و كواغد كاضتها ، وحاكم وكف يحجي ويا الملازم .. جز القضية و كفل مامون علي ان ما يتعدى مرت الثانية وما ينعاد ، ولو رجع تهجم تبلغون الشرطة تشيلة .
جروا علي وطلعوا من المركز .. شافته هدوة صرخت ( وليدييييي يمه ) وطاحت عليه حضنها وهو يكلي ( شني يمه جاهل اني وتبجين عليه )
- يااااه من دهر خايبة خايب الامن خذوك جا غير سلامتي من الله وطلعوك ، امش .
بعدهم واكفين ، صفت سيارة ياسر : ها سلامات شني ؟
مأمون : الله يسلمك فضت تسلم .
- اجيت عليكم بساع ساعة الكالتلي الهام شلونج عمة
وسلم على حاكم و مؤيد ومد ايده لمأمون تسالموا من بلا طيب خاطر ...
ظل يحجي وياه حاكم : يطيك العافية بوية فليح وطلايبه وفضت ان شاءالله
- الحمد لله ، هسه شني رادين للبيت
- اي والله
- ياله .
صعد مامون بسيارته ، بس ما كفت صعد حاكم ومؤيد ويا اسر ، وهدوة وكواغد و علي ويا امون .
ردوا للبيت وهم يسولفون بالسالفة ، ومخبوصين والوادم اجتهم تتحمدلهم بالسلامة ، ساعة وشوية وصفت سيارة سرحان وازلامة انخبص البيت خبص .
خابر عم سرحان كاله بوية ال ثجيل يكولون باجر نحول عد سرحان ناخذ عطوة و ان جان فليح غلطان حك الشيخ واصل وهو الفصال
للعصر وصلوا ال ناصر لبغداد و دكوا الباب على بيت فليح .. ساعة الطبو وشافووا وجه مزورك و كصته مخيطة ، اغتاضواا ، وكاموا يصيحون (( سرحان وولده طاكين الزلمة و يدور فصول بروسننا احنا النفصله وعلي اليوم الليوم) هادين البيت و طالعين البيت سرحان
تمار سامع من ياسر فليح هاد على بيت الشيخ و الشرطةة ماخذة مأمون .. بساع رايحلهم .. وساعة العرف فليح منطي بته لواحد مهتلف و هو الخطبها كم مرة وما رضى بيه ، كض سيارتك و اطلع من البيت وروح على بيت فليح .
نوسة : توهم طلعوا عمامي وهم يتحلفون السرحان ولولده شلون هو ابو الراهي وهجي مسوي بابوي ، وماكو كلمة ما حجوها و غلطوا بيها علي و على امي، اني كعدت بالمطبخ ما كابلتهم ، ساعة الطلعوا وهدى البيت ، طلعت اشوف شني ما شني ، ابوي بعده بالبيت كاعد يورث جكارة .
ولن سيارة تصف ، حسبالي عمامي رجعوا ، رديت للمطبخ بساع اندكت الباب حيل انرجت رج ، فزيت بس ما كلت ياهو خفت ، ولن تمار يدفر الباب و يطب للدوانية و كض ابوي ونام بخوانيكة ولف الغترة اعلى ركبته و هو يصرخ ( النذل اليوم اموتك خلاص يالنكسسسسسسس ) وابوي غده فارة بيده وعيونه جحضن
طبيت الطم على خدودي ( تمار هده ، تمااااار هده ) اعصاب لا يسمعني ولا يرد ، جريت زلغت ضربت ما فاد وياه ، صراحية ماي شلتها وضربتها بيه ، فز من عنده و هو يصرخ ( لمي اهدومج اطلعي )
اعاين لابوي لا يتحرك ولا يون ، طحت عليه اكضنه :- بويييييه ، بووووية حاجيني بويه احاااااجيك ، اسويت بيه كلي مووووته ، بوووويه
شالني من ايدي و هو يكلي : لمي هدومج خل نطلع
- مسوووودن انت شسوووويت
- لهنا وبس جزعت صالي سنين ناطر يرضى تالي يطيج كاااافي
- عوفني اطلع منا كبل يجون عمامي روووح
- جاي اكلج امشي
- امشي وين اطلع لا تفضحني روووووح
- ما اطلع اذا ما تروحين
- ولك ابوي رااااااااح يموت امشي خل افزع الواااااادم امشششششي
كمت اضرب بيه وادفع و هو يكلي : ششمتااااانية يطونج لياهو الجااااان ، تعاااي
- لو تصير نبي على عملتك هاي ما اواطيك ، رووووح منا
طردته من البيت و كمت اصرخ و اكعد بابوي ،، انده ريد ماكو ، ذبيت عليه ماي عصرت خشمه ماكو ، اتذكرت المضمد من بز ااصبعه و فز ، ركضت جبت دنبوس وبزين اصبع رجله ماله ردة فعل، تسودنت معناتها ابوي مات .
