Chapter 35 (part 1): ဆိုးသွမ်းတဲ့ခွေးလေးအဖြစ်ကနေ မင်းသားလေးအဖြစ်ကိုပြောင်းလဲသွားခြင်း
ချက်ချင်းပြန်ပိတ်သွားတဲ့ကားတံခါးကိုကြည့်ရင်း
ကျောက်နင်း အံ့အားသင့်သွားလေတယ်။ လုချန်ဟဲကဘာဖြစ်သွားတာလဲ? သူ့အမြင်ကပြဿနာရှိနေတာတော့မဖြစ်နိုင်လေဘူး.. ဘာကြောင့်လဲဆိုတော့ သူလုချန်ဟဲရဲ့ကိုယ်သင်းနံ့ကို အဝေးကြီးမှာကတည်းကအနံ့ခံမိပြီးသားဖြစ်တယ်။ ဒါ့အပြင် ကားကသူပုံမှန်သုံးနေကျကားမဟုတ်ပေမယ့် ဒီကားကလည်းသူတို့အိမ်ကကားပဲဖြစ်လေတယ်။ကျောက်နင်း ကားတံခါးအနားမှာလှည့်ပတ်လျှောက်နေရင်း ပြန်အလှည့်မှာတော့ သူလျှောက်ထားခဲ့တဲ့ ရွှံ့တွေအပြည့်နဲ့ ခြေရာတွေကိုတွေ့လိုက်ရတော့တယ်။ အဲဒီ့အချိန်ကြမှ ကျောက်နင်းနားလည်သွားခဲ့ပြီး သူ့မျက်နှာတစ်ခုလုံးကမှုန်မှိုင်းသွားလေတယ်။
လုချန်ဟဲ နောက်တစ်ကြိမ် ကားတံခါးကို ပြန်ဖွင့်လိုက်တဲ့အချိန်မှာတော့ ပူတင်းလေးက ကားတံခါးပေါက်အနားမှာ ဆောင့်ကြောင့်ထိုင်နေပြီး သူ့ဆီကိုခုန်တက်မလာဘဲ အထင်သေးနေတဲ့အကြည့်တွေနဲ့ သူ့ကိုယ်သူကြည့်နေတာကိုတွေ့လိုက်ရတော့တယ်။ သူ့ရဲ့ပုံစံက အတော်လေးကို မကျေမနပ်ဖြစ်နေမှန်းသိသာနေလေတယ်။
အမေလုနဲ့အတူတူပါလာတဲ့အိမ်တော်ထိန်းကြီးက သူတို့ဆီကိုလျှောက်လာတယ်။
" သခင်လေး.."
လုချန်ဟဲက မြေကြီးပေါ်မှာထိုင်နေပြီး ဆိုးသွမ်းတဲ့ခွေးလေးပုံစံပေါက်နေတဲ့ ပူတင်းလေးကိုတစ်ချက်ကြည့်လိုက်ပြီး သူ့အနားကိုတိုးသွားလိုက်တော့တယ်။
" အဲဒီ့တော့ သူကအခုရုပ်ရှင်ရိုက်နေတာလား? "
အိမ်တော်ထိန်းကြီးက ခေါင်းငြိမ့်ပြလိုက်တယ်။
" ဟုတ်ပါတယ် သခင်လေး..
ဒီနှစ်ရက်ရဲ့ရိုက်ကူးရေးက ငလျင်လှုပ်သွားတဲ့အကြောင်းကိုရိုက်ကူးနေတာပါ.. ။ ဒီဇာတ်လမ်းမှာ ပူတင်းလေးရိုက်ကူးရမယ့်အခန်းကအများကြီးမပါပေမယ့်လည်း သူကအခုနကလေးတင်ပဲ သူသရုပ်ဆောင်ရမယ့်အခန်းအချို့ကိုရိုက်ကူးပြီးသွားပါပြီ.. ဒါပေမယ့်သူကနောက်လာမယ့်နှစ်ရက်မှာလည်း အရေးကြီးတဲ့ဇာတ်ဝင်ခန်းအချို့ ရိုက်ကူးဖို့ကျန်ပါသေးတယ်.."