#كحل_عرب
(بيت بيوت )
((( بقلم زينب ماجد )))
الحلقة -11-
(رجوع الغائب)
متبدل بطبعة الوكت
لو احنة ، التبدلنة ؟
لــِ عريان السيد خلف||🖤
بطة تبجي جيف ابوها عافها وهدوة خلتها يم علاوي ومشت ، شافها ياسر : عليش تبجين
بطة : بابا راح واني اروح وياه
- اي شوي ويرد ، روحي العبي ويا الجهال
وسن : تعاي نلعب
-ما اريدن
ياسر : العبي غاد شوي ويجي ابوج
مشت وهي تتنغوص راحت كعدت يم راس مأمون وهو نايم : مأمووون مأموون
- اكعد عفية اخذني لابوي
- اييي
- اكعد يلا
- شتريدين اريد انام
- عفية والله راح ابجي
كعد عاين عليها : جا ما رحتي وياهم
- هدوة كالتلي ظلي هنا عينج على علاوي .
كعد من نومته حط راسه جوا الحنفيه و غسل راسه : ابوي وين ؟
وسن : بالمضيف
كام من مكانه وراد يطلع ، كال الها : ظلي هنا هسه اجي
راح لابو للمضيف اخذ منه فلوس واجا اخذها اشترالها ورجع كعدها يم علاوي و انطا مصاصة لعلاوي يمص بيها ..
شوي واجا سرحان رد من مضيفة وكت الغدا ، اخذ علاوي يحبحب بيه: عليش الولد هاذ مدبك
فخرية : جا غير مرتك هدته و مشت .
سرحان: جدتك وين
مامون : صلت ونامت ، بس انا وبطة كاعدين يمه .
كام سرحان غسل علاوي وكعداه يمه اعلى الغدا ويشيل من الثريد شواي ويحط بحلكه ، فخرية اغتاضت كلش الى ان طكتها : شنهي ابن الاميرة وهيج داير بالك عليه
التفت عليها : شمالج
- بتك هاي من اجيت ما شلتها
- موش كربت وحبيتهم كلهم
- كلهم شنهي بت هاي المفروض تعزها ازود وحدة .
- ما عدي فرك كلهم بزري
- من هاي اشوفنك مكابل هالفرخ تغسله وتوكله بيدك وذيج ما تدري عن داره .
- تغدي بويه واذكري الله .
مامون : بويه اخذه لامي
فخرية : ومنيلها امك انت الاخر شنهي غاسلة عكولكم ، ابوك صايرلها مربية لولدها وانت تصيح امي يااااع
سرحان : انت شمالج تسودنتي اتزقنبي وبلايا حس ماصخ ، كمل بويه و صيح اعلى امك .
فخرية : سنين انا اداري وما غزر ويا بزرك .
مامون : ابوي الكالنا صيحولها يمه .
- جا هو كله من ابوك
سرحان : اللهم طولج ياروح ، خلص بويه غداك وروح انت وياسر اخذو بت حاكم و هالولد خلوه عد امه ، وحس ما اريد اسمع بعد .
الكل سكت بس صوت الخواشيك بالصحون تنسمع ، ليما خلص سرحان، شال علاوي وياه غسلاله و رد بيه للغرفة ، مامون بعده ياكل .. تمدد : اذا خلصتي سويلي استكان جاي .
كامت من اكلها و الغرفة هدوء بس صوت المبردة والمروحة و هم يتغدون سكته
حط ابنه على ايده يطبطب عليه ... غفى الجاهل .
طبت وشافت الولد غافي على ايده وهو مغمض عيونه ، حجت بحس عالي : هااااااذ جايك
فز : شمالج بويه جفلتيني ما تشوفين الولد نايم .
- انا اريد اعرف شنهي اول ولد ؟ عليش كاتل روحك عليه
- ولج انت عليش تتحيونين الفرخ زغير وامه مامش ، جا ابني يو ابن الجيران
- بزرك و هم زغار عدي ما فد يوم كربت ليهم لو وكلتهم بيدك ، واذا اعلى الزغير بتي هاي ازغر منه عليش عايفها و كاض بهاذ .
- اهيييييي يالطلابة الما تفض ، اكول فاركي راسي دايخ فاركي
اخذ الجاي ونسوان زناد كامن يشيلن بالسفرة ، وهي خذت جهالها ومشت لغرفتها
بطة : ابوك صار عصبي
مأمون : اي بس تبجين يكتلج
- لا هو كالك اخذني لهناكه
- خب دروحي المطي لو طلع بهالحر يفطس
- لعد شوكت نروح
- العصر .
ظلوا كاعدين على التلفزيون الظهر يطلع برامج الاطفال يتورجون عليه .. وسرحان خلص جايه وتمدد بصف ابنه وغفى ، لشواي اندكت الباب .
فز سرحان وياسر كام بسرعة ، شاف الباب ، واحد من ال ثجيل جاي على سرحان ، رد ياسر : عمي يريدونك ع الباب .
