#كحل_عرب
(بيت بيوت )
((( بقلم زينب ماجد )))
الحلقة_30
( رسالة بالخطأ )
المحنه الگوة ماتنراد...!!
يامحلى النفوس بكيفها من اتحن
لــِ عريان السيد خلف||🖤
ياسر : اللي تشوفه عمي
سرحان : جا خوش .. الله يكتب اللي بيه البركة .
ليلى : كلللللللللللللللللوش شايف الف خير يمه بنية عمك ما تلاكي بحسنها وتربيتها كللللللللللللوش
سرحان : انطري يا مرة نشوف رأي البت خوما اغصبنها .. غير اخذ رايها واشوفن احجايتها ياله احج
ليلى : اي عيوني حاجيها ليش لا ... واحنا هم ما عدنا شي ننتظرها وين يلاكي احسن منها ... مو هيج ياسر بمه
ياسر : عمي انا كونت شغل ابغداد و لازم اطلع وامي ما راضية
- تعيش غاد يو تشتغل يو شنهي
ليلى : يعيش شنهي يهد امه واهله و يروح غاد و علي اغضب عليه و ما يطخ الساني بلسانه ليوم الدين
- بهداي اعلى الولد يا مرة خلني اسمعنه شنهو اليريدة
- عمي انا كلت الك كبل انا وتمار ابن الشيخ ال منعم اتفقنا نفتح النا مشروع ابغداد و نسترزق منه، ما اعيشن بس كل فترة امشي غاد اوكف اعلى رزقي واتابع حلالي .
- من الزينات هاي عمي جا هكو احسن من الواحد يكون نفسه .
- انا اترخص منك عمي
ليلى : خوية احلفنك بالعباس اريدنك تعكله ..
- غاصبته انت يفخرية
- خوية يريد بت حاكم .. و انا بت حاكم ما اخذها الها عبن انت كلت يو خذيتها تجلي من السماوة وبيني وبينك انا من شفته كام يشتغل ابغداد عرفته يريد يستقر ابغداد ويتناحر وياك .
- بس العرس مو بالغصب
- جا شوفت عينك شفته وافق اعلى العرس .. ولا تخاف بتك يو خذاها يحطها بماي العيون عبن تعرف شكثر يودك و يحبك بس احبن راسك خوية لا تخله يكرب بت حاكم .. مالنا حيل طلايب .
- انا حرمتها اعليهم اثنينهم لا هو ولا مأمون ياخذها .. شلون ارضى واحدهم ماخذ بت اخيه حاط عينه اعليها .
- اييي يبعد كلبي اريدك تعاوني ابعدنه عنها .
- انا ما اغصب احد اأمرنه يبعد .. انهرنه .. بس الخطبة يظل رايها لبتي ولزوم احطن هالصورة ابالها وهي وامها يقررن يرضن يو ما يرضن وكتها امش لاخوتها اخذ رايهم و بعدها الله كريم .
راح كعد ويا امه و فخرية وكال الهن الحجي كيت و كيت وياسر رايد وردة .. ردحة وفخرية ما عدهن كل اعتراض بالعكس فرحن جيف خيرهم يظل بينهم ما يروح للغريب و ياسر تربات اديهم ويعرفونه ويعرفون اخلاقه .
ثاني يوم طلب بته و كال الها : بويه هاذ عرس مو لعب وامج اكيد ورجتج على الحك وياسر جان حاط عينه على بت حاكم .. وهساه رايدج مستعدة تعيشين وياه لو لا ؟
اذا تكولين اي ... بيت زناد يصبح الكم .. افتحنه وانا كفال اثاثه مني الكم .. و تريد عمتج تعيش وياج تظل هنا ما عدي كل مانع .. بس انا رايد رايج بويه مو بعد يوم يومين تكولين ابوي غصبني لو ابوي اطاني.
ردحة : جا يا يمه ما تلاكي احسن من ياسر ، احسن ما تاخذ واحد ما تعرف اصله وطبايعه ، ياسر نعرفه و خيره سابك ويغركها بيه ..
ظلت البنية ساكته .. حاجاها .. خاطر يعرف الجواب منها ... تبسمت و كالتله : اللي تأمر بيه بويه انا حاضرة
وكامت للغرفة .
- دام البنية راضية هاهيه، على بركة الله .
.......
مأمون ؛ ليش ما جاي اداوم ؟
مروان : ماكو دوام
- شني ماكو دوام صاير كلاوجي انت صحبانك كلها جاي اداوم
- اي تسخت ماكو دراسه
- مروان انا ما مرتاحلك .. صرت شطولك وانت بعدك بالمتوسطة حس على روحك عاد البكدك هسه اقل شي خامس اعدادي .
- ما احبن الدراسة هي كوة .. ما اودنها يا خوية.
