كاتم ضمير

الحلقة ٥٠

#كاتم_ضمير

((( بقلم زينب ماجد )))

الحلقة_٥٠

متت موتت شعر عد شاعر اخرس صار
لايقراني غيره  ولاهو يقراني
انه تمثال هم تنمحي بظلة نجوم
انه نحاة جرحي وصرح سواني
اشكثر مرّو ابصفي شكثر فاتت ناس
بيه تنادسو من جتف للثاني
(للشاعر ايهاب المالكي )

فزيت من شفت ابويه كدامي : انت شجابك

- حسبالج عفتيني هناك بدون فلوس وما اكدر اجي .. راح احاسبكم انت وامج وخواتج ال*** على اعمالكم وغدركم الي .. وراح تندمون على السويتو بيه

- اكول انصرف منا ولا تطلع بوجهي ، كافي تحملت سخافتك وسوالفك الللي سويتهن بتركيا ، لا تعتقد اتحملك هنا ... ولي من وجهي .

راد يجر ايدي ، ابتعدت منه : لو حاولت تتقرب مني لو تندك بيه والله ثم والله ما راح اخليك تتهنى وراح لشوفك نجوم الظهر .. ابتعد

عفته ومشيت
اجا وراي : مو بكيفج ابتعد اني ابووووج وجاي هنا وما عندي مكان تنطيني فلوس لا اتشوفين مني شي بعمرج ما شايفته

- شنو هو اللي بقى وما شفته منك
بشرفي طعنت .. بيه وتاجرت ، فضيحة وفضحت ، فلوس واخذت .. كتل وكتلت .. كلشي شتو البقيته وما سويته

- انطيني فلوس انطيني

- وماليش انطيك فلوس ، بأي حق

-، ما عندي مكان اكعد بيه ولا عندي بيت اروحله شلون اضل بالشارع

- والمن رجعت

- انطيني لج بلا حجي .

تنهدت ..
طلعت ٥٠ الف من جنطتي انطيته
شمرهن بوجهي: اجدي منج بت الكلب كلج صرتي بخيري وبفضلي لو ما اني ما الج وجود بالحياة وتكعدين تتصدقين على ابوج

- ياريتك ما خلفتني وما صرت ابويه ، ذني العندي يعجبك يعجبك ميعجبك باب الكاظم ينتظرك اكعد جدي والله يرزقك .

عفته ومشيت هو ظل يغلط ويفشر عليه
ودنك يلم بالفلوس الشمرهن ووكعن بالكاع ..
اني سيارة عابد طبكت لبعيد .. رحت صعدت بيها ، هو جان عاقد حاجبه : منو هذا الجنتي واكفة وياه

- فاضل

- ابوج اجا

- واجا وجعان الراس .. امشي

- اهووووو لا هله ولا مرحبا
حجاها وهو يحرك بسيارته ..

رجعت الكشن ليورا وتمددت ، اندار : يولي والله اذا نمتي هيج بدفرة ازتج بالشارع .. يولي ما شفتيني لا ما نمتي .

- تعبااااانة ميتة تعب والله ، اكعد من ٨ اطلع لصالون نسرين اشتغل زبوناتي ارجع للبيت اسبح اكل لكمة وابدل وارجع للمركز اشتغل ل٨ بالليل .. كل شغلي وكفة لو مدنكة .. نهاية الدوام احس ظهري ما اكدر احركه ويدخل الجنة اليشوفني الفراش شلون شكلة هاي غير يوم الدوام بالمستشفى لا تحجي من هوسة المرضى والحوادث مو بس الجسم حتى النفسية تصير زفت .