- اي
كام من مجانه ، وحجه : هلا بويه تفضل
- دام فضلك شيخ لجن انا وداني الشيخ جاسم يكول خنجر وربعة الشقاوجية تربعوا بفاتحتنا و يتأمرون اعلى زلمنا
- وانا شنهي بويه شقاوجي يو ولي امرهم
- لا يكول انت الك جلمه اعلى خنجر ما نريد طلابة بفاتحة الشيخ سلطان والناس جاي تجبل ، ويكول خله يتفضل عشاه بالفاتحة و الشيخ طالبك .
- الله كريم ، كله لابو مصطفى ساعة وانا بالفاتحة .
طب للبيت سبح وريع روحه ولبس ملابس المشيخة وصاح : يااااسر
- امر عمي
- ما يامر عليك عدوي ، غير هديماتك بويه وامش وياي ، لا تظل عاكف بالبيت وليدي ، انا رايد الوادم تعرف عد ال مطر زلمه .. كوم وياي .
ليلى : عسنك سالم ويعلي اعلومك كوم يمه
خذته ومشت وهو يكللها : يمه عدي امتحان بكلوريا شني
- انعل ابو البكلوريا خايب خل الوادم تعرف انت ابن الشيخ زناد ... روح
- يا شيخ رحمة لوالديج ، تعذري لعمي وعلي استحي منه
- ولك كوم لا تخليني اطكك
كام لبس دشداشة ولف الغترة اعلى راسه ، وطلع ، لكا مامون صاعد و مكعد اخوه بحضنه بالصدر ، وبطة كاعدة ليورا ، وسرحان يسولف ويا زلم معكل ما بدربه .
ظل واكف .. عاين عليه سرحان : مامون بوية رد ليورا خل اخيك يكعد احذاي .
نزل مامون .. و تبسم ياسر
مأمون كتمها بكلبه وابالة تبسم لإن نزله ابوه ..
كعد وره بس مغتاض ، وبطة مخلصة الدرب ثرثرة ، ليما لخها على وجها و صاح : دكااااافي
سرحان : عليش اطكها بويه
- تحجي هواي
ظلت بطة تبجي ليما وصلاهم .. وكال : مامون الفرخ بحضن امه اتخليه ، لا تهده بيد ياهو الجان
ما رد مامون و دخل ، التفت سرحان و هو يحط ايده على جتف ياسر : يلا عمي
دش سرحان للفاتحة و يرشد ياسر شيسوي وشلون يسلم بس بسكوت بدون اشاير ، وكعداه يمه ، عاين ليغاد .. خنجر وربعه واكفين يم الجادر مالت الجاي ، كعد يمه الشيخ جاسم و هو يكله : كل هلا بيك شيخ زارتنا البركة
- البركة بيكم بوية اعلى راسب .
- انا رايد اتعذر منك اعلى سالفة امس ما تسوى، حجاية انا و المرة توسعت
سرحان : لا حشاك ابو مصطفى انا الاتعذر منك عبن هديت بلايا ما ادري بس السالفة وصلتني مشوشة ، وانت تعرف راديون وصية الوالد الله يرحمه و عزيزة علي واغتاض بغيضها .
- لا ان شاءالله احنه اهل وام احمد ولون عدها اغلاط لجن الها كدر عدي وانا اعزنها .
- المرة ضعيفة حال اتغلط وتميل و رجالها اليعدل المايله بالعكل و المسايس يابو مصطفى .
- الله كريم ، كل الهلا بيك .
- بالمهلي بوية
- انا وديت عليك اعلى ذولة الشقاوات يابو مامون ما رايدين نبتلش وياهم واهم يزمخون اعلى ولدنا ويامرونهم و الولد اغتاضت وانت الك جلمة اعلى وحيد بيهم .
- ان شاءالله سهلة .
شواي وكام ليغاد : خنجر
- هلا ابو مامون
- دشتك فاتحة سلطان شنهي اسبابها
- مامش ناكل ونطلع
- علي انا هالحجي يخنجر
- محسن رايد جمارة شنهي رايدني اسكت
- اي لا ذاك هو روح اجتله جا شعدك واكف يمي ، ليمتها خوية تحل مشكلتك بفتك اكبر من الفتك الاول
- جا اهدنه ليما ينهي اعليها
- وان جتلته انحلت ؟ يو اهلها اطوها الك ، خاف ربك و خله يوفكك .. عاين حالك الشيب ترس راسك وانت لا بيت يلمك ولا حالك مثل الخلك .
-انا راضي بهاذ وضعي ٥ مرات اخطبها وما يطوها جا شسوي بعد
- اعلى هاي تصرفتك وخاواتك ياهو اليطيك مرة خوية انت مسودن ؟ انا اخيك شغليتك بمعملي سنة وحدة وبطلتك موش مالت شغل خوية ، عدل حالك ليمتها تظل بهالحال .