- محد يحب التعب و القراية بس غير مستقبلك هاذ خوما تدل هيج سايب
- الله كريم
- الحجي وياك ضايع .
جاي يحجي كام مروان من عنده ما يحب يسمع اخذ الطوبة وطلع يلعب بيها بالشارع ويلعبها على رجله . انتجى على سيارته مامون و هو كاض كتابه يقرأ ، صفت سيارة .. عاين عليها ولنها سيارة تمار .
- اهلااااااا
تمار : يااااا هلا بيك شلونك
تباوسوا وسلموا على بعض : شني ما شني اليوم هنا ؟
تمار : اي والله اجيت على المشروع الكلت الك عليه .
- الدنيا عصر يا خوية ، تفضل تفضل
- لا والله انا حطيت ابالي ااجر غرفة فندق واكعد بيها .. فترة الأجي بيها ليجاي .
- صدك جذب تأجر وديوان ابوي عامر بعلي عيب عليك ومرت الاخرى لو عدتها تصير مو خوش ها .
- هههههه اصيل والله
- كل الهلا .
سلم عليه مروان و دخلوا جوا و بلغ امه .. خاطر تجهز العشا .. بنفس العصرية مرت عليهم نوسة ، من الباب ابنها صرخ وفات للبيت وهي ادك الباب بضحك .. دخلت كبل للدوانية و صاحت : هااااا ولكم
نوسة : ولني الاكي الزلمه جدامي دنج راسه وما رفعه .. حطيت اعلى وجهي و كضيت ذيالي و شيله عبود .. اجا وراي مروان : وعلي انت مسودنه هو هيج اليدخل
- جا غير تكلولي عدكم خطار بالعباس تفشلت جا هسه شيكول عني
اجا هدية : هلا بيج يمه
كامت باوستها : الله جابج عاونيني بالعشا
- اي اطيني شسويلج .
- اسلكي التمنات على ما مروان يروح يجيبلنا دجيجة من السوك .
كمت ذبيت عباتي و توزرت .. طلعت جدر حميت بي الماي و اطيت التمن لامي تلكطه و كعدت اكلي الحشوا .. لحد ما سويت العشا كله وامي بس كاضة ابني .
صبوا السفرة وانا مدري شمالني شو بكلبي طفكة اريدن اروح اعاينله و اشوفنه .. بس لا عيب شيكول علي شني ما تستحي، لا يمه انا مرة عدي ولد اي جلمه زايدة علي ينعاب بيها وليدي بكبره ، خل اجفي روحي واكعد اخيرلي .
رجعوا الأكل من السفرة وصبينا .. انا وامي و كعدنا بالمطبخ ناكل و نسولف .. عزلت الي جدرين من الاكل وحطيتهن وراي ، حجت امي : المن هاذ عازلته لابوج الشفية ؟
- لا يمه الي جا شني اجي هنا اشتغل وما اخذ حكي انا مرة اشتغل بحك .. مالج حك عليه اخذ واطلع لا تظلمين بختي .
- ام السانين كولي ماخذته لابوي لا ادولبينه بلسانج
- يمه شفت الفخذ هاذ وتضكرت ابوي خطية ياكله لحيمة ، ما نكدر نشتري الدجاج وناكله اجيبن مرات رجلين وروس اطبخهن بس مو مثل الفخذ .
-بالعافية، شلونه وياج هو ؟
- ساعاته براحاته
- بعده يسكر
- لا وين المكيريد يرد من الشغل تعبان ينام بس كوره وي ابني كل طكه يطكه .. اعلى ساعة اكولن يشك راسه
- ابعدي ابنج عنه
- يمه ابني لوكي جيف ماكو احد عدنا يروح ليه خاطر يلاعبه و ابوي يطكه .. اجرنه وهاي تكضي شسوي .
- حجت وياج جدتج جارتنا خطبتج لأبنها بس تكول بلايا فر*خ نريدها خالية.
- عشتوا اهد ابني خاطر اجابل ابنها شني مسودنه لو ما عدي عقل .
- انا هم كلت لامي هجي .
جاي نحجي اجا مأمون و هو يكول : يابه سوو درب الولد يريد يفوت للحمام .
لفت ربطتها امي وانا جريت عباتي صعدتها لمتوني وعدلت ربطتي .. فات هو مدنج .. ظليت اعاين وراه طوله حلو .. وعطره من مر صار بخشمي .
وامي تكله : فوت خالة فوت لا تستحي .
تمار : دايمة ان شالله .
وطلع من المطبخ ، حجت امي : هو موش هاذ الرادج يو غيره .
- اي هو ، ما تعرفين خطب عرس بهالسنة ونص بعد ما وصلتنا اخبارة
صاحت امي على مروان ونشدته كال الها : لا بعده ما معرس بس رايد يشتغل ابغداد .
