كاتم ضمير

الحلقة ٤٨

#كاتم_ضمير

(((بقلم زينب ماجد )))

الحلقة_٤٧

مثل سجينتك راح انسحب بهداي....
حتى اترك حياتك واطلع ابسكته....
بلا ما تشعر ويكسر قر اري الشوك...
وارجعلك واكول: اتسرعت خذته...

تقرب من الطاولة اللي احنا كاعدين عليها
كل خطوة احس الموت يتقرب مني ، الخوف للحظة سرى بكل جسمي ، جن مسويتلي مصيبة .

ما عرفت شلون ادارك الموضوع
وما اريد افشل كدام عصام عيب .. كلت
وكمت بأبتسامة حتى ارحب بيه : هلو عيني ، هاي شنو هنا .

وكف ع الطاولة : شعندج هنا

- اجيت اني والاخ عصام ، اعرفك الرائد عصام ...

كام عصام من مكانه ، ووكفت اعرفه : عابد

- يعرفني ما ينساني

- اعتقد نفسه اللي بذاك اليوم تعارك مو لو اني غلطان

عابد : بالضبط

عصام : اهلا وسهلا ، تفضل تعشى ويانا

- لا والله جنت جاي منا وعرفت خطيبتي هنا بلغتني ، فكلت امر ارجعها بطريقي

- خير ان شاءالله ، هاهيه اخذوا راحتكم .

ايناس : شكرا الك ، مع السلام

- كل الهلا بيج عيوني

خذيت جنطتي وعابد اشرلي امشي كدامه .. مشيت وهو وراي ، احس على ساعة يجيبني بدفرة من ورا .

انداريت : هذا موقف تحطني بيه عابد

- امشي لا اكفر بيج كوة لازم اعصابي ، امشيي

حجاها وهو يلزمني من زندي ويعصرني حيل : وخر ايدك اني مو طفلة وتجرني هيج وتعت بيه

- امشي

- امشي لما اني اريد امشي مو تأمرني

- ايناس حابة اسويلج فضيحة بنص هالمطعم واسحلج كبالهم

نكثته مني :- اذا تكدر سويها لا تهدد

- تحطين راسج براسي يولي

- لا مو ناوية

عفته ومشيت .. لحكني
تجاهلت سيارته ونزلت للشارع صاح : شوفي اذا ما تصعدين والقرأن يا ايناس تشوفين مني شي عمرج ما شايفته

- عابد لتهدد ولتحجي وياية بهالمنطق ، لإن من تصير حالك حال اليهددوني ويفرضون عليه .. اخليك حالك حالهم واتصرف بالمثل

- صعدي

التفيت وصعدت ، صعد وضرب باب السيارة حيل ..
فززني وقشعر جلدي من الفزة ، حجه : صديقاتي .. خوش صديقات ايناس دا تلتقين وياهم من وراي .

- ترا ما عندي التقي بيهم كدامك وما تخاف لإن ما عندي شي .. ولما جذبت بس لإن انت تتخبل لما تعرفني طالعة كلت اكلك بالشغل وبعدين اسولفلك وحتى لو ما سولفتلك ما مفروض عليه انطيك تقرير بروحاتي وبجياتي لإنو مو من حقك