طلعت للشارع اصرخ فزعلي جيرانه واجاني يركض ، شالوا ابوي وتراكضوا بيه للمستشفى، وتمار ليغاد صاف ما راح .
احتريت بكاعي شسوي ؟ لبست عبتي و طلعت من البيت ، على الاقل البد عد جدي جا لو كضوني عمامي شكللهم ياهو الهد على البيت وكتلهم .. خليني انكر احسلي ...
ظليت امشي ليما ردت اوصل للبيت تذكرت اني الفزعت الجيران جا لو عمامي سألوهم راح يكلولهم بتكم ويردون علي ، شني يربي ارد لو لا
اندار راسي ادخيلك ربي .
اروحن لجدتي وهي تحل ازمتي ..
طبيت على بيت جدي جسمي يرعش وعيوني بالطول صايرات من الخوفة البكلبي .. تلني عمتي ايمان كتلها : جدتي وين ؟
- شبيج ولج
- بس اريدن حبوبتي
- عد بيت هدوة
- وديلي احد يصيحها بسكوت
- اكو شي
- اي اكو بس دزي
كضت نانة وكالتلها ( تركضين ليمه تشاورينها وتكليلها تعاي بساع بس لا تخلين احد يدري بيج )
لبست تانة نعالها وركضت لبيت سرحان صاير هوسة من هرجة ازلامه وال ثجيل عده يتصايحون جيف طاكين فليح .
وسرحان يكلهم : سهلة اذا طكة فليخ باطلة تاخذون حكه من هالشارب ، بس لا انا ولا ولدي نتانازل عن دوسة البيت ، و الفصل تشيلونه .
كضهم عمهم وهو يكلهم ( خايبين تحجون صدك يو تشاقون ، فليح هاد اعلى بيت شيخ ومفشر اعلى عرضه جا مو زين ما حطو الجيلة براسه و جتلوه اسكتوا بوية تراها لو صارت دواوين يحگکم ما تحكونه و تطلعون بالوجه الاسود ، تعذروا منه و خل يطيحها )
كاموا من عده و هم ما طالبين العذر بعدهم كوام و سرحان وازلامه مصرين ع الفصل .
شفات بطة نانة طبت صاحت بيها : روحي شيلي اكبر بساع
- هسه بس اروح ليمه
- شيلي دا اكلج عذبنيييي الشغل بيدي
شالت اكبر حطته على خصرها ومشت ليمه كواغد .. دنكت الها ، فزت كواغد : ها ولج شرايدة ؟
شاورتها : امي تكول تعاي بساع ولا تكليل لاحد
- يا ستار شني ؟
- هي امي هيج تكول
- هكو شي ؟
- بس نوسة اجتي ويمكن بيها شي
- ادخيلك ربي
هدية : خير يمه ، شنهيييي
- ماكو شي الجريدي طاب على المخزن لا ياكل كواني الطحين و وابتلي خليني اكومن اجتلنه يمه ، وانا هم تعبت وكت نومتي بعد ما بيه ، اودعناكم
- هلا بيج يمه، بس يمه خلي عبيس يمر اعلى نويسة يشوفها وليدها هذا وياه عدي بس اخافن اعليها من ال ثجيل يمه ما يتأمنون .