رد مر وكعد بالدوانية يم الولد ، انا كمت لملميت البيت لامي ومسحته وغسلت المواعين وكتلها : يله يمه هم ياله اروحن ابوي غاد الاكي بلايا عشا .
شالت فلوس و حطتهن بيدي : خلي ذني حدر ايدج
- لا يمه يطيج العافية عدي خير من الله
- جا ادري عدج بس اخذيهن وجمعيهن للعازة وانت بتي اعرفنج مدبرة .
- اي والله يمه جاي اجمع واشتري مكياج هلبت اتعلم شغل المكياج بالبيت واشتغله للنسوان هواي يجني ويطلبن مني امكيجهن وانا ما اعرف .
- انا اشتريه الج اذا اجا سرحان اخذنج و نروح نزور الإمام الكاظم و مناك اشكال والوان واشتري .
- الله يحفظج احبيبة عسى الله لا يحرمني منج .
- هلا بيج بنيتي، ولك مرووووووان ، تعال زت اخيتك لبيتها يمه .
طلعت للحوش لكيت تمار طالع و مأمون واكف وياه بالباب، امي وصت مروان علي، شال ابني على جتافه وانا درت ليها الولحلها بيدي خاطر اطي كفاي لتمار استحيت اديرن وجهي يو اعاين عليه و تصد عيني بعينه هسه شيكول عنه اخفيفة وتتبصبص .
حجه مأمون : نوسة اصعدي اوصلج
- لا يطيك العافية خوية البيت قريب نتمشاله .
- جا خوش
طلع فلوس من محفظته و خله بيد ابني الشايله مروان حبه و كال لمروان : توصلها لباب البيت مو براس الفرع .. خوش
- هو طبعا جا اعوفنها بنص الدرب .
- يلا بالسلامة .
مشت هي ومروان واندار تمار يسأل مأمون : علاقتكم اخوة .. زينه .
مأمون : نويسة رويحة حلال عساك بس تنخاها تلمك لم وعاشت ويانا فترة ناكل ونشرب .. شلون ما نخاويها .
- شعجب محد منكم خطبها
ضحك مأمون : اخطبها شني جا غير اختي .. لا تحسب ابالك .. انا لو ما احسبنها مثل اختي جذب الكه مرة مثلها ، بس البيناتنا خوة الله شاهد .
- جا ليش عايشة لوحدة ليش مو وياكم
- مو وحدها ابوها اسير حرب و رد و عقلة مو تمام اهله ذبو بالشارع ، جابت ابوها و كامت تشتغل و تعيشه وتعيش ابنها
- يعني شايلة مسؤليتهم خطية .
- هالبنية قصتها قصة كبىت كبل اوانها .. خذوها ال ثجيل وزوجوها وهي ب٩ سنين
وبقى يسرد بقصة نوسة على تمار .. وتمار يستمع بأمعان .
ثاني يوم من الصبح ياسر اجا للبيت ، وهم غدة و جيب وودي ، فهدية ودت على خواتها بطة ونهاد يعاوننها بالشغل .
طبت بطة، مامون اغتاض من طبت
طب وراها وحاجه امه : يمه طلعه للحوش ما اريدن ولد كاعدين وفاتحين الباب و ياريت يخلص الغدا كبل الصلاة خاطر يأذن نصلي نمد السفرة .
- ابشر يمه
بطة : شتريدين اسويلج هسه بيمن ابدي ؟
هدية : شنكي العجين على ما اركب التمن .
بطة : فكيت المعجنه و جريت صينيه لوثتها طحين و كعدت اشنك و بالي كله بدوانيتهم واكولن : هم يمر ياسر و اشوفه؟
خلت العجين كله و كتلها : اخبزة ؟
- تكدرين ؟.
- اي لعد ليش شنو ما خابزة .
شلت الصينية و خذيتها جوا ، كالت هدوة : لالة لا خل نطلعه .. الجو حار مو مالت تخبزين بترك تحتركين ما تكدرين
شلنا التنور و طلعته برا ووكفت اطرك واخبز ، ما احس الا اصوت اجاني من ورا : شلونج هنودة
التفتت ياسر وراي ، تبسمت : هلا بيك شلونك
- مشتاكلج هواي .
تبسمت وانا اطرك بالخبزة ، طلع مأمون : ياسر البيت بيه بنات و مؤيد ما يرضى خواته ينشافن لا تحطني بموقف وياه .. اذا ما بيها زحمة اكعد بالدوانية .
تنهد و يمشي عني .. شكد حقدت عليه
كوا خوما كوا اني ما احب مأمون ، غصب لازم اترك ياسر وارضى بيه حتى يصير خوش .
دا اخبز .. دخلت نوسة للبيت : هلا شو هنا
باوستها : اي والله اجيت دا اساعد هدوة بشغلها خطار عدها خطية
- بعده ما راح
- ياهوه ؟
- تمار
- الاعرفه تمار وياسر هنا بعد راح بقى ما ادري بس ع الاكثر اثنينهم .
