كاتم ضمير

الحلقة ٢٣

#كاتم_ضمير

((( بقلم زينب ماجد )))

الحلقة _ ٢٣

كل جروحنا
           وكل المعاناة
                    من ما وره الناس البيها نحلم
                             (ايهاب المالكي)

قفل الباب ..
باوعتله ، حجه : نامي بمكانج

- شلون انام غير شربت حباية ؟

- اي بس اتمددي

اتمددت ، حسيته متوتر ويلوب بمكانه : بيك شي ؟

- اني خايف أذيج

- ليش تأذيني

دار وجه وكام يمسح العرك من كصته بالرغم الجو بارد حيل وهو عركان .. بقيت متمددة ورجلية ع البطانية ، كام واجا يمي : هاي شبيك رابي

لزم ايدي حيل وتقرب يتنفس .. تضايقت منه
تحرك بسرعة جر البطانية وكال : تغطي زين باردة خاف تتمرضين .

جر البطانية حيل وغطا حتى راسي ووكف يم الشباك وفتحه : انت مخبل الجو ثلج وانت تفتح الشباك

- تغطي زين وما تبردين .

تغطيت حاولت انام بوجود رابي لإن نعسانة ..
بس اطرافي احسها بدت تخدر .. بس خدر بيه حرارة
مو اي حرارة نار هيج كأنما حرارة نعناع .. باطرافي

راسي بدا يدخن
كمت افرك بأيديا جوا البطانية واحك رجل برجل

فتحت البطانية راسي احسه اشتعل
كمت من مكاني ، حجه : شبيج

- راسي جاي يحترك .. اخ رأسي ، اخ يمه راسيييي
كمت الف بروحي احك رجل برجل وايد بأيد وراسي احكه بجتفي وافتر بالغرفة ..

كمت احس الغرفة توشوش ..
الرؤية عندي تخربطت .. كمت احس اكو دخان بالغرفة هواي كمت اصيح : شنو هذا الدخان ، راح احترك شنو هذا الدخااااان

- صوتج  مينا تعاي هنا

- رابي اديه دا تحترك ، فدوة سااااعدني

- هاي بعدج لإن اول مرة تاخذين الحباية

كمت اصرخ من اديه ..
اجا ابوي على صوتي يدك بالباب بس رابي ما يفتحله واني اصيح : اخ راسييي   مامااااااا ، رااااسي

فاضل : شبيج حبيبتي ، افتحي الباب

رابي كام يحط ايده على حلكها ويحاول يسكتها وهي مثل المحترك متعرف تفرك بديها براسها برجليها ..

فاضل سكران ويدك بالباب ومحد يفتحله
عافها تصرخ وانمطل ع القنفة ، وهي تفور من اثر الحبة التعاطتها .

فجأة صارت تحس احد يخنك بيها
ربطها رابي بأثنين اديه بس يحاول يهديها كامت تصرب بيه وتصيح : راح امووووت اااااااخ ، وخر عني راح اختنننننك

لنص ساعة وهذا حالها وهو يحاول يهدي بيها ..
كامت تصيح : هذا عكرب عكرب راح يكرصني ، راح يجييييني