كاتم ضمير

الحلقة ٤٥

#كاتم_ضمير

(((بقلم زينب ماجد )))

الحلقة_٤٥

ايناس تكول :
شما تلتفت عيني الگاك موجود
ويتراوالي وجهك وين ماصد
اغمض والگه ظلك يمشي بالعين
بحيث من ارد اجيك برمشي تلبد
وانوط عن خيالك واقترب ليك
وتتلاحگك روحي تصيرلك سد
حيرة وماعرفت شلون وياك
تصفى ويمشن احساسين بالضد

عابد يرد :

انة بحالة تناقض وانقسامات
وصراع وفوضويةوموجد وجد ...
بحيث انشطر شخصيتين وياك
اكرهك واليحبك يمي يگعد
احط موعد لنسيانك واجي اردودا
حط للموعد البيه ننسى ..موعد
باشد حالات زعلي اتصالح وياك
سماي نجوم بيها وغيم يرعد
واجيك وباعتقادك جابني الثار
وانة من ابعد عليك يجبني الود

حسبت اطول مسافة زعلة وياك
خطوة وچنه بيها شوية نبعد
كل مانمشي بيها انفاسنا تضيگ
ماتكمل الخطوة و للهوى نرد

(للشاعر الكبير إيهاب المالكي )

بقيت بغرفتي ..
هددني اكثر من مرة يكسر باب عدغرفتي بس اني بقيت سادة الباب ما الي ايد تفتحه ... ساعة تتبع ساعة واني على مكاني  .

مخليت دعاء مدعيته
مخليت امام ما نخيته
وتعلكت روحي بالإمام علي .. ادعي واكوله ( ما الي اب اشد ظهري بيه يا امامي انت ابوية دخيلتك )

للفجر واني هذا حالي .. افتر اباوع من الشباك اريد احد يمر ماكو .. اريد احد انتخي بيه فارغة .. اطكطك اصابيعي والإمام علي ما وكع من شفايفي ..

الفجر صار هدوء
ابد ما سمعتله حركة بالبيت ..
بدلت ملابسي بهدوء وفتحت الباب على كيف ..
باوعت بالصالة موجود تليفوني ع القنفة بس ما موجود احد ، بسرعة اخذت تليفوني .. طلعت رقم عابد ع الواتساب دست اتصال ومشيت على كيفي اتفقد المطبخ ... ماكو احد

فتحت باب الشقة عابد رد : الو
سديت الباب ورحت ركض ع الدرج انزل ، وهو يكلي : الو ، ايناس

حطيت التليفون على اذني .. مرته تكله : شكو

- نامي
طلع من الغرفة كلتله : روح طلعت ما اريد شي بعد

- يولي مكعدتني من الفجر متصلة شصاير

- ماكو شي

- صوتج مرعوب شصاير وياج ، لحظة بس اغسل وجهي حتى افتح عيوني .

نزلت وطلعت برا .. الجو ضباب رغم الشهر الرابع مو شتا بس اكو برودة بالجو .. بس اريد تكسي ماكو الشارع فارغ .

كمت امشي بالشارع
عابد غسل وجهه والتليفون وياه ، نزل للصالة : شبيج يولي

- خايفة حيل

- منيش خايفة ؟

- صار شي ما جنت متوقعته .. مصدومة

- دحجي بت الاوادم مكعدتني من الفجر زوعتيني عافيتي ع الريك .. احجي .