- من اخذها يستعدل حالي
- لا ما يستعدل البت تدرس طب كل كتاب بذاك السعر يشترونه اهلها يبيعون ثيابهم والعدهم و الما عدهم خاطر يوفرولها التدرسه .. يو صارت عدك تكدر خوية تدبر لكمة عيشها .
- الرايدة مني شنهو
- الاريدنه تاخذ هالمخربطين ذول و تجفينا طلايب ال ثجيل ياله
- ويو خذتهم انا شمستفاد
- التريده شنهو
- اسبقهم و اخطبلي البت من ابوها خاطر وانا مستعد شتريد اسوي ويو رديت خل يردون بجلمتهم
- اهلها ما موافكين
- اتكفلني عده انت الك خاطر يمه .
- اتكفلك واتفاشل يخنجر
- اتبرى مني و طكني بنعالك يو فشليتك
- عز الله كدرك يخوي لجن انا ..... قاطعة
- سويها وساندني يسرحان البت اريدنها وعلي مستعد مو بس كتبها كلشي اجيبلها بس خل يطوها ، اخيك جاي يموت وانا اشوفن ذول الكواوي*** يشبوبشون اعليها .
- الله كريم اخذها جلمة مني احجيلك ويا حاكم ، بس انسحب واسحب ربعك .
حط اصبعين بحلكه و صوفر الهم ، عاينوا عليه: يالربع ياله امشونا
ظل يتأفأف سرحان : بالله هاي حركة تسويها جدام الفاتحة .. تصوفر
- عوينة ابيهم
- سب اهلي واحد واحد يو اطوها الك اعلى صفيرك هاذ .
ضحك خنجر .. وسرحان يهز براسه ما يريد يتبسم جدام الفاتحة .
.....
حمدان : انت بعكلك تدنج راسك لسرحان
جاسم : الزلمه صار نسيبي وانا مالي بعد بطلايب ابوي الله يرحمه ... ومن الاصل وديت عليه خاطر يسحب ذول من الفاتحة الا شناطر نبتلش ونسويها دم بفاتحة ابونا .
- اخ كون الي كدرة و اكتص من سرحان ، عدالك ذولة الشقاوات من حالهم جايين .. تلاكي هو الحطهم بفاتحتنا خاطر يفضحنا ويخرب عزانا
- الزلمه شوفة عينك سحبهم
- اي جا هو الامرهم يجون و هو الكال الهم يطلعون الا عاين يتامرون بامرك يو بامر شيخ غير سرحان
- خنجر كريب سرحان وهم ربع خنجر .. فكنا
- ظل بشورك هاذ .. هدانا الولي و ظلت الواوية ادش مضايفنا من امثال سرحان و ربعه .
- راح تخليني اهدن خنجر وربعه و اندار اعليك
حمود : شجاكم منا الفاتحة صدك جذب جا هسه وكتها
رد سرحان كعد وياسر يحاجي : عمي عليش تلوم خنجر حكة من جنت انا اول متوسط وهو عاشكها وانا شاهد اعلى عشكهم ... ولهساه هو منتظر .
- شفايدة منتظر يوليدي وهو ما محرك ساكنه ... العشك موش حجايات تصفهن يبوي وتصيح انا عاشك ، لا العشك ينرادله افعال ، لو من ذاك الوكت لهالوكت معدل امره ومشتغل وكاد ، جا تغير حاله و فتحله بيت وخله الف واحد يتمنى يطيه بته .. موش موسد التربان ويكول انا عاشك .
- وعمي لو انا عشكت بت ، راح تصف وياي
- انت وليدي و اربات ايدي ، اعشك اليتمناها كلبك و خلها اعلى عمك يجيبها الك .
- وعد ؟
تبسم سرحان ودك اعلى جتفه : وعد يبعد عمك .
مامون يعاين من ابعيد
ابوه جن ناسي عده ولد جبير وحاسب ابن زناد هو جبيره .
......
هدية : احاجيج راديون
- كولي ديه
- خايبة انت موش رجلج صار شيخ ال ثجيل دعاونيني ... بتي ظاله بلا والي عد عمامها مدكة وابوي كل ما حجه وياهم تكاوموا
راديون : والله يا ديه هو بس بالاسم رجلي انا لا الي حجاية وياه ولا اكرب منه
- دجربي لخاطري وعلي حالي اعليها يصعب اعلى الكافر
- تحاجين اعلى جويات الضنى يهدوة اهو اكو اعز منهم
- لا والله يدية وانا حالي حال بلاعة الموس لا تبلعه ولا تكدر تطلعه ... انا لا اكدر احجي عبن رجلي شيخ و كل حجاية مني ينعاب بيها ، ولا اكدر اسكت واهلي كوام ويا بيت ناصر .
- احاجيه ان شاءالله .
عد ما صار العشا ...
وجاسم وكف برا وديت احمد كتله : كله امي تريدك .
راح صاحه ، واجاني يحجي وحجايته من اطراف خشمه : هااا شرايدة
- ردت احاجيك اعلى بت هدوة
- هدوة ياهي
- مرت سرحان اخوي موش بتها عد بيت ناصر والمسيجينه سايكين عليها هلبت تحج وياهم وتخلي البت تروح ويا امها .
