ချင်းရွှမ်လမ်းစဥ် ဆရာသခင် (Part 3) (Myanmar Translation)

Book 31 Chapter 435

Uni

အခန်း (၄၃၅) ဆုံးဖြတ်ချက်ခိုင်မာခြင်း

ယွမ်ကျိုးနယ်သည် အကြီးအကျယ် ပျက်စီးလျက် ရှိချေပြီ။

နှစ်ဝက်အတွင်းတွင် တာအိုကျင့်ကြံသူ သုံးပုံတစ်ပုံ သေဆုံးခဲ့ကြရပြီး အနောက်ဘက်နှင့် မြောက်ဘက် ကန္တာရဆီမှ နတ်မိစ္ဆာများလည်း မရေမတွက် နိုင်အောင် သတ်ဖြတ် ခံခဲ့ကြရလေသည်။

ကျင့်ကြံသူလောကတွင် သွေးချောင်းစီးခဲ့ရပြီး သက်ရှိ သတ္တဝါများ၏ အသွေးကို အသုံးပြုကာ အမှောင်မိစ္ဆာ ဂိုဏ်းသည် မိုးနှင့်မြေတွင် ခြေမဆန့်နိုင်သည့် နေရာဟူ၍ မရှိသလောက်ပင် ဖြစ်လေသည်။

အမှောင်မိစ္ဆာ ဂိုဏ်းမှာလည်း တဖြည်းဖြည်း အင်အားကြီးမားလာခဲ့သည်။

ထိုသို့ အသွေးကို အသုံးပြုကာ မိုးမြေတစ်ခွင် ခြေဆန့်ခြင်းသည် ရှေးဟောင်း ဒဏ္ဍာရီများတွင် ရှိသည့် မိစ္ဆာကျင့်စဉ် တစ်မျိုး ဖြစ်လေသည်။ သတ္တဝါများ ဒုက္ခရောက်မည်ကို စိတ်ပူသောကြောင့် ရှေးခေတ်ကျင့်ကြံသူများက ထိုကျင့်စဉ်ကို ကန့်သတ် ထားခဲ့ကြသည်။

သို့သော် ယန်ရွှီးကတော့ သတ္တဝါများ၏ အသွေးဖြင့် သွေးကန် တစ်ခု တည်ဆောက်ထားကာ သူဖြစ်လိုသည်များ အားလုံးကို ပြုလုပ်ခဲ့လေသည်။ အမှောင်မိစ္ဆာဂိုဏ်း၏ အင်အားကို ပိုမို ကြီးထွားစေပြီး ကျင့်ကြံသူ လောကတွင် အမြစ် တွယ်စေခဲ့သည်။

အမှောင်မိစ္ဆာဂိုဏ်းသည် သွေးကန် အကြောင်းကို ထုတ်ဖော် ပြောကြား လိုက်သည့်အခါ ဗုဒ္ဓဘာသာဂိုဏ်းများရော တာအိုဝါဒဂိုဏ်များမှာ အလွန် ကြောက်လန့် ခဲ့ကြလေသည်။ အဘယ်ကြောင့် ဆိုသော် ထိုသွေးကန်ကို အသုံးပြုကာ ယန်ရွှီးသည် နေရာဒေသမရွေး၊ လူမျိုးမရွေးကို ထိန်းချုပ် နိုင်မည် ဖြစ်လေသည်။

ကျင့်ကြံသူလောကရှိ ကျန်ရှိနေသေးသည့် ကျင့်ကြံသူများမှာလည်း နေ့စဉ် အိပ်မက်ဆိုးများ မက်လျက် ရှိလေတော့သည်။

သူတို့သည် အမှောင်မိစ္ဆာ ဂိုဏ်းအတွင်းသို့ ဝင်ခဲ့လျှင်တောင်မှ သူတို့ အသက်အတွက် အာမခံချက် မရှိပေ။