غمزتلي : شفتي ياسر
ضحكت : هو مأمون يخليني اشوفه اول كلمتين زرك ابلعومنا .
- حييل بعد ايدي ههههههههه
- عابتلج
- دميلي عنج خل اعاونج .
لفت عباتها وكعدت للصينية تطرك و تحط بالمخبازة واني الزكها و اطلع الخبز .. لحد ما خلصنا صفطة خبز هاكداتها ... جرت خبزة و هي تاكل : خبز امي ابيض طيب خو ما مثل اطحيني نصه نخاله .
- ههههههههه دطيني هاي المكسبة وياج ..
جرينا كرصة وكمنا ناكل بيها ونسولف، وكف علاوي وهو ياشرلي : ها حبيبي
- تعاي
جرته نوسة : احجي سرنا دافنينه سوا
طلع ورقة وهو كاض القلم و شاورني : هاي ياسر دزاها .
فتحتها كاتب ( ما تصدكين شكثر مشتاق لعيونج و لضحكة شفافج .. شوفتي الج هاي كفيلة تخليني اعيش سنين فرحان بس انا عدي خبر هو غامني كبل لا يغمج و يكدرج لابد التقيج و نسولف .. وياريت وكتها تتفهميني لإن انا انحطيت بموقف كلش مو زين اشرحه الج من الاكيج .. محد يحبج بكثر والعباس ابو فاضل اعشكنج يبطة )
فرحت بهاي الرسالة حيل .. جريت القلم من علاوي وركضت جوا شكيت ورقة من الدفتر ونوسه تعاين وياي : ايييي خل اكتب
- اي دخل اتعلم ترا انا كديشه عدي كلب يحب بس ما عدي ابسان يصفط حجي حلو .. اعرف اهوبز والغي .
- اي لعد اني الاعرف .. شكتبله هسه ؟
هدية : نوووووووسة .. ببببببببطة .
نوسة : ها يمه
- جايات تعاونني يمه لو تكرصن جوا .. خل نفض الغدا ياله بنياتي .
تراكضنا لهدوة عاوناها وصبينا الغدا ومسحنا البيت ، و كعدنا جوا على ما يرجعون الاكل ، لزمت القلم واني حايرة شكتبله
- كتبيله انا هم كلش هواي مشتاكتلك
- يا عزا عيب اكتبله هشكل
- جا مو تحبينه
- اي بس مو اكتبله هيجي واذب روحي .. شكتب هسه
- اكتبي تجري الدموع من العيون للي غابوا عن العيون
- اكلج ما تفكين فدوة خليني افكر
- جا اكتبي يا غائبي الذي غاب كثيرا طيح الله حظك كثيرا
- ياااااااا هههههههه والله سوالفج سوالف مروان بس تصنفون .
- جا غير جلي اساعدج على الأكدر عليه .
- اسمعي راح اكتبله ( وانا كذلك كما قلت ...... قاطعنني
- انهجم بيتج يم الفصحى دكتبيله جلفي دكتبي
- ايييي معليج
كتبتله ( وانا ايضا كذلك ، لكن لا استطيع رؤيتك كون مأمون لا يقبل بذلك ومراقب جيدا للوضع لا اعلم ما يريد مني لكنه تصرفاته تضايقني جدا، انا على وشك الذهاب الى البيت اعتذر ان لم اقدر على اللقاء وارجوا كتابة ما تريد القول به فانا متلهفة لسماع ما يشغل بالك ومقلقك و قد اصابني من الفضول الكثير )
نوسة : يععععع ختب باع الفصحى يمااااي
- عابتلج هسه انت حاطة راسج وياي
- لا بس والله حلو دزي
جاي اطبك بالورقه صاحت هدوة : تعالن تغدن يمه .
ركضنا للمطبخ اشرت لعلاوي ونوسة وهدوة يحطن بالاكل ، خليتها بيده وهمستله : وصلها ولا تخلي احد يشوفك .
مأمون لمحها من دنكت لعلي تشاوره ، طلع منها يركض .. صاح مأمون : عليييييي
انتبهتله بطة ، انكمش كلبها ساعة الشافت مأمون صاح لعلي ، كرب علاوي لمأمون : البيدك شني هاي ؟
- ماكو شي
- علييييي اطني
- والله اني معليه
خذه الرسالة من عنده وكضاه من اذنه : مرت الاخرى اذا صرت مرسةل لأحد اكل لابوي عليك وتعرف ابوي شيسوي .
- لا والله بعد ما اعيدها معليه
- امشي يلا فوت يم الولد لا تكاعد البنات عييييب .
مشى منه و هو محتقن ، صاحت عليه هدوة : شمالك يمه ويا اخيك ؟
- هيج يمه من اشوفنه غلط لابد اعلمه خوما اخليه مستمر بغلطه .