- الله كريم عود انا لو كدرت امشيلها اروحن .
سلمت عليهم و طلعت من البيت راحت على بيتها دخلت ، نوسة بالدوانية وتروح وترد ، طبت حبوبتها : ها ولج
- الحكيلي حبوبة كليلي شسوي
- شني ؟
سولفت الها السالفة كلها وكالتها : كليلي حبوبة شسوي ، لو درا احد تمار الرايدني جاتل ابوي اشتهر وعلي وعمامي يكتلوني .
- انكري وكليلهم انا جوا و سمعت الباب انفتح وهوسة بالهول ودخلت اشوفن زلمه هاد اعلى ابوي ما شفته عبن ساعة الصيحيت لف وجهه وطلع من البيت وانا فزعت الوادم
- ولو كلولي شعدج شردتي ؟
- كليلهم خفت اظلن وحيدي بالبيت وانا بت لا يطفر علي الحرامي واشتهر والخوفة بكلبي ظلت من طفرت الملثم وشردت لخوالي .
- ولو كلولي ليش ما رحتي وياه ؟
-ازلام شنهي تصفين ويا الزلم وتصعدين ، نكري حبوبه وخله يولي ، هلبت الله صدك وميت و نفتك من هالردي .
- يعني ما اخافن ؟
- نامي وما عليج جدة ، ولو اجو عمامج انا اطلع الهم .
هديت اعلى حجي حبوبتي ، وظليت كاعدة يمها وهي تمددت ، طب جدي حاكم و حبوبتي كالتله ملثمين طابين اعلى فليح وهيج وهيج السالفة ، متسودن حاكم ورايح لبيت فليح ، لاكي ولد ناصر الجيران كايليلهم : ابنكم نقلوه للمستشفى ، وظالين واكفين بالشارع محتارين ما يعرفون وين يروحون .
سلم عليهم وكايل الهم : بت فليح عدي وملثم هاد على البيت وهادين على فليح وبته ومفزعه الوادم و ناقلينه .
ركبوا وتوجوهوا لبيت حاكم ، و صاحوا نوسة وكعدوا يتحققون وياها : ما شفتيه ، ما عرفتي ؟
- ما عرفته الزلمه جان لابس اسود ولاف اللثام على وجهه ما ميزته .
رجع الجيران بلغهم هو بمستشفى الجوادر وفلاح فاقد الوعي وياريت لو تروحوله .
رايحين على فليح .. نشدوا عنه كلولهم حالته تعبانة ، بس الحمد لله تعدى مرحلة الخطر و الأن هو نايم
سرحان : بوية انقل انت واخيك فراشات للزلم خلهم ينامون ، تعبنا اليوم كلش ، ودخت لهساع لا ماكل ولا شارب من هبطت اليوم .
يحجيها وهو يطب للهول ، حجت هدوة : مت عيني انا من حلاة روحي ركضت عليك فززيتك
- لا بوية جا المن تركضين .. بس هالطلايب انا جزعت منها وكلت الج لجن ... مريضة ما اكدر احجي .
- جا انا شبيدي البت نامت وابوي كال الصبح يجي عليها انا ادري هالمخزبك يهد علينا من صباح الله .
- الله كريم صارت بعد المعاتب و الحجي واللوم ما يفيد .
التفتت هدوة على بطة وهي تكللها: عشا زين لعمج بساع
- اي والله ميت من الجوع
وسن تنقل بالفراشات و مامون و علاوي يشيلون ، حجت هدية وهي تعاين لسرحان : يسرحان تمنيت هنا وتشوف فزعت عليوي ساعة الهد فليح .