- الشان شان بيت ناصر انت ياهو مالتج اتحطين روحج
- شمالك وياي حجاية حجيتها شنهي ابتليت .
- لا تبتلين خلصي عشاج و امشي لبيتج اخلص الفاتحة واجي .
- اي بس اسعى بيها البت مالها احد ابيت ناصر خلها ترد لامها
- انا احجي كردي ؟ موش جاي اكلج مالج غرض
- وعليش تحاجيني من اطراف خشمك .. احممممد البس انعالك يمه خل نمش الكعدة بهاللبيت تكصر العمر ما تلاكي من وحيدة حجاية خير
كضاها من زندها : امشي جدامي
خذاها اعلى صفحة: مرت الاخرى يو عليتي حسج و حجيتي حجايات اكبر منج ما تلومين الا روحج
- طكني مثل سواية امس ياله ... يا حيف اعلى الدنيا البدلت جسام بيك .. ما جان يصيحني الا رويدا وما يو كضني هالكضه هاي مو يطكني بس شكولن اعلى الدنيا .
جريت ايدي منه وانا عيوني مجمرات غيض مدمعات ، استهضمت واهيس النار شبت بصدري ، هو طلع من البيت مغتاض
شفت نسوانه متشفيات ساعة الشافني طلعت من عده هاذ حالي ، ونجمة ما كصرت بالفاتحة كل التكضه و تكله ؛ دشيت عليها مرة واشوفنها حالة هالشعر جدامه و هو خوف من الوادم ننفضح خذاها .. عبنها ما كعدت راحة .
لو ردت احاجيها واردنها كدام الناس تكبر وتصير اسمي علج بحلوك الوادم ، والناس تاخذ السالفة الشينة تصدكها حتى يو جانت غلط ، المهم حجاية شر .
رديت بالليل لبيتي ، بس كلش الدنيا طالعة من عيني نومت جهالي و دموعي هماله ، اقارن روحي صح جنت بعيشة ضيكة ويا جسام لجن حجاياته وعشكه الي ما يخلن بخاطري هم ... الاوي همومي بعشكه الي واتكوى بيه ... هساه راح وخلاني الاوي بروحي وما الي احد عكبه .
.. انا مسركة الباب عبن محد بالبيت والحرامية هواي اليسطون اعلى البيوت .. خلص الفاتحة اجا يفتح الباب ما نفتح دكها ، انا صاحية ، لبست شيلتي ، حسيت دموعي و فتحتها .
عاين بوجهي : جنتي تبجين
- لا مرتاحة و الخير غاط ليجاي عليش ابجي .
- احاجيج
- تصبح على خير
هديته ورحت نمت بفراشي ... دش نزع ملابسه وراح سبح و غير وارتاح وانا بدموعي ، مر من عدي هيس انا جاي ابجي ، دنج و كمبص يمي : راديون
ما رديت : غير اعرف شنهو البيج خاطر اعرف شسوي
- انت كف نسوانك وامك عني ولا اسوي شي غيره
- شمالهن
ظليت اجرن بخشمي النفس وما اردن ...
تنهد: كومي احجي وياج
- مالي خلك احاجي احد
- يعني زعلتي من كضة ايد
- لا زعلت ولا رايدة ازعل هدني بحالي وفكني .
- زين كومي سويلي عشا وعلي جوعان من الصبح ليجاي لكمة ما حاط بحلكي .
فزيت من فراشي وانداريتله : اكلك انت عليش تهد الفاتحة و البيت ونسوانك و تجي ليجاي
- هوسة والبيت مكتض نسوان وانا اعلى فرد وكفه من الصبح لليل شنهي مستكثرة علي ارتاحلي شواي .
كمت من مجاني سويتله العشا وحطيته اله بالغرفة ، صاحني ما حجيت وياه هديته ورحت لفراشي .
ثاني يوم انا كاعدة يم هدوة ، دش هو يسلم على نسوان كبار و شاف هدية : شلونج ام علي شلون احوالج
هدية : هلا بيك خوية الحمد لله الله يحفظك .
- الحال شلونه غاد ابغداد
- خير و نعمة
- ام احمد انت وام علي شوية .
كمت انا وهدوة وطلعنا للكراج ، وكفت وهو يحاجي هدوة : انا ام احمد حاجتني امس بسالفة البت ، اخذيها عدج ولو احد حاجاج كليله الشيخ جاسم هو الكالي اخذيها وخلي السالفة يمي .
هدية : يطيك العافية كون بجاه ابو فاضل روح كون الله يرزكك ويوفكك يا خوية اعلى هالفرحة هاي .
- هلا بيج خوية ، تامرين انت وام احمد .
