نبض لا يهدأ ..❤(مكتملة)

❤البارت الثامن❤

❤ نبض ❤ لا ❤ يهدأ ....

في الكلية ..

يجلس إياس بابتسامة تعلو وجهه وهو يُمسك بيده كيس شيبس كبير يأكله بنهم واستمتاع .. وأمامه على الطاولة عدة أكياس أخری مُختلفة النكهات إضافة إلى مُسلّيات أخرى ومشروبات ..

بجانبه أصدقائه الذين يُشاركونه جلسته وطعامه وينظرون إليه بسخرية ..

أمسك إيهاب كيس شبيس يفتحه وبدأ بأكله هاتفاً وهو يلوك بفمه: اقفل بؤك ده وبلاش الإبتسامة السخيفة دي متعرفش مستنيك إيه ..

التفت إياس نحوه بملل ولم يُجبه ليهتف رائد بضحك وهو يُشاركهم الأكل: سيبه يا إيهاب حرام مش شايفه مبسوط متبوظش فرحته ..

هتفت شهد وهي تأكل غزل البنات: بس مقولتلناش يا إياس إزاي الباشا رضى عنك كده وأداك كل الفلوس دي ؟؟

سندس بابتسامة: قولتلكوا جواد مش زي م انتوا فاكرينه ..

إيهاب بسخرية: أه فعلاً والدليل الأكل اللي بناكله من فلوسه دلوقتي ..

رائد: لأ أنا جواد ده مبطيقهوش ومش هاكل من عنده حاجة ..

إياس: يبقى شيل كيس الشيبس ده من إيدك ..

رفع رائد حاجبيه بسخرية: أنت بتدافع عنه .. سمعت يا هوبا ده بدافع عنه ..

هز إيهاب رأسه بحسرة: من كام جنيه لعب بعقله أومال لو قاله كام كلمة حلوة هيعمل إيه وقتها !؟

رائد بضحك: ده هيسلّمله نفسه حالاً ..

شهق إيهاب هاتفاً: بقا كده يا إياس أخس مكنش العشم .. بتبيع نفسك بالساهل كده علشان الفلوس ..

رائد: عيب عليك يا إياس مكنتش فاكرك كده ..

إيهاب: متعرفش الناس غير لما تعاشرها يا رائد معلش بان على حقيقته ..

رائد: ده داخل على طمع ..

إيهاب بضحك: آه فلوس جواد كتيرة ..

رائد: وكلامه حلو وعسل ..

إيهاب: وحضنه دافي وحنين ..

رائد: م تديهولنا شوية يا إياس كام يوم بس نتمتّع زيك ..

هتف إياس بحنق محتدّاً: اخرس أنت وهو أنا الحق عليا اللي حكيتلكوا اللي حصل ..

شهد: خلاص يا إياس أنت عارفهم تافهين وفاكرين إن ده هزار .. وكفاية بقا أنت وهو عيب كده ..

سندس باندفاع: وعلى فكرة كل اللي قولتوه عليه صح .. وإياس برضه حس بده وبعدين أما يتقرب من جواد أكتر هيوصل لكلامي ويتأكد أنه صح ..

إياس بغضب: أنا مقولتش حااجة عشان تتريقوا كده .. حكيتلكوا اللي حصل معايا بعدين أنا مكنتش واعي وقولتلكوا اللي حسيت بيه .. بس الحق عليا من هنا ورايح هخرس خالص ..