كاتم ضمير

الحلقة ١٢

#كاتم_ضمير

((( بقلم زينب ماجد )))

الحلقة_١٢

بسد بوساتهم دفنوا شگد انياب
واكول يجوز جانت عن حسن نية
( للشاعر إيهاب المالكي)

اخوي احمد مات

صرخت وحطيت ايدي على حلكي : انا لله وانا اليه راجعون .

نزل التليفون و طلع من البيت كله
طلع رابي وضياء بسرعة : شكو ليش صرختي

- احمد اخو عابد مات

صرخ ضياء : لاااااا
وركض وطلع من البيت وراه .. باوعتله
عابد متجي ايده ع السيارة ومدنك راسه ويبجي ، اجا ضياء : الله يصبرك خوية

حضنه عابد وكام يبجي
اباوعلهم وابجي ، حجه رابي : شبيه اخوه

- مسوي حادث وبالعناية يمنا بالمستشفى وهسه مات

- خطية الله يصبرهم

طلعوله حمايته وصعدوا بالسيارة وطلعوا للمستشفى
طب رابي واصدقائه للبيت : ايناس اني ادفع وياج ٢٠٠ مال الايجار اتفقنا على هاي .

هزيت راسي .. بقى يباوعلي : هو النقيب شنو يعني صديقج

- وكفتله بسالفة اخوه وهو وكفلي هواي بس خوش واحد ما يستاهل ، خطية والله حيل أنقهرت .

- الله يرحمه ، اكلج احنا راح نخلص ، من اكمل اروح اجيب البنات حتى نغسل البيت حتى باجر ننقل كلشي .

- تعبتك هواي وصار هم البيت عليك

- لا شني قابل اني غريب

- الله يخليك

عفته ورجعت للمستشفى.

رابي كمل الشبابيك والبيبان وشكر صحبانه وطلع لبيت عمه .. لكى صياح وهوسة

هناء مرت عمة كالبة البيت على بناتها وتصيح وتغلط
ميس ومينا كاعدات وطالعة روحهن ، سأل : شكو ؟

ميس: غسلت المواعين كلها الصبح وحتى اني الركبت الغدا .. تكل لعمي اني الاغسل واني الاطبخ وبس نايمات وتغلط وتسمعنا ، زين ليش متكول ميس سوت ميس اشتغلت اني ما متعاجزة من شغل بس ليش من يجي عمي تنكر وتظل بس تشكي وتصيح وتكلب البيت هوسة .

مينا : لإن بومة وحية وعكربة وخابطتهن كلهن اليكول موكلتنا من چد ابوها .

ميس : انجبي انت لا تروح تسمعج

رابي : هششش كافي عوفوها اصلا خلصنا البيت ، وباجر نشيل

فتح الباب عمي وفات : رابي هنا انت شعدك صاف ويا النسوان

- بنات عمي هنا مثل خواتي شنو نسوان

- لا ما اقبلها كوم اطلع عمي اكعد بالباب ، وانتن يا عمي لا بس اكل ونوم كومن شوية بيت عمج هم مثل بيت ابوجن لا كله على مرت عمجن ما يصير .