حجاها واندار يطلع
تسودنن نسوانه .. و الحجي عدل وكبل لعمتهن
وهدية تحضن براديون : وعلي ما اعرف اشلون اجازيج ، اهيس كلبي يريد يطلع من مجانه
كواغد : هلبت هالشيخ هاذ يهدي ال ثجيل ويغير حالهم مبين خوش زلمه
راديون : والله يعمه كلهم واحد
- لا يعمه موش كلهم واحد واصابعج موش سوا كولي انت الكافلة كلبج و عكلج ما يفكر .
- شفكر عمه
- صالي ٣ ايام بالفاتحة وتورجت وشفتج يعمه ما بيج خير ، الزلمه خوش و بيتج وحدج و البكلبج بكلبج واسعد روحي واغيضن اليكرهني عليش مخلية الحجي عليج اكوام .
- كلبي مل يعمه حتى السعادة ما اريدنها .. العزيز وراح
- لا ما يصير .. الزلمه موش اعز من الضنا ووحيدي راح ما وكفت وتجيت روحي وكمت وكديت وعشت ، الدنيا تريد الكوي يعمه و الحزن يلاوي بنادم ليما يطيحه .. وشماتج هواي يبت العزيز .
- وابادل جسام
- هاي الدنيا عمه
- لا عمه مو هاي وانا كلبي عشكه حشى يعشك ثاني لو اطي روحي لغيره وانسعد وياه . لو ما جهالي وعلي لاكتل روحي والحكنه
- جا زينية هاي يعمه ما اكللك اله اكعدي ويا روحج وداوري امرج المضى ما يعود و دنيانا ينرادلها حيل .
ظلت كواغد تنصح براديون هلبت تغير من اطباعها وتسعد روحها .. بس راديون عبس ... ما ينفع وياها شي .. كلبها حجارة صار عكب ما جسام انتحر كبال عينها . لا تود احد ولا تاخذ حجاية احد و طبايعها موش اول .
لجن الفايدة بطبايع راديون .. هي رجعة بت هدوة لامها ... ما وسعتها الدنيا لا هي ولا بتها وحدة تحضن بالاخرى وادموعهن بعيونهن يلالن فرح .
ظلوا بالسماوة ٥ ايام و قرر حاكم يرد وراه شغل بس سرحان راح يظل هنا .. بس ودع عايلته يردها وياه ..
:- اخذهم وياك وخلهم عدك هالفترة
- اي لا ما اخليهم يروحون للبيت ، ابيتي تظل
- انا جنت رايد احاجيك لجن انت استعجلت الرجعة
- والله وراي شغل ما اكدر اظلن ، بس اسمعنك شنهي حجايتك
- لا خلها عود من ارد غاد احاجيك
- كولها ما عدي شي كاعد ليما يكضن امرهن .
- انا حاجاني خنجر بسالفة ورايد احاجيك بيها
- اذا جانت السالفة خطبة لا تحج بيها يبو مامون
- الزلمه رايدها و صاله سنين ناطر توافكون
- انصحه يشوف بت الحلال التناسبه ، انا بناتي بعد لو يعنسن عدي ما اطيهن لواحد من السلف كافي الضيم الشافته هدوة من فليح اروحن اورط جميرة بواحد مثل خنجر يا ابو مامون .
- الزلمه يتعدل حاله وانا اكفلنه
- لا تتفاشل وتكفله .. من شب على شيء شاب عليه وخنجر شاب اعلى الخاوات والسكر و العربدة وصعب يتعدل تالي هالعمر وبتي صغيرة لا هي بعمره ولا بكدره والصدك تعبان عليها يابو مامون اكصر من بيتي واطيها ومرات بالعباس تصل اتريك جاي وخبز في سبيل الفلس البجيبي اوفرنه الكتبها وتريدني اطيها .. كله لا ينطر .
- والله ما ادري شكللك
- لا تكلي ، وروح كله لا يعاود ويخطب بت ماله عدي .
الفهمه سرحان من حجيه .. السماوات لو طبكن اعلى الكاع حاكم ما يطي بته لخنجر ..
رد حاكم و سرحان بلغ خنجر
بس ما رضى وكاله : اظل وراها لو اعرف يكتلني الشيب والبت تعنس ، لا اخليها تاخء ولا انا اخذ غيرها
- بس انت يا خوية جاي تضيع روحك
- انا خلصت عمري ضايع ما يهم لو ضعت زايد .
- خنجر اسمعها مني ياخوية وخل اخطبلك بت واستقر ، هد جمرة لحالها .
- عكب هالسنين كلها اهدنها شمالك مسودن
- اي يا خوية تهد ، انت معلك روحك باوهام ما تصير
- ربك ما يضيع عده شي وانا حاطه يم الله
- بسكرك يا خوية ادور من الله توفيجة
- جا الله بس لليصلون ؟ انا حاطها يمه يريد يردني واليستجابلي ظلت يم رحمته .
- والنعم بالله .
مر اعلى وفاة سلطان شهرين
هدوة ردت بتها عدها و مرتاحه ابيتها
حاكم انتقل البيتهم الجديد براس الركن بفرع بيت سرحان خاطر يظل قريب على بته ومنها بيت واسع واعلى كد فليساتهم.
