Sea You Again [COMPLETED]

3. Not Too Bad

Natauhan na lang ulit siya nang batukan nang kaibigan, "Bes, nawala ka na."

"Ang sakit bes," sagot ni Sharla nang hawakan ang kanyang batok. "May naalala lang naman ako."

"'Wag ka. Wala kang ex. 'Wag ako."

"Ang harsh mo a," asik nito kay Beej.

"Alam ko na. Pero ang yummy nila 'no?"

Aminadong madaling humanga sa kaguwapuhan ng boys itong si Sharla. Pero kahit na ligawan pa siya ng mga ito, wala naman siyang sasagutin sa mga ito. Dahil para sa kanya wala pa ring tatalo kay Manzo. Ang dakilang bff nila ni Beej. Hot si Manzo para kay Sharla. Maganda ang katawan na dahil na rin siguro sa ilang taong paggi-gym. Tapos sobrang laki talaga ng transformation nito lalo na nang nagka-trabaho na. Akalain ba naman niyang ang nerdy na kaibigan noong elementary ay magta-transform nang gano'ng kalaki. Matangkad ito. Maputi ang halos walang pores na balat. Matangos ang ilong at singkit ang mga mata. Oo, lately na lang na-realize ni Sharla na na-fall na pala siya sa kaibigan. Kaya naman todo iwas ito rito. Takot na takot at baka raw mahalata ni Manzo. Alam ni Beej ang nararamdaman ng kaibigan at suportado raw nito ang kabaliwan niya. Kaso magkagalit ngayon sina Beej at Manzo na dahil lang naman sa isang simpleng bagay.

Sa katunayan, kasama sana si Manzo sa lakad na 'to kaso nga lang may iba raw itong lakad. Kaya 'yon nagtampo si Beej.

☼☼☼☼☼

Bago umalis papunta sa isla ng Kota Kita, nagkita muna sina Manzo at Sharla. Kinukuha na kasi nito ang hiniram niyang external drive na punong-puno ng downloaded movies. Wala siyang choice. Pinuntahan siya nito sa bahay.

"Sharlita, may manliligaw ka," asar sa kanya ng kuya niyang si Shai nang papasukin si Manzo sa kuwarto niya.

"Pota, kuya wala akong bra," asik nito sa kapatid. Napatakip na lang ito ng kamay sa bibig nang makitang nasa loob na ng kuwarto itong si Manzo. Totoong wala siyang bra dahil kagigising lang niya at manipis ang sleeveless shirt na suot. At isa pa sobrang kalat sa kuwarto niya dahil sa nag-aayos pa nga siya ng gamit na dadalhin sa beach escapade nila ni Beej sa Kota Kita.

"What the hell, Sharla? Magbihis ka nga," bungad nga ni Manzo rito nang makita ang kaibigan. Agad naman itong humarap sa nakabukas pa rin na pintuan.

"Tang ina 'to. Ikaw na nga 'yang basta-basta nanggugulat d'yan. 'Wag ka munang titingin."

"Asa pa. Not a chance. Bilisan mo nga, dali."

Hiyang-hiya ito sa sarili. Feeling niya, siya na ang pinakapangit na nilalang sa mata ni Manzo. Hindi niya nga alam kung may muta pa ba siya sa mata o kung may tuyong laway pa sa pisngi niya. Tapos hindi man lang siya nakapag-spray ng air fresherner sa makalat na kuwarto.

Nang masabi ni Manzo ang agenda ay nagtanong na ito about sa beach escapade ng dalawa.

"Naku, 'wag ka nang pumunta ro'n. Malakas daw ang alon d'on. Lampas 2 hours pa ang boat ride bago marating ang isla. Delikado 'yon."

"Para kang sira. E sinong kasama ni Beej? 'Tsaka wala pa akong gala this month. Batong-bato na ako dito sa bahay. Wala na rin akong ibang mayayaya at busy na ang mga tao ngayon."

"Tayo na lang," seryosong sabi ni Manzo sa kaibigan. Nakangiti pa ito sa kanya. 'Yung ngiting hindi nakalabas ang ngipin pero nakakapagpatigil ng mundo. Natigilan muna si Sharla dahil sa sinabi ng kaibigan at sandaling umasa. Napipi na rin ito at hindi na nakasagot.

"Tayo na lang! Tayo na lang ang mag-beach next week. Sasamahan kita."

"Hay naku, lalo lang magagalit sa 'yo si Beej. Sumama ka na nga lang samin."