ချင်းရွှမ်လမ်းစဥ် ဆရာသခင် (Part 3) (Myanmar Translation)

Book 34 Chapter 471

Uni

အခန်း (၄၇၁) သေခြင်းရှင်ခြင်းစာအုပ်

ဆန်းလျန်သည် ခဏတာမျှ တိတ်ဆိတ် ငြိမ်သက်နေလေသည်။

ပြီးမှ မေးလိုက်သည်။

"မင်းရဲ့ ဆရာဘိုးဘိုး ချန်စန်းကျီက ကျင့်စဉ်လမ်းအဆင့် ဘယ်အထိရောက်နေပြီလဲ ခန့်မှန်းနိုင်လား၊ သူက နတ်ဘုရားတစ်ပါး ဖြစ်နေပြီလား"

"ခင်ဗျား မေးတာတွေက တော်တော် ထူးဆန်းတာပဲ၊ ကျုပ်ရဲ့ ဆရာဘိုးဘိုး အကြောင်းကို မေးတယ်ဆိုတော့ ခင်ဗျားက ကျင့်စဉ်လမ်းမှာ ဒီလောက် အဆင့်မြင့်တာ သေခြင်းရှင်ခြင်း စာအုပ်ကို မဖတ်ဖူးဘူးလား"

ထိုစကားကြောင့် ဆန်းလျန်မှာ အနည်းငယ် လှုပ်ရှားသွားရသည်။

"သေခြင်းရှင်ခြင်း စာအုပ်ဆိုတာ တကယ်ရှိတာလား"

"သောက်ကျိုးနဲ" ဟူ၍သာ လျိုမုန့်တယ် တွေးလိုက်မိတော့သည်။

ကျင့်စဉ်လမ်း ပြီးမြောက် အောင်မြင်သွားသူ မည်သူမဆို သေခြင်းရှင်ခြင်း စာအုပ်ကို ဖတ်ကြသည်ပဲ ဖြစ်လေသည်။ ထိုစာအုပ်အကြောင်းကို ဆန်းလျန် မသိသည်မှာ ထူးဆန်းလှသည်။ သို့သော် ဆန်းလျန်က မသိဘူးဆိုမှတော့ သူက သူသိသလောက် ထပ်ရှင်းပြ လိုက်လေသည်။

"သေခြင်းရှင်ခြင်း စာအုပ်ဆိုတာ စကြဝဠာစွမ်းအားနဲ့ ဖြစ်တည်လာတဲ့ စာအုပ်ပဲ၊ လူသားဆန်မှု ကျမ်းစာလို့လည်း ခေါ်တယ်၊ စကြဝဠာထဲက သတ္တဝါတွေ အားလုံးအကြောင်းကို မှတ်တမ်း တင်ထားတယ်၊ သေခြင်းနဲ့ရှင်ခြင်း အကြောင်းတွေကိုလည်း အဲဒီစာအုပ်ထဲမှာ မှတ်တမ်း တင်ထားတယ်၊ အဲဒီစာအုပ်က နတ်ဘုရား စွမ်းအားတွေကိုလည်း ပိုင်ဆိုင်တယ်၊ သေခြင်းရှင်ခြင်း စာအုပ်ထဲမှာ ခင်ဗျားနာမည် မပယ်ဖျက်နိုင် သေးသရွေ့ အချိန်တန်ရင်တော့ ခင်ဗျားသေရမှာပဲ၊ ဆရာဘိုးဘိုး ချန်စန်းကျီရဲ့အမည်က သေခြင်းရှင်ခြင်း စာအုပ်ထဲမှာတော့ ပယ်ဖျက်မခံရသေးဘူး၊ အချိန်ကျရင် သူလည်း သေဆုံးရပြီး လူပြန်ဝင်စားရမှာပါပဲ"

ဆန်းလျန်မှာ အနည်းငယ် အံ့သြသွားရလေသည်။ သူက သူရောက်နေသည့် လောကတွင် ထိုသို့ ထူးဆန်းသည့် ကိစ္စရပ်များ ရှိလိမ့်မည်ဟု ထင်မှတ် မထားမိပေ။ လျိုမုန့်တယ်၏ စကားအရဆိုလျှင် သေခြင်းရှင်ခြင်း စာအုပ်သည် သူကြားဖူးသည်ထက်ပင် တန်ခိုးစွမ်းအား ကြီးမား နေသေးသည်။ သို့သော် သူက အဘယ့်ကြောင့် ထိုစာအုပ်နှင့် ပတ်သက်ပြီး မခံစားမိပါလိမ့်။ သူက သူရောက်ရှိနေသည့် လောကမှ လူမဟုတ်သည့် အတွက် ထိုသို့ဖြစ်နေရခြင်းလား။ သို့မဟုတ် အခြားသော အကြောင်းများ ရှိနေသေးသည်လား။