عاينله سرحان و هو يكله : وليدي البطل ، وشو تعال ليجاي
- وليدي البطل شني بووووية تشجيع ، مو جاهل اني والسويته عادي ترا
- لا هو الحك بس بوية انا سمعت من مأمون ويا الشرطة لا تترادد حط الحك اعلى المقابيلك موش اعليك ...
هدية : لو تشوفه الحجار فوك روسنا وبطة كاضة بمامون وهاذ من بين الحجار هد وكتها احترك كلبي بس من كعدت وتضكرت ، تظليت اضحك ويا روحي من الفرحة ، صار عدي ولد ويفزعلي يو احد مسني بجلمة .
- شحدهم يمه غير انعل والديهم .
حطت بطة صينية العشا لسرحان وهم يسولفون بهداي ويتذكرون الصار ، طب مأمون : بوية
- جابك الله تعال وليدي تعشى انت ما كلت
- لا بالعافية ما اشتهي ، بس ردت اكلك
- شنهي ؟
- هداين على بيت فليح و متعدين عليه والجيران ناقلينه للمستشفى ونوسة عد بيت عمي حاكم .
هدية : يمه ادخيلك ربي
سرحان : ياهم ذول المتعدين ؟
- ما عرف نوسة تكول ملثمين ما شفتهم
- شني هاي ؟ هو اليريد يهد ملثم.. يهد بنصاص اليالي هاطر يظل بلثامه ومحد يعرفه موش اول الليل
- يعني شني
- والله يا بويه ما عرف بس السالفة شو ما مرتاحلها .. انت ياهو الكالك ؟
- مؤيد توه اجا وكلالي
- ديروا بالكم ولا اطلعون ، عليوي بوية دير بالك وليدي
علي : واحنا ياهو مالتنا ؟
- ميخالف بوية الحذر يقيك الضرر ، تحذر واكعد باجر
الهام : مأمون ياسر اجاك للمركز اليوم
التفت الها مأمون : اي اجا
- خطية اجا ليجاي طاير كلبه ومن كلتله اجاك ركض
هز راسه مأمون ، حجه سرحان : سلم عليك
- اي سلم
- الله يهديكم بوية
... ثاني يوم الصبح صحى فليح .. التموا عليه ( خايب فليح ياهو الطكك ) ما يحجي ( ولك الياهو الهد عليك ، شفته لمتحه .. بتك تكول ملثم الهد علينا )
ما يحجي ...
ومحد يعرف سبب سكوته ، ليما خذوه وطلعوا من المستشفى ، بالطريق ولن يكلهم : انا الطكاني شايفة بس صالي ساعة اريد اتضكر وين شايف ، والزلمة الهد علي من ال ضاحي انا شايفة جم مره يروح ويرد عليهم
تسودنوا ساعة السمعوا الحجي هاذ ، ردا فليح لبيته وروحوا على بيت الشيخ سرحان وكفوا بالباب يتصايحون ، طلع سرحان وزلامه : هاااا
- الهاد اعلى فليح امس من ال ضاحي يسرحااااان
سرحان : وياهو من ال ضاحي الهاد اعلى فليح اطني اسمه .
- فليح ما يعرفه بالسم بس يعرف شكله و اهو من ال ضاحي و النا حك وناخذه بعون الله .
حجوها و طلعوا .. ما كثروا حجي ، كضوا عالسالفة ممسك خاطر يؤكبون الحك على سرحان و طلع منها ، ظل يتنهد سرحان ويكلهم : انا كايللكم فليح ما اواطننه عبن اعرفه ردي وخنيث ويفيض الغيض
- وهسه الراي شنهو يشيخ ؟
مأمون : من رخصة ابوي ، احنا مالنا غرض وهم مالهم حك علينا ، اليريد يثبت هالحجي خل يكول اسم الهاد على فلاح والا كلنا نكدر نتهم عامي شامي ، وشغلة ثانية .. بته امس كالت الزلمة جان ملثم وعمي حاكم ومؤيد يشهدون على هالحجي ، شلون شافه فليح و هو ملثم ؟ من السان بتهم نحكهم .. ما دام بتهم نطقت حك وكالت الزلمة ملثم و هم ما عدهم دليل ولا اسم الهاد .. حجتهم ضعيفة .