هد.شغلة بالمعمل وباع السيارتين الطتهن الدولة لاولاد الشهيد من نسوانه لالة وابنها .. و بنات يسرى .. واشترى سيارة حمل جبيرة يطلع بيها محافظات ، واردها اقوى من شغل المعمل وان جانه تعب وتبيات برا البيت ، بس عايلته زادت، وحملة زاد بدراسة بته طب ، ما جان يظن هالكثر مصاريف ، شكثر ما تحاول تقلل على اهلها .. مصاريف دراستها تزين الراس .
اضطرت كواغد تعاونه خاطر تشيل عنه تتفق ويا اخوها صلاح يوديلها حليب جاموس غاد بفلس ونص ، وتجي تسوي روبه والناس تشتري منها بالفرع ..
واشترتلها دبات غاز و حطتهن بالكراج ، الناس تجي تبدل دباتها الفارغة عدها وتطيها فلوس ومن يجي حاكم تطيهن اله بسيارته يحطهن و يترسهن بزهد .. و تشتغل ابيتها احسن ما تظل كاعدة و الزلمة مبتلي بعيشتهم .
من بعد الشهرين وولادة الاء بت ايمان و حاكم
اكتشفت ايمان انه هي حامل على اربعين بتها .. تسودنت ساعة العرفت تبجي وتلطم و تكل لحاكم : تعبت اريد اذبه انا كتلك بعد والله ما بيه حيل .. ما اريده
- نعمة ربج تذبينها شمالج مسودنه انت
- لا اريد نعمة ولا اريد كلشي اكلك تعبت سهر و بجي وغسل ورضاعة .. مليت والله تعبت ظهري سكط صار .
- جا بعد.صار شتسوين احمد ربج لا تتكبرين اعلى نعمته .
ظلت ايمان ابالها تذبه ..
ما خلت شي ما سوته .. تشيل الدبة غاز وتركض وما يفيد .. تصعد على الكومدي وتطفر وما يفيد ..
كامت تشتغل ليل نهار خاطر ينزل ويطيح وما فاد .. چلب الجاهل فرد تچليبه ابطنها .
وكواغد تصيح : جا انت تفرشين روحج وتصيحين لحكولي حبلت .. لمي نفسج
ايمان : انا بيدي وما كطعت .. حاكم وراي اخلص ولكم والله تعبت من السهر والبحي والجهال والخلفة تعبت .
هدية : دكولي ياله شمالج لا تسكطين روحج يمعودة ، ما تريدينه ، جيبي واطينياه وعلي اكيف .
- اخذي والله بس اجيبه اطي الج ، ولج تعبت فهموني تعبت .. نعمة الله اني ما دافرتها بس تعبت .
- اكلج روحي دكتورة هلبت تشوفلج حل وتكطعين الخلفة جا ليمتها تظلين تخلفين
- هو اني بيدي يا هدية غير ابوج ما يرضى كل ما احاجي يكلي اكعدي واسكتي لا تلعبين بروحج .
كواغد : سوي عملية بجيابتج هاي واعقدي
هدية : يا يمه غير يتسودن ابوي ما تعرفينه يموت على الخلفة شكثر ما يصبر عده يفرح .
- اي هو قابل مرضع سهران ويا احد مكابل احد رد من شغله لف راسه ونام هاذ شغله ابوج .
كواغد : يا جا شتريدين يلوليلهم يو يرضعهم انت شو ما تعرفين تسولفين
- يمه المرة متضايكة هديها .
كاعدين عصرية ونسولف اسوالف نسوان وما نهيس الا الباب تندك : ابو ستار
كامت امي ولنهم بيت عمي ابو محسن من السماوة متعنين و جايين ومحسن وياهم ، تلكتهم امي بالهلا و المرحبا
وودينا اعلى دجيجات ذبحناهن وسوينا عشى ، نشدوا اعلى ابوي كلنالهم : بالشغل باجر غبشة يجي
جمارة ما طلعت الهم ولا شافتهم .. ظلت كاعدة فوك كارصة روحها .
ليما صار الليل و الكهرباء تطفى و الجوا لساه حار ، فرشنالهم فوك و صعدوا خاطر ينامون ولن عمي يشوف جمارة : ولج انت عليش ما تنزلين تسلمين
- عمي جنت اقرا
- يا قراية هاي والكهرباء مطفية طايحة الحظ ، كومي سلمي .
كمت من مكاني سلمت ، محسن واكف احذاه مد ايده ، ما اطيت ايدي وكلتله : هلا محسن و تعديتهم ومشيت لغرفة لالة ولونها حارة وظلمه و تكتل ولا اجابل عمامي ، غمه على هيج عمام ولا اطيكنهم .
كلها نامت بالسطح ، احنه سطحين سط اول وسطح طابق ثاني ... الزلم فرشنالها فوك كلش و النسوان بالسطح الاول نامن وانا حابسة روحي بهالغرفة ومتزوهرة .
