كاتم ضمير

الحلقة ٥٦

#كاتم_ضمير

((( بقلم زينب ماجد )))

الحلقة_٥٦

اصعب موقف بلحظات الوداع
من تشوف الجنت تبني تهدم
من تقوي كلبك وانتة مجروح
مامهتم اتبين وانت مهتم
(ايهاب المالكي)

شمرت التليفون من ايدي
بس فرفحت .. احس كلبي صار جمرة بصدري
فتحت الكنتور الملابس كلها كدامي وعيني انعمت اكلب بالملابس ادور ملابس البسها ..

اجيب هدومي منا واردها منا ..
عيوني عمت ما كمت اشوف غير كلمات مرته وهي تكتبلي ( ما تستحين تتلزكين بواحد متزوج وعنده عائلة ) ... اشوفج منو اللي لازكة لمنو .. بسيطة انت والماخذتة ... لا ما اطلع صبري و سنيني من عيوووونكم ما اتسمى باسمييييي

التليفون يدك يدك يدك ما توقف
جريته بقوة .. عابد
كمت حظرته من السيمكارت من الواتساب الانستا المانجر الفيسبوك التلي ، حظرته من كلشي .

ورجعت للكنتور ادور
ما دا الكا ملابس كمت شلعت الملابس من التعلاكات حيل وكمت اشمر بيهن واصيح : وين هدوووووومي وين وديتوووو ملاااااابسييي الله ياخذني ويخلصنييييي منكم

ركضت امي صعدتلي : شبيج ولج ، شصاير

- اني تاليتهاااا طلعت اتلزكلها الطايحة الحظ والكلب اللي صابرتله اسنييييين ويومة اكول باجر يحلها خلي انطي مجال .. طلع ماخذ مرته لابيل يتونسون ويكلي شغل .. انعل ابوكم لابو الساعة الشفتكم بيها يريدها معلكني بيييييه لييييش .

صعدت مينا : ماما عابد كاعد يتصل عليح

صرخت : ممنوع واحد بيكم يرد عليه ، ممنوع تريحون كلبه وتردوله على اتصال اهجممممم البيت والله

امي : شبيج تخبلتي منرد بس اهدئي

- اني بس اريد افتهم هدووومي ويييين

- مو هاي كلها هدومج يا بتي شبيج بس اهدئي انت مريضة ليش تسوين بروحج هيج .

دنكت امي انطتني ملابس
اخذتهم لبست وطلعت من البيت ، رحت على بيت اهل عابد ، الحماية ما موجودين بالباب بس سيارتين برادو وجكسارة ، دكيت الباب قوي محد طلعلي .

خابرت على ابوه ، رد : الو

- الو اني ايناس

- اي عرفتج رقمج عندي شلونج يابه

- لا يابه ولا اريد منكم شي .. تنطةني طلاكي من ابنكم لا وحق هو تراب ودمه بالنجف اهجم البيت فوك راسكم .

- يا ستار شصاير

- واكفة اباب بيتك محد ديفتح الباب انتم شنو معلكيني ما تخافون الله ، اتعقوني يا ابويه والله ما اريدكم وحتى ابنكم ما اريييييده .

- هذا الحجي احجي ويا عابد ، عجزنا واحنا نحجي وما يرد

- ولا عليه يرد ، ولا تتوقعون اسكتله ، والله ما اسكت