سرحان ؛ وانا هاذ رايي .
وسن : مأمووون ، مروان على التليفون يريدك
- اي جاي
هد ابوه وازلامه يدانشون بالموضوع و دخل اخذ سماعة التليفون من وسن : الو
- الو ها مأمون شنو شصاير ؟
- كول شنو الما صاير ، وعلي افلام هندي الصار بينا من امس وليجاي
- اي
- لفونا الامن البارحة اني وعلي
- لا يا علي تحجي صدك انت
- قابل مجذب عليك
- وهسه انتم وين
- بالسجن جاي نحجي وياك شبيك يا مروان
- يعني قصدي شلونك
- لونا بنفسجي
-خب شكد خايس انت اني دمي محترك وانت تصنف ..
- ولك ماكو شي والله لا يظل بالك
- شني غير احترك دمي بالعباس تمنيت روحي موجود يا بوياااااي
- تحطلك وصلة وتهز غير
- مو مثلك كاولي واهز
- ههههههههههه لا يظل بالك احنا بخير ركز بتدريبك وراك لعبة
- يعني ما بيكم شي عليكم العباس
- لا والقران كلشي ما بينا ، بس يمكن راح يطكوني بفصلية
- ضمها اليه اذا حلوة عليك العباس
- دمشي لك خايس اني اكتل وانسجن و تروحلك على الحاضر
- ميخالف جا اخيك انا مكطوع كلبي
- والله فد كاولي واكبر كوا***
-هههههههههه عليوي وينه ؟
- مدري نايم فوك بعده
- هسه ابوي يطي الفصلية لعلي المدلل هاذ ويفلسنا
- اشوف العين هيج السالفة ، بس لا اني الجبير و عزيز عد ابوي متأكد يمي .
- بعير احسن
- اكلك انتوياهو مالتك شو بالله روح ، كاعد بالبصرة وبنعال ما هاد ويانا و يدور فصل .
- لا يالنذل تعوفني وراك وانا اخيك
- دولي ولي ، ديري بالك على نفسك
- حبيبي ابو الاكبر سلملي على امي هدوة وابوي ، ان شاءالله بلكي ٥ ايام وارد
- ترجع بالسلامة خوية الله وياك .
سد السماعة وبطة متخصرتله : اي عني ابو الاكبر ، شتريييييد
- ها شكو ؟
- تريد فصلية
- ههههه هاي جنت تتصنتين
- اي لعد شنو ... تحجي صدك انت لو تشاقه
- لا اشاقه شنو احجي صدك
- والعباس ابو فاضل غير اكطعك انت والتجيبها
- هاااه .. تكطعيني اني
- اي والله مو بس اكطعك اكلك بسنوني
- ليش ولج
- اي لعد شنو غير اموتك اذا تجيب غيري
- بعلي مسودنه ، دميلي من كدامي شو ميلي .
- عليك الله تحجي صدك لو تشاقى
- اتشاقى وياج والله مخبلة انت اخذ فصلية شبيج بس اصنف ويا مروان .
- اي عبالي ، مدام تصنف اكمش اكبر خل اروح اكمل شغلي
- لا جا راح اخذ فصلية مخصوص بس حتى تكض اكبر بدالي .
- جيب حتى اكبر ما اطيكياه .
- اي هو هيج يله تمشي النسوان .
مشى ، طلع سرحان بوجهه : كوم امش وياي بويه
- هاه
- خل نروح نمش لنوسة نحجي وياها ، خاطر نتأكد الزلمة ملثم ، حتى اذا صدك احكنهم بتهمتهم هاي .