شوي واهيس احد يمش بالغرفة ، حجيت : ياهو
ماكو رد ، ظليت مركزة ليما هيست ايد انحطت على بطني فزيت بساع : يااااهو انت
محسن : شمالج فزيتي رايد احجي وياك
- وخر مني ما اريدن احجي
- حسج لا تعلينه ، اسمعي
- ما اريد اسمع كوم مني
- انت ليش هيج ناهرتني
- ما اريدك زور لو كوا هي
- بس انا احبنج وعلي الشهور المرت من يوم وفاة الشيخ سلطان و لليوم وانا بس افكر بيج .
- وياهو الكايلك فكر .. هدني واطلع من الحجرة
احجي واعاين بظلام .. كلشي ما اشوف غير خيال كوه يتراولي .
كرب ايده و كال : خليني احجي البكلبي الاول ...
بعدت ايده عني و كمت : دميل شني انت ما تستحي ادش اعلى غرفة بت كول متصلخة متكشفه ، شنو كلش ماكو مستحى
- انا رايدج بالحلال
- الحلال اليجي منك ما اريدنه
دفعني للحايط و ضك روحه وياي : جا ياهو البالج و ما تريدينه كليلي
- ميل لا اصيحن وعلي هسه الم الدنيا كلها عليك مييييل
- انا مصدك كاضج ولج وعلي علشكج الليل كله اتخايلك
- لإنك فاسد ميييل
دفعته عني ، و صحت : يييييييمه .
حط ايده على حلكي ويسحب بيه اذا حاولتي تصيحين وتكعدين احد والله اسوي بيج الما ينحجي
كمت اجر بوجهي من ايده اريد اوخر ، لزك روحه بيا .. كمت باظافري ازلغ ايده حيل خاطر تفك من حلكي ، وي ما زلت ايده وانا عضيته حيل ، وبعدت روحي ، تفلت عليه بالظلمه ما ادري وين اجت ..
وطلعت من الغرفة كلبي يرجف
كل حيلي يهتز .. عاينت ادور بعيوني اعلى فراش امي ، شفتها ليغاد نايمه ، صفيت يمها ونمت ، فزت هي : اسم الله يمه شمالج تلهثين .
- خفت احجي وامي تسويلها هوسة بهالليل ما ادري شصم حلكي ، بس كربت روحي منها
- شمالج
- شصرة طبت بثوبي من نزلت اشرب ماي وشاغت روحي خفت
- ورجيفج هاذ من شصرة عمت عين كون هديتي حيلي حسبالي مدري شجرى وياج
دارت عني ونامت وانا حطيت راسي يم راسها ونمت بكترها .. للصبح كعدت ، على حس ابن هدوة يبجي وهي نايمة ، شلته عنها ونزلت بيه غسلتله و سويتله اكله الفرخ ... نزلت هدوة وراي
- ها عمت عيني جا ليش ما كعدتيني كطعتي نومتج
- شفتج نايمه ما هونت بيج تكعدين
- اسوي الجاي كبل لا يكعدون
- هدوة
- ها ديه
- كربي
- خير ولج خوفتيني
- الليل كله ما عرفت طعم النوم
- عليش ؟
- محسن هاذ الطايح حظه تعدى عليه امس بالليل
صفكت وجهي : دهر صابج وشسوالج
- شردت منه بالليل ما كدر يسويلي شي بس انا ما اعرف ليش خايفة وعلي جسمي يرعش من ذيج الساعة ولهسه .
- شلون جا احنا وين عنج ووصل ليج الحقير
- اظنه جان مراقبكم من نمتو كرب للغرفة واجا
- اليوم انعل والديه وعلي
- لا اصبري ، ما يصير تكولين
- وليش يمه نسكتله
- جا اذا حجيتي شراح يفرك شانطر يخطبوني الله ويسترون فعلته هو رايدني وانا ما اريدن كلشي يكربني منه
- خايبة من كل عقلج انت غير اشهره اليوم شنهي يسترج جاي ابيتنا وماكل زادنا و يدوس عرضنا .. ههي
-، هدوة لا تخطين خطوة ما حاسبتها ..
- نكعد امي
- امي تكوم الدنيا وتكعدها غير
- جا شني نسكت
- انا خايفة ، شوفي ايدي
اعاين لاديتها ترعش ، خذيتها بحضني شو هاي بجت : يا ولج جميرة هاذ ينزل دوعج خب غير اشعل عشيرته وعلي .
هديتها و كمت صعدت الها للطابق الثاني ودفرته برجلي و دنكت ليه : كوم يالخايس يالما عدك مستحى
فز عمي : ها ولج
كام هو
- كض ابنك عمي لا والعباس يجي ابوي واخلي يحط الجيلة براسه ، بت ما رايدتك شنهي وزتك وياها
كام عمي :- يواشج ولج غير اعرف السالفة
- السالفة يسولفها الك هالاغم هاذ ، فرشناكم بيننا وطعمناكم زادنا تالي ابنك يدوس اعلى اعراضنا ، ايالخايس ... صبرك علي بس يجي ابوي .
