Bata! Bata!
Bakit ka ginawa?
Sino ang gumawa?
Saan?
Sa gilid ng eskinitang iyo na ngayong tahanan?
Sa likod ng gusaling, iyong pinagkukublihan?
Sa tabi ba ng lansangan,na nagsisilbi mo nang palaruan?
Kailan?
At sa paanong paraan?
Pahiga—patayo?
Ikaw ba'y pinanindigan?
Paharap—patalikod?
Bakit ka tinalikuran?
Bata!Ikaw ba ang bunga ng pagnanasa?
Ginawa ka ba upang sa sarap sila magpakasasa?
Upang patahimikin ang nagwawala nilang sistema,
upang mapagbigyan ang tawag ng laman.
Ginawa sa mabilisang paraan.
Ni hindi inisip ang kalalabasan
Ni hindi alam ang kahihinatnan
Kung pagkatapos ng siyam na buwan
Ay may bubong na masisilungan
Kung sa paglabas mo ba sa sinapupunan
Ay may maiinit na yakap na mararamdaman
Kung sa bawat pagsikat ng araw sa silangan
Ay may kanin at ulam na pang-agahan
Bakit maaga?
Bakit ka ginawa?
Upang matugunan ang bisyo ng iyong ama?
Na habang nakikipaghabulan ka sa mga sasakyan sa kalsada
Wala nang pakialam kung mahagip at madisgras'ya
Ay siya namang pagpapakalunod niya sa alak at droga
Na habang pinipilit mo pang ihakbang ang namamanhid mong mga paa
Bitbit ang gula-gulanit na sako't mga basura,
Ay siya ring pagpapatirapa ng iyong ina sa harap ng kan'yang mga barkada.
Bata.Bakit ka ba ginawa?
Bakit hindi sila naawa.
Bakit ang pinagmulan mo'y kusa kang isinusuka?
Isinusumpa.
Itinatatwa.
Binabalewala.
Bakit ka ginawa?
Bakit ka pa ginawa?
Kung sa mga oras na ito'y hanap mo ang pagkalinga
Kung sa bawat minuto ay kumakalam ang iyong sikmura
Kung sa bawat segundo ay laman ka ng mga balita
Na isa kang kamalian ng binatilyo't dalaga
Na binuhay ka lang upang hindi sila tawaging laos ng mga ka-eskw'ela
Na nabuo ka sa matinding poot dahil sa pamilya
Na bunga ka lang ng pagkauhaw sa totoong pagsinta.
Bakit ka pa ginawa?
Binuo?
Kung ang una mong matitikman ay lupit ng mundo
Kung ang una mong masisilayan ay gulo
Kung ang tubig na iinumin mo'y galing sa poso't mula rin sa estero
Kung ang pagkain mo mula umaga hanggang gabi, ay daig pa ang rasyon ng preso.
Ano ang ginawang proseso?
Bakit mali ang konsepto?
Lahat ng dapat ay nagbago.
Nabago.
Naglaho.
Sa murang isipan ay tumimo
Na hindi lapis ang dapat hawakanbagkus ay kinakalawang na pako
Na ang paaralan ay para lang sa matatalino't may sentimo
Na normal lang ang gumawa ng krimen at manloko
Na imbes bola ang nilalaro, lantang gulay ang kailangang ilako
Ang mga kalaro—
Kotseng makintab, dyip at motorsiklo
Na kaunting galaw lang gasgas ang aabutin ng tuhod at siko
At kung mamalasi'y diretso na sa sementeryo.
Manlilimos ng piso–
Singko—
Pambili ng pagmamahal at respeto.
Sa mga taong nagdaraan sa kanto
Na imbes abutan ng tinapay kahit kapiraso, ay pandidirihan na parang isang aso
Pagiging inosente'y nabalot na ng mga milagro.
Bata.Bakit ka ba ginawa?
Bakit ka pa ginawa?
Bakit ninyo pa siya ginawa?
Gayong hahayaan lang ding dumanas nang labis na pagdurusa.
Bakit mo pa ginawa?