- بس بهداي اعليه ييمه تعرفه مدلل
- لا تخافين عليه .
دار لنوسة و صاحلها : انت تعرفين ببطة
- شبيها
- لا تغشمين روحج
- ترا ما بيها شي لو حبته شني حرام
- اي تروح لبيت ابوها وتتمعشك مو ابيت ابوي ، نبهيها الرسالة صارت عدي وما يهمني اعرف محتواها ولا راح افتحها بس لو انعاد الامر الرسالة احطها بيد مؤيد .
- يا شبيك مأمون تسودنت
- كليلها هيج وبس .
- بس لا تكول عليك العباس والله خطية جا مؤيد لو دره ما يرحمها .
اشرلها امشي و حط الرسالة بجيبه و دخل للغرفة ، راحت لبطة تتهامس وياها ، صاحت هدوة : شنهي السالفة تاكلن لو تتهامسن .
- اي يمه جاي ناكل .
توهن جاي يتغدن و لن سرحان تصف سيارته ، فزت هدوة جن طفل ناطر ابوه .. دخلت بساع جوا غيرت ثوبها ومضمضت حلكها .. هو دخل للديوان يسلم على الولد ، ركضله علاوي طاير گلبه يحبحب بيه و بديه وفرحان بابوه اجا .
غسلت وجهه هدوة ونشفت ولفت ربطتها .. وهو بعده يسلم على الولد ويحبحب بعلاوي ويطلع له الكرزات من جيبه ويطيه اله .
اعاين لأمي وكفت وهي تحك سنونها بديرم وتنتظره يدخل ، تبسمت .. اعلى الفرحة الوضحت برسومها ساعة الأجه .
دخل علينا للبيت ، حجا : كواكم الله بويه .
تلكته هدوة : هلا ومية هلا .. هلا بطولك ، شعجب اجيت عسه ولا اعلى بالي .
كرب منها حبها بكصتها و هو يكللها : شلونج شلون الصحة الوضع شلونه .
- يبعد كلبي و طوايف اهلي بخير ناكصتنا شوفتك
- الله يخليج .. عدي سالفة واجيت ليجاي بس ياسر يمتى اجا
- الصبح
- تفاجئت لكيته كدامي ، شلونج بويه نويسة شلون علومج .
- بخير عمي الله يطيك العافية
- ابيج شلونه وياج ؟
- زينه
- زين يو زوين
- الحمد لله اعلى كل حال عمي جا بعد ابو الزين و الزوين اذبنه ؟
- لا والله يا بعد عمج اصيله ان احبن البت الشاطرة مثلج ومدبرة امرها .. وعلي تسويلج الف شارب عدي .
ضحكت : الله يحفظك عمي ويخليك خيمة فوك روسنا .
- هلا بيج بويه
هدية : جويعان يبعد كلبي اصبلك أغدي ؟
- والله هو انا جوعان بس مستلك .. حضريلي دشداشة خفيفة خلنس اسبح وبعدها جهزيلي الغدا .
- من عيوني
صاحت علي امي احضر الغدا اله وهي ركضت تحضرله الحمام و ظلت لاهيه وياه ، كربت من عندي بطة : اكلج نوسة هسه شلون ؟
- شني شلون هدي شوي
- بس الرسالة بيد مأمون
-لا تخافين جا مامون ما ينخاف منه ابو كلب الطيب
- قصدج ابو الضمايم .. الوجه يضحك وبكلبه الف ضمه ضامرها للناس .. ترا ميحب احد
- يعابي عدوج عليش تحجين عليه ترا شوفي انا ما ارضى انت خالتي وبحسبة اختي و هو اخيي ما احبن اسمع احجاية مو زينه عليه
سكتت ومشت عني بس مغتاضة حيل ، طبت صبا و هي تكلها : امي تكول يلا تعاي كبل لا يجي مؤيد و يسويها هوسة
- كليلها بعدها هدوة محتاجتني روحي .
- مؤيد ميقبل
- روحي انت ومؤيد دروووحي
نوسة : ارجعي عليش تعرضين روحج للشينة وتنطكين
- بس اريد اعرف شنو اللي يريد يكوله ياسر الفضول كتلني عيونه من شفتهن يحجن الف لغز ما فهمت شبيه .
- واذا اجا مؤيد
- مدام سرحان هنا ما يخليه يصيح عليه .
جاي نحجي .. اجا عمي سرحان وهو يسولف ويا امي ، صفينا على كتر ، شالت الصينية امي و دنكت حطتها كدامه ، وهو يكللها : كابليني .
- لا الف عافية تونا جنه نتغده كبل لا تجي .
- ميخالف كابليني خل اتهنى بلكمتي .
كعدت امي وهي تكلي : اطركي اللبينه العمج يمه و ثلج من الترمز طلعي و حطي بيه .
