كاتم ضمير

الحلقة ٤١

#كاتم_ضمير

((( بقلم زينب ماجد )))

الحلقة_ ٤١

العلى ايدك ما يظل شالفايدة من يعود ؟
يتبعثر وراك وتلتفت يلتم ..
من حنيتك شكد نبهتني الناس
بس اخجل اكلهم كلبي ما يفهم
وارد اضعف مثل ما انت جنت تريد
واحن الناس منهم الي الموت ارحم

يكليي وداعتك مو قسوة بس أحتار
واخجل من اسألك ضعفك شقدم ؟
(للكبير إيهاب المالكي )

كمت من مكاني واني أسمع امي تتعارك ويا ابويه
وكفت كدامه ، كام يصيح : اني كشفت التسجيلات من ورا راسج .. اني خسرت من وراج واني ابوج والي حق براتبج .. تنطيني نصه كل شهر تنطيني ما تنطيني والله الا اندمكم

كعدت كباله بدون اي ردة فعل ..
امي كامت تتعارك وياه ، وطردته من البيت ..
ظل يصيح ويضرب بالباب وعمتي تحجي ويا امي ..

بنص كل هالهوسة ما الي حيل احجي كلمة
بداخلي شي انكسر ..
تعب يقاوم
تعب يدافع
تعب يستمر
هزيمة محارب انهكه القتال ، احنى سيفه واستقبل السهام بجسم هزيل ما يقوى على المقاومة ..
هيج جان أحساسي .

الظهر داومت بالمستشفى على حسب الأصول
شماتت سارة
وضحك لبنى
ومواساة مهند
ووكفت زملائي البقية ..
ابتسامتهم .. تضامنهم ..
لازم ايدهم وهم يحطوها على ايدي حتى يكلولي : احنا يمج ..

صارت الساعات و الأيام تمشي بالابيض والاسود
ما بيها روح ..

احن واشتاق ..
بس المن ؟
لشخص كسر كلبي حتى ما يكسر كلب بنت خالته ويعصي اوامر امه ..

لشخص حط ايدي بيد الموت وانطاني ظهره ..
احاول اتذكر مواقفه السيئة عسى ولعل كلبي يحقد عليه وينساه ..

بس يبقى الصراع ما بين عقلي وكلبي
واتذكر حنيته ومواقفه وسنده الي بكل شدة وموقف .. شنو التمنيته وما سواه .. شنو الردته وما نفذه ..
انسان حبني بالفطرة .. لا راد مني مقابل ولا حسيت بحبه استغلال .. سندني بوقت لما ظهري انحنى وقواني بأضعف اوقاتي ..

وين اشرد منه ؟
وشلون انساه ، وكل مكان بحياتي اله بيه ذكرى
غرفة الممرضين .. الردهات ، الطوارئ ، العناية ، الامنية ، الكافتريا ، كل مكان ابيتي، باب الشارع ، الفرع ، حتى المطاعم والحدايق ماكو مكان ما زرناه وجربناه اني وياه .. وين اشرد منه واني بكل مكان الكاه ؟

جان اقرب صديق الي بهذه الفترة مهند
دائما واكف وياي ويحاول يساعدني ويطلعني من هالمحنة اللي اني بيها .. بس ما كدر .

الا ما بيوم
ومن بعد فترة من زواج عابد ..
اجا مهند وكال : ايناس وضعج ما لازم يبقى هيج .. ليش ما تسافرين ، اطلعي شوي غيري جو او عيشي برا .. ترا انت عندج مهنة بأي مكان بالعالم تشتغلين تحطين بأيدج ذهب .