كاتم ضمير

الحلقة ٣٥

#كاتم_ضمير

((( بقلم زينب ماجد )))

الحلقة_٣٥

انه عندي الترف
مو بالجسد بالروح
ما افسر التطور بالمشي اتلوه
(ايهاب المالكي)

طلع من المكتب ، كمت من مكاني وكعدت بمكانه ..
انجيت ع الميز واني احط وجهي بين اديه من التعب ..
اكول شعليه ..
بس مو بكيفي .. خواتي ما اعتبرهم خواتي على كد ما اعتبرهم بناتي وبمسؤليتي .. ميس طايشة وفاقدة لحنان وحماية اب ودا تريد تعوض نقصها .. وابو عابد واحد قليل ذكة ، اليعوف مرته ويدور وحدة بكد بته شاعتبره حب هذا لو نزوة ويريد يغير حياته ويعيد شبابه براس طفلة طايشة وغبية مثل اختي ..

وجانبا عن كل هذا
ام عابد تصير ام زوجي يعني مثل امي ما رضيتها على ابوي ارضاها عليها ؟

واذا اريد اصير وحدة انانية وما افكر بالكل
فاول وحدة تنضر اني ..
عابد اليوم زين وياية
شمدريني اباجر اشلونه ؟
الدنيا تغير حتى الحديد من تمر عليه تزنجره
شلون برجال صاحب رتبة وفلوس خير من الله بجيبه والنسوان كل التوكف وياه تستظرف وتتمايع كدامه .. ما امن ولا بذرة .. باجر لو راد يخوني الي حق احجي واعترض ؟ .. هسه يكلي حلال من رضيتي على امي تحط اختج ضرة وتحرمين عليه .. ساعتها شحجي ؟

السالفة كلها متصير
لو مو ميس تبجي وتكلب الدنيا
لو تنت...حر ما افكر ولا لحظة انو ارضى بهالزواج .

واني دايخة بهالتفكير
دخل عابد للمكتب ، دا اريد اكوم من مكاني ، أشر : خليج

- الله يساعدك عمري

- بساعد بختج ، شكو ماكو
كعد كدام المكتب

: ابوك جان هنا .. تخيل دا يخطب ميس

- كتلج ماخذ الموضوع بجدية

- وانت محجيت وياه

- شوفي بالبيت ما عدنا هذا الترابط الأسري انصحه وينصحني ما اعرف يمكن اني حاس بس مالي دخل

- وامك ، ترضى يتزوج على أمك

- وأمي شعليها ؟

-زوجها

- اي اذا قصر بحقها لو هجرها .. الها حق تحجي بس ما دام هو رجال وعنده خير ويحب يتزوج من حقه لا عيب ولا حرام هي ابيتها معززة مكرمة واللي يريدها ابيت.. وبالمجمل اني معليه

- تفكيرك هذا حقيقي يعني لو دا تشاقى ؟

ضحك : لج يولي شيلي هالموضوع من بالج واطلبينا غدا

حجاها وكام من مكانه وكف كدام السبلت ويفتح بقميصه متحتر ، واني اباوعله : بديت اكرهك

اندار عليه ، ابتسم : يولي فكينا من هالموضوع اني بيا ما بيه اشرد من مشاكل اهلي بالبيت الاكيج هنا كالبتها نكد والوجه معبس وشايلة مشاكلهم وحاطتها بيناتنا .