كاتم ضمير

الحلقة

#كاتم_ضمير

((( بقلم زينب ماجد )))

الحلقة_ ٥٤

فرق يوسف بريء اتضح مـــــــن تهمو
تقنعني قميصك من دبـــر ينقــد
يوسف من لبــــس جان القميص كدار
بس انتــــــه قميصك بي زغر ماكــد
(ايهاب المالكي )

- شلون ترجع اني امنت كلشي هناك وطلعتهن

- ايناس اذا تطلعون فبلا ردة مستعدة تعيشين خارج العراق بلا ردة اذا رجعت تتحاكم

- ما ادري ..
خلي اخابرها ، اني تعبانة مدا افكر عقلي كلش مشوش وتعبان

- الله يساعدكم .. بس استعجلي اذا بيها رجعة خلي تجي على مطار اربيل .. لا بغداد

- ماشي

قفلت الخط ..
نسرين دخلت حطتلي الاكل
مشكورة عمري تعبتج وياية

- لا يكلبي لا تعبتيني ولا ابد .. شلون صرتي

- خابرني عصام

- الضابط

- اي ديكولي امج عليها القاء قبض
وسولفتلها

كالت : ايناس الطلعة مو سهلة وانتن نسوان ما تعرفين الدنيا شضامتلجن مو مال بلا رجعة

- بلا رجعة يعني ايس من عابد كلش الا في حال اترك امي واجي وهاي المستحيل اسويها .

- اي عيني لا مو مال بلا رجعة صعب .. خابري امج ترجع

دنحجي اتصل عابد
رديت : الو

- ها شلون صرتي

-شلوني اني ارتاح

- شكو يولي

سولفتله .. كال : ما ينراد الها روحة للقاضي خلي ترجع بسرعة

- والبيت الاجرته هناك والاثاث واستقروا شلون

- هسه على الفلوس يا كلبي دخلي ترجع

- عابد بس طلعتهم صارت عليه ب٦ ملايين والله هاي غير ٥ ملايين خليتها بايد امي لما راحت .

- كلشي يتعوض خلي ترجع والله كريم

بقى يسولف وياي ويقنعني .. ما شفت خيار غير ترجع
خابرت على امي بلغتها وكتلها هيج وهيج ابويه .. كالت : وشلون هسه

- ماما اني اكدر اكلج رجعي بس اذا قررتي تبقين يعني بدون رجعة واتوقعي فد يوم من الايام اني اتزوج واعوفكم هناك واجي للعراق

- لا امي مو بلا رجعة اني خواتي هناك اهلي ناسي هنا اجيت كم يوم اختنكت وين بالعراق كل ما طك كلبي ورحت زرت ابو الجوادين لو اروح لابو عبدلله من فدوة اروح لاسمه يس اني شجابرني على هالبهذلة غير فاضل ، والله دا ابجي دم على اخياتي ولمتهن بالعراق عفتهن وتهجولت .

- معناها ارجعي واني ادبرها

سالتني على صوتي المبحوح .. كتلها : ليث مات