كاتم ضمير

مناقشة

السلام عليكم

من فترة واني تاركة قراءة التعليق ع القصة
مجرد اكتب وانشر واطلع ما اشوف ردود الأفعال ع القصة.

اللي يعرفني ومتابع قديم الي ، يعرف نمطي بتقديم الروايات .. انوع بأختيار القصة بين القصة المحافظة العشائرية واللي يكونون ابطالها محافظين ، وبين قصة تكشف بلاوي مجتمع وامور دا تصير بمجتمعنا نذكره ونحجي عنه .

قدمت نهوة حارث .. قصة عشائرية وجو محافظ

رجعت قدمت ورا حكاية سمر واللي اعتبر قصتها العشق الممنوع .. وناقشت بيها هنا قضية العادة السرية وتاثيرها ع البنت وخفايا مجتمعية .

رجعت وراها قدمت قلب قابل للكسر قصة عشائرية وجو عائلي محافظ

رجعت وراها قدمت (خطوات نحو الجحيم ) اللي ناقشت بيها تجارة الاعضاء والمافيا وامور كثير تصير حتى خارج القطر .

من بعدها نزلت قصة المراهقة والأربعيني قصة عشائرية وجو عائلي محافظ ..

رجعت بعدها قدمت ( ليتني استطيع فعلها) ناقشت بيها التحرش من قبل المحارم ، وضياع الأم والاب وتأثيرها ع العائلة ... وناقشت امور تصير بخفايا المجتمع .

رجعت وراها قدمت( كحل عرب ) قصة عشائرية وجو عائلي محافظ .

من بعدها قدمت الكم ( كاتم ضمير ) على نفس النمط
رواية تشرح امور بخفايا المجتمع نتناقشها ونطرحها .. وهذا نظام رواياتي من سنين .

ما طرحت رواية يكون هدفها توعوي ويناقش قضايا مهمة اذا ما وردت كلمة (وين اكو هيج ، شنو هذا القرف، قصة مو من واقعنا ، مبينة خيال)

هو انتو شايفين واقعنا محافظ ؟
شايفين ان مجتمعنا بريفكت ؟
مجتمعنا مو محافظ ابد ، يتهيئلكم ظاهريا .. بخفايا المجتمع امور بالغرب متصير ولا يسووها.

نعم اكو عوائل محافظة
واكو عوائل متشددة
وادرك ان بعض المتابعين او بالاحرى المتابعات لإن اشوف الشباب ممستغربين بالعكس يعرفون ان الديصير اكثر من هيج، لكن اكو متابعات يكون جل عالمهم هو البيت لتطلع بسيط بالانترنت مشايفين الشارع ولا معايشين الناس ولا يعرفون شديصير خارج اسوار بيتهم .. اتفهم منهم الأستغراب
بس لتعتقدون هالامور ماكو

البارحة جنت احجي ويا ايناس ..
تكول اقاربنا اللي يعرفون ابويه شمروه من العشيرة وعمامي عانوا ما عانوا ، من نحجيلهم جزء بسيط من قلة غيرته وشرف ميصدكنا ويتهمن ان احنا دنألف على ابويه ، فحتى لاقاربنا مكمنا نحجي بسوايات ابويه بينا ، غما استغرب استغراب الناس حقهم .

اني صحيح مستحيل الغي او احذف قصة اني تعبت بيها لإن هذا كلامي واتفاقي من البداية مع اصحاب الرواية اليجي يطرح قصته يتحمل هو التبعات، لكن البعض لما يتضايق من كثرة التجاوزات يكوم يلغي بأحداث القصة ويختصر بيها واغلب احداثها تروح .. هالشي صار بقصة كحل عرب بقصة الاء .. وهسه ويا مينا .. فحرامات ليش تنلغي احداث جميل تعرفوها وتكمللكم القصة ومتبقى عدكم علاقات ناقصة بسبب التجاوز .

اللي دا تقروه صار من سنوات
واللي يطرح قصته صح عرضها كدامك بس ما نصبك قاضي تحكم عليه بما شئت ..اتعض من اخطاءه اذا تشوف افعاله خطا، انصح لإن هم يتابعون خلف الشاشات لربما نصيحتك تأثر وتوصل والكلمة الطيبة صدقة

انت متطلعين من البيت مو معناها التطلع ساقطة، مو اذا حجت ويا هذا وهذا وهذا وضحكت وياه وتشاقت وهي بداخلها ما عدها شي لمجرد صديق معناها مو زينة، اغلب اللي تشتغل او تدرس بمكان مختلط يصير تعاملها ويا الشاب مثل تعاملها ويا البنت من ناحية الحجي  الضحك الكعدات السوالف الطلعات ، متكوم تفكر لا هذا ولد ميصير احجي وياه،  تتعامل ويا البنت والولد نفس الشي  ، نعم اكو البعض اللي عدهم مو عادي وهاي تبقى لكل انسان نظريته، بس مو معناها تقيمون شرف الإنسان من هالنقطة. 

اقروا القصة .. ابدوا ردة الفعل .. تضايقوا
يعمي تجاوزوا بالمعقول ، بس مو تطعنون بشرف وكلام مسموم .. انت دا تقرون قصة وتستمتعون لو دا تطلعون نقمكم باللي تقروه ؟

اتمنى يكون الجو اهدئ حتى القصة ميتعكر جوها .. وان شاءلله التقيكم بالليل بحلقة او بمصيبة اكبر من مصايب مينو😬

دمتم بخير أحبابي
والى اللقاء
احبكم

#زينب_ماجد