كاتم ضمير

الحلقة ٢٤

#كاتم_ضمير

((( بقلم زينب ماجد )))

الحلقة_٢٤

عشت الخاطرك تحلف بخلكي الناس
انازع و اليمر يشوفني مدلل
(ايهاب المالكي)

ع الموقف السواه
لو يذبحني ما يطلع من جسمي قطرة دم ..
وجهي صار مو اصفر اسود على كد الهبطة والفشلة الخلاني بيها ..

زملائي خطية تهافتوا لموا الصور بلا ما يباوعولها .. شككوهن وقسم منهم تهجم على ابويه وكام يتعاركون وياه ، والبنات التموا عليه .

كعدت بالكاع بعد رجلية ما شالتني
الغريب يدافعلي من ابويه
الغريب يسترني من ابويه
اي وضع اني بيه
شسوا بيه ؟

حطيت اديه على وجهي وكمت ابجي من كل كلبي

مهند تعارك ويا ابويه ، والامنية بسبب تجاوز ابويه وتشهيره بيه طردته من المستشفى .

كاعدين البنات وهم يكلولي : كومي لا تهتمين ايناس قابل ما نعرفج انت شنو

- انتم تعرفوني والباقين شيكولون من يسمعون ابويه هيج يطعن بيه ، والله هو الخطفني وهو الصورني وابتزني لو اوافق ع اليريده لو يشهرني اكو هيج اب ، اكو هيج بشر يسوي بعرضه وبشرررفه .

نزل المدير ع الهوسة
حجه : ايناس تعالي للادارة فورا ، فضي هذه الهوسة فورا كلمن على شغلة يلا .

وكف مهند : احنا يمج ووياج ايناس ، لا تهتمين للي صار

- شلون ما اهتم وهو نثر صوري بنصكم انت الغريب من يمك ثرت وثارت غيرتك عليه وهو كل غيره ما بكلبه

نور : دكومي هسه روحي للمدير والله كريم .

مسحت وجهي صار خريطة على كد ما بجيت ودكيت على وجهي من سواية ابويه ، مشيت للأدارة كعدت ، حجه المدير : شنو القصة يا ايناس

- استاذ ابويه انسان حقير لو شكد ما احجي عنه قليل على اللي سواه بينا

- واكو بينة تتلفظ على ابوها بكلمة حقير

- حرام ينكل عنه اب بس انت حقك لإن ما تعرف عن كل اللي سواه بينا .

- شوفي سابقا اكو لواء تهمج بعلاقة ويا ابنه وشهر بيج وصارت هوسة هنا ، واكثر من مرة يا ايناس ينطعن بسلوكج ، والكادر الطبي لازم يكون على مستوى من الرقي .

- استاذ

- خليني اكمل كلاااامي لا تقاطعيني ، اكو ممرض اشتكى عليج سابقا انت تاهمته يتغزل بالممرضات الصغار .. وكل طعن ديطلع منج وعليج بالشرف .. اني لو اريد اعدي شعدي .. وهذه سمعة مستشفى وكادر طبي

- كل كلامي ودفاعي عن نفسي مراح يفيد ما دامك مقتنع بكل الكلام الحواليا .. فا اللي تشوفه استاذ لا تقصر بيه ، وشكرا جزيلا على ثقتك .