حجيت هالحجايتين وابوه تسودن ، نزلت امي فازه من نومتها عيونها موسعتهن توها كاعدة مت عيني وتلف بشيلتها : شمالج هدوة يمه
- ماكو شي يمه ، بس يجي ابوي وانا اعرف شعمل
والله وابن الحلال بذكره ، سمعت الباب انطبكت ما الكراج واركض للستاره اعاين للبيت واشوفن ابوي دش للبيت ، و جمارة تلكته حضنته .
حاكم : ها جمرة بوية شمالج
- مشتاكتلك
- جا شمالهن عيونج مدمعات بويه
-، لا بويه تعبت من القراية وعيوني تعبانات حيل
- عوينة ابو القراية التتعب عيونج هديهن بوية
نزلتله : ها الله يساعدك بويه
- هلا بام علاوي
حضنته .. عاين هكو سترة بالهول مالت زلمه : ياهو الهنا
نزلت امي وانا جاوبته : بيت عمي ابو محسن .
سلمت عليه امي والكل بدا ينزل ، و سوينا ريوك ولمينا البيت ، و حجه عمي : والله يابو ستار كعدته اعلى رفسات هدوة مدري شمالها متسودنه من الصبح
حاكم : ام علي ترافس كول غيرها هاي العاكله .
هدية : لابويه سويته واذا رايد اكلك ياهو الداس بيتك وتعدى اعلى حرمتك ورفسته انا ما عدي مانع دام عمي ظكر السالفة وحجه بيها
حاكم : ياهو التعدى اعلى بيتي شنهي الحجي
ابو محسن : والله الولد هاذ ويكول نايم ما اعرف بالسالفة شنهي .. وتناوشتنا رفسات
هدية :- كله حاجي شعدك تمر للغرفة اعلى جمارة نص الليل وتصم بحلكها شرايد منها
فز ابوي من مجانه : شنهي الحجي يهديوة
هدية : والله بويه هاي بتك وانشدها ... اذا انا مجذبه
محسن : لا مار ولا واصل يم احد لا تذبن بلاجن علي ، هاي واحنا خطاركم هيج مالكم كدر للخطار
جمارة : عليش تجذب ها لو عدك ذرة مستحى ما تسوي السويته وانا بت عمك
صرخ حاكم : السالفة شنهيييييي فهموني
امي جرت جمارة و عمي كام ، كاله : الظاهر مالنا كدر
جره ابوي : ابنك شعامل
محسن : والله عمي انا البت رايدها على سنة الله ورسوبة وجاي تتبلى علي خاطر ما اخطبنها
جمارة : انا اتبلى عليك ولك يالاغم شوف التزلغ بيدك اذا انا جذابه ... عليك الله بويه عاين ايده .
بس حجتها جمارة البيت صار هوسه ، وحاكم فز لمحسن وابو صار كبالة : طلع اديك ولك
ابو محسن : ماله داعي نطلع من البيت وما نظل
- اكلك طلع ايدك
جر ايده من وره ابوه وسحبها .. معصم ايده مزلغ تزلغ ... وابوي تسودن تلاوه وياهم و هد على محسن كضاه نام بزردومه
نريد نخلص الولد من ادين ابوي ، نجر بيه نريد ، حيله بعشر زلم ما ينجر ... وهو يصيح : ايمان جيبيلي المسدس بالكومدييييي ايماااان
كامت تصرخ امه وابوه يتلاوه ويا ابوي بس يريد يفكه ، وايمان راحت قفلت باب الغرفة حتى لا يطب ابوي وياخذ المسدس
فز ابوي للغرفة خاطر يجيب اسلاحه وذوله طلعوا من بيتنا يجرون بأبنهم ... شافعم ابوي طلعوا وهو يدفر بالباب وينعل بايمان تفتح الباب يريد سلاحة
ايمان : لا تورط روحك حاااااكم خله يولي
- ولج فتحي بت الكلبببببب فتحيييييي
عاف الباب ولحكهم امي صكت الباب وكالتله : ولو حاكم هدهم
- ميلي عنييييي
- لا تلحكهم حاااااكم
طلع وراهم ماكو
رد وهو يغلط ويشتم بيهن وكلب البيت فوك حدر
انا من الصياح ابني تعارض ، خذيت جهالي ورحت لبيت خفت من ابوي وصياحة
توني كعدت اخذ نفس ، اندك التليفون كمت ليه ولنه سرحان
- الو
- الو ها يهدوة شمالج
- هيج سالفة جنت اركض
- عليش ، هكو شي بيج شي
- لا يبعد اهلي ما بيه شي ، خير كول
- والله يا هدوة مدري شكلج
- ما بعد بيه هبطات وعلي
- فليح رد من الاسر وجابوه هسه لهله ... يتبع
☆☆☆☆☆
#زينب_ماجد