سويته و خليته ، اجا مأمون و هو يكول : الجماعة تمددوا ، اي شلونك يابه شكو ماكو
- الأخبار جثيرة ، احجيلي اخباركم انتم .
-احنا بخير دامك بخير
- اخيك داوم يو لالة ؟
- بويه احجي وياه وما يفيد شسويله
- اكصبه و علي .. وينه هو
- مو وكتها الولد منا هسه اتركه ، اي شني ما شني .
- كالك ياسر لو لا ؟
- لا ما حجينا بس بشغلهم الجديد ، يريدوني ادخل وياهم و الصدك بويه انا ما هاوي .
- اذا تريد اطيك راس المال .. وادخل وياهم
- تعرفني ياسر ما اكابله مو ادور اشاركه
- وليمتها هالحال بويه
- الله كريم .. بس شني اليكلي بيه ياسر ما كلت .
- عمتك ليلى خطبت اختك وردة لياسر .
بعدة توا نطك .. بطة جانت واكقة وتترس بالكلاص ، زلكت الدولكه من ايدها كلها و تبدى الماي، عاينوا ليها عرفوا شمالها ، حجت : اااا اعتذر هسه امسحة .
تحجي وتوترت حيل واديها كامت ترجف ، تنهد مأمون و هو يكله : وياسر شنهو رايه ؟
سرحان : هو الخطبها .. هو وامه و انا اخذت الموافقة من البت جيت ابلغنكم انتم اخوتها وادانش الامر عكبها نرد الجواب .
ما كدرت بطة تمس ، اديها بادن و دموعها خاننها ، تركتهم و طبت جوا ، اندار مأمون لنوسه اشرلها اتروح وراها ..
لحكتها ، حجه مأمون : وشني هاذ بويه وتطي بنية
- تراه ابن عمك
- بس مو زلمه ولا هو كد كلمته .. شنو اختنا لاكينها بالشارع وننطيها اله .. لا هاويها ولا اله نية بيها واذا موافق بس خاطر يتقرب منك و يظل معلك بمضيفك .
- وهاذ الاريدنه انا
- والبنية
- البنية موافقة بويه وراضية بقسمتها .. عليش اخلي الولد يطلع عن طوري .
- وطلعتهم
- لو طلع طلعته ما تسرك معناها دموم بينك و بينه .
- اذا على هالموضوع ما اخليه يكرب لو على كص ركبتي .. مؤيد صديقي و شحده يوافق ارد اشوفه شلون يسبقني ويكوش اعلى رادتي .
- اسمع مأمون مثل ما بعدت ياسر انت ابعدك .. هدوة كاعدة نا اريد اغثنها وتحسب الحجي عليها الله شاهد معزة اهلها تعرفها بكلبي ، بس مالت بت متعاركين عليها لا تظن اخليك تكربها لو تنط دموم افتهمت لو لا ، واكلك الحجيته لياسر .. ساعة التنوي لو تحجي بخطبتها لا انا ابوك ولا انا اعرفك، تطلع من بيتي وانا بري منك .
- وليش هيج
- اي ما ارضى تاخذ بت اخوك عينه عليها لو هو ياخذها وانت نافسها ، انسوها ما اخليكم تكربون منها لو تطلع نخلة بروسكم .
- الله كريم بوية .
نوسة : على كيفج بهداي
- سمعتي شنو كال .. كال خطب بت سرحان ولج واني ليش .. ليش يسوي بيه هيج ليش يدزلي رسالة يكلي احبج و هو خاطب غيري .
كامت هدوة من مكانها و دخلت للحجرة : لمي روحج يمه ما يصير هجي تبجين سرحان منا عيب ، ما بيه خير لو بيه خير جا عافج و خطب مو يتلصلص و هو مكوش اعلى بت سرحان ، بس انا اعرف .. اكص ايدي من العرج لو ما جان هاذ شغل فخرية وليلى خاطر يحرمن اختي على خير ال ضاحي .. حسد عيشة الله يعدمهن عيشتهن بجزات دموعج هاي بجاه الامير علي.
طاحت بطة بحضن هدوة وهي تبجي وكل جسمها يرعش وهي تكللها : ليش سوا بيه هيج ، يعني راح يخطبها .
- خطبها مو راح يخطبها ، لا حاطلج كدر ولا راي .. الزلمه المثله ما يتأمن يهنودة هدي يروح فدوة لدموعج هالجايف هاذ .. والله لو ما سرحان هسه اطردنه من بيتي .
ظلت تبجي ، مر سرحان خاطر يغسل على المغسلة ، اشرتلها هدوة : اشششش حسي ادموعج ياله
- لا ما اكدر اريد اروح لبيتنا
- البسي عباتج و هل علاوي يزتج .
دخل سرحان و هو يكول : هااااه
هدوة : تعال يبعد كلبي نام انت دايخ عمت عيني ، ارتاح ارتاح .
