كاتم ضمير

الحلقة ٢٠

#كاتم_ضمير

((( بقلم زينب ماجد )))

الحلقة _ ٢٠

‏گالولي ها ما جآك ! كلتلهم منين؟
اهل الگلت والگال ما خلت أثنين
(ايهاب المالكي )

هستوني صعدت بالسيارة صار صوت قوي ، ويا ما دا تتحرك السيارة وما احس الا صوت وراي هز الدنيا ، فزيت وحتى ابو السيارة وكف سيارته ، وما اشوف الا سيارة عابد مكلوبة وواصلة للشارع الثاني ... الناس كلها فزعت صرخت من مكاني ونزلت اركض : عااااابد عاااااااابد

السيارة مكلوبة على كفاها وعابد بداخلها
الدنيا كلها فزعتله السير انكطع كمت اضرب على وجهي انسحك راح ..

الولد فتحو السيارة وسحبوها من جوا
ركضتله اصرخ وهم يسألون : تعرفينا ويااه

مجنت اجاوبهم على كد ما انخبصت بحاله ..
فاقد كل اعتقادي مات ، مددوا حطيت راسي على صدره ، ركزت على كلبه .. اكو نبض بكلبه بس ضعيف
شلت راسي من عنده وكمت احط ايدي على كلبه وادوس .. 

سحبوه من ايدي : خوية هل ننقله بسرعة ، راح يموت

سحبوه وكأنوا سحبوا روحي من جسمي
ظليت اباوعلها وهم يشيلوه وابجي بجي الطفل وكاعدة بالكاع ابنطروني على اركبي ..

ركضت وياه للسيارة
صعدت و خليت راسه على رجليه ، امسح على وجهه واكله : عابد لخاطري لتعوفني ، عابد افتح عيونك

الهوسة البرا والناس انجمعت على ذيج السيارة الصدمته ، صاح رجال : الجنطة للبنية المن .. هاي
جراها سايق السيارة شمرها عليه من الجام لزمتها واني مدنكة على عابد وابجي .

صعدوا ويانا بالسيارة اثنين
طلعنا بيه لمستشفى الشيخ زايد
والولد الكدام يحجي يكول: اني شفت الحادث ابو الالنترا جان جاي سريع وهذا الولد شخط سيارته بسرعة ، وسيارته عالية بسرعة صعد فوك الالنترا وانكلبت بسرعة مرتين بيه وانشمرت السيارة ع السايد الثاني .

هو يحجي واني اباوع لوجه عابد
حرفيا دموعي بللت وجها على كد ما تنزل بسرعة
هو فاتح حلكة ،وفاقد

شال الولد اكلنيس انطاني
اخذت منه، دك تليفون بجيب عابد
مديت ايدي بجيبه ، طلعته ايفون سفن التليفون الثاني مالته القديم هذا بس يفتح اتصال وياي ويخلي مفتوح وموبايله ذاك لشغله ..

باوعته .. المتصل (ابو الكحا*)
انصدمت بالأسم ، حتى بجيتي وكفت
زين هسه ارد وابلغ اخاف احد من اهله لو واحد غريب
رديت ... اجا صوت ضياء : الو سيدي

- ضياء

- ايناس النقيب عابد وين دا اتصل على رقمه ذاك ماكو رد

- عابد سوا حادث ضياء بلغ اهله فدوة راح نطلع لمستشفى الشيخ زايد .

- شلون وين سوا الحادث ، شلونه هو هسه