- ياله
لبسوا وراحوا لبيت حاكم ، كعدوا بالدوانية وحاكم كعد يمهم ،والحجية كواغد بالمخزن ، صاح حاكم : الاء بوية روحي اندهي لنوسة خل تجي
مشت الاء ، دخلت على نوسة متمددة بغرفة جدتها : نوسة ابوي يريدج
- شيريد ؟
- سرحان ومامون كاعدين و يريديج
- صيحي على حبوبتي خل تجي بسرعة
- يمه بالمخزن
- ميخالف صيحيها
مشت الهم : صباح الخير
سرحان:- هلا اصباح النور، كعدي بويه
- كول عمي
- سولفيلي الصار امس بالتفصيل
- عمي ماكو تفاصيل هواي انا جنت بالمطبخ من طلعوا عمامي ، شوي وحسيت الباب انفتح شفت واحد كاض ابوي ويخنك بيه ، من كمت اصرخ هولف لثامه و شرد من البيت ؟
- يعني من سمع حسج لف الثامه لو شنهي ؟
- اي ؟
- عمي السالفة هاي ما ادري شلونها ، جاي باول الليل و داخل للبيت دفع مو ساطي ... وهاد الثامه جدام ابوج ومن سمع حسج تلثم .. شنهي
دخلت كواغد وهو يتحقق منها ، ظلت ساكته ، كلام نوسة ما جان مترابط و سرحان شك بالسالفة ، وكواغد اكدتله من اشرتله من وراهم ، نهى السالفة وكام .
وطلعت كواغد للمخزن ، خله حاكم يسد الباب واندار لكواغد : ها ام ستار شنهي الراي ؟
- انا امس البت اجتني خايفة ولفقت سالفة الملثم بس الهاد اعلى فليح بس الهاد تمار جيف طالبها وفليح ما مطيها اله ، وراح اطاها لواحد مهتلف ، بس خفت ينطعن بسمعتها واحنا بعد ما ناكصين ييمه بس هاي السالفة وانت حلها من يمك ولا تفضح البنية .
- اذا هيج اخابر اعلى الشيخ ال منعم واخبرنه بسالفة ابنه .
مأمون : السالفة اذا وصلت للشيوخ الحدر الشيوخ يطلعونها بوية ونوسة اختنا و تمار صاحبي
- بوية نطهم علم خاطر باجر عكبة يو لافوها ال ثجيل اعلينا يشيلونها ال منعم .. احنا ياهو مالتنا ؟
- انا ابلغ تمار واحجي وياه لو لافوها ال ثجيل ، يدخل الزلمه خوش زلمه ما يرضاها نطيح بيها بس لا تورطه واطلع السالفة وتروح تمس نوسه .. وحل بفليح يستاهل .
-انا السالفة البيها فليح تكشش روحي بس كون اظلن كاض غيضي للاخير اخافن لا اتهور واروح انا الاهد اعليه ، الردي يكول من ال ضاحي ، جا شكد ناقص غيرة هاذ وما عدة لا ذمة ولا ضمير
كواغد : ردي من يومه جا ما تعرفه
- لا بالعباس اعرفنه وهالكدامج مأمون بوية امس شحذرتكم ساعة الكلتلي هدوا اعلى فليح
- كتلي لا اطلعون
- شفتي ، اعرف يلوفها علينا دام ماله حك يمنا ، ال ثجيل ااااااخ تلوع افادي منهم ليما حفظت كل ادروبهم من الجلاد للجلاد .
طلع سرحان لبيته ، و سكت عن السالفة ، وحولوا ال ثجيل يمه واخذوا عطوة و الكعدة ورى ١٠ ايام بمضيف ال ضاحي .
ردوا اخوة نوسة ردوا عليها ، شلون عايفة البيت وشاردة مرت الاخرى وحسبوا هالطلايب الصارت كلها من حدر راسها ، تعاركت وياهم كواغد : خايبين يالخبكان يالغمان توكم تضكرتوا عدكم اخت وجايين تلومونها ، وين جانت الغيرة نايمة من اطر ادروب وتكد اعلى روحها بنص بغداد خاطر اتعيش ابنها وابوها الذبيتو بالشارع ، هسه صرتوا خيرين وتخافون اعلى ابوك ، ياله هاذ ابوكم وفكونا منه ومن طلايبه.
