قرية النساء🕌مكتملة🕌

🕌الجزء 9🕌

#سلوى_العلوي ✍️
🕌#قرية_النساء 🕌
البارت 9 👑
فاتت ثلاث أيام وكل يوم العويتقة ديالنا سيليا تصبح وتمسي على وجه سيد المير لي حتى لهاد اللحظة ماكتعرف عليه من غير إسموا كتداوي جرحو لي بدا يتشافى وكيتعاودو الحجايات والحكايات لي عاشوها أو عاودوهالهوم الناس هو زاد حبها وبغاها تكون أميرتو.. وهي زادت تقربات ليه وعرفات بلي ماشي كاع الرجال سلطاويين وكيعجبهوم يتعالاو على مرا .. كيف العادة اليوم جات وجابتلو الماكلة
سيليا: صباح الخير أولد الخير كيف صبحتي ؟
بهاء الدين: صباح الورد لي ما يذبل والشمس لي ماتغيب والعسل لي ما يمرار  صباح الزين لي واخا يمشي يبقاو حروفو والصوت لي فاش يتسمع ينغم سامعو صباح الخير أوجه الخير
حنات راسها حشماانة كل صباح يصبح عليها بهاد الكلام الزين لي ماليه مثيل كلسات شافت جرحو وفطرات معاه وكلسو يتحاجاو غافلين على عيون لي مراقباهوم من بعيد مليانين حقد وغل وشر كيتوعدو لسيليا بالعذاب .. كانت ملاحظة بلي فهاد الأيام كتخرج فصباح وترجع تاخد لغداء وتولي تمشي بحاللا شي واحد كيتسناهاوها هي عرفاتها كاتجي للغار تقابل الفارس المغوار لي حباتو من نهار شافتو كيطل عليهوم فوق التلة رجعات للقرية وموراها بشوية رجعات سيليا ما على بالهاش بلي غيصرالها . خدات الغدا كيف العادة ويالله نوات تعتب العتبة وقفها صوت اللفعة السامة
وردة: أفين غادا الغشيمة ولا خرجو رجليك الشواري وما بقيتي تشركي معانا الجليسة
سيليا:ديها فالجيهة لي ضاراك أمسمومة وبعدي من ساحتي حسن ماتولي أيامك معدودة
وردة: رخي فيك النفس حيت مازال ما قلت ماتقولت عاد ناوية نخوي لمزيودة
يزة: آش عندك أوردة لاش كاتجبديها تاني
سيليا: هانتي كاتشوفي أدادة الى ما دقات علي ما تكمل عشيتها فرحانة
وردة: دادا يزة بنتكم الزينة نوارة لقبيلة العفيفة الشريفة ولات كاتلاقا لعزارة فالغيران الى مافخباركشاي
سيليا طاحلها الما فالركابي هادي ماكانتش على بالها
يزة: آش سايرا تقولي أوردة وزني كلامك ولزمي حدك راكي كطاولي على ختك
وردة: إلى كذبتيني سيري للغار تلقاي الراجل لي مخبياه وكاتلاقاه
سيليا :(بثقة في النفس حيت ماشي هي لي تحني الراس) بلاش عليك أدادة فالغار كاين راجل غريب على البلاد
يزة:(بصدمة) كيفاش الملعوقة 😳
سيليا: دادا هاد لغريب لقيتو مضروب فالغابة وديتو للغار داويتو وعطيتو الماكلة علاما يصح ويكمل طريقو للشمال
يزة: أويلي على الشمال واش عارفة بلي ناس بلاد الشمال ماشي كولهوم لطاف اويلي دوزي قداميي من ليوم ما كاين خرووج غتكلسي فبيتك وتشدي الركنة داكشي لي بقى
سيليا: دادا آش هادشي من إيمتا وليتي تحبسيني وحنا من نهار عقلنا على راسنا حرات مايتجرأحتى واحد يقيدنا
يزة : من اليوم أبنتيي سيريي لبيتك تا ندوي مع تيثريت يالله
مشات سيليا والدموع فطرف عينها ماعاجبها حال بغات تشوفو وتوادع معاه وتعطيه العهد بلي غاتسناه تا يرجع من سفرو ويجي يطلبها من عند مها لكن قطعو عليها شوفتو وقصولها جناحها وهي لي كانت عصفورة كطير بلاما تعيا ..
عند بهاء الدين عيا يتسناها النهار بطولتو والليل بظلامو لكن مابان ليها آثار وهو خاصو يشد الطريق للشمال باش يرجع دغيا لبلادو ويجيب والديه يخطبها ويديرها فدارو تولي مرتو وأم ولادو ..بعد مدة شافها جاية بنقابها وسلهامها لكن هادو ماشي عويناتها
بهاء الدين : شكون نتي وفين هي سيليا
وردة: أنا أسيدي وردة وردة لقبيلة شفتك مجروح وبغيت نساعدك سيليا ماجاياش اليوم ولا غدة وعمرها تعتب هاد العتبة
بهاء الدين: كييفاااش علااش آش وقعلها
وردة : راها محبوسة وعمرها تحلم بخروجها
بهاء الدين : (شاف فيها بحقد كيفاش كتهدر وهي فرحانة باينة وصلات الهدرة لأهلها وحبابها هز حوايجو وسرج عودو) الله يعاون أبنت الناس ويلا فيك شي نفس قولي لسيليا بلي أنا راجع ليها إن شاء الله
زاد وخلاها كاتقلى فسمها مارضاتش بالقمعة لي قمعها وهي على ودو صبرات وتسمات واشية فالقرية وبعدو عليها البنات بحاللا فيها الجدام صدقات لا هي براجل لا هي بصحابات (هادا سرك يالمسمومة 😌😂)  أما سيليا من داك النهار قطعات الهدرة على ناس القرية وما بقى حالها حال ولات قليلة الهدرة وما تاكل حتى يرغبوها ويحلفو عليها غضبات وغضبتها صعيبة تفك من غير ايمان لي ليها تعاود وعليها تشكي همها ...
#قرية_النساء💃