Sea You Again [COMPLETED]

3. Not Too Bad

3. Not Too Bad

Kung may isang isla na gugustuhin ni Sharla na balik-balikan, iyon sana ang isla kung saan nila idinaos ang 25th birthday ni Beej. Maganda ang isla at hindi pa masyadong spoiled ang mahabang beach. Pino at kulay puting asukal ang buhangin nito. Mayaman sa coral ang dagat na taglay na yata ang lahat ng shades ng blue. Kaya naman nang unang araw nila rito, talaga namang sinabi nila sa sarili na hindi sila mahihiyang mag-tupis. Para mas ma-enjoy ng balat nila ang dagat at ang pinong buhangin. Saka sino ba namang makakakilala sa kanila rito?

Kulay itim ang sinuot ni Beej na tupis na may maliliit at madalang na print ng sunflower. Kahit si Sharla ay napa-wow na lang din sa kaibigan nang makita itong suot ang bagong swimsuit. Seksi ang kaibigan niya kaya naman muling nag-alinlangan si Sharla na isuot ang pulang tupis na pahiram pa sa kanya nito. "Bes, ba't ka ba mahihiya? Mas seksi ka kaya sa 'kin," sabi pa ni Beej sa kaibigan. "Mas may curves ka, look," dagdag pa nito nang titigan siya. Tumango lang si Sharla kahit sa totoo naman ay natatabaan pa siya sa sarili. Nalalakihan siya sa braso niya, natatabaan siya sa balakang niya, at lalo na sa mga hita niya. "Hindi nga bes, I'm being honest," sabi pa ni Beej nang makitang nakasimangot ang kaibigan na nagpasimangot din dito. "Mas makinis ka rin sa 'kin, ewan ko ba sa 'yo kung bakit hindi ka pa rin confident."

"Ese nemen bes, ako na yata ang pinaka-confident na merla sa islang ito dahil sa mga sinabi mo, sige na nga magbibihis na ako," sagot nito sa kaibigan at pagkatapos ay dali-dali nang dumiretso sa CR sa kuwarto nila. Unang-una, ayaw niyang sumisimangot din si Beej at baka magka-topak pa ito. Moody pa naman ito at iniisip niyang magbi-birthday na sa susunod na araw. As much as possible, gusto niyang maging perfect itong 'Beach Birthday Bash' nilang magkaibigan.

Confident ang dalawang dumiretso sa beach pagkatapos maglagay ng sunblock sa balat. Medyo malapit lang naman ito sa hotel nila. Nag-photo op muna sila na inabot ng halos kalahating oras bago sila tuluyang lumublob sa malamig na dagat.

"Bes, sa tingin mo malungkot ba ang dagat?" seryosong tanong ni Beej sa kaibigan.

"Bakit mo naman natanong 'yan?"

"Naisip ko lang," tipid nitong tugon at animo'y nakatitig sa kawalan.

"Hindi nga. Malungkot ka? Nag-eemote ka na naman?" Feeling ni Sharla, naiisip nito si Maxi, dahil tulad niya lagi niya itong naaalala sa dagat, lagi rin niya itong hinahanap-hanap sa dagat.

"Wala nga lang, bes. Random thought lang. Gano'n."

"Ah. Pero para sa akin kasi, masaya rin naman ang dagat. Kaya nga gustong-gusto ko sa beach, 'di ba. 'Pag nasa beach ako kahit mag-isa lang ako, parang sinasabi ng dagat na I can still be happy. Pero s'yempre, mas gusto ko ang ganito, na kasama ka."

"Ah kasi siguro malungkot ka rin, tapos malungkot din ang dagat, kaya 'pag lumalapit ka sa kanya, sumasaya siya at sumasaya ka rin. Negative plus negative equals positive."

"Hay naku bes, ang drama mo ngayon, naninibago ako. 'Wag kang ganyan."

"Sorry na. Is this what they called quarter-life crisis? Lately ang dami kong naiisip tapos most of them bother me, sadden me."

"Bes, ako rin naman. 5 years na ako sa work ko. Parang nagsasawa na ako. Pero alam mo naman na hindi ako pedeng umalis, 'di ba?"

Doon na lang umikot ang usapan ng dalawa habang nagbababad sa kulay turquoise na tubig. Kinalauna'y naisipan nilang puntahan ang kabilang bahagi ng beach kung saan mas malakas ang mga alon at maraming kalalakihang nagsu-surf. "Bes, baka and'yan na ang forever mo. Baka isa na sa kanila," biro pa ni Beej sa kaibigan. Tumawa lang si Sharla bago siya napatitig sa abs ng mga kalalakihang nagsu-surf. Ang guwapo naman ng mga nilalang na 'to, sabi ni Sharla sa sarili. Nagsisibalikan na kasi ang mga ito sa dalampasigan habang hawak ang kani-kanilang mga surfboard. May ilang Caucasian pero mas gusto pa rin ni Sharla ang Asian looks. 'Yung may Manzo looks.