مشى للقريوله و بطة ونوسة طلعن من الغرفة كلها ، رادت تطلع هدوة ، كال الها : خليج يمي يهدوة .
- رادتلك يبعد عمري ، هسه اجيك .
لبست العباية بطة ورادت تطلع ، هدوة صاحت بنوسة : امشي وياها يمه و ديري بالج عليها لا تخلين مؤيد يهيسها .
- اي يمه
رادت تطلع من البيت وكف مأمون و هو يكللها : دموعج هاي ما يستحقها وما اشوفنها اموتن ولج وعلي ما يستحقها .
بطة : وخر عني
- كلت الج والله ما يحبج ولا يهمه امرج تزعلين تبجين ، هو حط عينه عليج جيف انا ردتج .. دموعج هاي ما اتحملها
دفعته و هي تكله : كله منك يا حقير والله كله منك هو خطبني وانت الوكفت وعرضت بيها .. الله لا ينطيك ... وخر مني .
دفعته و هدوة طلعت على الصوت ، ونوسه تبعتها .. ركضت وراها للبيت .. ياسر كعد على صوتها ، فز وطلع : شني شكو .
تكربله مأمون : ولك اذا انت زلمه صدك اطلع وياي وخلنا نتواجه انا رااااايد اشرب من دمك
كضاه من اهدومه حيل .
ركضتله هدوة وتمار كضاه : هاه هاه شمالكم
ياسر : اذا انت رايد تشرب من دمي .. انا بودي اشوفن دمك اذبحك بيدي
وواحد كضا الاخر وهدوة وتمار يفاكوون بيناتهم .. طلع مأمون من البيت و هو يكله : ما اكتلك ابيتي بس اذا زلمه اطلع وخلنا نتواجه خنثه .
ياسر سمعه و انهد على مأمون بوكسيات طيحاه مأمون للكاع وركب فوكاه .. ظلوا يتكاتلون و تمار يفاكك بيناتهم الى ان جر ياسر من عده و صعداه بالسيارة
توه شحطها طلع سرحان ، شاف مأمون محتقن دمه .. مروان جان طالع ويا الفريق يلعب طوبة .. كرب من عنده سرحان : انت ما تستحي على روحك توني انا اوصي بيه .
مأمون محتقن واعصاب نار ... سبه بلا وعي و هو يكول : انعل والديه هالسرسري هااااذ وعلي بس يكرب اسسسسسسسحكه .
ويا ما حجاها سرحه طكه راشدي : تنعل ياهو ولك ... تنعل عمك .
جرته هدوة و هي تكله : بروح ابوك بهداي وياه سرحان .
هداه مأمون و كض سيارته و شحطها من الباب ..
جان مملي غضب و هو يصيح : كله منه السرسري اكضك لو لااااا الا بعلي الا اسحكك .. حطيت روحك بوسطي جاااايف لو لاك جا هي مرتي هساه لولاك جا كلشي ماشي اعلى مرامي . انت الحطيت روحك بدربي الا اشعلك شعل والعباس ، لاخليك باليوم تموت الف موته .
أيمان : شبيه بس كليلي عمه ليش هشكل تبجي .
نوسة ؛ هيج وحدها عمه هي هناك تضايكت و بجت .
ايمان: اي ليش تبجين هيج يا ماما غير اعرف شبيج مو مردتي كلبي .
- ماما جان يوعدني يجي يخطبني تالي خطب بت سرحان
- هذا منو ؟
-ياسر ماما ياسر
تحجي وهي تشهك بحضنها
حجت نوسة : عمه الصدك هي تحبه و جانت متأمله يخطبها و هو الطايح الحظ دوم من يشوفها يكتبلها عريضة بحبها .. لحد ما عمي سرحان اليوم حجه اثاري خاطب بت سرحان
- يطبه الف مرض وتبجين من وراه يبطة لويش ماما ، دنشفي دموعج ليروح يجي اخوج و يشك بيج يذبحج والله
- خل يذبحني شنو عيشتي اني كليلي شنو عيشتي يطكني مؤيد اشتغلت داريت اخواني نمت عاي عيشة والقران مليت صار الموت امنية ماما امنية
نوسة : اييي عاد لا تجيبين اسمي الهيبة ما اسمحلج .
تبسمت ايمان و هي تحضن بتها وتحاول تهديها .
رجع ياسر للبيت هو وتمار : والله الرجعة مو بصالحك
- لازم اكللها .. لازم احجي وياها
- اي شتحجي وياها انت راح تخطب بعد شلون تقبل بيك .
- انا رايد اخذلها بيت هنا ابغداد و اعيشها بيه يرضون لو ما يرضون تمار انا عاشكها بت اريدنها
- ومأمون يريدها
- هاذ اذبحه و ما يبرد دمي
- ياخي شلون تاخذها وانت هاطب مسودن انت
- مستعد انطي المهر لو ابيع ورث ابوي كله
- درد العقلك فدوه و اتركها يعني تتوقع سرحان راح يرضالك تخطب على بته .