حجه اخوها سلام : انت مرة غريبة من ال شمخي مالج حجاية ويانا اختي احكنها واطيح حظها ما تفجين خلكج ويانا
- خايب يبو حلك المزبد من اكض الربد بالعباس اشج راسك ، امش منا لا تخليني اضحك الوادم اعليك ، امش .
متسودن شلون غالطة علية هاد على بيت حاكم ويتمرجل وظل يدفر بالباب ويفشر على كواغد ، طلعله حاكم يصيح عليه ويغلط ، ليما نزل مؤيد سامعه ، نازله ركض ومتعاركين هو وياه ، والتمت الكبار تفاككهم .. داك رجل سلام ما يمشي من يم بابهم الا نوسه وياه ويصيح : اريد اشوف شلون يكوون براسها علي ، وعلي ما امشي منا الا تطلع ويانا .
وصياح ونياح وهوسة ، كضت بنوسة لبست عبايتها وجفت الشر عن بيت اجدادها ، ظلت تصيح عليها كواغد : طبي مالج غرض خله يولي
وهي تبجي وتكله : بعد شنطر جم مصيبة تصير بطلعتي رحت لامي هجمو بيتها اجيتكم هجموكم .. ، خليني امشي غاد واتجفى شري .
طلعت وياهم رحت للبيت، طب اخوي سلام وهو يكلي : اسمعي ولج من عين باجر يجي الزلمه الحاجي بيج تعقدون .. وتفض السالفة
- عقد شني خافوا ربكم بسكم تضححون بيه ... ضحيتوا كبل واطيتوني لحسن وتالي هاذ حالي صفيت ، وين رايدين تذبوني بعد .
- البت مالها راي ووووولج لو انت خوش بنية ومحترمة ما طلكاج ، بس جان يصيح الويل منج ومن دياحتج على امج الكح**
- والله امي تشرف اكبر واحد بيكم .. وعرس ما اعرس لو تطلع نخلة بروسكم .
طكاها : ولج تتكوين انت بت الكح*** نكسر ظهرررررج والله
ظلت تبجي وتعلي بصوتها وهي تصرخ : حسبي الله ونعم الوكيل بيكم عساها بحظكم وابختكم والله ما اعرس لو الدنيا تنكلب ، جايين من تالي تحكموني ، والله ما تحكموني .
- نحكمج وغصبا ما على راسج شحاسبه روحج بلا رداد ولج .
- جا وينكم هديني بلا رداد كل هالسنين انا اكد وانا اشتغل وانتم ما دارين عنه ، هسه جاي .
- لا الفات خلص وتعرسين وابوي يكعد هنا واحنا كل اسبوع احنا جايينه
-وانت مو ابنه عليمن تخلي عدي اخذ ابوك وكعده عدك ، تخليه كعيدي ليش ، لو هنا غيرة ماكو
شلون تكولين هيج هد علي ضرب و صياح و افشار ما خله شي ما عمله .
وين اطي وجهي وبيمن الوذ وافتك منهم ؟ شكد ما اكولن اعلى روحي قوية سلتمون علي يلووني وانكسر ، ابني منعوه عني ما يخلونه يجي البيت ، وسبوني سباية بظلمهم
ورى ٣ ايام ... التموا واجا الزلمة القرا الفاتحة ، جايب سيد وجاي ، وطب علي سلام و كال : اتلبسين عباتج واطبين ومن يكلج السيد موافقة ، تكولين نعم واذا رفضتي ابنج تحلمين تشوفينه اخذ ابوي واخذج وياي واخليج خدامة لمرتي واذلج مذلة بالقرأن .......يتبع
☆☆☆☆☆☆
بنات عدت نشر البارت بسبب خربطه صارت بالنشر
كثرولي بتعليقاتكم الحلوه