كاتم ضمير

الحلقة ٣٩

#كاتم_ضمير

((( بقلم زينب ماجد )))

الحلقة_ ٣٩

تذكر كبل ؟
من تعتنيلي بالهفتك مشتاك حتى تشوفني
وتلكاني روحي مشككه
ولمسات اديك تروفني
تتركني هسا قررت ؟؟
ينطيك كلبك ننتهي وبس بالاحلام تشوفني
(ايهاب المالكي)

(( عابد الجمعة خطبته ))

كلمة هزتني هز
هزت جسمي كله وثلثين حيلي ..
ايدي بعد هالكلمة حتى التليفون ثكل براحتها ..
نزلت التليفون طاح من ايدي ..

الطبيب منطيني مهدأ على مود حالة المخ
كمت اتنفس قوي .. النفس اليطلع من صدري كأنما يشكك بركبتي .. اختنكت حيل ...

كلها يمي ..
دكاترة
مراجعين
ممرضين
بنكلادش
طوارئ وهوسة ..
بس روحي ما كامت تشوف احد ..

اختنكت اختنكت حيل ..
كل المكان ما يوسعني اتنفس بيه
شي بصدري ضاق حيل ..
خطرت على بالي أية توصف الحالة ( وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ  ) ضاق صدري بشكل غريب احس اضلاعي انبطكت وعصرت كلبي عصر .. وجع صار بكلبي عمري ما حاسة بيه بهيج وجع مؤذي .

طلعت من الطوارئ
لبرا احاول بس استوعب اللي سمعته
هيج بسهولة بدلني ؟
لعد وكلمة احبج وذاك الغزل والحب والهيام وينه
كله نساه ... اني لو زعلانة منه ولو نهيت بسنه ما اكدر افكر بغيره لو افكر اجيب لكلبي واحد ثاني .. هو شلون بهالسهولة كدر يبدلني ..

هاهيه يعني
انتهينه وخلصت قصتنا ؟
بعد عابد مو اليه وراح يتزوج بغيري
كلمة احبج .. وهمساته واحضانه وضحكته وكله لغيري .

كعدت بالكاع لزمت راسي واباوع كدامي وفاتحة حلكي
بس رايد استوعب وضعي !
كلش صعبت عليه نفسي بذيج اللحظة .

طلعلي مهند ..
كعد يمي واسى وحجه هواية
بس ما سمعت ولا فهمت كلمة من اللي كاله ...

كومني وياه
ورحنا نشوف الردهات سوا ..
كوة امشي .. وانهي شغلي ..
طلعت الصبح للبيت كبل ..
كمت اشرد من واقعي للنوم بس اريد انسى ..
خلصتها نوم بنوم .. اكعد اصحى واخذ منوم حتى ارجع انام ..

امي عمتي خواتي بنات عمتي كلهم كاموا يسألون على وضعي وما اكللهم شي .. الى ان كعدتني ماما .. شالت البطانية من جسمي : ايناس وضع هذا بالله صارلج يومين نايمة

- ولو كعدت شتريدون مني .. عوفينيييي

- ايناس بتي شجرالج فهميني

كعدت من الفراش .. عابد اليوم خطبته ماما
حجيتها وجروا دموعي .. ظلت واكفة بمكانها مصدومة .. صدك يسويها

- يسويها وبأكبر قاعة ابغداد حتى يحرك كلبي
ماما الجان كل طموحة يشوف ضحكة عيوني هسه كل غايته يبجيهن ... والله مبقالي حيل اتحمل ماما