Sea You Again [COMPLETED]

23. Stay Strong

Nang tumaob ang bangkang sinasakyan, ang unang bagay na naisip ni Sharla ay ang maligtas ang sarili. Hindi maalis sa kanya ang mag-panic. 'Yung tipong dapat ay makalapit agad siya sa bangka na unti-unting lumalayo sa kanya.

Pero nang mapagtanto niyang hindi naman siya lulubog sa dagat dahil sa yapos-yapos na life vest, saka na niya naisip si Kren. Sa kanilang lima, si Kren lamang ang walang suot na life vest. Doon siya labis na nabahala. Isinuot niya ang hawak na life vest. Nilingon niya ang paligid pero hindi niya talaga masipat ang binata. Si Bindi ang malapit sa kanya na hanggang ngayon ay nagpa-panic pa rin. Mabibingi na siya sa boses nito. Kaya naman kahit may suot itong lifevest, bahagya pa rin itong lumulubog sa tubig. Hindi ba't ikaw naman ang may gusto na mag-sail tayo na hindi kasama si Alvin? Iyon ang naglalaro sa kanyang isip, pero iba ang lumabas sa kanyang bibig, "Bindi, relax. May suot kang life vest." Lalo siyang hindi makapag-pokus dahil sa ingay nito.

Nakita niya si Beej na malapit sa nakataob na bangka. Malakas ang alon at maari itong mahampas ng bangka kaya malakas din ang boses niya itong tinawag. Agad naman siyang napansin nito kaya agad din niyang tinuro ang papalapit na bangka habang lumalangoy ito papalapit sa kaibigan.

Nang makalapit kay Beej, itinanong niya rito kung nakita ba nito ang dalawang binata. At tulad niya hindi pa rin daw nito nakikita ang dalawa. Dahil walang makitang bakas ng mga ito sa ibabaw ng tubig bukod sa mga nakalutang nilang mga gamit l, sinubukan niya ring ilubog ang sarili sa dagat. Mabuti na lamang at malinaw ang tubig kaya kahit papa'no ay may naaninaw siyang pigura ng isang lalaki na nasa ilalim ng tumaob na bangka. Agad siyang lumangoy papalapit doon.

Nang makarating na malapit sa humahampas na bangka, muli siyang sumlip sa ilalim para matukoy kung bakit hindi makaalis ang lalaki sa ilalim ng bangka. Nakita niya ang suot nitong lifevest kaya natukoy niyang ito si Manzo na agad niyang nilapitan. Nakita niya ang tali na bahagyang nakapulupot sa katawan nito at ang nakapikit na mukha ni Manzo. Tinulangan siya ni Beej na tanggalin ang taling nakapulupot dito at nang makaalis sa ilalim ng dagat ay tuluyan na rin itong lumutang tulad nila. Bukod sa pagtapik sa mukha ni Manzo, wala siyang tigil sa pagtawag sa pangalan nito.

Nang lumuwa ng tubig at nagmulat ang mga mata ng binata, hindi lang nakahinga nang maluwag si Sharla abot tainga pa ang ngiting gumuhit sa mukha nito. Sa wakas, ligtas na ang dalawa niyang best friends. Nang makaayos ng puwesto si Manzo, luminga-linga muna sa ito paligid. Ngunit nang makitang may isang nawawala sa kanila, muli nitong ibinalik ang tingin kay Sharla. "Salamat, Shar. Pero nasan si Kren? Hindi nyo nakita?" tanong nito.

Sabay-sabay umiling ang tatlong babae. Kahit paulit-ulit ni Manzo na ikutan ng tingin ang paligid, hindi niya rin mahanap si Kren. Sinubukan din nitong silipin ang ilalim ng dagat.

Sa huli, napagdesisyunan nilang muling baligtarin ang bangka na palutang-lutang pa rin malapit sa kanila. Napagtulungan nilang tatlo na muling maisayos ang bangka. Nagawa rin nilang ubusin ang tubig sa loob nito. Swerte namang naroroon pa rin ang water pump at napatakbo pa rin nila ito. Hindi nawawala si Kren sa isip ni Sharla. Ang iniisip lang nito, posibleng naanod na ito ng dagat sa malayo kaya hindi na nila ito mahanap. At ang nasa isip lang niya, 'pag naayos nila ang bangka, maaari nila itong gamitin para hanapin ang binata.

Naayos naman nila ang bangka at si Sharla na rin muli ang naupo malapit sa makina. Kanina pa nilang hindi makausap si Bindi, at bakas sa mukha nito ang labis na takot na nararamdaman. Muling naalala ni Sharla ang nangyari sa kanila 9 years ago bago si Bindi nalunod sa dagat. Dahil dun, muli niya itong tinawag," Hey, Bindi. Stay strong...." Pinatatag niya ang boses at nagpatuloy sa pagsasalita," Hahanapin natin si Kren."

Pero sa halip na i-appreciate ang sinabi ni Sharla, sinamaan lang siya ng tingin ni Bindi.

"Anong problema mo?" hiyaw ni Sharla.