كاتم ضمير

الحلقة ٣٢

#كاتم_ضمير

((( بقلم زينب ماجد )))

الحلقة_ ٣٢

انه مثل الخرز عندي الجروح انواع
كل واحد بحاله وميزة يحويهـــــا
تدري من الغصن كل الطيور اتطير
اذا بس مرة وحدة الجيله تخطيهــا
( للكبير أيهاب المالكي )

- افتح كاميرا

-تنهد وقفل التليفون بوجهي
تخبلت رسمي .. دزيتله رسالة ( تقفل بوجهي عابد ؟)
الرسالة صح واحد مصارت أثنين

دست اتصال فورا .. ماكو نت
رديت اتصلت يطلعلي ( أن الجهاز مغلق او خارج منطقة التغطية ) احس روحي احتركت شوي
اكتل نفسي .. احركها شسوي
كمت اشلع براسي من القهر
متحملت لبست وكلت الا اروح للمطعم الهو بيه واسويله عرس هناك اطلع كل حركة كلبي بيه .

الساعة وحدة ونص
طلعت من الغرفة شهكت امي
وين ولج .. ايناس

- عوفيني رحمة لربج لا تخليني اكتل روحي

- بس كليلي وين رايحة احاجيج

ركضت على عكازتها وكفتلها : شراااايدة مني

- ولج الساعة ٣ بالليل وين رايحة

- للمنصور

- شتصخمين

- عابد سهران بوحدة من الملاهي اذا ما رحت هسه اشهره واخزيه ما ارتاح

- تخبلتي امي اكعدي

- ما اكعد لو الدنيا تنكلب

- ولج ليش تعمين على روحج عمتج هنا ايناس .. اكعدي اصبري هسه .

- ماما عوفيني الله يخليج

- لا والله ما اخليج شنو مدا اشوفين الساعة بيش شو ماخذتها فالتو ما تحترمين احد

كمت اصرخ : عابد ديكتلني دينتقم مني بأسلوب بترد جاي اموت ماما دا امووووت

حضنتني وكمت ابجي
كمت اشهك بحضنها بضعف والشهكة تطلع من كل كلبي .. بجيت لحد ممليت وتعبت وغفيت بحضنها .. حطت مخدة تمددت هي وخلتني على أيدها مثل الطفل ..

احس بالليل اتذكر واحترك والوذ بأمي احضنها حيل واشم ريحتها واحاول اقوي نفسي ..
وهي تدعي على راسي طول الليل

للصبح  الساعة ب١٠ كعدت جسمي كأنما واكعة من سابع سما ، متسمم ويوجعني من كل مكان ..

فتحت التليفون
الشركة دازتلي ( الرقم الذي طلبه متاح حاليا) الساعة ب٥ الصبح .. وشايف رسالة الواتساب وما مجاوب .

حتى اطلع للمستشفى
سبحت وبدلت  .. بس جثة بدون روح
روحي طلعت البارحة واني ابجي .. ماتت بليلتها

طلعت من البيت
صفت سيارة عابد جان لابس البدلة العسكرية لونها خاكي .. نزل من السيارة وضياء موجود وكف كدامي : اصعدي دا نحجي أيناس .