အရောင်မဲ့ လွင်ပြင်(အေရာင္မဲ့ လြင္ျပင္)Completed

Chapter 1

Unicode

အချိန်ကား နေ့လည် ၁၂နာရီထိုးဖို့ ၁၅မိနစ်အလိုတွင်ဖြစ်သည်။ ရန်ကုန်မြို့ကြီး၏ စည်းကားလှသော နေရာတစ်ခုတွင် ပျားပန်းခပ်မျှ လှုပ်ရှားသွားလာနေသည့် သူတွေကို တွေ့ရသည်။ လမ်းမပေါ်တွင် ဥဒဟိုသွားလာနေသော ကားကြီးကားငယ်အသွယ်သွယ်တို့ကို တွေ့နိုင်သည်။ မှတ်တိုင်မှာ ခရီးသည် အတက်အဆင်း၊ အတင်အချလုပ်နေသော YBSများမှာလည်း မနည်းလှ။

"အပေါက်ဝမှာပဲပိတ်ရပ်မနေပါနဲ့ အထဲကိုတိုးပေးပါခင်ဗျာ"

ဒရိုင်ဘာမှ အဝင်ဝမှာတွင်ရပ်နေသူများကို လှမ်းပြောနေသည်။ တက်လာသည့် ခရီးသည်တစ်ယောက်သည် ပိုက်ဆံပုံးနားတွင်ရပ်ပြီး ချီတုံချတုံဖြစ်နေသည်။ သူ့လက်ထဲတွင်တော့ ၁၀၀၀ တန်တစ်ရွက်ကို ကိုင်ထားသည်။ ထိုအခါ ဒရိုင်ဘာမှ

"၂၀၀တန်အကြွေမပါရင် ဒီနားမှာ ခဏစောင့်ပြီး နောက်တက်လာတဲ့သူတွေဆီကလဲယူပါလား"

ဟုအကြံပေးလိုက်သည်။ မကြာခင်မှာပဲ ကားပေါ်သို့တစ်ယောက်ပြီးတစ်ယောက်တက်လာသည်။ ခုဏက တစ်ထောင်တန်ကိုင်ထားသော ကောင်လေးသည် နောက်တက်လာသော လူလေးယောက်ထံမှာ ၂၀၀တန်လေးရွက်ပြည့်သွားသဖြင့် ၁၀၀၀တန်ကို ပိုက်ဆံပုံးထဲသို့ ထည့်ပြီး ကားအတွင်းသို့ လှမ်းသွားတော့သည်။ မကြာမီမှာပဲ နောက်ထပ် YBSတစ်စီးထိုးရပ်လာသဖြင့် ကားလည်း စထွက်တော့သည်။

ထိုသို့ များပြားလှသော ကားအသွားအလာများအကြားတွင် ပွတ်ကာသီးကာ လမ်းဖြတ်ကူးနေကြသည့်သူများကိုလည်း အသည်းအေးဖွယ်တွေ့နိုင်သည်။ လမ်းကူသူများကလည်း လူကူးမျဥ်းကြားမှ မကူးကြ။ ကားများကလည်း လူကူးမျဥ်းကြားတွင် ရပ်ပေးရသည် ဆိုသည်ကို နားမလည်ကြတာလားမသိ။ လမ်းကူးသူတို့မှာ ကားများကြားမှ လှစ်ခနဲလှစ်ခနဲ ကူးသွားကြသည်။ ကားတို့သည်လည်း နည်းနည်းမှ အရှိန်မလျော့။ မြန်မာနိုင်ငံမှ လမ်းကူးသူများနှင့် flash man မည်သူက ပိုလျင်မြန်သလဲ ဆိုသော မေးခွန်းသည် အငြင်းပွားဖွယ် မေးခွန်းဖြစ်နိုင်သည်။

ထိုရှုပ်ထွေးလှသော လမ်းမကြီး၏ ဘေးတစ်ချက်တစ်ချက်တွင်တော့ ကားလမ်းမပေါ်ထိ အမိုးများရောက်လုနီးပါး ကျုးကျော်ရောင်းချနေသော လမ်းဘေးစျေးဆိုင်တန်းများကိုလည်းတွေ့နိုင်သည်။ မူလ လမ်းဘေးဆိုင်ခန်းများ၏ ရှေ့တွင် နေရာချ ရောင်းချနေခြင်းဖြစ်သည်။ ထို့ကြောင့် သူတို့စခန်းချထားသော ပလက်ဖောင်းထက်တွင် လမ်းလျှောက်ရမည့် အများပြည်သူများမှာ လမ်းလျှောက်ဖို့ အခွင့်မသာသဖြင့် ကားလမ်းမဘေးကနေ ကပ်ပြီးလျှောက်နေရသည်။ အန္တရာယ်များလိုက်ပါဘိ။ ထိုသို့ကပ်လျှောက်သူများထဲတွင်
"ချစ် ဒီဖက်ကိုလာ" ဆိုပြီး ကောင်လေးမှ ကောင်မလေးကို အတွင်းဖက်သို့ပို့ပြီး လျှောက်ခိုင်းသည့် စုံတွဲများကိုလည်း စိတ်ပျက်ဖွယ်မြင်တွေ့ရနိုင်သည်။