- مثل ما رضى يخطب على عمتي فخرية وبرضاته اهلها وحط وحدة غاد ووحد ببغداد .
- انت جلي تقارن روحك بشيخ السلف لا انت بكده ولا يحقلك تعمل وياه هجي ، بكل بساطة يجليك ينعل سلفاك تحجي صدك ويامن حاط راسك وجاي تقلد .
- انا ما حاط راسي بس انا رايدها
- عوفها لخاطر وعلي ما تفيدك
- بس ارجع يا خوية درجع رحمة لابيك .
دار السيارة و رجع ، طب مؤيد .. وهو يدخل للغرفة : يمه اكل جوعان
تفاجئ ببطة تبجي : شبيها بطة
فزت امه ؛ ما بيها شي جانت تغسل بالطرمة وتكهربت يمكن المبردة صايرة تكهرب .
- هسه اكل وافحصها ، تأذيها اخذها للمضمد
- لا لا ما يحتاج ، عوفها ترتاح
ندست بتها حتى تسكت واشرت لنوسه تجابلها ، وطلعت وهي تسويله اكل .
صف تمار سيارته و تانى وحدة من خواتها الزغار يطلعن مر على الدكان اخذ ورقة وقلم كتب بيها ( لازم اشوفج بطة واحجيلج كلشي اذا تكدرين بالليل من ينامون طلعي لازم احجي وياج ولازم تفهميني) .
صبا : انطيني خمس وعشرين عفية حباب
- بس خل اكل واروح اشتريلج
- لا اريد هسه اشتري مصاصة اني ولوله .. عفيه حبيبي
- اي بس خل اكل الدنيا ليل وين اطلعين
- بسرعة لام حميد اشتري وارجع والله مفتحه ما معزله ، عفية حباب
تبسم ، طلع فلوس من جيبه و انطاها ، حبته بخدها ورجعت تكوله : وبعد لوله
- دجيبي الخمسة وعشرين وهاج ١٠٠ دينار روحي اشتري انت ولالة ورجعيلي الخردة وخلصيني من السانج
- هيييييي
لبست نعالها وركضت للشارع اشترت مصاصتين ورجعت الباقي بيدها ، كضاها ياسر: نانه
- ها
دنك الها : هاي الورقة تنطيها لبطة ضروري توصليها
- شنو هايه
- معليج بس وصليها .
ركضت للبيت ، مشت لمؤيد انطته الباقي و الرسالة وياها ، سألها هاي شنو : ما بطة
فتحها .. قرأ الرسالة و هو تسودن ، دفر الاكل من كدامه وركض الها : ياهو هاذ الطالبج باللليل ولج ، احجيييييي تتواعدين من ورا ظهرييييييي .. كح******
جراها من راسها يرفس بيها ، تراكضت ليه كواغد و كل البالبيت و حاكم يصيح : شمالها
ومؤيدد يكله : مواعدة بتك بويه مواعدة .. ياهو هاذ ابيكلج تعاي باللليل حاجيني .
البيت اكتض صريخ و هو يرافس بيها كصبها كصب ما تعرف دمها منين كام يجري .. صرخت كواغد و عي تكل لعباس : امش صيح سرحان راح يموت البت اركضضضض
وهو كاضها بكل حيله يكتل بيها .. طلع عباس يركض ، مأمون توه طاب للبيت .. كاعد بالكراج ماله خلك يطب جوه و مروان بصفه يحاجي .
طب عباس وهو يصرخ : عمو سرحان وين مؤيد راح يموت بطة وينه .
مأمون ؛ يموتها شني
فز من مكانه وركض الهم ركض على جدامه دفع الباب و فات عبيه جراها من ايده وطاح عليه : هو هيج جااااايف وخر عنهاااا
دفعه عنها وكام يتلاوه وياه ومروان يجر بمأمون ، كام مؤيد وهو يصيح : اليوم اخليها تبيعة اختها اليوم .. ادفنج بصف جمااااااارة ولج هننننننننند
دفعه حيل مأمون و هو يصرخ : لك دميييييل .. تايهتلك وتدفنها .
- ولك رايدة تركبلي كروووون هاي ، تواعد من وراي .. كليلي ياهو الرايدج بالليل ، مواعدة ياهو .
- جاي اكلك وخر عنها مؤييييييد
- ما اهدها والله الا اعرف ياهو المواعدها ولك راح تخبلني .
مأمون : انا المواعدها ...اذا عدك حجي احجي وياي.....يتبع
☆☆☆☆☆
وجان يذب نفسه مأمون بنار ما حسب الها حساب ...
ونبلش قصته.. وناخذ رأيكم بأحداثها .
#زينب_ماجد