GROWLING HEARTS

55. BETRAYAL

TAISSA

Salamat sa Panginoon dahil kahit nasa bingit na ako ng kamatayan ay nailigtas pa rin ako ni Henry. Siya ang sumipa ng pinto at pumatay sa aso nila Aling Vicky. Mabuti na lang at may usapan pala kami bago ang Monster Party na susunduin niya ako sa bahay ni Shaina upang pumunta sa Yotik City. Naaalala ko na inutusan pala siya ng mga magulang niya na tignan ang branches ng Pharmacy nila doon.

Mag-iisang linggo na ako dito sa hospital at mukhang bumubuti naman ang kalagayan ko. Papagaling na din ang mga sugat na tinamo ko — ang tama ng shotgun at mga kagat ng aso. Nasuri na rin ako ng mga doktor kung nainfect ba ako ng virus na nakuha ni Maricel. Sa mabuting palad ay wala naman, gayon rin si Shaina na nagpapahinga sa kabilang kwarto ay okay na din. Ang tatag talaga ng babaeng iyon. Hindi siya sumuko ng basta-basta. Sabi ni Henry ay dumating na din ang mga magulang niya galing business trip at bumubuti na ang kalagayan nito. Mukhang na-trauma lang daw si Shaina kaya titigil muna siya sa pag-aaral. Napag-isipan din daw nilang dalhin si Shaina sa ibang lugar. Para siguro makalimutan ang mga nangyari.

Nagpapasalamat ako at sa kabilang banda ay nalulungkot din. Hindi kasi pinalad ang Pamilya Almigar — sina Mang Thomas, Maricel at Aling Vicky. Pagkatapos kasi na mailigtas kaming dalawa ni Shaina ay namatay din kaagad si Aling Vicky. Mahina na kasi ang katawan niya kaya hindi na niya siguro kinaya ang mga nangyari sa pamilya niya. Hindi ko mawaglit sa isip ko na naging mga biktima lang ang Pamilya Almigar. Hindi naman kasi magkakaganon ang pamilya nila kung hindi nakagat ng halimaw si Maricel. Kasalanan ito ng halimaw. Gagawin ko ang lahat para matigil na ito.

Nagising si Flex na kanina pa natutulog sa gilid ng higaan ko. Naramdaman niya ang paggalaw ko habang inaabot ang baso ng tubig kaya siya nagising. Agad niyang kinusot ang mga mata at tinanong ako kung ano ang kailangan ko.

"Tubig? Gusto mo?" tanong niya.

Ngumiti ako at nagsalita. "Sana, puwede bang paabot? Nauuhaw kasi ako." sabi ko.

"Sure, ito oh." inabot niya ang tubig at agad kong ininom ito.

Noong unang araw ko pa lang sa hospital ay dinalaw na kaagad ako ni Flex. Siya ang unang pumunta pagkatapos ng pamilya ko at ni Henry. Dumalaw na rin kahapon ang mga kaklase ko, sina Miss Melania pati sina Cormac at mga barkada niya. Sa kasalukuyan ay umuwi na muna sina Nanay at Tatay kasama ang tatlo kong kapatid, may pasok pa kasi sila bukas. Si Henry naman ay umuwi lang saglit at nangakong babalik din mamayang 10:00 PM. Alas otso y media pa lang kaya may isang oras at kalahati pa bago siya dumating.

"Ano pang gusto mo?" tanong ni Flex habang nakangiti. Kita sa mga mata niya na inaantok siya.

"Wala na Flex, matulog ka na at ang laki na ng eyebags mo." utos at biro ko sa kaniya.

"Haha, ikaw talaga Tais oh! Huwag mo akong alalahanin," sabay pakita ng kaliwang braso niya na akala niya maskulada. "I'm alive and kicking pa oh!" naging energetic siya bigla kaya nakakatawa siyang tignan.

Napatawa na lang ako sa reaksyon niya. Ito pa rin ang Flex na kilala ko. Mabuti at bumabalik na ang relasyon naming magkaibigan. Nakakagaan sa pakiramdam.

"Aw." inda ko ng biglang kumirot ang sugat ko sa braso. Mabilis na tumayo si Flex at tinignan kung napano ako.

"Anong masakit Tais?" nag-aalala niyang tanong. Nakakatawa ang mukha niya kapag nag-aalala.